المقالات
الشعر
عبد الاله زمراوي
وا حسرة الوطن الحكمتو رقصت فوق حوشو الكبير واصبحنا مافي
وا حسرة الوطن الحكمتو رقصت فوق حوشو الكبير واصبحنا مافي
01-15-2015 09:19 AM


ماني خايف
من كلابك
ماني مرعوب
من سيوفك
ماني خافي!

ترقص على
جُرح الوطن؛
قسّمتو كيري
على كلابك؛
ماكا ناكر
وماكا نافي!

ترقُص
على وتر الخليل
سيرٓة عريس
مجدول وصافي!

حرّمْ تَراقِص
ضُلّك المهزوز
عديل
ضاع الوطن
يا يُمة خافي!

يا ضيعة
الوطن اللي
ضاع
يا ضيعة الليل
و القوافي!

أسفاً عليه؛
"ابيَضّت العينين"
علي وطني
الجفيتو
وماني جافي!

غنينا من تبينا فيه
"وطن الجدود"
المِن زمان
وصّونا بيه
وطناَ جميل
وطناَ مُعافَي!

جونا من
وين العدم؟
أصلو
من وين السجم؟
ياتو كُبّة؛
من قُرى
الوطن الخُرافي؟

قسّمتو
يلعنك الله
كيري؛
وماكٓ نادم
وماني عَافي!

سلّيت
سكاكينك نَهار
كتَّلتٓ
أولادنا الصُغار
والشيخ صِبِح
ضامِر هزيل:
والخوف على أمي
الدموع كبّتها
صافي!

هرب الخلوق
ضاقت
مواعين الطبوق
قدحك تقيل
يا زول عوافي!

صِبِح الزمن
ممسوخ علي
أمي وابوي
أختي وأخوي
صبح الزمن
زمناً خرافي!

يا حليل
أٌمي التلولينا
و تزغرد فوق
جروف الساقيِّ
لا بقراً حلوب
يا الله كافي!

يا حليل
جِدي البكفكف
دمعة المفجوع
يحاحي الطير
يقيّل في الجوافي!

بكت الجروف
حزناً على وادينا
والقُنديلة
يا فرح القوافي!

النيل بكى
سالت دميعات
الجروف النايمة
فوق ارض النخيل
حرقتْ لحِافي!

وا حسرة الوطن
الحكمتو
رقصتٓ فوق
حوشو الكبير
و اصبحنا مافي!

حرّم لقيت
كضبك عجيب
رقصك غريب
بكِّيتْ سما
الوطن المقسّم
والقوافي!

دينك كُتر
دين النفاق
غشيتنا
من اول خطاب
فكروك صٓحابي
وإنت كضبك
لونو صاااافي!

سافرت بينا
على محطات الخراب...
صليت على
قِبلة شواطينك
مرضنا ومافي
زولاً صار مُعافي


[email protected]

تعليقات 5 | إهداء 0 | زيارات 1792

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1189271 [لبني]
4.07/5 (5 صوت)

01-17-2015 02:01 AM
سلام بمولانا الشاعر،


#1188695 [Nader]
4.11/5 (8 صوت)

01-15-2015 01:36 PM
حيّاك الله عبد الإله ؛ الشاعر المناضل ، شكراً لهذا الإبداع ، نتمنى أن نراك قريباً في وطن حر أبي و قد تخلصنا من هذا الكابوس


#1188666 [زول]
4.07/5 (5 صوت)

01-15-2015 12:45 PM
صدقت والله


#1188658 [عمر عووضة]
2.54/5 (6 صوت)

01-15-2015 12:34 PM
بكت الجروف
حزناً على وادينا
والقُنديلة
يا فرح القوافي!

النيل بكى
سالت دميعات
الجروف النايمة
فوق ارض النخيل
حرقتْ لحِافي!

وا حسرة الوطن
الحكمتو
رقصتٓ فوق
حوشو الكبير
و اصبحنا مافي!


تكفيك قلادة ووشاح اها الزمراوي


#1188576 [سيف الله عمر فرح]
4.07/5 (5 صوت)

01-15-2015 11:06 AM
دينك كُتر
دين النفاق
غـشـيتنا
من اول خطاب
فكروك صٓحابي
وإنت كضبك
لونو صاااافي !

ومع هذا نرى المصلحجية والمنافقون يهتفون ، ب سير سير يا البشير ! .

ويا للحسرة أستاذى زمراوى ، حزب العمالقة ، حزب الشريف حسين الهندى ، مبارك زروق ، واحمد فضلى ، واحمد السيد حمد ، وآخرون كثر ، لم يجدوا اليوم رجلآ لينافسوا به رئيس الحزب المتوالى حزب المؤتمر الوطنى عمر حسن البشير ، أو رجالآ يقرروا مقاطعة الانتخابات المطبوخة نتائجها سلفآ ..

وا حسرتا ، وا خيبتاه ، السيد محمد عثمان الميرغنى لم يجد رجلآ فى حزب الهندى ، وزروق ، والفضلى ليرشحه لينافس به حزب المؤتمر الوطنى ، فقام بتأييد ترشيح البشير وابدى دعمه له !!! ..

هذا زمانك يا مهازل فامرحى ، قد ............ ! .


ردود على سيف الله عمر فرح
[ٍٍٍٍساساق] 01-15-2015 02:17 PM
طيب كان الميرغني ارشح نفسه ... البشير خير ممثل للميرغني ... ما علاقة الميرغني بالقضايا الوطنية ... كانز الذهب والمال


عبد الإله زمراوي
 عبد الإله زمراوي

مساحة اعلانية
تقييم
2.00/10 (2 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة