04-09-2015 04:53 PM


انتشرت في الآونة الأخيرة ألقاب لا يدرك العبد لله كنهها، ولا يعلم متطلبات (نيلها)، يستضيف أحد البرامج السياسية أحدهم فيقوم مقدم البرنامج بتعريفه للمشاهدين بأنه الأستاذ فلان الفلاني (الباحث في شؤون الثورات العربية)، أو يستضيف أحد أستوديوهات التحليل الكروي أحدهم مقدماً أياه.. الكابتن علان العلاني (الخبير) في (دائرة السنتر)!.
ومع انتشار (الخبراء) و(الباحثين) عندنا في كل المجالات إلا أننا نعيش إخفاقات وتردٍ (معتق)، وقصور باين في كافة المرافق والخدمات، قصور طال أمده واستفحل لسنوات طوال من غير (مجرد أمل) في تلافيه، أو إيجاد بعض الحلول التي من الممكن أن تحسن منه قليلاً.
هذه المرافق والخدمات المتدهورة كالصحة والتعليم والطرق (مثال) يبدو أن حلها الجذري يكمن في اللجوء إلى الخبرات الأجنبية، وأعتقد أن أكثر مجالين يحتاجان إلى (إسعاف عاجل)، وإلى خبير أجنبي (سرو باتع)، هما مجالا (الكهرباء والكورة)، فقد أصبح الخلل فيهما واضحاً على الرغم من (القروش الاتصرفت فيهم)؛ لذا فالعبد لله يدعو المسؤولين (الكبار طبعن) إلى العمل على استيراد عدد واحد خبير (كهربجي) أجنبي عشان ينتهي لينا من مسألة (الكهرباء) دي ونخلص، وكمان واحد خبير (كورنجي) أجنبي يرجع لينا الكورة دي أربعين سنة لي وراء أيام ناس جكسا وماجد وقاقرين والدحيش علشان ما يطق في المشجعين ديل (عرق) يلحقهم أمات طه وهم يشاهدون هذا العك والرفس والشليت الذي لا يمت للكرة بشيء.
قد يتساءل البعض عن الآلية التي سوف يتم بها استيراد هذا الخبير، العبد لله يعتقد أن المسألة لا بد أن يكون فيها قدر من السرية؛ إذ لا يصح أن تقوم الحكومة بعمل إعلان في الصحف العالمية تعلن فيه حاجتها إلى استيراد واحد خبير (خواجة) متخصص في (متابعة) سير (التيار) من (السدود) حتى (البيوت)، لأنو حاجة (تكسف) أن تعلن بلد بحالها نجاحها في بناء (سد)، وعجزها عن توفير الكهرباء (الطالعة منو).
وبما إن حكومتنا المجيدة تدعو إلى التقشف، وترشيد الإنفاق، أقترح أن يكون ذات الخبير بيفهم في الكورة برضو- يعني يكون خبير (كورة وكهرباء)؛ عشان بعد ما ينتهي لينا من موضوع (الكهرباء)، يقوم يقبل لينا على موضوع (الكورة)، وينجضو لينا وبي أقل التكاليف!.
وحتى لا نكون عرضة إلى التهكم من (اليسوى واللي ما يسواش)، والناس تقول علينا (عملو السد وما قدرو يوصلو كهربتو)، فأنا أعتقد أن يتم التعاقد دون ذلك الإعلان، وبصورة شخصية (كتامي)، وأن يتم تكوين وفد عالي المستوى؛ من أجل إنجاز هذه المهمة، يجوب بلاد العالم المتحضر، متسائلاً في كل قطر يزوره:
- يا جماعة ما عندكم لينا خبير (كورة) وتوصيل تيار سدود؟!.
حتى إذا ظفر أعضاء الوفد بأحد الخبراء واطلعوا على ملف سيرته الذاتية واتضح لهم أن (الخواجة) خبير (كورة وكهرباء) وقعوا معه عقداً، وأحضروه معهم على نفس الطائرة:
- شوف يا خواجة الكهرباء دي زمااان كانت بتقطع عندنا عادي.. ساعة ساعتين تلاتة في اليوم.. مرة تقطع هنا، ومرة تقطع هناك، لكن بعد ما عملنا (السد) ده بقت تقطع كلو كلو، وبقت البلد كووولها تقعد بالساعات في (إظلام شامل)!، وكمان شوف لينا معاكا (كورتنا) دي زمان ما كنا بنصرف عليها ولا مليم لكن كانت عال العال نلاقي (الهونفيد) نغلبو نلاقي (الجن الأزرق) نغلبو، لكن بعد ما بقينا نصرف عليها ملايين الدولارات بقينا ملطشة، وما شلنا لينا ولا (علبة صلصة)!.
- أوكى ... أوكي خواجة يشوف أول كهرباء بعدين يشوف كورة، بعدين يوريكم الحاصل شنو.
قام (الخواجة) بزيارات ميدانية شملت كل المحطات الحرارية والمدارية والسدود والخزانات وتحصل على صورة من جميع الدراسات التي تخصها، وكل البيانات اللازمة، ثم بعد ذلك قام بزيارة ميدانية إلى كل الإستادات، والميادين، والفرق الرياضية، وتم تزويده بالسيرة الذاتية لكل الإداريين، والحكام، ولجان التدريب، واللاعبين، حتى المشجعين، بعدها طلب الخواجة أن يعتكف في مقر إقامته يومين؛ لدراسة المشكلتين ومعرفة الإخفاقات التي تلازمانهما!.
- أها يا خواجة ما توصلتا لي مشكلتنا مع الكورة والكهرباء لسه؟، ما لقيت لينا حل؟.
- مفيش حل.. مفيش فائدة.. الظاهر إنو مكتوب عليكم أي (كهرباء) تولدوها (تطلع) برة الشبكة.. وأي لاعب تجيبوهو (يطلع) ماسورة!.

كسرة:
الغريبة عندنا حاجه اسمها (خبير وطني)، وما بعيد على كده يكون عندنا خبير (شعبي).
كسرة ثابتة (قديمة):
أخبار ملف خط هيثرو العند النائب العام شنو (وووووووووووو) + (وووووووووووو) + (وووووووووووو) +و+(و)+(و)+و+و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو (وووو وووو وووو) + (ووووووووو) +(و)+(و)+و+و


تعليقات 11 | إهداء 0 | زيارات 6316

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1245186 [البصير ابو حمد]
0.00/5 (0 صوت)

04-12-2015 12:17 PM
وفى خبير (نسوانى ) اسمو ابو الدفاع ماتنسوه


#1245072 [جنو منو]
0.00/5 (0 صوت)

04-12-2015 10:08 AM
أفضل لنا العودة لحاجه ونسينى بالزيت وكدة ..


#1244644 [ود البجا]
0.00/5 (0 صوت)

04-11-2015 03:00 PM
والله ضحكتني يا جبرة يا أب دمن خفيف . قلت الجماعة عملوا سدود وما قدروا يوصلوا كهربتها.إنت متأكد أنها سدود ولا مسطحات مائية .
مرة في وزارة كبيرة ومهمة مدير إدارة ما عارف يقرأ التقرير ، ولا قادر يفهم الملخص ولا الرسوم البيانية ، تتخيل ناداني وسألني ، الشخبطة دي شنو أفهما لي وأكتب لي بيها تقرير بالعربي الفصيح ، عارف الشخبطة دي كانت شنو ، Flowchart (رسم بياني انسيابي) و هي ملخص و خلاصة الشغل بتاع تلاتة أيام في ورشة للجنة التي كان يرأسها مع الوفد الأجنبي ، واللي مفروض هو يجسدها على الواقع كسياسات . ولكن هيهات .


#1244559 [radar]
0.00/5 (0 صوت)

04-11-2015 12:13 PM
أنا شخصيا منتظر رد ربيع عبد العالطي ومصطفى اسماعيل (المعجزة) في حكاية قيام وزير العدل باطلاق سراح مدني وابوعيس. أسماعيل قال انهم كانوا كونوا خلايا نائمة لتخريب الانتخابات ولكن كيف يفكوهم قبل الانتخابات أما الخبير الوطني فقد كذب بما لم تكذب به الأوائل.


#1243936 [karbinto]
5.00/5 (1 صوت)

04-10-2015 12:47 AM
فصدك خبير وللا خابور ياجبره


#1243902 [عصمتووف]
5.00/5 (2 صوت)

04-09-2015 10:53 PM
ما دام ربيع عبدالعاطي خبير عاوز شنو اكثر من كده


#1243895 [ابوعبدالله]
5.00/5 (1 صوت)

04-09-2015 10:29 PM
ياخي طلع واحد قبل ايام في احدى القنوات قال خبير تحليل شخصيات وكان بحلل في شخصية رئيس الجمهورية عمر البشير وهاك ياتحليل طبعا" من تقسيمات الوجه وشبههة بعدم الخوف برئيس امريكا


#1243879 [Awad]
5.00/5 (2 صوت)

04-09-2015 09:35 PM
يا جبرة بدون لف ودوران ماهو خبيرنا الوطنى(ربيع عبدالعاطى) بفهم فى الكلو(كهرباء- كورة- سياسة- تأجير شقق) وعييييييييييييييييييك ده بفهم فى كل شىء ولو ماكان بفهم ماجابوه شاهد وخبير فى قضية المناضلين(أبوعيسى وأمين مكى).


#1243849 [Takawai El Balawi]
0.00/5 (0 صوت)

04-09-2015 08:06 PM
رائع يا جبرة كالعادة.
عليك اللة اكتب لينا عن الخبراء الوطنيين التايوانيين ( مواسير يعنى). ديل دايرين ياكلو ال ألألف و ألألفين (رزالة مش كدة ؟) و تلقاهم اثناء الأجتماعات يداعبوا فى الوتساب (طفولة متأخرة مش كدة ) و يا كافى البلاء عند الحديث لا يعرفوا عربى و لا أنجليزى ( لأنو مشوا أمورهم بلأوآىنطة و كسير التلج) و يساعدوا كلامهم بأبتسامة باهتة أو نكتة بايخة . المؤسف عند اتخاذ القرار يجروا للوزير . كلامهم كلو الوزير قال / الوزير نادانى / ماشى للوزير . طيب يا ألأسد انت ما ياك الخبير و ياك الأستاذ . عالم تخاف ما تختشيش .


#1243801 [fatmon]
0.00/5 (0 صوت)

04-09-2015 06:07 PM
تم انشاء موقع لاستطلاع اراء السودانيين عن ترشيح عمر البشير لرئاسة الجمهورية.
الرجاء التصويت عبر الرابط وتمرير الرسالة لكل القروبات المضافة اليك. الهدف هو محاولة محايدة لمعرفة راي الشعب السوداني بمختلف اطيافه واتجاهاته السياسية.
الرجاء تمرير الرسالة لكل من تعرف معارضا كان او مؤيدا
http://www.easypolls.net/poll.html?p=55259e5be4b07084151c8e8e


ردود على fatmon
[EzzSudan] 04-11-2015 09:41 AM
Who did established this web site !!!!!?

European Union [سم زعاف] 04-10-2015 09:36 AM
يا Fatmon الرسالة تقول "Poll i not available"


#1243785 [khalid osman]
5.00/5 (4 صوت)

04-09-2015 05:41 PM
كمان يا استاذ ماتنسى يجيبوا لينا كم معلق مباريات....زى البقول ليك .. عبقري كورة ... متمكن .. فنان مبدع.... والله تسمع التعليق تموت من الضحك.....


الفاتح جبرا
الفاتح جبرا

مساحة اعلانية
تقييم
10.00/10 (3 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة