الرسول ,, فوقها
02-21-2011 11:12 AM

بسم الله الرحمن الرحيم

حاطب ليل

الرسول ,, فوقها

عبد اللطيف البوني
[email protected]

قبل عدة سنوات لاحظ احد موظفي المحليات في الخرطوم ان العربات التي تاتي محملة بالقصب (لاولاد الزمن دا , القصب هو سيقان الذرة ) الي العاصمة توسخها ب(الوراتاب ) المتطاير من القصب (على الطلاق ما اشرحها) فصدر امر محلي يامر كل صاحب عربة تحمل قصبا بتغطيته بمشمع الا سوف تتعرض العربة الي غرامة مالية . اها عينك ما تشوف الا النور الجماعة ماصدقوا انه قد انفتح لهم باب غرامات جديد فاصبحوا يقوفون العربات و(ضنب القصبة مارق برة) و(المشمع ما اصلي) لابل حتى داخل الجزيرة منبت القصب اذا لم تستعمل المشمع (الله قال بي قولك) واذكر ذات يوم كنت اركب مع والدي تغشاه رحمة الله فاوقفته الشرطة عند الجديد الثورة وقيل له ياحاج المشمع دا ما مربوط كويس فتصديت لهم وقلت لهم نحن الان في الجزيرة ولم ندخل العاصمة حتى نوسخها فطلب الشرطي من الوالد ان (يسكت الزول المتفلسف دا) وقد فعل . اخشى ما اخشاه ان يكون قد حدث يومها ان احدهم استورد مشمعات وبارت عليه ودفع ثمنها قصب وعربات الجزيرة .
في احدى اجتماعات مجلس الوزراء واثناء مناقشة موضوع يخص المرور قال احد الوزراء وربما على طريقة انا اتكلم اذن انا موجود انه لاحظ ان الناس يركبون العربات الكاشفة والبكاسي بصورة قد تعرض سلامتهم للخطر وورد هذا في وقائع الاجتماع . اها عينك ماتشوف الا النور قام الجماعة بصياغة قانون يمنع الركوب في احواض البكاسي او الدفارات ان شاء الله راكب واحد فاصبح الجماعة يغرمون الذين يركبون البكاسي حتى بين القرى وكادوا ان يرجعونا الي عهد الحمير الكوار ومازال هذا المسلسل هذا مستمرا وحكي لي احدهم انه قبل ايام جاء المخاض لاحدى نسائهم وتقرر اسعافها لاقرب مستشفى ولم يكن في القرية غير عربة بوكسي وهنا لابد من وضع المراة على سرير في حوض البوكسي ومعها الداية والمرافقات لانه قد ياتيها الطلق في الطريق وقبل ان يتحركوا نبههم احدهم باخذ غرامة المرور معهم !!!
اما بطاقة الفحص الشهري فحدث ولاحرج اذ ان قانون المرور يفرض على اي مركبة عامة ان تعرض نفسها للفحص الشهري للتاكد من سلامتها هذا بعد دفع عشرين جنيها فاصبحت العشرين غاية مع (زيادة شوية) في حالة عدم حضور العربة وهذا هو الغالب ومن ناحية عملية لو عرضت كل المركبات العامة في السودان لهذا الفحص لما مكنها الشهر كله من ذلك ثم ثانيا ماهي الاليات التي تحفص شهريا في السودان ام انه حب الغرامات هو سبب (الاستخلال) والاستغلال؟
مناسبة هذة الحكاوي هي انه جاء في اخبار الاسبوع المنصرم ان السادة في شرطة المرور اطلقوا حملة مفادها ان الاطارات سبب رئيسي في وقوع الحوادث المرورية ووفق الاحصاءات التي قامت بها ادارة المرور وانه لابد من التصدي لهذة الظاهرة وبجدية وعن عيوب هذة (اللساتك) جاء ان هناك عيوبا في التصنيع وان هناك اطارات متاكلة اي قديمة وهناك خلط انواع غير متجانسة فالخوف كل الخوف ان لايكتفي السادة في المرور بعملية التوعية المرورية فيقومون بصياغة قانون يجعل الامر مخالفة مرورية اي يعطي شرطة المرور حق فرض غرامات (معليش نقول تسويات) على اي صاحب مركبة بها لستك قديم او غير جيد الصناعة او لساتكه غير متجانسة فحتما لو حدث هذا فان طاقة جهنمية سوف تنفتح على سائقي العربات خاصة الشاحنات ذات اللساتك التي تصل 32 لستك وبالمقابل سوف تزداد ايرادات الغرامات بصورة مذهلة سيكون هذا بئير بترول جديدة للجماعة اصحاب الصفافير ولتجار اللساتك وصناعي (تموت تخلي)
كما يقول عادل امام نحن لانعرف اسمنا اكتر من الحكومة لابل نحن ندرك ان الاطارات تتسبب احيانا في الحوادث المرورية فكم من عربة انقلبت نتيجة (طرشقة) اطار وقد يكون الاطار (جديد كرت) ومع ذلك نناشد السادة في المرور ان لا يجعلوا من حكاية الاطارات هذة مخالفة مرورية انما يكافحون الامر بالتوعية فبنود الغرامات المرورية ليس فيها زيادة لمستزيد فشرطي المرور عندما يوقف المركبة العامة لن يعدم ما يمكنه من اخذ الغرامة ولو بعد مجهود ولكن اذا دخلت اللساتك الشغلانة فلن تسلم منها مركبة عامة فارتفاع اسعار اللساتك مع تناقص العائد من المركبات جعلت اصحاب المركبا ت يلجاون (للمليص) و( الكركاسات) فالناس شغالة بالمباصرة وكفاية غرامات لانها ذبحت الحركة الاقتصادية من الوريد الي الوريد.

تعليقات 14 | إهداء 0 | زيارات 3009

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#100004 [اللعوته]
0.00/5 (0 صوت)

02-22-2011 01:49 PM
الورتاب علي وزن متلاب يا دكتور البوني بتعوف المتاليب مش كان ود جزيرة بتحدي دي ما بتتعرف لكل الناس وفي حلتكم متاليب كتيرة


#99592 [gasim ali]
0.00/5 (0 صوت)

02-22-2011 01:02 AM
الموضوع ببساطه....حكومتنا ما عندها اي احترام لينا...ومافي طريقه غير الهجمات المرتده


#99496 [Aman]
0.00/5 (0 صوت)

02-21-2011 07:44 PM
رائع والله انت يا استاز البوني ناس المحلية (جبل اولياء) اخر مرة هم قامو بالكشة طبعا مع النظام الخام اقصد العام، من اجل ابادة الخمور البلادية (عركي البلح) و بالفعل نجحت الحملة لاسباب (لوجستية) و مصادرة ( الكوجرونات) طبعا الكوجرون هو اناء يتم فيه اعداد الخمر تصدق او الا تصدق انه يتم اعادة بيع هزه ( الكوجرونات) لاصحابها ثانيا ، طبعا تطبق ( الشريعة الاسلامية) كالحكم حسب ( التمرجية) و عملية البيع يتم بعد تشكيل (لجان) عشان زيادة ( الربط السنوي) للمحلية .


#99448 [الاغبش ]
0.00/5 (0 صوت)

02-21-2011 05:56 PM
مجرد سؤال
لماذا تركت موضوع كيان الوسط؟؟؟؟


#99364 [زوول]
0.00/5 (0 صوت)

02-21-2011 03:38 PM
يادكتور المابعرف الورتاب الاخم واصر ومافى داعى تحلف بالطلاق على ام الاولاد بعدين يادكتور الحكومة دى حاتفرض بعد شويه رسوم استنشاق الهواء شهريا ما اصلوا الهواء ذى الموية العندها فاتورة ومافيش حد احسن من حد


#99332 [مطيرق الحن]
0.00/5 (0 صوت)

02-21-2011 02:43 PM
المصيبه مقالك ده يقراهو واحد من ابان كروش المستثمرين اصحاب الحظوه ويدخل ليهو شحنة لساتك ويصدرو قانون بالكلام دهاصلهم واقفين علي الهبشه الجماعه ديل


#99322 [Mohamed]
0.00/5 (0 صوت)

02-21-2011 02:18 PM
اصحاب الصفافير ها ها ها ها


#99314 [يعقوب]
0.00/5 (0 صوت)

02-21-2011 02:04 PM
شرطة المرور سبب الثورة القادمة


#99311 [moha]
0.00/5 (0 صوت)

02-21-2011 02:01 PM
انت عارف يا استاذ بعد شوية حيقولو ليك لون العربات لازم يكون اخضر عشان يتماشي مع النفرة الخضراء والشدرة اقصد الشجرة. يا استاذ ديل دايرين يفرضو رسوم علي الكمسنجي وبتاع تحويل الرصيد اتخيل . والله دي دولة ولة اقطاعية انا ما عارف .بعد شوية حيقررو انو اي زول حيدفع جزية عن يد وهو صاغر . منعول ابوكي بلد .


#99300 [ابو مريم]
0.00/5 (0 صوت)

02-21-2011 01:41 PM
كويس انو المقال بتعلق بموضوع ساخر ويتعلق بالعربات واهل العربات.... والا لكان دخلتنا في مصطلحات المسكاب والعروش والباجور والدرت ومالا يفهم عقباه


#99283 [ابوبكر]
0.00/5 (0 صوت)

02-21-2011 01:19 PM
انت مالك بتفتح عويناتهم للحاجات دي ... ما تخلي اللساتك في حالها .


#99233 [محمد بابكر - ]
0.00/5 (0 صوت)

02-21-2011 12:26 PM
سامحناك في الورتاب و الكركاسة.... و تسلم المرة (أ/ العيال)

بسحقو تشرح ( المليص)


#99215 [اههععع]
0.00/5 (0 صوت)

02-21-2011 11:57 AM
امال يعوضو البترول القلعو منهم باقان امون ده كيف ....كل شى ولا يقيف بنا فلل كافورى


#99205 [مونتي]
0.00/5 (0 صوت)

02-21-2011 11:47 AM
دوماً رائع يأستاذنا


عبد اللطيف البوني
عبد اللطيف البوني

مساحة اعلانية
تقييم
3.66/10 (24 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة