12-05-2014 05:25 AM


بسم الله الرحمن الرحيم
صحابة وقالو بدريين( قصيدة)
*************************
صحابة وقالو بدريين
تزين جيدم العفة وبقيمو الدين
يحاربو الكفرة والأنجاس..
على كل القيم حراس..
على شق التمر من زهدهم عايشين
لسانم مر.على الفسقة وعلى الفاجرين
ضميرم قالو ألمع من صحن صيني..
ومن طهر الملايكة قريب..
وزي المويه نايمة على سرير الرمل شفافين
دموعم في طرف عينم..
بتتفجر غزيرة تبلل اللحية..
إذا ما سمعوا آيات الكتاب تُتلى..
وجات سيرة السلف..والخُلفا والصالحين
وزي ما قالو..يوم ما ضاقوا طعم السحت..
ومحروس النظر قالو..من الخسة ومن الخلسة..
وحافظين للعروض ..بالدين
وهم الأُمنا والقادرين..
يخلو الدنيا تستعدل..وتتحشم..وتتوجه ..
حضارياً..ويمسحوا دولة الصهيون
بجيش محمد العائد..من الماضي البكيل العين
وقالو كمان حناكل من زارعتنا..
ونلبس من صناعتنا..ونفوق العالمين أجمع..
عشان ما قرارنا يتحرر..من التبعية معصومين
وقالو وقالو... قالو وقالو... كم كمين ..وكم كمين
وكان عنوانم التمكين.. وظنو الكانو مخدوعين..
انه النصر قرب جد ..على الكفرة الجنوبين
وإنه حنبقى بين اتنين
إما نعيش على الأرض اللي مليون ميل ..
أعزة وفوق كرامتنا..
أو نلحق مواكب الشهدا فد مرة..
تحفنا في الجنان حور عين
وقالو وقالو..قالو قالو ..كم كمين ..وكم كمين
سمعنا كتير..وعشنا كتير ..مشينا كتير..
وشفنا كتير..عرفنا كتير ..ونمنا كتير.
صحينا على وطن.. مشطور..
بعد أرواح شباب مدخور ..
عشان يبقوا العمار للدُور..
راحت ..زي ما قال الشيخ..
بعد ما كان بيغنيبم
ضحايا ..وما في ليهم حور
وحاشا أقول كلامه القاله في جنياتنا..
مقام المات بأمر نبينا..
مهما كان بكون مشكور
ونمنا كتير.. صحينا ..
على حروب تلدا الحروب وتدور
نزوح ونزوح...قبور وقبور
هتِك أعراض..ضياع أجيال..حريق دارفور..
لا أخضر ولا يابس ..
يباب بيسلمك لي بُور
جنوب الازرق العاتي..وجبال النوبة..
بورسودان..وفي كجبار ..كِدِنتَكار..ولاد منصور
وكاس الموت في سبتمبر..وطعم الحسرة والدمعات
على شبابنا اللي راح مغدور
بعد ما رضينا بي صبرك ..وسماعات..
كمان ضبحولنا برضه حمير..
مَهاجر شالت المليون ورا المليون..
من العلما ..أطبانا..اساتذتنا..
مهندس فات..بعد ما بطل البابور
شباب زي الورود عاطل..
وما ردوا الجميل للتعبو فيهم جد..
علي باب السفارة..حشود..
عشان كمين وظيفة جندي..في بلداً
خت إيديه..فوق إيد اللي كانو سبب بلاوينا..
وخلوا الدم دوام جوه العروق بيفور
وبعد ده يقولوا ..نتحاور..عليك الله..؟
قوم شوف ليك غراب جزّو..
ونحن أكيد حنتحاور..
بعد ما يفوت غراب البين..
وناس همبول..وناس دلدول ..
وناس مسطول ..وناس طرطور
وحسك ياولد عينك..تقرب تاني
من صندوق..يجيب شرعية للكوز الصبح مقدود

معمر حسن محمد نور
4/ديسمبر / 2014

muamar61@yahoo.com

تعليقات 1 | إهداء 0 | زيارات 554

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1164093 [nafissa]
1.00/5 (1 صوت)

12-06-2014 02:46 PM
لله درك يابني


معمر حسن محمد نور
مساحة اعلانية
تقييم
8.75/10 (3 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة