02-26-2015 10:53 PM


بينما كنت أجهز نفسي للخروج من المنزل متجهاً إلى الصحيفة قالت لي زوجتي وهي تسألني :
- ما مشيت لي حاجة نفيسة دي؟
- مشيت ليها.. مش عشان أعزيهم في وفاة حاج عبدالمنعم؟!
- وفاة شنو؟ حاجة نفيسة جاتا جلطة وراقدة في المستشفى!
- معقولة؟ المرة دي والله مسكينة.. راجلا حاج عبد المنعم فراشو يا دوبك إترفع. 
- ما هو الفراش ده ما ذاااتو المصيبة!!
حاج عبد المنعم تدرج كموظف بنك حتى صار مديراً لأحد الفروع قبل وصوله لسن المعاش قبل سنوات قليلة.. متزوج من (نفيسة) زميلته فى العمل قبل أكثر من ثلاثين عاماً أنجبا خلاها عدداً من البنين والبنات.. لم يكن لحاج عبد المنعم مشاركات اجتماعية، بل كان كائناً (بيتياً) .. ما أن يعود من عمله بالبنك و(يقرّش عربيتو) لا يغادر منزله إلاّ لأداء صلاة العشاء بمسجد الحي..من صفاته أنه كان هادئ الطباع، حسن الهندام، خفيض الصوت يتحدث إليك همساً، توفي بصورة مفاجئة قبل حوالي أسبوع.
- كيفن الفراش هو المصيبة..؟ ما فاهم. 
- طيب النحكي ليكا..
قالوا ليكا تاني يوم للوفاة.. والبكاء حاااار.. والنسوان ديل يعملن ليك في البدع ونفيسة دي تردح وتشيل وتوصف. 
- الليلة وين يا الحاج الصلاي... خليتني أنا والمعاي.
- الليلو وين يا الأمين البأمنوهو الملايين.
- وووووب يا المثالي المشيت خليتني في حالي.
- وووووب يا الواضح أب كلامن ما فاضح. 
- الليلة وييينك يا الأرباب الماك كضاب.
- الليلة وييينك يا الحنان الحافظ للقرآن. 
- ووووب وووب وووووووووووب!!
حاجه نفيسة تشيل وتردح والدموع دي ما تديك الدرب والنسوان المعاها شغالات ليها كورس قالوا ما يشوفن ليكا إلا (مرا) طويلة وعريضة وقيافة.. التوب ما توب.. واللبس ما لبس.. والحنة ما حنة والدخان ما دخان.. تدخل ليك عليهن ومعاها تلاتة بنات.. الشعر كيفن والبلوزات كيفن والإسكيرتات كيفن ومما دخلن يطقو ليكا الثكلى.. وقعدوا يصرخو بي أعلى صوت لحدت ما وقفو ليكا بيت البكا على فد كراع.. 
- أها وبعدين؟
- بعدين بعد ما أخدن بكيتن.. وكل واحدة شربت ليها كباية موية باردة مشن قعدن بعيد.. يتخجخجن ويبكن. 
والنسوان ديل كوووولهن سابو البكا وقعدن يعاينن ليهن!
- أها وبعدين؟
- أها قالو أخت حاجة نفيسة الصغيرة قالت لي ليها برااااحة في أضانا : إنتي النسوان ديل من وين؟
قامت حاجة نفيسة ردت عليها قالت ليها: يعميني قبال ده ما شفتهن! 
- أها والحصل شنو؟
- الحصل إنو النسوان قالن لي حاجة نفيسة أمشي أسألي المرا دي وقولي ليها إنتي منو؟ قامت الحاجة مشت على المرا وقلدتا وقعدن يبكن زيييين وبعد ما قعدن في الواطة ومسحن دموعن قامت الحاجة سألت ليك المرا قالت ليها: ما إتعرفنا على بعض يختي!!
- أها المرا قالت ليها شنو؟
- قالت ليها أنا إحسان زوجة المرحوم على سنة الله ورسوله وديل بناتو هادية وهديل!
- وده الجاب لي حاجة نفيسة الصدمة وجاب ليها الجلطة؟
- لا لا .. حاجة نفيسة كانت متأكدة من المرحوم عشان أصلو ما كان بيطلع من البيت.. طوااالي قالت للمرا قومي أمشي من هنا قبل ما نجيب ليكي البوليس يا مرا يا محتالة.. الحاج ده من بيتو ما بيطلع إلاّ يمشي يصلي العشاء في الجامع ويقعد ليهو ساعة ساعتين في حلقة (التلاوة)
- أها.. وقالت ليها شنو؟!
- قالت ليها ما أنا ذاااتي (حلقة التلاوة) دي ذااااتا!!
كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)

التيار





تعليقات 13 | إهداء 1 | زيارات 5383

خدمات المحتوى


التعليقات
#1218031 [داجن الداجن]
0.00/5 (0 صوت)

03-01-2015 10:43 AM
الفاتح جنا ما الفاتح جبرا - ليك حق


#1217941 [جنو منو]
0.00/5 (0 صوت)

03-01-2015 09:08 AM
انت ياجبرة شربت القهوة مع النسوان امس ولاشنو .. القصة قديمة على ما اعتقد ومتدوالة فى مجالس
قهوة حروم الحلة بتاعت الساعى 12


#1217352 [ود الخضر]
0.00/5 (0 صوت)

02-28-2015 11:47 AM
يا جبرة انت مكنتك خفت وبقيت تحكى ونسة النسوان فى الحلة


#1217346 [Abdo]
0.00/5 (0 صوت)

02-28-2015 11:41 AM
.


دى من الأرشيف يا أستاذ ؟؟؟؟؟؟!!!!!!



.


#1217334 [حوراني]
0.00/5 (0 صوت)

02-28-2015 11:21 AM
الله يخليك يااستاذ جبره وينصرك ويحفظك منتظرين رمضان انشاء الله تستمر في كتابة السيناريو وتتحفنا


#1217173 [عوض الله جابر]
0.00/5 (0 صوت)

02-28-2015 02:18 AM
خليني من ده كلو يا جبرا إنت قابلته حاجه نفيسه كيف وهي في الحبس ؟؟
بعدين رقدوها مستشفي كيف وهي في الحبس...

بعدين المره التانيه مرقت من بيتها كيف وهي مفروض تكون في الحبس..
غايتو جننتك جن..


ردود على عوض الله جابر
European Union [ربوع السودان] 02-28-2015 09:19 AM
هو بقولك زوجته قالت له ولم يقابل حاجة نفيسة وهي في الحبس وبعدين عادي بيرقدوها دي ظروف وبعدين الحبس فترة محددة بين المغرب والعشاء والمرأة لو ما عندها من يعولها يمكن ان تخرج وهي في الحبس لكي تعمل والله اعلم


#1217069 [المغترب]
0.00/5 (0 صوت)

02-27-2015 08:25 PM
هي ذاته حلقة تلاوته القران يا ود جبره


#1216850 [حكم]
5.00/5 (3 صوت)

02-27-2015 09:59 AM
لكن الحاج طلع ابو سريع

قلت البنات اسمهن هادية وهديل؟ والتالتة؟


#1216828 [جرتلى]
5.00/5 (2 صوت)

02-27-2015 08:50 AM
غايتو انت يا ود جبرا الله يديك العافيه مالك تهبش فى الحلو الحلال


#1216780 [جوري منتصر]
5.00/5 (3 صوت)

02-27-2015 06:24 AM
الجماعه الطيبين ديل فتحو باب الزواج الكتامي والسري ده علي مصرعيه وتخصصو فيه ...عشان كده حنشوف البدعه السئيه دي منتشره انتشار النار في الهشيم
مال الحرام مفسد ويودي للحرام


#1216746 [ahmad]
5.00/5 (5 صوت)

02-27-2015 04:53 AM
انت اظرف زول فى السودان انت بهجة شكرا


#1216732 [ام الحسن]
5.00/5 (4 صوت)

02-27-2015 03:41 AM
العنوان قبل الخوف من الحذف والتعديل من الجماعة كان

الحاج طلع كوز

غايتو حاولت تلف علي امنجية الرقابة وقلت اضاني اها دي


#1216673 [fatmon]
5.00/5 (1 صوت)

02-26-2015 11:39 PM
ما يكون ساعة الفطور والبيت جنب البنك؟؟؟؟؟؟؟


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة