أحلام إيزي
01-25-2015 05:16 PM


عدت إلى البيت بعد يوم عمل مرهق وما أن فنحت الباب حتي إستقبلتني كعادتها بشوق وترحاب إلا انها هذه المرة قد (زودتها حبتين) إذ انها اخذت تنطط وتأتي بحركات بهلوانية توحي بانها في غاية الإنبساط و (الفرفشة) ، أمسكت بها وهي تحرك ذيلها في تناغم يمنة ويسرى
وواجهتها بسؤال لم تضع له حسابا :

– هسه إنتي البفرحك شنو .. شايفه ليك زول واحد في البلد دي فرحان ؟
– (وهي تضع يدها على خدها) : مش عملوا لينا قانون وكمان أجازوهو
– قانون شنووو .. والله ياهو ده الفضل
– يا أستاااذ ده إسمو قانون (الرفق بالحيوانات) .. اللي هم ديل نحنا !!
وبعد أن توقفت عن الفرح والإنبساطة إعتدلت أيزي (وهذا إسمها) وأخبرتني بأن (برلماننا) الموقر قد صادق على قانون رفاه الحيوان لسنة 2015م، بعد أن قام بنعديا اسم القانون إلى (الرفق بالحيوان) وأن القانون قد قضى بإنزال عقوبات تصل إلى السجن 5 سنوات والغرامة المالية ومصادرة الحيوان على منتهكي حقوقه كما أن القانون قد وضع (5) حريات كفلها للحيوان تتمثل في الحرية ضد العطش، والجوع، والخوف وعدم تعريضه لمؤثرات فيزيائية تؤثر عليه وإتاحة حرية التعبير للحيوان عن سلوكه الحيواني ..
– هسه ده الشئ الخلاكي تننططي يعني ؟
– أكيد تاني أخواني الحيوانات ديل كوووولهم ح يكونو في مأمن من الإنتهاكات !
– أول مرة أعرف إنك كلبه (غبيانه) مع إنو جدودك (خواجات) .. في بلد عربي ما فيهو إنتهاكات ؟
– والله أنا لاغبيانه لا حاجه أها شوف كمان أدونا الحرية ضد العطش
– عطش مين يا أيزي كدي أمشي بس (غرب الحارات) القريبة دي ح تلاقي البشر (المواطنين) ذاااتم عطشانين
– وكمان الحرية ضد الجوع !
هنا لم أتمالك نفسي فضحكت حتى بانت نواجذي فقلت لها :
– الظاهر يا أيزي إنتي ما جايبه خبر ساااكت .. وقافلة القزاز ومشغلة الفريون
– كيف ؟
– ضد الجوع بتاع مين يا أيزي .. العاصمة دي بس فيها كم ألف تلميذ جعانين وما قاعدين يفطرو !
– طيب عندك كلام في إنو القانون كمان عمل لينا حصانة ضد الخوف؟
– ههههه … والله (فعلن) إنتي ما جايبه خبر .. ده نص الشعب الفضل خايف وقلبو مقطوع … الخايف من الحرب والخايف من بكرة والخايف يمرض ليهو زول وما يلاقي حق العلاج والخايف يفصلو أولادو عشان أقساط الكلية ده غير الخايف من (المرا) عشان عايز يدبل وبالمناسبة يا أيزي ديل من النص (التاني) !
– والماده الرابعة بتقول ما يتم تعريضنا لمؤثرات فيزيائية !
– (في إستغراش) : مؤثرات فيزيائية؟ إنتو كمان يا أيزي قاعدين يستجوبوكم ؟
– لا .. لا ما كهرباء .. وللا تلج .. بيقصدو مثلا ما يشيلونا حمولة أكتر من طاقتنا مثلاً !!
– أكتر من الحموله يعني الشايلنها نحنا دي ؟ الواحد يكون مرتبو ألف جنيه ومأجر بي ألف وميتين وعندو ستة شفع في المدارس غير المرا ؟
– أها يا أستاذ المادة الخامسة بتقول إنو أدونا حرية التعبير رايك شنوووو؟
– ههههههههه .. ده كلام جرايد … كدي أطلعي ليكي مظاهرة !!

كسرة :
لا داعي لسن أي قوانين (جديده) ما دام القوانين (الموجودة) لا يعمل بها وللا مش كده ؟

كسرة ثابتة (قديمة)
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و) !

تعليقات 7 | إهداء 0 | زيارات 5832

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1195992 [زرزور]
0.00/5 (0 صوت)

01-26-2015 03:46 PM
عرفنا كل شئ قلته بس ورونا جدودك خواجات دى يفهموها كيف ؟


#1195575 [الحلومر]
0.00/5 (0 صوت)

01-26-2015 08:08 AM
متي يطبق هذا القانون علي البشر؟؟ولا ها اتذكرت الحروب قرضت الانسان السوداني ولم يبقي من البشر الا ناس البرطمان او بالاصح البرطمام طممتو بطونه لعنة الله عليكم دنيا وآخرة


#1195379 [omarkhalid]
5.00/5 (2 صوت)

01-25-2015 09:56 PM
طيب لو الواحد صدم ليه حمار والحمار مات ادفع الدية وﻻ اسجنو
ولو الحمار كان مشرد منو البياخذ الدية


ردود على omarkhalid
[أبو محمد] 01-27-2015 01:09 PM
والله أجمل رد هو رد أبو شهاب ( المؤتمر الوطني ) جاهز لأخذ الديات بتاعت كل الشعب السوداني !!!!

[abushihab] 01-26-2015 07:15 PM
المؤتمر الوطني


#1195355 [julgam]
5.00/5 (2 صوت)

01-25-2015 08:46 PM
ياود جبرا تيك إت إيزى ،بسم الله عليك ،شنو بقيت تتكلم مع الكلاب ،الله يعوضنا فيك،،


#1195339 [قاسم الامين عبود]
5.00/5 (1 صوت)

01-25-2015 07:53 PM
امتلك بندقية خرطوش مصدقة من الجهات المختصة واستعانوا بي في قتل كلب اصيب بداء السعر فاعتذرت لهم قامت الدنيا وما قعدت وكل الجيران والناس تدخلوا في محاولة باقناعي بان ارصص الكلبة حيث تضرر منها كثير من الجيران ولكن رفضت خوفا من الحبس والسيم وجيم ومصادرة البندقية ويحيروني منها وانا خاتيها لليوم الاسودسالني احد الجيران لماذا رفضت قتل الكلب مع العلم انك زمان من اول مرة يكلموك بالكلب او الثعبان علي طول تمشي تقتلوا هسع الجديد شنو يعني رافض كتل الكلبة شرحت الوضع قلت عملوا قانون الحيوان قال لي والله لو البندقية دى حقتي انا كان قالوا لي اكتل !!!!!قام اتلفت يمين وشمال وقال اكتلوا وكتل عشرة زيو


#1195314 [حكم]
5.00/5 (1 صوت)

01-25-2015 06:33 PM
كسرة :
لا داعي لسن أي قوانين (جديده) ما دام القوانين (الموجودة) لا يعمل بها وللا مش كده ؟



الكلام دا قلناهو زماااااان
لكن كلام القصير ما بنسمع


#1195301 [rabeen]
0.00/5 (0 صوت)

01-25-2015 06:02 PM
تعرف يا استاذ جبره قالوا الفاضي يهمز امه والماعندو شغلة زي البرطمانيين بتوعنا دول بيعملوا قوانين عشان يشغلوا بيها الناس والعباد ويبدو ان الكيزان حيستوردوا حيوانات للاستثمار الانساني وقالوا خلاص نعمل قانون لانه الدول اللي حيستوردوا منها عارفه حالات حقوق الانسان في السودان عشان كده رافة بحالهم اصدروا هذا القانون وفي الحقيقة هو لهم وينطبق عليهم جميعا

لا


الفاتح جبرا
الفاتح جبرا

مساحة اعلانية
تقييم
9.94/10 (8 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة