يسألونك
11-05-2014 12:54 AM

• يسألونك عن اللحوم.. قل: تاني مش ح تضوقوها إلا من ضحية لضحية.
• يسألونك عن بيت الوزير الملياري قل: مش خلاس السمسار إستلم أتعابو؟ (يبقى الفيلم إنتهى).
• يسألونك عن إقرار الذمة.. قل: (هي وينا الذمة البيعملوا ليها إقرار)؟!
• يسألونك عن حظر النشر في جرائم وفضائح الفساد.. قل: (مال يكتلوها كيف يا غسان؟)
• يسألونك عن غسيل الأموال.. قل: نحنا قادرين نغسل هدومنا؟؟!!
• يسألونك عن المدينة الرياضية.. قل: (بالله ليه إنتو فاكرين؟)
• يسألونك عن الأحزاب.. قل: سوف يبلغ عددها المائة بعد قليل.
• يسألونك عن المؤتمر العام.. قل: لو أشتريتو بي قروشو مكنات غسيل كُلى مش كان أفيد؟!
• يسألونك عن الدولار.. قل: يرفعوهو وينزلوهو على كيفهم..
* يسألونك عن المرحلة الجامعية.. قل: إنها المرحلة التي تسبق العطالة!
* يسألونك عن الفلوس.. قل: الشعب مش محتاج ليها (مش عندو الماستر كارد والفيزا كارد؟) !
* يسألونك عن السجين.. قل: هو مجرم (بس ما لقى ليهو واسطة تخارجو)..
* يسألونك عن الشريعة.. قل: (هي وينا؟)
* يسألونك عن قنواتنا التلفزيونية.. قل: هي أداة من أدوات التعذيب!
* يسألونك عن تعدد الزيجات.. قل: هو عمل يقوم به (المؤمنين) الصالحين من أجل تقليص نسبة العنوسة زي ما بيقولوا.. (بس قاعدين يعزلوا البنات الصغار وسمحات)..
* يسألونك عن المؤامرة.. قل: إنها شماعة نعلق عليها فشلنا وأخطاءنا (هو الشغال بينا بالله منو؟)
* يسألونك عن الشفافية.. قل: هي لباس يظهر العورات.. (وطبعن إظهار العورة حرام يا جماعة).
* يسألونك عن البطالة.. قل: هي المشكلة التي تسبب للدول (البتحترم نفسها) هاجساً مرعباً
وعشان كده بتسعى لحلها والقضاء عليها).
* يسألونك عن الفساد.. قل: هو آفة تعاني منها معظم الدول، ما عدا السودان (عشان الوازع الديني وكده)..
* يسألونك عن الغلاء.. قل: هو أن يساوي مرتبك خمسة كيلو لحمة (وهي قيمة الحد الأدنى للأجور).
* يسألونك عن التسول.. قل: (كان توسل.. وهسه بقى قلع عديل).
* يسألونك عن الحزام الناسف.. قل: إنه ربما يكون اسما لأغنية جديدة بعد الأغنيات الحربية مثل (قنبلة) و(أضربني بي مسدسك وأملاني أنا رصاص)..
* يسألونك عن تذاكر دخول المستشفيات لزيارة المرضى.. قل: إنها لا تتفق بل تتعارض وتوجيه الرسول الكريم الذي يحضنا على زيارة المرضى (ونحنا دولة رسالية وعندنا مشروع حضاري وكده)..
* يسألونك عن تقرير المراجع العام.. قل: (يعني شنو ما قاعدين نقراهو كل عام).
* يسألونك عن الصرافات.. قل: (ياتا.. الفي البنوك واللا الفي البيوت؟).
* يسألونك عن الإغتراب.. قل: هو مشروع لتسمين الحكومة وإفقار المغترب.
* يسألونك عن الأعياد.. قل: أصبحت بعبعاً يهدد المواطنين.
* يسألونك عن حملة الدكتوراه في بلادنا.. قل: (إنهم أصبحوا أكثر من الباعة الجائلين على شارات المرور)..
* يسألونك عن هيئة الحج والعُمرة.. قل: (هي إستثمار في شعيرة دينية وده حراااام)..
* يسألونك عن الموت الأكلينيكي.. قل: (دي الحالة الأنحنا فيها دي) !!!
* يسألونك عن خط هيثرو *الخرطوم.. قل: (هههههه مش قالوا ح يرجعوهو أول وبعدين يشوفو الباعو منو؟)!
كسرة:
* يسألونك عن الحل.. قل: يحلنا الحلا بله.

كسرة ثابتة (قديمة):
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +(وووو)
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+(وووو).

التيار





تعليقات 15 | إهداء 0 | زيارات 5730

خدمات المحتوى


التعليقات
#1143581 [القطاني]
0.00/5 (0 صوت)

11-06-2014 12:41 PM
عمر قلت لي قران والله صدق القال عليك تور


#1143551 [عزالدين الشريف]
5.00/5 (1 صوت)

11-06-2014 12:13 PM
اعتقد انو العمود ده ناقص كتير، ورد في صحيفة حريات عدد امس نفس العمود بس بدون نقص ... اين ذهبت البقية؟ وصلت لبريد الراكوبة ناقصة ام هم الانقصوها؟ داخل السودان هنالك حظر وانقاص وزيادة وكل ما لا يليق ويتفق مع مهنة الكتابة وذلك مفهوم في اطار النظام الحالي، نطمع في رد من الراكوبة حول هذا الموضوع ...


#1143473 [الودعوا ارتحلوا]
0.00/5 (0 صوت)

11-06-2014 10:59 AM
ههههههههههه هو بلة اتحلا يعني ؟ والله ما كنت عارف يا جبرة . (عمومن)ربنا يحلنا نحن مثل ما حلا بلة من وسخ ودنس بني كوز لعنة الله تغشاهم اجمعين


#1142988 [Quickly]
0.00/5 (0 صوت)

11-05-2014 10:23 PM
يسألونك عن تعدد الزيجات.. قل: هو عمل يقوم به (المؤمنين) الصالحين من أجل تقليص نسبة العنوسة زي ما بيقولوا.. (بس قاعدين يعزلوا البنات الصغار وسمحات).
ههههههههههه قوووية


#1142901 [فتح الرحمن السر محمد]
5.00/5 (1 صوت)

11-05-2014 07:13 PM
* يسألونك عن الانتخابات قل هي للخج
* يسألونك عن الدستور قل نؤمن ببعض ونكفر ببعض
* يسألونك عن عن التعليم قل لمن استطاع اليه سبيلا
* يسألونك عن المؤتمر الوطني قل خلق ليحكم حتى اخر شبر واخر زول
* يسألونك عن الرئاسة قل قل لا لدنيا لا لكرسي قد عملنا
* يسألونك عن السودان قل منو العوض وليه العوض
* يسألونك عن الكيزان قل من اين اتى هولاء
* يسألونك عن الكيزان قل اولاد الهرمة ليكم يوم


#1142767 [عمر]
0.00/5 (0 صوت)

11-05-2014 03:29 PM
ياجبرة العب بعيد كلمة يسالونك واردة فس القران بلاش استهتار بكلام الله والتحريف لوعندك حاحة امشي قولها في وشهم ربنا يهدينا ويهدبك


ردود على عمر
Sudan [ابو السيد] 11-06-2014 07:38 AM
يا سي عمر لو عملنا بي كلامك دا مفروض نتكلم بلغة الإشارة ... يا أخي إنت تحسب أنك تحسن عملاً لكنك تكره عباد الله في دين الله الذي من المفروض يكون فيه كل حياتنا .

Sudan [Hisho] 11-05-2014 09:15 PM
يعنى الكلمة دى تعتبر كلمة قرانية ما عربية ولذا يجب ان لا تستعمل ؟؟؟ والله لكن فهم ممتاز وواعى .. لماذا لا تخلق منها فتوى وتسئل ليك واحد من ما تسمونهم علماء وخلى يقول ليك حكمها شنو ,, قال واردة فى القران قال ...

Saudi Arabia [جنقجوراي] 11-05-2014 07:16 PM
والله انت ياعمر كلمة تور شوية عليك،،، مخك سجم.


#1142604 [محمد فضل السيد]
5.00/5 (1 صوت)

11-05-2014 12:56 PM
وسألونك عن الفقر (قل كلنا في خضمه بل نحن أربابه) .
ويسألونك عن الفسق والدعارة (قل بقت تجارة زيها وزي بيع مصنوعات النجارة) .
يسألونك عن السودان (قل بلد سهتان ومهان في حكم الكيزان) .

والأسئلة لا تنقطع وكلها وجع في وجع ....


#1142546 [Hamid]
5.00/5 (1 صوت)

11-05-2014 11:56 AM
يسألونك عن صيانة الشوارع والطرق وافتتاح المباني بتاعة الخدمات........ قل هي دائما لمن تجي الانتخابات.


#1142327 [حامد عابدين]
5.00/5 (3 صوت)

11-05-2014 09:17 AM
ويسألونك عن عضو هيئة علماء المسلمين صاحب الصورة الفاحشة : قل هو مجاهد في سبيل عضوه
ويسألونك هل له علاقة بالاسكايب : قل بل له علاقة بالسكس ايب


#1142283 [شفق الغيب]
5.00/5 (2 صوت)

11-05-2014 08:40 AM
يسألونك عن الكذب ماهو رئيسنا قال مابنتخب


#1142192 [برعي]
5.00/5 (8 صوت)

11-05-2014 07:43 AM
ويسالونك عن السودان : قل دولة كانت جنوب مصر ، تنبا لها الانجليز عند تاسيسها بالازدهار والنمو ، واتي ابناؤها البرره فجعلوها اثرا بعد عين، في غمضة عين بعدوك يا حنين، وخلونا نحن نهضرب .


#1142110 [osama dai elnaiem]
5.00/5 (7 صوت)

11-05-2014 06:09 AM
يسألونك عن اسرائيل : قل هي حاضرة لنداري بها اخفاقاتنا ونذكرها عند كل منعطف .
يسألونك عن البشير : قل هو أذي فاجتنبوه.
يسألونك عن الترابي : قل هو لاعب ملوص الذي فقد سحره
يسألونك عن السودان : قل هو مريض الان بمرض الاخوانجية وسيتعافي باذن الله قريبا والله هو الشافي وليخسأ بلة الغائب.


#1142090 [الحلومر]
0.00/5 (0 صوت)

11-05-2014 05:26 AM
نريد ان نعرف ما هي قصد بله؟؟(وهل بله الغائب له علاقة وصلة بالقصةوبله دا اناني لدرجة ينحله براه وينجو بنفسه ويترك باقي شعب الصسودان في ورطة افتونا بالله ؟؟!!


ردود على الحلومر
[معمر حسن محمد نور] 11-06-2014 06:03 AM
الحلو مر تحياتي..تقول القصة أن بلة كان مسجون مؤبد..وزهج من السجن ودعا ربه يارب تحلني كان موت كان حياة..فانهار عليه السجن ومات..يعني أسوأ الخيارات


#1142073 [عمار]
5.00/5 (2 صوت)

11-05-2014 04:05 AM
ويسألونك عن ابوركبة..... قال بصراحة هو قاعد في الكرسي لغايت ما يمووووت
ويسألونك عن السودان ...... السودان ضاااااع والقيامة قامت والفيلم انتهي


#1142048 [الأصم]
5.00/5 (7 صوت)

11-05-2014 01:51 AM
يسألونك عن الوثبة .. قل هي قفزة لميس الانتخابات .


ردود على الأصم
Saudi Arabia [بلة الحــاضر] 11-05-2014 12:11 PM
يسالونك عن بلة الغايب: قل هو الحاكم الفعلي للسودان


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة