12-03-2015 09:42 PM



الترابي بيتحرك وبيلم الناس في بيتو والصواني والرواني طالعة نازلة . عربات بنزين وكهرباء موية ونفايات ومواهي خدم وحشم وتلفونات خارجية ومحلية له ولاتباعه ، وهو لا عنده مترة ولا فراشة . القروش بتجي من وين ؟ زمان اهلنا بيقولواوبيسألوا لمن الزول مامعروف شغلو ودخلو ,, فلان ده بيملا الزير من وين ؟ ,, الزير زمان كان بيتملي بي قرش ، صفيحتان . حوالي 8 حالون او 32 لتر . الموية كان بيجيبها السقا من البير او البحر . في امدرمان كان السقا في الاول من الاخوة اليمنيين . الموية بالخرج علي ظهر الحمار . اشهر سقا في الدامركان اخونا الاستاذ السر قدورمتعه الله بالصحة .
الاخ الدكتور علي دياب اتي مع مجموعة من مبعوثي المالية لبراغ . وكان ابراهيم صالح وابراهيم عبيد وعبد الوهاب عثمان وزير المالية السابق "طيب الله ثراهم ,, يمازحونه . لانه محسي نشأ في مصر لم يعرف قوانين اللعبة . سلموه الضرائب قام بمطالبة دائرة المهدي وآل الميرغني بالضرائب وعندما لم يردوا عليه عمل عليهم حجز، حسب القانون . وهذا في ايام الديمقراطية الثانية . واضطر وكيل الوزارة مصباح وآخرين بالاعتذار للسادة . ووصف علي بأنه شيوعي حاقد ومحرش. وعلي لم يكن عنده اي انتماء سياسي . كان سودانيا غيورا .
كنا نسمع عن الشباب الذي كانوا يصطادونهم في الشوارع ويجدون انفسهم في الجنوب للحرب . احدهم كان يحمل كيس بصل من الدكان . واحد المعلمين الكبار المعروفين اراد ان يعترض علي الاسلوب الوحشي ، فتعرض للإهانة والضرب والاعتقال . ودي كانت سياسة شيخ حسن الما معروف بيملا الزير من وين .
هل اولاد الميرغني ديل ادوا الخدمة العسكرية . وفي حالة الاجابة بنعم ، في ياتو متحرك . هل هو متحرك الفتة ام متحرك الرز باللبن ؟ قال شنو ؟ ... بلد ديمقراطي ... محن .
كركاسة
طالبت كثيرا .طرحت السؤال المهم اين شارع ملكة نساء السودان ، المناضلة الدكتورة خالدة زاهر الساداتي طيب الله ثراها. من المفروض ان يطلق اسمها علي حي بكامله . الحكومة لا تهتم , لماذا لا يتحرك نساء ورجال امدرمان ويطلقون علي الشارع الذي يمتد من شارع الموردة الي شمال الريفيرا باسم الدكتورة خالدة زاهر . ولماذا لا يطلق علي الحي كله اسم المناضلة بدلا عن فريق ريد المفتش الانجليزي .


[email protected]

تعليقات 13 | إهداء 0 | زيارات 5496

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1380558 [عمر الحاج حلفاوي]
0.00/5 (0 صوت)

12-05-2015 08:34 PM
الاستاذ شوقي متعك الله بالصحة والعافية كلامك كله جميل وصحيح فقط اختلف معك في تغير اسم شارع المفتش الانجليزي طبعا د .خالدة زاهر يجب ان يطلقوا اسمها علي معظم شوارع ومستشفيات السودان لكن المشكلة عندنا اننا دائما نزور التاريخ ونقيم الاحتفالات الكبري باقامة مشاريع وكذا وكذا والحقيقة اننا نغير الاسم فقط جامعة كسلا وتكون مدرسة كسلا الثانوية وكل جامعات السودان الحالية كلها كانت مدارس محترمة سابقا حتي بخت الرضا دمروها وسموها ما عارف جامعة شنو وكل المشاريع التي تشاهدا كانت اشياء موجودة اجهزوا عليها ودمروها ومن ثم غيروا الاسم وعملوا احتفالات لذلك اريدك وانت رجل وثائقي ان تبقي الاسماء القديمة تذكر الاجيال القادمة بماضي السودان..


ردود على عمر الحاج حلفاوي
[shawgi badri] 12-06-2015 12:10 PM
العزيز عمر لك التحية . هذا الشارع الذي اقترحته مثل كل الشوارع لا اسم له ز والجزء الشرقي من الموردة حيث منزل العم زاهر سرور ليس له اسم . لكن كنا بنقول فريق ريد لانه كان للمفتش ريد منزلا في مواجهة الريفيرا .
الساحة امام قلعة صالح جبريل كنا بنلعب فيها فيها الدافوري . وتعرف بالفسحة . بعد جهد تمكنا من اطلاق اسم توفيق صالح جبريل الشاعر . وعرفت كذالك بحديقة العشاق بسبب قصيدته حديقة العشاق . ,, كسلا اشرقت بها شمس وجدي ,, التي يغنيها الكابلي .
لماذالا يطلق اسمها علي كلية طبية . او عنبر او مؤسسة طبية ، مستشفي ؟؟؟


#1380536 [الأزهري]
0.00/5 (0 صوت)

12-05-2015 08:03 PM
بالله الاستاذ السر قدور متعه الله بالصحة في البدء كان خرَّاجي، ثم إعلامي وشاعر وربما جرب الغنا لكن يبدو ان الصوت ما ساعده، والله هذا من دواعي الفخر له والانفخار به لعصاميته وعزيمته القوية


#1380129 [سودانى طافش]
0.00/5 (0 صوت)

12-04-2015 06:10 PM
شكرا العم شوقى على المعلومة .. عمرى كله كنت فاكر فريق ( ريد ) يعنى شارع فيهو حب وكدا ..!


#1380101 [محجوب عبد المنعم حسن معني]
0.00/5 (0 صوت)

12-04-2015 03:48 PM
انسان الشرق ولؤم المركز
----
هل هو مركب نقص ؟
----
اين هذه المواضيع يا ادارة الراكوبة
لماذا لم تنشر، كما ذكر العم شوقي بدري
مع مودتي


#1380072 [شجرة التبلدي]
0.00/5 (0 صوت)

12-04-2015 01:07 PM
العم شوقي بدي انت دائما ممتع ومبدع, اطال الله عمرك ومتعك بالصحة والعافية وسددك خطاك


#1379999 [abumohamed]
0.00/5 (0 صوت)

12-04-2015 08:10 AM
بالفعل يا عم شوقى الدكتورة خالدة تستحق التكريم من الشعب , فقد كانت عيادتها في ام درمان مفتوحة لمعالجة نساء السودان

اقترح تسمية الشارع الذى ذكره العم شوقى باسم خالدة زاهر ( أم خالد )

وهو الشارع الذى يبدأ من جنوب نادى الضباط ويتجه شرقا مارا جنوب منزل عمنا زاهر سرور السادات الى ان يصل النيل شمال الريفيرا,

كذلك يمكن تسمية مدرسة البنات غرب شارع الموردة باسم خالدة زاهر , وهذه المدرسة كنا نسميها مدرسة بسملة ( مس ملر )

لك الشكر عمنا الرائع شوقى والرحمة للدكتورة خالدة , والتحيه لأبن دفعتى خالد عثمان نجل الدكتورة خالدة .


ردود على abumohamed
[shawgi badri] 12-04-2015 02:52 PM
¨يابومحمد لك التحيىة . امثال البطلة خالدة زاهر تقام لهم التماثيل في بعض الدول لقد نسي السودايون عظماءهم ويطلقون اسماء لا دخل لهل بالسودان علي الاحياء والشوارع . نحن شعب اراد ان يكون مسكينا . هل يذكر السودانيون والد خالدة البطل زاهر الساداتي ؟؟


#1379991 [حاج علي]
0.00/5 (0 صوت)

12-04-2015 07:36 AM
والله يا شوقي عندك جنس خبارات وشمارات
طلعت الراجل كان ببيع الموية في الدامر
غايتو انا سمعت كان جرسون في قهاوي كبوشية
والشغلتين من اشرف المهن
بس جاء امدرمان وباع الموية في حارة السقايين
ومن سوق الموية وجورج مشرقي اصبح مبدع له التحية وطولة العمر


ردود على حاج علي
[هاشم محمد أحمد] 12-04-2015 09:45 PM
يا أخي خلي العنصرية و دع ألف زهرة تتفتح.الراجل إجتهد و إرتقي إلي مكانة عالية و أصبح شخصية قومية,فلم العقد.
لو قلت ليك أنا رعيت الغنم في ودنوباوي ما حتصدق.أم درمان كانت مجتمع قروي وقته,أي في سني الستينات الماضية.لم يكن يعرف الناس وقته سيد اللبن و لا لبن البودرة.كانوا يربون الغنم للبن و كانوا أصحاء و سعداء.
نشأنا في ودنوباوي و أقمنا فيها عشرة سنين,حيث عمل والدنا مشرف تربوي في المرحلة الأولية في مدارس أم درمان.و فور تقاعد والدنا بالمعاش إنتقلنا و إستقرينا في بلدنا في دنقلا العجوز. و ذات يوم إستفزني زملائي :ولاد الناظر متقرضمين ...ما بيعرفوا يحلبوا البقرة...ألخ.إستفزني هذا الكلام و حاولت أحلب البقرة,لكنها لفختني. و من يومه لم أحلب البقرة.لكن هل أنا متقرضم و منفصم عن مجتمعي؟
أبنائي يعيشون في فيرجينيا.حيث أعمل محاضرآ في جامعتها و حيث نشأوا.هم مساكين لا يعرفون شيئآ عن الحياة في بلدنا.لا يرطنون و لا يعرفون كيف يعيش الناس هناك إلا القليل.تجدهم متشوقين للكنتري,أي البلد.تقول لي إبنتي فاطمة بلهجة خليط سوداني و إسكندراني و أمريكي :بابا إمتي حنروحوا الكنتري؟ و هناك يجدون سعادتهم في ركوب الحمير و الفنجيط و العوم في النيل و غيره من الرياضات عندما يسافرون إلي هناك كل سنتين.
هذا وزمانهم و هذه حياتهم و لن نعلم أولادنا أخلاقنا فهم خلقوا لزمان آخر.لكن ينازعني ما يمكن تسميته الصراع الحضاري.


#1379974 [باكاش]
0.00/5 (0 صوت)

12-04-2015 04:19 AM
ههههههههههههههه مادمرت السر قدور لكن.


ردود على باكاش
[باكاش] 12-05-2015 08:47 AM
ههههههه والله بهظر يا عمنا الشغل حق الرجال كلنا اشتغلنا في الاجازات في القشارت والميناء ليك العتبي حتي ترضي ياجميييييييييييل.

[باكاش] 12-05-2015 08:37 AM
ههههههه والله بهظر يا عمنا شوقي
الشغل حق الرجال اشتغلنا في الاجازات في القشارات والميناء بهظر يا جميل.

[shawgi badri] 12-04-2015 01:17 PM
كيف دمرت اخي السر ؟ لقد كتبت بأنني عملت في اوربا بغسل الاطباق وعملت في جمع الزبالة وحملها . وكنت منظف شبابيك اتعلق في العمارات . واضيف ع . س . لاسمي وتعني عنالي سابق . لانني عملت اسنين كعتالي في مواني اوربا . وجنايني ونربال في اوربا . وعملت في السودان كعجلاتي ونقاش ونجار ونواتي وحواتي . اين المشكلة .
السر قال وكتب انه كان يعمل كسقي . ولكن المالك ظلمه لانه قال ان للسر الثلث والمالك الثلث والحمار الثلث . وكان السر يضحك وهنا عظمة السر . هذه اشادة بالسر وتأكيدا لعظته . لانه اليوم شخصية وطنية . اين الذين ولدوا وفي افواههم ملاعق من ذهب من السر .


#1379964 [ود ااكوتش]
0.00/5 (0 صوت)

12-04-2015 03:39 AM
والله ياعم شوقي سؤالك ده من زمان محيرنا والنظريه الاقنعت نفسي بيها سمعتها من شاب في أب حراز - مدني ،ايام الترابي مع الجماعه قال لينا انه الترابي عنده مكنة طباعه في بيته وتفسيره كان منطقي وقتها انه اذا مسكت ورقتين من قيمة الألف جنيه حتلقى في اختلاف في نوعية الورق
يمكن كلامه صائب ويمكن خائب نسبة للتزوير الكان حاصل في البلد وبقى مابتقدر تستلم حتى طابعة كمبيوتر بسيطة ومتعددة الاستخدام مرسلها ليك خالك من الخليج الا بعد استخراج إذن من الأمن وكتابة تعهد خطي ، لكن المسلط ده تتوقع منه أي حاجه لمصلحته الشخصيه


#1379919 [محجوب عبد المنعم حسن معني]
0.00/5 (0 صوت)

12-03-2015 10:45 PM
ولا تزعل يا عمنا العزيز، انا من الليلة شارع الموردة بسميه بشارع الكتورة خالد زاهر .
مع مودتي


ردود على محجوب عبد المنعم حسن معني
[shawgi badri] 12-04-2015 07:46 AM
محجوب الغالي ليك تحية وود .سيعنرض البعض علي شارع الموردة . نسمي الحي او الشارع البيربط الموردة والريفيرا .


#1379917 [A. Rahman]
0.00/5 (0 صوت)

12-03-2015 10:40 PM
يا أستاذ شوقي أيام المؤتمر الشعبي الإسلامي المش عارف إيه داك، كان حسن الترابي اميناً عاماً له و كان تحت تصرفه ملايين الدولارات التي انهمرت على مؤتمره ذاك كوعاء لأموال حركة الإخوان المسلمين، و ارتعدت قلوبهم عندما دخل في غيبوبة بكندا نتيجة "لدفرة" هاشم بدر الدين، متعه الله بالصحة و العافية، و هي كانت دفرة لأنه هاشم لو ضربه كان سلَم النَمر. و تلك الأموال لا زالت بحوزته، أمال انت قايل من المفاصلة القرضاوي و يكن و الزنداني كانوا رايحين جايين رايحين جايين رايحين جايين على الخرطوم لإعادة المياه لمجاريها ليه؟ ما هو عشان القروش دي. و هذا ليس اجتهاد بل معلومة من سوداني عمل لفترة في أحد بنوك الأوفشور بجزرالبهاما. عرفت يا شوقي الصواني داخلة و خارجة ليه، و بالمناسبة هو ليس رجلاً أكولاً و يحافظ على وزنه، لكن ماسكهك من لغالبغهم بالصواني دي.


ردود على A. Rahman
[shawgi badri] 12-04-2015 07:26 AM
عليك نور ياعبد الرحمن انت كده جبت السبع من ديله . علشان الناس تعرف انه كلام هي لله هي لله وما لدنيا قد عملنا .... كله كلام فارغ . ولد احمد عمر المتزوج بت بت السيد عبد الرحمن انتقل الي جوار ربة وحصلت شكلة في الفلوس الكانت باسمه . انا في الحقيقة كنت بفكر بصوت مكتوب . لانو ابن الترابي عصام اشتكي انه بعد ابوه ما اعتقلوه بقت تجيهم فواتير للكهرباء وحاجات تاني زمان ماكان بتجيهم . لسة في ناس مغشوشة .


#1379911 [امين جادين]
0.00/5 (0 صوت)

12-03-2015 10:21 PM
استاذ شوقي يجب إطلاق اسم دكتورة خالدة وآخر على قاعات الطب في الخرطوم وان درمان
في ازيار كتيييييييرة بتتملي سمبله ومن دم الشعب السوداني الفضل
وعيال الميرغني كانوا في متحرك نظرةياابوهاشم


#1379904 [ود ابوراس]
5.00/5 (1 صوت)

12-03-2015 09:54 PM
العم شوقى٠ المقال اليوم مالو شويه كده


ردود على ود ابوراس
[بشرى النور] 12-04-2015 03:45 PM
ده مش مقال يا ود ابو راس ده ساندوتش او ان شئت فقل مزة او تصبيرة
من عمكم شوقى على بال ما تجيكم السفرة فيها الضلع والحاجات المسبكة
وحلو الكلام والتاريخ الما لعب وانا امدرمان وانا السودان

[جنوبي] 12-04-2015 10:50 AM
والله ما قلته الا الحق يا ابو راس عمنا شوقي الليله حيرنا معاه

[shawgi badri] 12-04-2015 07:42 AM
الموضوع المفروض يتنشر هو انسان الشرق ولؤم المركز .موضوع تاني بعنوان هل هو مركب نقص ؟ظ ولم تنشر الراكوبة اى منهما . وربما انهم مش مناسبين للنشر فقمت بارسال هذه الخاطرة . الكتابة حارة وبتاخد جهد ووقت .


شوقى بدرى
شوقى بدرى

مساحة اعلانية
تقييم
10.00/10 (1 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة