في



العقيد مرتجلاً
02-26-2011 12:08 PM

ساخر سبيل

العقيد مرتجلاً

الفاتح جبرا

أتاحت الظروف التى يمر بها الأخ العقيد القذافى رؤيته مرتجلاً لبعض الخطابات التى يتم بثها عبر الوسائط الإعلامية .. إليكم أعزائى القراء بعض الفقرات التى كانت حصيلة لبعض حالات الإرتجال تلك .. مع التعليق عليها :

* · للمرأة حق الترشح سواء كانت ذكر أو أنثى !

- (لا تنسوا أن الأخ العقيد مفكر لذا فإنه يضع كل الإحتمالات أمامه حتى إحتمال عمليات التحول الجنسي trans-sexual))

* · ايها الشعب .. لولا الكهرباء لجلسنا نشاهد التلفاز في الظلام !!

- (يبدو أن تلفزيونات ليبيا تعمل على البطاريات وكده .. يعنى بالتيار المباشر direct current )

* · أنا لست ديكتاتورا لأغلق الفيس بوك .. لكني سأعتقل من يدخل عليه !!

- (ربما يكون الأخ العقيد ذكياً لدرجة أنه يود أن يشير إلى حاجتين الأولى إنو ما دكتاتور والثانية أن جهاز أمنه قوى لدرجة أن بإستطاعته تتبع كل كمبيوترات وهواتف الشعب .. كمبيوتر كمبيوتر وهاتف هاتف والقبض على كل من يدخل الفيسبوك .. بس ) !

* مراسل للعقيد : هل تخاف ممافعله المصريين والتونسين من التظاهر وقلب لنظام الحكم؟ العقيد يرد : انت مراسل غبي ايه اللي يخلي المصريين والتوانسه يتظاهروا في ليبيا

- (والله برضو سؤال وجيه !!)

* · تظاهروا كما تشاؤون ولكن لا تخرجوا إلى الشوارع والميادين !!

- (أغلى نصيحة يمكن أن يقدمها حاكم لشعبه .. الراجل قلبو عليهم وما عاوزهم يتعبوا .. أيه لزوم يطلعوا إلى الشوارع والميادين؟ كل زول يقعد فى بيتو ويقود ليهو مظاهرة !)

* · ساظل فى ليبيا الى ان اموت او يوافينى الاجل !!

- (دى بالذات شربتا ليها علبة بنسون كاملة وما قدرتا عليها !!)

* · بر الوالدين اهم من طاعة امك و ابوك .

- (دى بعد ما شربتا ليها علبة بنسون تاني فهمتها .. فطاعة الأم والأب يا سادتي جزء صغير من بر الوالدين الذى هو أعم وأشمل والله أعلم .. !)

* البترول لكم ومن بكرة أيّ واحد يمشي ياخد حصتو وانا متنازل عن حصتي.

- (مستنين أيه؟ كل مواطن ليبي يشيل جالونو ويمشي يشيل حصتو وينسي موضوع المظاهرات ده !)

* الشعب بياخد حبوب (مخدرات) !

- (أكيد بيتناولها بدليل أنو الشعب ساكت وكاضم ليهو 41 سنة و 5 شهور و24 يوم يعنى 2164 أسبوع أو ما يعادل 363,648 من الساعات أى ما يعادل 21,818,880 دقيقة اى ما يعادل 1,309,132,800 ثانية !!)

* (مخاطباً شعبه) : يا وسـخـانين يا مقملين .

- (إذا علمنا أن مشتقات البترول جميعها إبتداءاً من الكيروسين مروراً بالبنزين إنتهاءاً بالقطران تستخدم فى قتل القمل والتخلص منه فأين يذهب البترول !!)

* أنا أرفع من المناصب التى يتقلدها الرؤساء , أنا مقاتل مجاهد مناظل من الخيمة .

- (الخيمة .. رأس الخيمة .. بقت ما فارقه )

* ابدأوا بالخروج الليلة .. ابتداءا من الغد .

- (يكون قاصد ابدأوا بالخروج من الغد إبتداءاً من الليلة !!!)

* الباخره الراسية في المطار .

- (إذا المطار لصق الميناء مفيش مشكلة !!)

* لست رئيسا و لا رجلا عاديا حتي اقتل بالسم .

- (يمكن إذا كان السم ذو قوة ثلاثية .. الرؤساء والرجال العاديون هم الذين يموتو بالسم العادى)

* الديموقراطية تعني ديمو كراسي .

- والديموخيامية ... تعنى ديمو خيام !

* السجن خمسه سنوات لمن يقتل نفسه حرقا .

- (وبعد إنتهاء العقوبة يعالج نفسو من القتل ويلم رمادو ويطلع من السجن عااادى) !

* السبب الرئيسي للطلاق .. هو الزواج .

- (كده أنا ح أغير من البنسون !)

* أرجو من المواطنين أن يقبضوا على أولادهم البياخدو حبوب مخدرة هادول علشان نعالجهم و نعيد تأهيلهم ... ده ثبت إنو هذه الحبوب تسبب أمراض القلب !

- (ياخى روح ده إنتا العملتا لينا أمراض قلب !)

كسرة :

تنبية : يرجى بعد الإنتهاء من قراءة المقال تناول 2 حبة بنادول (إكسترا) .







تعليقات 22 | إهداء 14 | زيارات 6105

خدمات المحتوى


التعليقات
#103034 [ودالجزيرة]
0.00/5 (0 صوت)

02-27-2011 01:16 PM
* السبب الرئيسي للطلاق .. هو الزواج .

- (كده أنا ح أغير من البنسون !)


مانظلمو ممكن زواج التانيه سبب في طلاق الاولي

لكن هو ماغبي مع الاحترام الشعب الاغبي حسب معلوملتي هو ما بعرف ان المكرونه زراعه ام صناعه


#103028 [ابو مريم]
0.00/5 (0 صوت)

02-27-2011 01:09 PM
في الحقيقة انا ايضا لفت نظري دعاية البندول الاكسترا لو كان عن قصد أو من غير قصد .... المهم كلنا نخطأ متعمدين او عفويين ولكن نرجو ان يهمك قاعدتك العريضة من القراء واحترامهم حتى لا يتسوقون في دكاكين ثانية.
مرة اخرى لك العذر من عندنا هذه المرة


#102918 [خرباش]
0.00/5 (0 صوت)

02-27-2011 10:48 AM
حند مر المشاريع الزراعية وعلى رأسها مشروع الجزيرة ونوقف إستيراد القمح ونرجع للعواسة. دي عايزة ليها( z y) معبى كراتين بنسون.


#102881 [الزول السمح( الأصل )]
0.00/5 (0 صوت)

02-27-2011 09:55 AM
* (مخاطباً شعبه) : يا وسـخـانين يا مقملين .

- (إذا علمنا أن مشتقات البترول جميعها إبتداءاً من الكيروسين مروراً بالبنزين إنتهاءاً بالقطران تستخدم فى قتل القمل والتخلص منه فأين يذهب البترول !!)

برضو أحسن من القال ليكم ياشحادين. لأنه العندو البترول ومشتقاته ممكن يعملوا ليهو توعية صحية ووزراة الصحة تعمل على المكافحة.. لكن الشحاد يجيب من وين؟

بعدين علبتين البنسون ديل بى كم كراس؟


#102802 [الملك]
0.00/5 (0 صوت)

02-27-2011 03:26 AM
جهاز امن البشير يغتصب النساء اذا كانوا رجل او إمرأة


#102722 [hima]
0.00/5 (0 صوت)

02-26-2011 10:50 PM
هاك دي بحبة واحدة
لآ يجب على الأطفال ان يخرجوآ للمظآهرآت سوآء كآنوا صغآر ام كبآر


#102664 [ali]
0.00/5 (0 صوت)

02-26-2011 08:25 PM
تظاهروا كما تشاؤون ولكن لا تخرجوا إلى الشوارع والميادين !!
والله ياجبرا الظاهر عليهم ديل السودانييييييييييييييييييييييييييييييين القاعدين يتظاهرو في بيوتم .:D :D :D


#102627 [gaffar]
0.00/5 (0 صوت)

02-26-2011 06:34 PM
الأخ الأستاذ الفاتح ..حبيت أنوهك في كاتب في جريده الشرق الأوسط ..و إسمه محمد صادق دياب .لقد سرق مقالك ..كلمات متقاطعه..في العدد 11775 تاريخ الأربعاء 11/23/2



#102610 [حادب على الوطن]
0.00/5 (0 صوت)

02-26-2011 06:01 PM
لكن الحبتين ديل بفكن المشكلة الواقعين فيهادى شوفو لينا حاجة تفك السلتيب دى


#102599 [منو؟]
0.00/5 (0 صوت)

02-26-2011 05:43 PM
ازيك يابروف والله يسلمك بس مابعني اسلمك لناس الا.. والله يا بروف لو بلعت من حبوب هلوستو المهلوس بيها ماح تفهم كلمه من كلامو ابوزنقه زنقه ده


#102598 [خرباش]
0.00/5 (0 صوت)

02-26-2011 05:43 PM
يلا أخرجوا ... أهتفوا .... قولوا بالدم بالروح نفديك يا عقيد ....................
الراجل سندوه ودرجوه راجين أيه ( الله يكفينا شر مرض العظمة )


#102594 [بوعزيزي]
0.00/5 (0 صوت)

02-26-2011 05:37 PM
الله يستر من ارتجال الكوع والبوع واليوععع!!! فاهم حاجه اها اسه نحنه مكتيرين من الهلوسه بتاعتنا !!!! عارف البنسون ده بجيب التظاهر في الالوان وبخلي الراس ما فهمان!!! لكن الخدره بتاعتنا دي اليوم مكتيرين منها ومنوزع للحبايب!!! ما قالوا الجماعه الثوار ديل مسطولين سطله خوفت القذافي!!! نحنه من جرب في حقتنا ! حدويرنا لي هنا ولا ممكن الواحد يلقي نفسو بيتزاهر في اسمرا!!!!


#102519 [Muslim.Ana]
0.00/5 (0 صوت)

02-26-2011 03:56 PM
يعني يا اخوانا حقو ندي نفسنا حقها برضو وذي ما القذافي بيدلع شعبو ويقول ليهم يا يا وسخانين ومقملين، فنحنا برضو الريس ما قصر معانا وقال لينا نلحس كوعنا وقال لينا الزارعنا غير الله اليجي يقلعنا وقال حاجات كتيرة مش بتشكك في نظافتنا ذي ما عمل القذافي مع شعبه لكن بتشكك في رجالتنا عديييييل.
كسرة
السلطات تشن حملة كبيرة على تجار البنقو عشان ما يوزعوا البنقو ويقوم الشعب ينسطل ويطلع مظاهرات ذي ما حصل في ليبيا. واحنا ما شاء الله علينا لحدي اسي شعب واعي شديد والله يجيب يوم سطلتنا.


#102492 [حوتة ]
0.00/5 (0 صوت)

02-26-2011 03:25 PM
الراجل دا مخبول واكتر من مجنون ----- انا ماعارف الليبين ديل صابرين عليهو 40 سنة كيف --------والله انحنا في نعم عظيمة :D :D :D :D


#102489 [ASHREF]
0.00/5 (0 صوت)

02-26-2011 03:20 PM
رايك شنو طيب فى واحد قال الشريعه بتطبق فى السودان وقام اغتصبوا رجال امنو ننساء السودان ولا واحد قال السودانن لو طلعو مظاهرات بيطلع عشان يرجموه ولا واحد تانى فنان قال الجنوب كان ثقل على السودان عشان كدا فصلو .دى جيب ليها صندوق من الاخضر النشوان.واستمر فيو لان القادم احلى وعايز دماغ عاليه


#102455 [أبورماز]
0.00/5 (0 صوت)

02-26-2011 02:28 PM
وأنا أزيدك من الشعر بيت .. من نظرياته فى كتابه الأخضر ..
النظريه الأولى : الناقة تلد الجمل والنعجة تلد الحمل والصحراء تتكفل ..
التانيه : الإنسان موجود والبترول موجود والإنسان موجود الشئ الذى لم يكن موجودا هو الثوره ..( يعنى هو )
التالته : هنالك فرق بين الجمهور والجماهير فالجمهور مفرد والجماهير جمع ...
والرابعه : الأمريكان إختاروا إسم لبلدهم من ثلاث كلمات والروس أربعه أما الجماهيريه فخمسه .. الجماهيريه الليبيه العربيه الإشتراكيه العظمى ..( ما متأكد من الترتيب)

والأنكأ والأمر أن كل الشعب الليبى يحفظ نظريات الكتاب الأخضر الخمسه وعشرين والتى هى على شاكلة النمازج أعلاه ...

خلف دور : مجلس الأمن يطالب بفتح بلاغ جرائم ضد الإنسانيه فى لاهاى على العقيد

كسره : إتنين لاهاى وإتنين جاى جاى ...


#102454 [محسيه]
0.00/5 (0 صوت)

02-26-2011 02:27 PM
بختك ياجبرا لسع بتشرب بنسون نحن بقينه نشرب لورد عشان نقدر نواكب الحاصيل بقدر العندنا


#102445 [ابو مريم]
0.00/5 (0 صوت)

02-26-2011 02:01 PM
كلام الطير في لبباقير
سيرحل العقيد الغزافي الساعة 5 صباحا بالليل
وسيكون بذلك صادف قول الشاعر:
سألونى عن المتنبئ قايلني بليد في البايولوجى
قتليهم انو المتنبئ كان في المهدية كهربجي

واحد قال مشتهي طحنية بملاح خدرة



#102439 [omima Jacheez]
0.00/5 (0 صوت)

02-26-2011 01:52 PM
الصنف شنو مع البنسون الحمد برلك جبته السيره ( هسي نحنا قلنا حاجة براها مسخنة ) أحرق البنسون حسابوا علي اقلام اخسس تباع وتشتري في سوق النخاسة الصحفية


#102419 [محمد احمد فضل]
0.00/5 (0 صوت)

02-26-2011 01:27 PM
انا شربت علبة برنجي اتناولت حبة بندول أكسترا وبقيت في حالة مابين الضحك ( ابودموع ) والبكاء ( حتي سالت المياه من مناخيري ) ، الفاتح جبرا مرتجلا


#102401 [jangy]
0.00/5 (0 صوت)

02-26-2011 12:42 PM
الفاتح يوسف اخوى العب غيرا..قايل عندنا قنابير ..عامل دعاية لتاس بندول اكسترا وعدت على ناس الجرايد لكن مش حتعدى علينا ديل نحنا اولاد كر واحد


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة