في



امبده .... امبده ليه ؟؟؟
12-01-2014 02:07 AM

امبده .... امبده ليه ؟؟
من حكماء امدرمان ود ارصد . وكان سائق تاكسي . وكان فردة البطل اللواء عوض عبد الرحمن صغير .وهو من رفض قتل المواطنين في اكتوبر . وضغط مع آخرين علي عبود للتنازل. وقديما كانت المهنة او التعليم لا تفرق بين الناس . تجد المنجد صديقا للقاضي مثل يوسف ومولانا عبد الحليم الطاهر متعه الله بالصحة . او العربجي عثمان طه ورئيس الجيش السوداني حمد النيل ضيف الله . ولحمد النيل ابن اسمه عثمان طه ولعثمان طه ابن اسمه حمد النيل .
بينما ود ارصد مستلقيا في السيارة في ليل شتاء بارد ، تقدم منه ثلاثة من ضخام الاجسام ونقروا علي الزجاج , وبعد ان فتح الزجاج قليلا قالوا له .... قوم ودينا امبده . فغسلهم بنظرة طويله وقال لهم قبل ان يقفل الزجاج ...... امبده... ليه ما تدقوني هني وتشيلوا القريشات . ووقتها لم تكن الكهرباء والماء قد وصلت الي امبده وكان الفراغ بين الاحفاد وامبدة يغص بالرباطين .
دلوكت الانقاذ قايمة وقاعدة ومؤجرة بيوت ومكاتب وعربات وهيلة وهيلمانة . امبده ليه ؟ مايدقوا الشعب ده في محله ويركيبوا البشير رئيس . ونرتاح من السفر والتكسر والسرادق والحفلات والترليونات الحتتصرف في حاجة نتيجتها معروفة كان بي خج كان بي قلع .
المحنة السودانية ان الانقاذ بتصدق كذبها قبل الآخرين . انهم يبحثون عن الشرعية عن طريق الانتخابات . والشرعية قد اتحرجمت لانها ذبحت بي قزازة . الدستور السمكرته الانقاذ قاموا عليه معطوه وظعطوه . تقول لي امبده .
غندور ده غبي ام متغابي هل يؤمن بانه بيفاوض . نافع قبل كده مش عرض وبشر وقال لقد اتيت لكم بالسلام ونحنا ونحنا الشرف الباذخ .. ورجع البشير هجروه وطلعوه خارج عن الملة . وعلي عثمان الطرطش غازي وركب في سرج نيفاشا وعمل فيها لقمان الحكيم . وكان يتوقع ان يفوز بجائزة نوبيل للسلام وبدأ في تحضير العبايه وسمعنا قالوا بيتدرب قدام المراية علي الخطبة الحيلقيها في النرويج . بعد ما طار البترول قبلوا عليه وخلوا ريحتو جاز جاز . وبمناسبة الجاز . الجماعة مش حسدوه وبدأ الكلام عن سكنه في جزيرة النخلة في دبي . وخلوه دلوكت يتضاير .
يتكلمون عن القوي الامين . وانهم سيحاربون الفساد وسيضعون الرجل المانسب في المكان المناسب . وحيجيبوا ناس مابتعرف تاكل . ما عارف كوز ما بياكل ده بيجيبوه من وين . لقد كتبنا وقلنا ان الانقاذ تحمل بذور الفناء داخلها . لان من سرق يريد ان يسرق زيادة . ومن لم يسرق ينتظر دوره . ومن لم يجد فرصة سينقلب او سيعارض وينقسم . وده الحاصل دلوت .
الكيزان ديل لو شافوا اي انسان بيعمل حاجة لوجه الله بيفتفتوا من الزعل . قبل كدة الاحفاد عندها مركز لرعاية الامومة والاطفال . ومجاني وده البجنن بوبي . قاموا قفلوه وشمعوه بالشمع الاحمر . قاسم بدري لافي شهرين ما لاقي السلطة الشمعت المركز . في النهاية كسر الشمع وفتح المركز . وقال عاوز اي زول يجي يسأل علشان يعرف من هو من شمع المركز . ولم يظهر احد . وغبينة مامون حميدة مع مستشفي جعفر ابنعوف ومستشفي الخرطوم هي نتاج لهذا الحقد علي العمل الصالح . ناس تقفل المستشفيات وتفتح وتوسع السجون . امبدة ليه ؟؟
احد الظباط نزل المعاش وكان عنده عربية . فكر ينزلها تاكسي . وزمان التكس بيدخل ذي مرتب رئيس الوزراء او اكتر حوالي 150 جنيه في الشهر . فاتصل الظابط المعاشي بصديقه اللواء عوض عبد الرحمن صغير وصديقه ود ارصد . وطلب الظابط ان يأتي له ود ارصد بسواق امين ما ياكلو . فقال له في هذه الحالة في حلين ,,,, يا تسوق العربية دي انت او تسوقها امك . لانه لو ابوك ساقها حياكلك ,, الانقاذ دي الا تجيب امها علشان تمسك الوزارات والمنظمات لان ابوها معرف حرامي ومجرم وقاتل وكذاب . لكن الانقاذ دي طفل انابيب . ام ماعندها ام .
انتو عرمان القادة تفاوض فيه الحكومة وغندور يحضن فيه ذي تقول نسيبه . مش الحكومة دي حاكمة عليه بالاعدام مع عقار والحلو ؟ والله لو لقيت لي زول يقدر يحل لي المعادلة دي ، انا حاكون شاكر وممتن ليه بقية حياتي . ناس غندور ديل عارفين انه طلبات الجبهة الثورية عادلة وصحيحة . وانهم ما حيقدروا ينفذوها . ولسة يدلكوا في درب اديس اببا وده بقي اكبر ديداب في الدنيا بعد ده الا يرصفوه . كلموا غندور . ديداب دي ما نبذ معناها سكة البهايم والناس في الخلاء . يقوم يزعل ويتهيخ ويطق . وهو عنده القابلية للطق . لمن هاجموه في حزب الامة اتنفخ زياده .خفت علي نضافة قبه المجلس البلدي في امدرمان . قال امبدة قال . امبد ... لييييييه ؟

شوقي بدري
[email protected]





تعليقات 8 | إهداء 0 | زيارات 3867

خدمات المحتوى


التعليقات
#1161396 [ود العباسية وحي العرب]
0.00/5 (0 صوت)

12-02-2014 05:27 PM
تعليق على شوقي بدري

لك التحية استاذ شوقي . شكرا لك لوفائك لصديقك الأخ الوجيه/ صديق حدوب ، قريبي وصديقي أيضا . لكن مالك يا خي كتلت العم العزيز الحاج محمد حدوب ، رجل البر والاحسان ،أطال الله عمره.الأعمار بيد الله وحاج محمد لا يزال حي يرزق ، ولكنني سوف أفتنك مع الأخ / صديق .

أخوك / ود العباسية وحي العرب ( ايه رأيك في ال combination دا - حوش جد في العباسية وحوش جدنا التاني في حي العرب ) . بالمناسبة ، صحي بنات العباسية كانوا بقدموا أولاد بيت المال وأب روف بعد نهاية الحفلات ؟؟


ردود على ود العباسية وحي العرب
Sweden [shawgi badri] 12-02-2014 09:05 PM
العزيز ود العباسية وحي العرب . التحية للعم محمد حيدوب . الرحمة تجور للحي كذالك . معنا هنا الاخ صلاح عبد الجليل . كان بيدرس في مدرسة التقدم . والمدرسة مختلطة اولاد وبنات . عزموهم حفلة في حي الصقور او ابكدوك . بعد الحفلة عاوزين يمشوا البنات قالوا ليهم انتظروا نوصلكم الظلط . واصر البنات علي التوصيل . بعد كم يوم صلاح قابل واحد من اولاد الصقور وقال ليه انحنا ماجينا بارتي في حلتكم . قال ليه الاولاد الكانوا قدام الدكان ديل ماكانوا منتظرنكم وفي تانين ما ظاهرين . لكن وصلوكم ناس كابتن اجلال . وكابتن اجلال كانت كابتن فريق كرة السلة , الكلام ده في نهاية السبعينات او بداية التمانينات .


#1161134 [عادل الامين]
1.00/5 (1 صوت)

12-02-2014 10:35 AM
نعم ياعمنا شوقي البلد وصلت مرحلة "عميانة قايداها مجنونة" ونخشي ان تسقط في فراغ دستوري..الشعب اختزل في حزب المؤتمر الوطني وحزب المؤتمر الوطني اختزل في الرئيس البشير..ولا احد يعمل بمرجعية الدستور او اتفاقيةنيفاشا من 2005 والى 2014..الناس يمشوا ام بدة ليه.. لا يلتزم الاخوان المسلمين بكل ما يوقعو عليه ونكث العهد من صفات المنافق وهم يظنون انهم عباقرة..البمنع شنو برضه ما يوافقو على مقررات الحوار والمؤتمر الدستوري المزعوم وبيقى لامر "البكا والزغاريد والجنازة كلب"..؟ اذا كان البشير نفسه يجهض حتى انجازات افراد حزبه مبادرةنافع /عقار ووثيقة الاصلاحالاخيرة..
وتشرزم المعارضة واصرار الامام على سياسة"حقي سميح وحق الناس ليه شتيح المدور بيها بالسودان من 1964 وخرب بيها-مقررات المائدة المستديرة1965و اتفاقية اديس ابابا 1977ومبادرة الميرغني /1988قرنق واتفاقية نيفاشا الاصل 2005 ومستمر في هذه السياسة حتى الان بمبادراته الكثيرةالتي دخلت موسوعة جينتس حتى لان وتضيع في الزمن لحدي ما نصل ابريل 2015 ويصنع الكيزان دستور دولة الخليفة الراعي والرعية والريع والرعاع ويضيع دستور المؤسسات الذى جاء به الراحل جون قرنق -دستور 2005 الذى يحتوي على وثيقة حقوق الانسان والمحكمة الدستورية العليا...اساس السودان الجديد والدولة الوطنية الحقيقية اتي خرجت من 1 يناير 1956ولم تعد حتى الان..
****
1-كل المطلوب ان تقف كل المعارضات المتشرزمة خلف الحركةالشعبية وقفة رجل واحد ومرجعيةنيفاشا ودستور 2005...ومواجهة الوساطة الافريقية بها عبر دفع مبادرة نافع/ عقار 2011 الملزمة للمؤتمر الوطني بالالتزام بها لوضع مصداقيتهم المضروبة في مواجهةالمجتمع الدولي..حتى تنتهي معاناة الشعب السوداني دون سقوط الدولةالسودانية نفسها
2- ان يعمل القضاةالدستوريين في المعارضات السودانية كلها على تنقيح دستور 2005 بانفسهم وجعله دستور لدولة مدنية فدرالية ديموقراطية مكونة من خمس اقاليم القديمة+ام بدة"الخرطوم..واسقاط ابشع مستوى حكم مر على السودان -الولايات..وبث مواد الدستور في راديو دبنقا..مادة..مادة...


ردود على عادل الامين
Sweden [shawgi badri] 12-03-2014 12:50 AM
والله يا عادل ده اجمل واصدق تعبير عن حالة البلد . عمياتة وساقاها مجنونة . انا اكتر حاجا مخوفاني هو الصادق. قالوا لمرض بيتاور . الصادق كوز . والكيزان ماسكين عليه الكتير خاصة الترابي . الصادق حيبيع في اول لفة وحتشوف وحتكون انت الشاهد ؟


#1160664 [اريج الوطن]
1.00/5 (1 صوت)

12-01-2014 05:33 PM
أنا من سكان امبدة القديمين تقريبا منذ أوائل الستينات ، ونحن الآن اتحاد ابناء امبدة القدامي سنرفع دعوى تعويضية ضد الكاتب شوقي بدري لأنه شوه سمعة أمبدة وكررها كثيرا وربطها بالكلام عن الحكومة وكنكشتها في الحكم وممكن كان أي مثل آخر يحل الموضوع ويقرب المعني وأمبدة ذنبها شنو ماهي مثلها مثل أي بقعة في السودان تضررت كثيرا من هذا الحكم الجائر وكما عينو ليها معتمد شافع قبل الغربة كان لسع جديد واصل من بلدو ما بعرف بئر العمدة من حي القلعة ولا بعرف محطة الصياغ أو محطة عبدالنبي فيا أستاذ شوقي مواجعنا كثيرة أرجو أن لا تضيف إليها مواجع أخرى فتربط بين أمبدة والإنقاذ ولو على سبيل المثال . المهم نحن زعلانين .


ردود على اريج الوطن
Sweden [shawgi badri] 12-02-2014 06:25 AM
كتبت لك ردا ولكن نشر المقال مرة اخري بدلا عن الرد . ارجو ان نبتعد عن التشدد . ترديدي لكلمة امبد ناتج عن حبي لامدرمان وام بده . وكنا نردد هذه المقولة كثيرا بيننا . والدي من الملاك في امبدة منذ الاربعينات . ولقد ارتحل كثير من جيراننا في العباسية الي امبده منهم الاستاذ شرحبيل احمد والموسيقار حسن السروجي . زميلي في نادي المريخ الرياضي الكامل والظابط حسن عماس انتقل من العرضة الي امبده في بداية الردمية .
عندما اراد اشقائي البيع في بداية التسعينات لم اعارضهم وانا بعيد ولكن طلبت منهم ان لا يبيعوا بدون استشارة اخيهم وصديقهم الوجيه صديق حدوب .لان الانسان في السودان لم يكن يبيع داره بدون مشاورة جيرانه . وصديق زميل طغولتهم ودراستهم . صديق ووالدة عليه الرحمة شبدا جامع امبده الذي في الواجهة .
وعم صديق هو الوالد صديق البلولة فارس امبده وحي العرب . وكنت ازوره في منزله شمال نقطة البوليس . وكنت اقضي معه الامسيات والساعات الطوال واتعلم منه تاريخ امدرمان القديمة . ابنه الاكبر الريح او الطاهر كان صديقي اللصيق لعشرات السنين . وآخر ابنائه عمار الصغير الذي كان في العاشرة من عمره . امبدة تعني لي الكثير ولا يمكن ان اسئ اليها .
احد الاخوة هنا عندما عرف انني عبسنجي او من العباسية، قال انه كانو مدعوين الي حفل في العباسية فاخذوا بعض اولاد الديم في الخرطوم للاستقواء بهم . ولكنهم جلسوا مستكينين . فقال لهم ما عاملين لينا ديامة . فقال احدهم ديامه عليكم انتو لكن دي العباسية . عندما بعرف الناس اننا من العباسية يقولون انتو بتدقوا المسامير في راس الناس . فلقد وجد شابا ميتا ومسمار مغروز في راسه في الجمسينات .
عندما قسمت بانت احجم الناس من البناء لانها كانت نائية في البداية مثل امبدة قديما . وكان الرباطون يجوبون خور ابو عنجو الي الستينات . وقال النتاس ما بيسكن هناك الا راجل . وبعد ان بني عدلان بيه منزله قالوا الرجال بانت . ومن هنا اتي الاسم

Sweden [shawgi badri] 12-01-2014 08:51 PM
امبده .... امبده ليه ؟؟
من حكماء امدرمان ود ارصد . وكان سائق تاكسي . وكان فردة البطل اللواء عوض عبد الرحمن صغير .وهو من رفض قتل المواطنين في اكتوبر . وضغط مع آخرين علي عبود للتنازل. وقديما كانت المهنة او التعليم لا تفرق بين الناس . تجد المنجد صديقا للقاضي مثل يوسف ومولانا عبد الحليم الطاهر متعه الله بالصحة . او العربجي عثمان طه ورئيس الجيش السوداني حمد النيل ضيف الله . ولحمد النيل ابن اسمه عثمان طه ولعثمان طه ابن اسمه حمد النيل .
بينما ود ارصد مستلقيا في السيارة في ليل شتاء بارد ، تقدم منه ثلاثة من ضخام الاجسام ونقروا علي الزجاج , وبعد ان فتح الزجاج قليلا قالوا له .... قوم ودينا امبده . فغسلهم بنظرة طويله وقال لهم قبل ان يقفل الزجاج ...... امبده... ليه ما تدقوني هني وتشيلوا القريشات . ووقتها لم تكن الكهرباء والماء قد وصلت الي امبده وكان الفراغ بين الاحفاد وامبدة يغص بالرباطين .
دلوكت الانقاذ قايمة وقاعدة ومؤجرة بيوت ومكاتب وعربات وهيلة وهيلمانة . امبده ليه ؟ مايدقوا الشعب ده في محله ويركيبوا البشير رئيس . ونرتاح من السفر والتكسر والسرادق والحفلات والترليونات الحتتصرف في حاجة نتيجتها معروفة كان بي خج كان بي قلع .
المحنة السودانية ان الانقاذ بتصدق كذبها قبل الآخرين . انهم يبحثون عن الشرعية عن طريق الانتخابات . والشرعية قد اتحرجمت لانها ذبحت بي قزازة . الدستور السمكرته الانقاذ قاموا عليه معطوه وظعطوه . تقول لي امبده .
غندور ده غبي ام متغابي هل يؤمن بانه بيفاوض . نافع قبل كده مش عرض وبشر وقال لقد اتيت لكم بالسلام ونحنا ونحنا الشرف الباذخ .. ورجع البشير هجروه وطلعوه خارج عن الملة . وعلي عثمان الطرطش غازي وركب في سرج نيفاشا وعمل فيها لقمان الحكيم . وكان يتوقع ان يفوز بجائزة نوبيل للسلام وبدأ في تحضير العبايه وسمعنا قالوا بيتدرب قدام المراية علي الخطبة الحيلقيها في النرويج . بعد ما طار البترول قبلوا عليه وخلوا ريحتو جاز جاز . وبمناسبة الجاز . الجماعة مش حسدوه وبدأ الكلام عن سكنه في جزيرة النخلة في دبي . وخلوه دلوكت يتضاير .
يتكلمون عن القوي الامين . وانهم سيحاربون الفساد وسيضعون الرجل المانسب في المكان المناسب . وحيجيبوا ناس مابتعرف تاكل . ما عارف كوز ما بياكل ده بيجيبوه من وين . لقد كتبنا وقلنا ان الانقاذ تحمل بذور الفناء داخلها . لان من سرق يريد ان يسرق زيادة . ومن لم يسرق ينتظر دوره . ومن لم يجد فرصة سينقلب او سيعارض وينقسم . وده الحاصل دلوت .
الكيزان ديل لو شافوا اي انسان بيعمل حاجة لوجه الله بيفتفتوا من الزعل . قبل كدة الاحفاد عندها مركز لرعاية الامومة والاطفال . ومجاني وده البجنن بوبي . قاموا قفلوه وشمعوه بالشمع الاحمر . قاسم بدري لافي شهرين ما لاقي السلطة الشمعت المركز . في النهاية كسر الشمع وفتح المركز . وقال عاوز اي زول يجي يسأل علشان يعرف من هو من شمع المركز . ولم يظهر احد . وغبينة مامون حميدة مع مستشفي جعفر ابنعوف ومستشفي الخرطوم هي نتاج لهذا الحقد علي العمل الصالح . ناس تقفل المستشفيات وتفتح وتوسع السجون . امبدة ليه ؟؟
احد الظباط نزل المعاش وكان عنده عربية . فكر ينزلها تاكسي . وزمان التكس بيدخل ذي مرتب رئيس الوزراء او اكتر حوالي 150 جنيه في الشهر . فاتصل الظابط المعاشي بصديقه اللواء عوض عبد الرحمن صغير وصديقه ود ارصد . وطلب الظابط ان يأتي له ود ارصد بسواق امين ما ياكلو . فقال له في هذه الحالة في حلين ,,,, يا تسوق العربية دي انت او تسوقها امك . لانه لو ابوك ساقها حياكلك ,, الانقاذ دي الا تجيب امها علشان تمسك الوزارات والمنظمات لان ابوها معرف حرامي ومجرم وقاتل وكذاب . لكن الانقاذ دي طفل انابيب . ام ماعندها ام .
انتو عرمان القادة تفاوض فيه الحكومة وغندور يحضن فيه ذي تقول نسيبه . مش الحكومة دي حاكمة عليه بالاعدام مع عقار والحلو ؟ والله لو لقيت لي زول يقدر يحل لي المعادلة دي ، انا حاكون شاكر وممتن ليه بقية حياتي . ناس غندور ديل عارفين انه طلبات الجبهة الثورية عادلة وصحيحة . وانهم ما حيقدروا ينفذوها . ولسة يدلكوا في درب اديس اببا وده بقي اكبر ديداب في الدنيا بعد ده الا يرصفوه . كلموا غندور . ديداب دي ما نبذ معناها سكة البهايم والناس في الخلاء . يقوم يزعل ويتهيخ ويطق . وهو عنده القابلية للطق . لمن هاجموه في حزب الامة اتنفخ زياده .خفت علي نضافة قبه المجلس البلدي في امدرمان . قال امبدة قال . امبد ... لييييييه ؟


#1160638 [الجفل الكلاب]
3.00/5 (2 صوت)

12-01-2014 05:07 PM
شكرا يا استاذ. دائما نتابع كتاباتك لانها مفيده ومعتقه برائحة السودان القديم(عندما كان سودان)


#1160630 [اريج الوطن]
1.00/5 (1 صوت)

12-01-2014 04:52 PM
نا من سكان امبدة القديمين تقريبا منذ أوائل الستينات ، ونحن الآن اتحاد ابناء امبدة القدامي سنرفع دعوى تعويضية ضد الكاتب شوقي بدري لأنه شوه سمعة أمبدة وكررها كثيرا وربطها بالكلام عن الحكومة كنكشتها في الحكم وممكن كان أي مثل آخر يحل الموضوع ويقرب المعني وأمبدة ذنبها شنو ماهي مثلها مثل أي بقعة في السودان تضررت كثيرا من هذا الحكم الجائر وكما عينو ليها معتمد شافع قبل الغربة كان لسع جديد واصل من بلدو ما بنعرف بئر العمدة من حي القلعة ولا بنعرف محطة الصياغ أو محطة عبدالنبي فيا أستاذ شوقي مواجعنا كثيرة أرجو أن لا تضيف إليها مواجع أخرى فتربط بين أمبدة والإنقاذ ولو على سبيل المثال . المهم نحن زعلانين .


#1160488 [حامد عوض]
3.00/5 (2 صوت)

12-01-2014 02:45 PM
الليله قعدت وفرشت ليهم في الواطه .. يديك ألف عافية


#1160462 [nafissa]
1.50/5 (2 صوت)

12-01-2014 02:11 PM
سلام الأخ الكريم شوقي ، بمناسبة أن غالبيةالسودانيين قديماً كانوا يتعاملون باانسانية وأريحية لا يعترفون بالطبقية في علاقاتهم الاجتماعية ، ذكرت مرة لأحدى الأخوات من سوريا أن رئيس الوزراء يسكن في حلتنا لم تصدق ذلك وقالت لي انحنا الفراش في مكتب الرئيس ما يسكن حدانا. أرجو متابعة مقالاتك حتى يعلم الجيل الحالي تاريخنا الذي شوه بما يرونه اليوم ويتعايشون معه.


ردود على nafissa
Sweden [shawgi badri] 12-01-2014 09:48 PM
العزيبزة نفيسة لك التحية . الصحفي اللبناني حايل كتب انه كان في دكان حلاق في الخرطزم ودخل الوزير المهندس ميرغني حمزة الذي كان وزيرا لثلاث وزارات احداها الري . فسلم وجلس منتظرا دوره عند الحلاق . الدكتور وخريج السوربون احمد السيد كان وزيرا للتجارة . ومنزله مليئ باهله وضيوفه طلب جنيها من قريبه الشاب طبيب الامتياز عبد الرحمن ساتي .


#1160364 [الدنقلاوي]
1.00/5 (1 صوت)

12-01-2014 10:13 AM
إبداع وخفة ظل والأهم إنها في التنك تماماً
تعيش وتكتب وتنسينا القرف واللغوسة النحنا فيها دي - ولو لمدة زمن القراية - خلينا احكي قصة يمكن تكون سمعهتا: حكي واحد من أولاد البرير أنو عندوا اتنين خيلانو في سويسرا واحد فيهم بعد أكثر من عشرين سنة برة قرر يزور السودان قريبو التاني قال ليهو (يا زول انت قايل الموضوع لعب بس تقول ماشي السودان تقوم تمشي ...السودان ده ما ساي السودان ده جد جد) الراجل ما سمع كلاموا مشى السودان ضربتو ملاريا شالوه للمطار بالنقالة، لما وصل سويسرا قريبو زارو وقال ليهو (مش قلت ليك السودان ده جد جد)


ردود على الدنقلاوي
Canada [الدنقلاوي] 12-02-2014 11:55 AM
تكرمك بالدخول على المداخلات علي المقال من تواضع الكبار ويزيد في تقديرك عندنا .. مهما قلنا تبقى البلد بلد ... بخيرها وناسها كان ممكن تكون جنة على الأرض .. لكن خيباتنا في كبارنا الاتضح انهم صغار سلمتنا في النهاية ليد الكيزان حثالة البشر وذبدة التخلف في العالم ... والعكة الحاصلة في أديس لا تبشر بخير لكن من قلة حيلتنا وبؤس حالنا نؤمل إنها توقف الحرب إنشاءالله شهرين تلاتة علشان التعابا في الجبال والنيل الأزرق ودارفور ينجموا شوية قبل ما يرجعوا يواصلوا شقاهم

Sweden [shawgi badri] 12-01-2014 09:41 PM
العزيز ابن الخال الضنقلاوي لك النحية . الرائع خالد الحاج صاحب سودانيات طيب الله ثراه كان قويا في جسمه وعقله لم يكن يدخن او يشرب الخمر . كانت له ضحكة تجلجل . سكن لعشرين سنة في هولندة . ذهب للسودان لاجازة . لم يشك من اي شئ طيلة حياته . وفقدناه بصدمة لم يفق منهااحبابه واسرته .
الصحفي ابراهيم موسي الخير . كان يرد علي اهله في السودان عندما يصرون علي حضوره ,,, هو السودان ده لعب ,,, اول حاجة لازم السودان ده يتعرش من الحر والكتاحة وتعملوا حاجة للضبان والناموس .
قبل الانقاذ استقريت في البسودان وما جاتني اي حاجة . الناس كان بتستغرب . اول ما الانقاذ تفوت حنرجع .


شوقي بدري
شوقي بدري

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة