04-12-2015 11:32 PM


قال لي صديقي (ياسر) الذي يشغل منصب المدير العام لإحدى الشركات:
- يا أستاذ كتاباتك كلها عن الأشياء السلبية.. البلد دي ما فيها حاجة إيجابية تكتبوا لينا فيها؟
- قلت له: والله لو شفنا شيء إيجابي بنكتب.
- قال لي: هل تعلم أن هنالك شركة سودانية (عالمية) خرجت من عباءة المفاهيم التقليدية (للبيزنيس) المتمثلة في التوسع وجني الأرباح وتوزيعها على المساهمين، وأصبحت تشارك مشاركة فاعلة في بناء ونهضة المجتمع (السوداني)؟!
- قلت له: يعني شنووو؟ أنا بعرف شركات (كتيرة) تشارك في كثير من الأنشطة الاجتماعية.
- قال لي: معظم شركاتنا، خاصة الكبيرة منها مشغولة بتحقيق مكاسب أصحابها فقط دون أن يكون لها دور فعَّال في تنمية المجتمع أو المشاركة في قضاياه المختلفة.
- والشركة الإنتا قاصدا دي عملت شنووو يعني؟
- الشركة القاصدا دي عندها مشروع سنوي اسمو (21 يوماً لخدمة المجتمع) يبدأ في الأول من يونيو، ويستمر لحدت يوم واحد وعشرين.. في الواحد وعشرين يوم دي الموظفين كووولهم بمختلف درجاتهم الوظيفية (من المدير العام وإنتا نازل) بيطلعوا من مكاتبهم (المكيفة) عشان يخدموا المجتمع.. يعني ممكن تلاقي المدير العام طالع ليهو في سلم (بيضرب بوهية) ونائب المدير العام ماسك ليهو (مسطرينه بيبني) وواحد من رؤساء الأقسام بيعجن ليهو في (مونة) !
بيني وبينكم الكلام ده (ما وقع ليا في رأسي) فطلبت من صديقي (ياسر) أن يعطيني أمثلة لما قامت به هذه الشركة من (أعمال) فأخرج (ورقة من درج مكتبه) وقال لي (أمسك عندك):
1- ساهم موظفو الشركة في أعمال تأهيل دار المايقوما للأطفال مجهولي الأبوين، وشملت أعمال الصيانة دار الأطفال فاقدي السند وتوسيع الصيدلية وإنشاء صهريج مياه وتقديم معينات عينية.
2- قام الموظفون خلال (الواحد وعشرين يوم دي) بإعادة تأهيل دار العجزة (الضو حجوج) وشمل المشروع الصيانة للدار والتبرع بأجهزة حاسوب ومولد كهربائي وإقامة يوم علاجي، ودعم المسنين بالملبوسات، بجانب تنفيذ جولة ترفيهية لهم داخل العاصمة.
3- قام موظفو الشركة بدعم (دار الرشاد للأطفال المشردين) إلى جانب إقامة يوم ترفيهي ليهم بمستشفى التجاني الماحي، وقدموا للمشردين ملبوسات أجهزة تلفاز بالإضافة إلى ملبوسات ومعدات رياضية ومواد الرسم.
4- بادر موظفو الشركة خلال هذه المبادرة السنوية (الواحد وعشرين يوم) بتنفيذ مشروع تدريب النساء ذوات الإعاقة الحركية لمبادئ الحاسوب والانترنت، وتم تدريب عدد 90 دارسة علماً بأن المشروع يستهدف عدد 450 دارسة.
5- قام ّ موظفو (الشركة) بأعمال الصيانة والترميم وإعادة تأهيل مباني مدرسة الصم والبكم بالخرطوم 2 حيث تمت صيانة المدرسة من الداخل والخارج، وصيانة مرافقها المختلفة: فصول، استراحات، المصلّى، ومكاتب الإدارة، وذلك حتى يجد تلاميذ هذه المدرسة بيئة دراسية مهيئة بإنتظارهم عند إنطلاق العام الدراسي الجديد.
أراد صديقي (ياسر) الإستطراد في سرد ما قامت به هذه الشركة لكنني قاطعته قائلاً:
- شوف يا ياسر.. جميل جداً إنو الشركات الكبيرة دي تطلع بمسؤوليتها الإجتماعية تجاه المجتمع العايشة فيهو.. وجميل جداً إنو الشركة القلتها دي تستن ليها سنة زي دي وتخصص ليها 21 يوما كل سنة عشان الموظفين بتوعنها يطلعوا من مكاتبهم ويخدموا المجتمع وده شئ تشكر عليهو.. لكن
وهنا قاطعني صديقي (ياسر) قائلاً:
- طيب وكت دي حاجه كويسه ليه ما بتكتبوا عنهم؟
- أنا شخصياً ح أكتب ليك عنهم في عمودي بس بشرط
- شرطك شنووو؟
- زي ما قلتا ليكا شئ جميل إنو الشركة دي تخصص ليها 21 يوما من كل سنة لخدمة المجتمع.. لكن أنا شايف إنو حقو الشركات الكبيرة دي بدل ما تشتت مجهوداتها في (صيانة المدارس) وتأهيل (المعاقين) وحفر (الآبار) وإجلاس (التلاميذ) والحاجات الكتيره دي تعمل لينا حاجة واحدة (ضخمة) تخلد بيها إسمها وتقعد ليها صدقة جارية على مر الزمن ويستفيد منها كل الشعب السوداني !!
- زي شنوو؟
- مثلاً (مستشفى لسرطان الثدي) !!
- والله كلامك في محلو يا أستاذ !!
- خلينا من محلو ولا ما محلو .. الشركة إسمها شنوو؟
- الشركة هي شركة (إم تي إن) MTN
- يبقى خلاس.. مستشفى MTN لسرطان الثدي !!
كسرة:
قال لي صديقي (ياسر) وأنا أغادر مكتبه: يا أستاذ والله ورطتنا معاهم جنس توريطه !
كسرة تانية:
شكراً لشركة MTN على ما تقوم به من مشروعات مقدرة تخدم المجتمع.. ونحن في إنتظار (المستشفى) وللا من بكره نعمل ليكم كسرة: أخبار مستشفى MTN لسرطان الثدي شنوووووووووووووووووو!

كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و+و.

التيار

تعليقات 15 | إهداء 0 | زيارات 5816

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1273136 [Dr. Sarah Waleed]
0.00/5 (0 صوت)

05-26-2015 06:11 AM
يا ريت و الله يا أستاذ .. سرطان الثدي يحتاج لمستشفيات .. و هو يمثل 29 -34% من كل أمراض السرطان لدى النساء في السودان .. و في العام السابق استقبل مستشفى الذرة ما يزيد على 1200 حالة .. و معظمها في المرحلتين الثالثة و الرابعة ..

نسأل الله عاجل الشفاء لجميع المرضى ..


#1246124 [انسان حقاني]
5.00/5 (2 صوت)

04-13-2015 07:59 PM
طلعت خطيييييييير ياجبرة في الدعاية
الجماعة عارفين ان متابعنك كتار فقاموا اتفقوا معاك على صياغة دعاية في شكل مقال
وتبرز لينا فيها دور الشركة الاجتماعي

مفروض الراكوبة تاخد حق الدعاية منك


#1246110 [ابوعبدالله]
0.00/5 (0 صوت)

04-13-2015 07:27 PM
اذا كان الواحد وعشرين يوم دي مصحوبة بكاميرا واعلام يبقى المسألة دعاية ونحن نتمنى حسن النية والعمل لوجه الله خاصة لو كان مستشفى للاورام.


#1246008 [صادميم]
0.00/5 (0 صوت)

04-13-2015 04:37 PM
ليه MTN ليه ما زين او سوداني انت عارف حاجه و ما عايز تقولها هل هنالك علاقة بين شركة MTN و المليونير مو ابراهيم الذي أسست زوجته مستشفي خاص بسرطان الثدي الذي يقع قرب مركز عفراء التجاري و عايز تقول انه بالرغم من انه مستشفى خيري الا انه يأخذ مبالغ كبيرة في فحص الثدي و علاج سرطانه.


ردود على صادميم
[صادميم] 05-26-2015 01:59 PM
انا قلت انه أسس ليكون مستشفاً خيرياً ولكنه رغم ذلك يتقاضى مبالغ طائلة من المريضات

European Union [Dr. Sarah Waleed] 05-26-2015 06:05 AM
مستشفى خيري!!!!!!
هذا غير صحيح بالمرة و الشاهد أن الكثير من المريضات -شفاهن الله- يحصلن على العلاج من المركز القومي للعلاج بالأشعة و الطب النووي - مستشفى الذرة


#1245928 [هجو نصر]
0.00/5 (0 صوت)

04-13-2015 02:22 PM
يا سيد اسماعيل ادم والله اقتراحك تمام ووريتنا ماثرة المحسن مو وزوجته بارك الله لهما في مالهما . يا سيدي الافكار بالكوم زي ماء النيل وخيرات النيل . ومع ذلك....ومع ذلك ! كما تفجع المرحوم الشاعر صلاح احمد ابراهيم


#1245896 [صلاح بخيت]
0.00/5 (0 صوت)

04-13-2015 01:44 PM
معقوله لم يقرأ السيد الرئيس كلام الفاتح جبرا ده الذي مر عليه عدد سنين او واحد من الوزراء لكي يفتوننا بما وصل إليه هذا الموضوع . ولا حوله ولا قوة إلا بالله .


#1245836 [أبوقرجة]
0.00/5 (0 صوت)

04-13-2015 12:15 PM
MTN دي شركة الاتصالات..... الموقعها جنوب أفريقيا...


لو هي معروفه بتاعت رئيس وزراء لبنان الأسبق (نجيب ميقاتي) ... والله دي قرش ما تدفعوا ليكم. ولا بتعمل حاجه ... والكسره الجايه يا استاذنا وعملتوا شنو في المستشفى يا ام تي ان خليها بالطنبور


#1245696 [جنو منو]
0.00/5 (0 صوت)

04-13-2015 09:23 AM
عشان يجىء مامون حميدة البلدوزر يكسروا ليكم ثانى يوم ويقول ليكم توزيع الخدمات الى الاطراف
وحجوة ام ضبيبينةبتاعتو دى .. والمقاول الكبير يشد من ازرة.. أقترح عليهم ياجبرة يعملوا مشاريع
انتاجية لدعم الاسر .. الناس جعانة ياجبرة .. والجوع هو سبب المرض .. والوقاية خير من العلاج ...
الكسرة الجديده مافى داعى ليها .. السابقات ماذا فعلن .!!


#1245694 [Ismail adam]
5.00/5 (2 صوت)

04-13-2015 09:16 AM
الأستاذ جبرة
جميل ما تكتب!و جميل جداً متابعتك لخط هيثرو -لكن مستشفي سرطان الثدي موجود بالخرطوم و بالقرب من شقق النصر و قام ببنائه المحترم محمد فتحي إبراهيم و المشهور ب مو إبراهيم و تشرف عليه السيده زوجته و هو من أجمل المستشفيات بالخرطوم و به أفضل جهاز في العالم للكشف عن السرطان بتاع الثدي- ليس فقط للنساء و لكن للرجال كذلك !
لذلك أدعوهم لبناء مستشفي غير تقليدي للطب النفسي -يعني قرية تبني بالطوب اللبن (زي بتاعة المهندس حسن فتحي في مصر و أميركا ) وبها حدائق غناء


#1245670 [K. S. Khalid]
5.00/5 (2 صوت)

04-13-2015 08:48 AM
سرقة الارصده سمه من سمات سئيه الذكر mtn فور تنزيل رصيدك تاتيك رساله تحدد عشره في المائه من رصيدك المودع مكافاه خمسه وثلاثين قرشا قبل ان تفيق من الصدمه اوشك رصيدك علي الانتها الرجاء الشحن وهكذا 0992266275 قمت بفتح بلاغ بعد الحجه الواهيه من المشرف عبدالرحمن حسن/ مدني وراح البلاغ شمار في مرقه.. نهب منظم وعندما حرم الاسلام شراء السمك في البحر لعلة حتي وان تكبدت المشاق ونزل الرصيد بواسطتهم الشبكه طاشه وحقك راح عايزهم ابنو مستشفي لعلاج السرطان ديل اجيبو السرطان والكابه لمشتركيهم خالد صالح خالد


#1245661 [K. S. Khalid]
5.00/5 (1 صوت)

04-13-2015 08:36 AM
ديل فاضين من سرقه الارصده قبل ماتنزل رصيدك تجيك رساله توضح عشره في المائه من رصيدك ومكافاه خمسه وتلين قرش بعدها اوشك رصيدك علي الانتهاء الرجاء الشحن .. اما اذا توفقت في تنشيط النت فالشبكه طاشه. ٠٩٩٢٢٦٦٢٧٥. دخلت في مشكله سحب الرصيد مرتين دون وجهه حق فتحت بلاغ ضد المشرف عبدالرحمن حسن ولا حياة لمن تنادي اسلوب المشرف معي كان فظا غليظا وكثير من المشتركين تركوا التعامل مع mtn ديل اجيبو السرطان مش اعالجو..خالد صالح


#1245654 [محمد احمد]
5.00/5 (1 صوت)

04-13-2015 08:24 AM
والله يا استاذ فعلا ورطهم لانو شركات الكيزان تاخذ ولاتعطي بكون الجماعة ندمو على استضافتك وياسر بعد ايام بحولوه شركه تانيه نظام دغمسة الموضوع وكده وبعد شويه انت تكتب كسراتك وارد عليك المدير الجديد والله ياجبره نحنا وضعناها في الميزانيه لكن اللجنه الفنيه للمشروع مافرغت من الدراسه وكده ولم تفرغ من دراستها حتي عام عشرميه وعشرين


#1245625 [muslim]
0.00/5 (0 صوت)

04-13-2015 07:50 AM
ممكن نعرف ليه سرطان الثدي بس يا استاذ جبره. هل هذا مبنى علي احصائيات لديك ام جربنديه ساكت.
هل تعلم بأن سرطان الثدي قابل الان للوقايه والعلاج ناجع في اكثر من 90٪ اذا تم التشخيص مبكرا . بدلا عن ذلك او اضافه له هنالك حاجه بتوفير اجهزه تشخيص مبكره للسرطان في المستشفيات الكبيره مثل الرنين المغناطيسي او
لماذا لايكون مستشفى لكل الاورام ؟


#1245621 [الراصد]
5.00/5 (1 صوت)

04-13-2015 07:43 AM
ربنا يسمع منك يا استاذ جبرة وبعدين نسميها (( ام تي ان وجبرة)) لسرطان الثدي... بس للاسف الواعي فيهم حيخليك في كسرتك دي... دعاية مجانية كل يوووووووووم..


#1245611 [ود الحارث]
5.00/5 (1 صوت)

04-13-2015 07:33 AM
والله كويس لقيت ليك زول بيعما حاجه لوجه الله تعالي وما منتظر فايده ماديه الله يستر عليهم من الحكومه بكره تطلع ليهم بفاتوره ضرائب مساعده نظام لحس وكده


الفاتح جبرا
الفاتح جبرا

مساحة اعلانية
تقييم
10.00/10 (2 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة