مرحلة (العفيص) !
03-17-2015 11:16 AM


يعتبر د. مصطفى عثمان إسماعيل رئيس القطاع السياسي بالمؤتمر الوطني(أكثر) قياديي المؤتمر الوطني (مرونة( وتعقلاً وابتعاداً عن التصريحات (الخشنة) لكن يبدو ان الرجل قد انطبقت عليه مقولة (من عاشر قوماً) إذ نسب إليه مؤخراً عبارات تفتقر إلى (الدبلماسية) وتتعدى حدود اللباقة واللياقة والكياسة هذه العبارات التي أطلقها من داخل مكتب حزبه العام والتي يهدد فيها بكسر كل يد تمتد على الحزب حيث قال : (البمد يدو علينا بنكسرا ليهو) وعليه :
- نطالب بتأهيل مستشفيات العظام وتوفير الجبص والشاش
- نطالب بتحديد (الأيد ياتا البتكسروها) البناكل بيها ولاّ التانية
- هل يتم (الكسير) تحت بنج (موضعي) أم بنج (عام) وللا (عدييييل كدة)؟
- هل يتم (الكسير) بضربة واحدة (وللا بتفّو الليد تفْ) ؟
- لو الزول أساسن أيدو مقطوعه؟ ح تقطعو ليهو شنوووو
- هل مد (اللسان) يستدعي ايضاً قطعه ولا القصة بس في (الليد)؟
- هل يقتصر (الكسير ده) على الذكور أم (الإناث برضو) بتكسرو ليهن ونبقى في (حي وووب) !
- ماهي الأدوات المستخدمة في (التكسير) .. فرار، عصاية ، عتلة (عشان نعرف بس)؟
- هل يتم التكسير على يد (عصابة) متدربة ولا (كسارين تحت التمرين)؟
- هل يتم التكسير في ساحات عامة لتشهد (التكسير) طائفة أم يتم في مكان مقفول؟
- بعد ما تكسر يد (المواطن) هل تتولي (الحكومة)علاجه وللا بخلوهو بأيدو (مدلدلة) !
- في حالة علاج الحكومة للمواطن (أبو أيد مكسورة) هل تفضل (الحكومة) الجبص ام الجبيرة ولماذا ؟ (مش برضو سؤال)؟
- في حالة إنو الشعب الفضل كوووولو مد أيدو : هل ح تستورد الحكومة(كسارين) من الخارج !
- في حالة (المغتربين) البيمدو أيدهم .. كيف ستتم عملية الكسر ؟ بعد عودتهم أم ستنشأ (ملحقيات كسر) بسفاراتنا في الخارج؟ - تنبيه – (جدة لا تحتاج) !!
- نقترح تجميع (الناس البتمد إيدا) وكسرهم (بالجملة) في احتفال بالساحة الخضراء
وتسمية اليوم بيوم (الكسر العالمي)
- نقترح علي الحكومة فتح مكاتب لاستقبال المواطنين العاوزين يمدو أيدينهم (ويخلصو من الموضوع) عملاً بمبدأ (كسروك ولا جوك) !
- هل ستساعد أحزاب الكرتون الموالية الحكومة في كسر يد المواطنين من مبدأ (حبيبي أكسر ليا وأنا أكسر ليك)؟
- إذا تم كسر يد (الشيخ) حتماً سوف يغني (كسروني الأحبة وقالو ليّا أنسي) !
- نقترح إعفاء كبار السن (زي حالاتنا) من قصة (الكسر دي) والاكتفاء بتحفيظهم جزءا من القرءان !
- نقترح إنشاء (الهيئة العليا لتكسير الأيادى) على أن يتولى رئاستها (أبو ساطور) !
- سينقسم الشعب الفضل إلى فئتين: فئة (أبو يد مكسورة) وفئة (أبو من غير يد مكسورة )!
- هل إذا رفع مواطن يده (مداها يعني) مشيراً بالسبابه .. هل سوف يتم كسر (السبابة) فقط أم اليد حتى مفصل الكفين أم وضوؤه باطل؟
- ماذا إذا مد المواطن (إيدينو الإتنين) هل تكسر واحدة فقط أم الإثين معاً ومعهم الثلاثاء والخميس
- من المؤكد بعد الخروج من مرحلة (الكسير) سوف تبدأ مرحلة (الشليت) وصولاً إلى مرحلة (العفّيص) !
- مانشيت في الصحف : توقف مراكز (الكسير) بسبب عدم دفع استحقاقات (الكسارين)
- واحد من الجماعة إياهم : إن كان الكسر بين الرسغ والساعد فلا غبار عليه والله أعلم !
- عاوزين فتوى : إذا الزول رفع إيدو وكسروها ليهو .. وقام تاني رفعا (ذاااتا) .. في هذه الحالة هل يتم كسر اليد التي تم كسرها قبلا أم يستعاض عنها بالأخرى (الما عملت حاجه)؟
- ويغني المغني : وا ناري الما بقيت (كسار) أطلع (الشجرة) وأمسك (الفرار) ... أييييه الليله وا ناري

كسرة :
- تنبيه : هذا المكان مراقب بالكاميرات .. إنتبه لحركة ايدينك !

- كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و

التيار

تعليقات 29 | إهداء 0 | زيارات 8468

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1230423 [خالد]
0.00/5 (0 صوت)

03-19-2015 12:17 PM
لافض فوك استاذ جبرا


#1230148 [mutasim]
5.00/5 (1 صوت)

03-19-2015 07:56 AM
غايتو بتفش المغسة يا جبرة ... طيب لمن يكسروا يدنا مش ممكن نقوم نلحس كوعنا دا ما تضارب شتايم .


#1230128 [محمد]
0.00/5 (0 صوت)

03-19-2015 07:30 AM
التعليقات ما راضية تمشي!!!


#1230127 [محمد]
5.00/5 (1 صوت)

03-19-2015 07:28 AM
رسلنا تعليق ما راضي يمشي


#1229810 [badraldin mm]
0.00/5 (0 صوت)

03-18-2015 04:44 PM
مصطفى عثمان واحد من الجماعة هذه الجماعة مترابطة فكريا واخلاقيا مافى فرق بين زعيط ومعيط كلهم واحد. نفس الشكل نفس الاخلاق لانو المدرسة هى نفس المدرسة والمنهج نفس المنهج... يحكى ان عقرب قالت لضفدع قطعينى معاك البحر عندى موضوع ضرورى فى البر التانى قالت الضفدعة انا عاوزة اعمل خير لكنى خايفة منك ....بعد مجادلة اقنعة العقرب الضفدعة ...ولمن وصلو لنصف البحر لدغة العقرب الضفدعة ...قالت الضفدعة للعقرب كدة حا نموت كلنا غرق ...قالت العقرب عارفة لكنى ما قادرة انسى انى عقرب ........فهم لاينسون انهم عقارب......


#1229673 [خالد فارس]
0.00/5 (0 صوت)

03-18-2015 01:48 PM
وزير الاستثمار قبل كده قال لما استولينا علي الحكم قال لقينا كل السودان شحادين عشان كده داير يكسر ايدينا عشان نرجع شحادين تاني


#1229542 [abshakir]
5.00/5 (2 صوت)

03-18-2015 11:46 AM
عسل والله دكتوراه شويه عليك ده مقال ما حصل ولا ح يحصل اتحداك واتحدى الدنيا


#1229458 [خالد فارس]
5.00/5 (2 صوت)

03-18-2015 10:18 AM
تلاتة مساطيل ذهبوا لعمر البشير قالوا ليه العطالة هلكتنا ما قادرين ناكل قال ليهم اطلبوا دايرين شنو واحد طلب امجاد واحد طلب ركشة وواحد طلب تمثال لعمر البشير بعد كم شهر صاحب الامجاد والركشة رجعوهم قالوا ليه البزين غالي وقطع الغيار غالية والناس مابتركب كلهم ماشين كداري المهم بتاع التمثال مارجع البشير قال فتشوه وجيبوه بعد ما جابوه قال ليه اخوانك رجعوا الامجاد والركشة انت ما لك مارجعت التمثال قال ليه ارجعوا ليه التمثال واضعوا في موقف جاكسون الكف بعشرة والشلوت بعشرين.


#1229400 [أبو محمد]
0.00/5 (0 صوت)

03-18-2015 09:17 AM
من أجمل المقالات التى قرأتها ، مقال هادف ومقال


#1229364 [الزول]
5.00/5 (1 صوت)

03-18-2015 08:48 AM
أبداع ياجبرة
ربنا يحفظك
طولنا من الضحك


#1229319 [ود الخضر]
5.00/5 (1 صوت)

03-18-2015 07:51 AM
الكيزان كلهم دواعش حيبدوا بكسير الادين وبعدين الرقاب
قريبا جدا سوف يظهر عليهم الفكر الداعشى وكسير اليدين يكون اخف
25 سنة دى المناظر وبعدين 25 سنة ثانية يبدا الذبيح


#1229207 [عكود]
0.00/5 (0 صوت)

03-17-2015 10:49 PM
انا قايتو بمد لساني ايدي دي باكل بيها


#1229201 [hadees]
0.00/5 (0 صوت)

03-17-2015 10:36 PM
طيب ياجبور يافاهم في نقطة محتاجة فتوي سريعة وخصوصاً بعدما سلمنا اننا مكسورين مكسورين لا محاله وجد انا ما قادر اعرف وفي حيرة من امري .. وهي ان كنت علي سفر في المنطقة الواقعة مابين ولاية الخرطوم والنيل الابيض ولم اكن ادري بالتحديد في حدود اي ولاية اناالان ,وقمت برفع يدي ففي اي ولاية تكسر يدي ؟؟وهل هناك تنسيق بين دوائر الكسر بالولايات


السؤال التاني ::: لو كنت عازم علي رفع يدي وقطعت النية بتبليغ السلطات انني سوف ارفعها عند مواعيد نشرة اخبار التاسعة تلفزيون السودان وسهوت عن رفعها هل سوف تكسر ام لا


السؤال التالت ::: اذا كنت قد رفعت يدي قبل صدور القرار هل سوف تكسر بأثر رجعي ام لا


ارجوا الافادة وجزاكم الله خيراً
اخوكم المحتار في امره هديس


#1229184 [ابوعبدالله]
0.00/5 (0 صوت)

03-17-2015 09:33 PM
اذا كسروا ايدك ياجبرة تاني الا تشتغل معلق رياضي وفي الازاعة فقط


#1229178 [الدرب الطويل]
0.00/5 (0 صوت)

03-17-2015 09:11 PM
رائع دوماً يا جبرا..
بس بيني بينك الجماعة كاسرين ركبة ليهم ربع قرن تمكين وكده.. والبشكير شخشياً كاسر ركابينو الاتنين والاربعاء والسبت..
الله يكسر ضلوعم..


#1229116 [بناديها]
0.00/5 (0 صوت)

03-17-2015 06:32 PM
يا استاذ بالنسبة للواو
اعمل واو الى ما لانهاية وريح روحك
لانه على الاقل عندك تانى خمسة سنة والواو عمودك تانى مابقضيها


#1229055 [أبو طلال]
5.00/5 (1 صوت)

03-17-2015 04:00 PM
ماهى العلاقة بين كسبر مصطفى عثمان وكسرات الفاتح جبر؟
الأولى جمع تكثير والتانية جمع مؤنث سالم


#1229054 [moiez]
5.00/5 (1 صوت)

03-17-2015 03:59 PM
ههههههههههههعههههههههههههه الزول دا جاك في حوشك ي جبرة قول لي انحنا بنكسر في لينا سنين


#1229017 [اسماعيل الزعيم]
5.00/5 (1 صوت)

03-17-2015 03:01 PM
يا استاذ جبره نسيت رسوم الكسر علي النعمة الحكومة دي ما تكسر يدك لو ما شالت حقها قال فرار قال


#1228992 [قاسم]
5.00/5 (2 صوت)

03-17-2015 02:10 PM
(بعد ما تكسر يد (المواطن) هل تتولي (الحكومة)علاجه وللا بخلوهو بأيدو (مدلدلة) ! ... دي بالغت فيها يا جبرة ... واحد ذكر بعض المكسورين من الجماعة ، بعضهم كسروهم من زماااان ... يا جبرة المكسور ما بيكسر ده هرطي ساي ... ناس زولك المكسور و حسنية خوجلي ديل لو جو في الزمن الصاح يمين بالله كانوا يغسلوا الحلل و ينضفوا الكمونية ، غير كده ما في ليهم شغلة ..


#1228985 [جنقو]
5.00/5 (1 صوت)

03-17-2015 02:00 PM
الان والان فقط انت شحذت سلاحك الساخر وعرفت اين موضع الجس..
وانها لكبيرة الا على الوطن...
ركبت الشارع


ردود على جنقو
[الدنقلاوي] 03-18-2015 01:47 AM
نعم يا جنقو الليلة جبرة فات الكبار والقدرو وفات نفسو ذاتا .. الله يبعد منه ناس النظام العام والجيران البحبو الملح والجيران الحاسدين والقوالين علشان الجو ده ما يكمل


#1228965 [نوم العافية]
0.00/5 (0 صوت)

03-17-2015 01:28 PM
هل سيتم تصدير الايادي المكسره الى دول الجوار حتى يأخذوا حذرهم


#1228954 [أبوسارة]
5.00/5 (1 صوت)

03-17-2015 01:15 PM
أكاد أري فيما يري النائم أن مصطفي الخائب في قبضة ثوار الشعب السوداني المنتفض وقد تم تكسير يديه الاثنين , ورأيت ضار علي ضار وكوعه قد دخل إلي حلقومه ,,,, قولوا آمين .


#1228950 [ود ميـــــــدوب]
0.00/5 (0 صوت)

03-17-2015 01:11 PM
(لو الزول أساسن أيدو مقطوعه؟ ح تقطعو ليهو شنوووو)
ما فاهم تقصد شنو.؟؟؟...
بمعنى لو ايدو اساسن مقطوعة يمدو كيف ؟؟؟
السؤال الاصح اذا الزول كسرو ليه يدو يصوت كيف ؟؟ واسمه يكون باقى ولا يمسحو من سجل الانتخابات ؟؟


#1228939 [Madam Maha]
0.00/5 (0 صوت)

03-17-2015 12:59 PM
اللة يجازي محنك يا ود جبرة..... ضحكتني ... بالمناسبة انا مع اقتراح الكسير الجماعي في الساحة الخضراء


#1228921 [أبو ياسر]
0.00/5 (0 صوت)

03-17-2015 12:41 PM
رائع يا أستاذ مقال معبر والله ضحكت حتى سالت دموعي . جزاك الله عنا كل خير في هذا الزمان الذي كثر فيه التجهم وصرة الوجه.


#1228919 [باب المندب]
0.00/5 (0 صوت)

03-17-2015 12:40 PM
كسرة يا ابوعلى
كسرى
كسار ضلوفن ( عى وزن ركاب سروجن ) ( يعنى سروجهن ويقصد الخي )
كسر البحر
كسر الترس ( تحصل دائما فى الخريف بضواحى العاصمة المثلثة )
كسر حاجز النحس ( امنية عند الفرق والجماهير الرياضية السودانية عند المشاركات الافريقية )
البيع بالكسر ( عادة تعلمها التجار فى عهد حكومة المشروع الحضارى )
كسار قلم ماكميكل ( وهو عمدة( كلى ) وقت كان الرجال رجال
البيع كسر ( ويعنى به البيع بأقل من التكلفة )
كسر اليد ( تهديد كيزانى اطلق عى لسان طبيب اسنان صغير ما كسر اسنان اللبن ) يدعى فى الاساقير بالطفل المعجزة وقد ظهر له منافس اخيرا من جوقة مرشحى الرئاسة القادمين الى الخلف والمتقهقرين الى الامام
كسر الدكان ( ان طاف عليه الحرامية وفلسوا بابه أو ( قدوا ) عرشه والناس نيام )
كسرتو ليك ( تعبير رياضى شائع عند مدافعى كرة القدم السودانية خاصة الباكات وهى عملية عرقلة لمهاجم الخصم ( الجناح ) ان كان ( فرفارة ) وهذه يأتى شرحها فى الافلام الجاية
كاسورى وهى عملية حربية صغيرة بين جماعتين من المراهفين ( يا دوب شمو صناحهم ) وقد تستعمل فيها عصى صغيرة أو الطوب والحجارة ويطلق على اصابة الرأس بها ( كسر رأس فلان بالطوبة )
كسار الجبور وهو بطل قومى فى ديار الجعليين الاصليين الكانو بيحاربو المستعمر الدخيل مش ناس كتفنى وتفنن فى الوان عذابى
وبمناسبة كلمة ( الوان ) فصاحبها ( حسينة خوجلى )هو اكبر كسار تلج


#1228918 [باب المندب]
0.00/5 (0 صوت)

03-17-2015 12:39 PM
كسرة تلج
كسرة يا ابوعلى
كسرى
كسار ضلوفن ( عى وزن ركاب سروجن ) ( يعنى سروجهن ويقصد الخي )
كسر البحر
كسر الترس ( تحصل دائما فى الخريف بضواحى العاصمة المثلثة )
كسر حاجز النحس ( امنية عند الفرق والجماهير الرياضية السودانية عند المشاركات الافريقية )
البيع بالكسر ( عادة تعلمها التجار فى عهد حكومة المشروع الحضارى )
كسار قلم ماكميكل ( وهو عمدة( كلى ) وقت كان الرجال رجال
البيع كسر ( ويعنى به البيع بأقل من التكلفة )
كسر اليد ( تهديد كيزانى اطلق عى لسان طبيب اسنان صغير ما كسر اسنان اللبن ) يدعى فى الاساقير بالطفل المعجزة وقد ظهر له منافس اخيرا من جوقة مرشحى الرئاسة القادمين الى الخلف والمتقهقرين الى الامام
كسر الدكان ( ان طاف عليه الحرامية وفلسوا بابه أو ( قدوا ) عرشه والناس نيام )
كسرتو ليك ( تعبير رياضى شائع عند مدافعى كرة القدم السودانية خاصة الباكات وهى عملية عرقلة لمهاجم الخصم ( الجناح ) ان كان ( فرفارة ) وهذه يأتى شرحها فى الافلام الجاية
كاسورى وهى عملية حربية صغيرة بين جماعتين من المراهفين ( يا دوب شمو صناحهم ) وقد تستعمل فيها عصى صغيرة أو الطوب والحجارة ويطلق على اصابة الرأس بها ( كسر رأس فلان بالطوبة )
كسار الجبور وهو بطل قومى فى ديار الجعليين الاصليين الكانو بيحاربو المستعمر الدخيل مش ناس كتفنى وتفنن فى الوان عذابى
وبمناسبة كلمة ( الوان ) فصاحبها ( حسينة خوجلى )هو اكبر كسار تلج


ردود على باب المندب
[حامد عوض] 03-17-2015 02:27 PM
كسر خاطر
كسر العنقريب (زمن الرجال البكسرو العناقريب مش ناس بشه)


#1228870 [حامد عوض]
5.00/5 (4 صوت)

03-17-2015 11:38 AM
أكثر قياديي المؤتمر الوطني مرونة.... ولييييونه وعيفووونه


ردود على حامد عوض
European Union [kaka] 03-17-2015 11:23 PM
ههههههههه ابداع


الفاتح جبرا
الفاتح جبرا

مساحة اعلانية
تقييم
10.00/10 (2 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة