في



التأنيب برضو حلو !
05-24-2015 07:59 PM


متى يتم تعامل الدولة مع مختلسي المال العام وسارقي قوت هذا الشعب الطيب بهذه الصورة الناعمة التي لا تخدش (المجرم) بل وفي بعض الأحايين (تستره) حتي لا يتعرف عليه أحد !
لم تكن قضية (مليارات مكتب الوالي) هي الأولى ولن تكن الأخيرة التي تم دفنها وقبرها وكأن شيئاً لم يكن على الرغم من إنها قضية جنائية تخالف عددا لا يستهان به من مواد القانون الجنائي السوداني منها التزوير وخيانة الأمانة وانتحال الشخصية .. لم تقدم القضية إلى القضاء رغما عن مليارية المبالغ التي تم الاستيلاء عليها بل لم يفتح يها بلاغاً (من أساسو) والعاجبو عاجبو والما عاجبو (اليجي يقلعنا) !
ولأن هذا النهج.. نهج التستر وعدم المحاسبة وفقه السترة .. قد أصبح الديدن العام فقد اغري ذلك كل من بيده مال حتى لو كان مال (الله) أن (يغرف) منو .. وخير مثال على ذلك ما حدث في ديوان الزكاة بولاية القضارف ... طيب الناس ديل عملوا شنوووو؟ أقول ليكم أولاً كانوا بيصرفوا بمكاتبات سياسية والمعني واااضح يعني بيصرفوا في حاجة ما ليها علاقه بل لا تقع ضمن مصارف الزكاة المعروفه ، ثانياً (وده الأخطر) بيصرفوا أموالا بدون كشوفات وبدون مستندات ذاااتو .. يعني بيشيلو سااااي !! ومش كده وبس بيخالفوا للوائح المالية الموضوعة لضبط العمل (يعني بالعربي كده شغالين على كيفهم) !!
طيب بعد القصة ما إتعرفت (الحكومة) ممثلة في ديوان الزكاة الإتحادي تربع إيدينا؟ حاشا وكلا فهذه المخالفات أوقعت مدير ديوان الزكاة بالقضارف وبعض مساعديه تحت طائلة المساءلة، فتم إجراء تحقيق رسمي معهم ومحاسبتهم عن طريق لجنة للتحقيق والمحاسبة شكلتها الأمانة العامة لديوان الزكاة الاتحادية
حيث أخضعت هذه اللجنة عددا من مديري الإدارات بديوان الزكاة بالقضارف للمحاسبة حيث وجدت اللجنه أن هؤلاء (المديرين) قد تصرفوا في (مال الله) وذلك عن طريق صرف حوافز(غير مستحقة) كما قاموا بالصرف بدون مستندات مخالفين بذلك اللوائح المالية .. تعالو نشوف (العقاااب) وهل يتناسب مع هذا الجرم الفادح .. العقاب يا سادتي الأفاضل تراوح بين التأنيب ( يعني : تاني ما تعمل كده) والخصم من 7 إلى 15 يوما (كتيره والله) ، دي الأحكام التي أصدرتها لجنة التحقيق وهي أحكام زي ما شايفين (رادعة) تخلي أي زول عاوز (يلهط) يفكر ألف (نانوسكند) قبلما يتجرأ ويعملا !
طيب تعالو نشوف أمين ديوان الزكاة بولاية القضارف (عبد الحاكم وداعة الله) قال عن المخالفات دي شنووو؟ .. سعادتو قال إنو (المخالفات التي وقعت أخطاء إدارية غير مقصودة) .. يعني الزول لما يصرف بدون مستند بيكون (مااا قاصد) !! يعني النشال في الحافلة يدخل أيدو في جيبك ويشيل الموبايل ولمن تقبضو يقول ليك (والله ما قاصد) !!
مش كده وبس ( وقطع بعدم وجود أي مخالفات جنائية في المخالفات التي وقعت ) .. والعبد لله يستفتي أخواننا القانونيين إن كان التلاعب بالمال العام بل (مال الله) يندرج تحت مواد قانون (الإيجارات) أم قانون (العقودات) أم قوانين (الحياة البرية) !
وحتي يبرر أمين ديوان الزكاة (المنهوب) فعلة منتسبيه (الشينة) فقد صرح بعدم وجود مخالفات جنائية بديوان الزكاة بالولاية بالمقارنة (شووووفو بالمقاارنة دي) بالجبايات العالية التي يحققها والتي تتجاوز المائتي مليار جنيه !! وأن العاملين بالديوان يجبون مبالغ ضخمة ولذلك يستحقون التحفيز على ما يبذلونه من جهد يعني بالعربي كده الزول ده بيقول لينا نحنا عامة الشعب الفضل (الناس دي بتجيب قروش كتيره شنو لو شالت ليها شوية قريشات) !!
والله أصبحنا لا نعرف (نضحك) أم (نبكي) علي ما آل إليه حال هؤلاء (الإخوان) وهم يبتغون عرض الحياة الزائل بهذه الصورة (المقززة) التي تفتقر إلى (الحياء) .. بالله عليكم كيف لموظف عام يأخذ (مالاً) دون (مستندات) أن يكون عقابه (التأنيب) !!

كسرة : برضو (التأنيب) حلو .. مش بطال !!

كسرة ثابتة (قديمة) :

• أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+و

التيار





تعليقات 19 | إهداء 0 | زيارات 8273

خدمات المحتوى


التعليقات
#1272983 [هاني]
0.00/5 (0 صوت)

05-25-2015 07:20 PM
عادي في القضارف ديوان الزكاة بعملو اكتر من كدا ... مرة في شغالة حبشية (مسيحية ) عن واحد من موظفي الديوان ديل عندها عملية زولا دا طلع ليها قروشها كاملة من ديوان الزكاة الحمد لله المبلغ كان 70 جنيه فقط لكن حتى دي زولنا دا من جلدنتو طلعها من الديوان ورسوم كاملة مع انو في العادة مع العيانين السودانيين المسلمين بدوهم بس اقل من تلت المبلغ


ردود على هاني
United States [كاسـترو عبدالحـمـيـد] 05-26-2015 02:41 PM
لا اتفق معك يا سيد / هانى . فالرحمة تجوز على الأنسان سواء كان يهوديا أو مسيحيا وايضا على الحيوان, فربما كانت سببا فى اسلام هذا المسيحى أو اليهودى عندما يعرف بأن الأسلام دين رحمة ومودة وتوجد مواقف كثيرة فى هذا الخصوص حصلت فى عهد الرسول ( صلعم ) والصحابة . اما موضوع العاملين فى ديوان الزكاة والمؤتمنين على مال الله فلهم عذاب شديد خاصة وان المال مال الله .


#1272950 [محمد علي]
0.00/5 (0 صوت)

05-25-2015 06:13 PM
البرقص ما بغطي دقنو.. أعتقد إعتقاداً يصلح(عنوان للمقال) يا أستاذ جبره.


#1272923 [الحقاني]
4.00/5 (1 صوت)

05-25-2015 05:35 PM
لي اربعة سنين بزرع في ولاية القضارف واكثر من مرة بطلع خسران ومديون والجماعة بشيلوا مني الزكاة على داير المليم
اتاريهم بتأنبوا الله في


#1272742 [حمزاوي]
5.00/5 (2 صوت)

05-25-2015 12:44 PM
كان عمر (رضي الله عنه) يمنع عماله وولاته من الدخول في الصفقات العامة سواء أكانوا بائعين أو مشترين، وكان عمر (رضي الله عنه) يحصي أموال العمال والولاة ليحاسبهم على ما زادوه بعد الولاية مما لا يدخل في عداد الزيادة المعقولة، ومن تعلل منهم بالتجارة لم يقبل منه دعواه وكان يقول لهم: إنما بعثناكم ولاة ولم نبعثكم تجارًا.
وروي أن عاملاً لعمر بن الخطاب اسمه الحارث بن كعب بن وهب، ظهر عليه الثراء، فسأله عمر عن مصدر ثرائه فأجاب: خرجت بنفقة معي فاتجرت بها، فقال عمر : أما والله ما بعثناكم لتتّجروا، وأخذه منه وما حصل عليه من ربح وأعاده لبيت مال المسلمين .
وهؤلاء يحكموننا بمبدأ الذين يستصغرون كبار ذنوبهم ويستعظمون صغار ذنوب غيرهم


#1272689 [شايبو مصطفى]
5.00/5 (2 صوت)

05-25-2015 11:44 AM
الاستاذ الفاتح جبرة لك التحية والتقدير
استاذنا الفاتح من شروط التوظيف خاصة في مجال المال ان تعرف تأكل وتأكل معاك وكدا تضمن الترقية والاستمرار في العمل و بما انك مؤتمن على مال الله وانت عبده مطلوب منك تمشي مكة كم مرة كدا عمرة وان شاء الله ربنا غفور ورحيم بهذا تجد ان اكثر الناس آكلا لمال الشعب هو أكثرهم ذهابا الي مكة ظانا بأنه سوف يغفر له مهما كانت الذنوب


#1272596 [عثمان عبده]
5.00/5 (1 صوت)

05-25-2015 10:09 AM
تحياتي الخالصات
الفاتح..
اتحداك لو قدرت تجيب واحد بس سرق مال عام والحكومة قدرت تجيبو...ما كتير وكتير جدا...ملف الإقطان ...ومكتب الوالي وما خفي أعظم...إتقوا الله فينا..يدخل عليهم بالساحق والماحق والبلا المتلاحق.


#1272497 [وحيد]
5.00/5 (3 صوت)

05-25-2015 08:43 AM
" فقه السترة" .. فقه " التحلل" و فقه " التانيب"
ناس مال الشعب اكلوه ..... و مال الحجاج اكلوه ... و مال الله اكلوه


#1272484 [جنو منو]
5.00/5 (3 صوت)

05-25-2015 08:33 AM
طبعا ياجبره من مصارف الزكاة .. العاملين عليها ..وكل اموال الزكاة تصرف على هذا
البند سواءا كانت بمستند أو بدون مستند لاتفرق عندهم هو فى زول براجع .. أما بقية
المصارف لامكان لها من الصرف ..لقد فاقوا سوء الظن ..!!


#1272463 [Tag.]
4.75/5 (3 صوت)

05-25-2015 08:11 AM
والحديث المعروف عَنْ أَبِي هُرَيْرَةَ أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ :
(( أَتَدْرُونَ مَا الْمُفْلِسُ ؟ قَالُوا : الْمُفْلِسُ فِينَا مَنْ لَا دِرْهَمَ لَهُ وَلَا مَتَاعَ ، فَقَالَ : إِنَّ الْمُفْلِسَ مِنْ أُمَّتِي يَأْتِي يَوْمَ الْقِيَامَةِ بِصَلَاةٍ وَصِيَامٍ وَزَكَاةٍ ، وَيَأْتِي قَدْ شَتَمَ هَذَا ، وَقَذَفَ هَذَا ، وَأَكَلَ مَالَ هَذَا ، وَسَفَكَ دَمَ هَذَا ، وَضَرَبَ هَذَا ، فَيُعْطَى هَذَا مِنْ حَسَنَاتِهِ ، وَهَذَا مِنْ حَسَنَاتِهِ ، فَإِنْ فَنِيَتْ حَسَنَاتُهُ قَبْلَ أَنْ يُقْضَى مَا عَلَيْهِ أُخِذَ مِنْ خَطَايَاهُمْ فَطُرِحَتْ عَلَيْهِ ، ثُمَّ طُرِحَ فِي النَّارِ ))
[ مسلم ].


#1272460 [Tag.]
5.00/5 (2 صوت)

05-25-2015 08:10 AM
نْ خَوْلَةَ الْأَنْصَارِيَّةِ رَضِيَ اللَّهُ عَنْهَا قَالَتْ : سَمِعْتُ النَّبِيَّ صَلَّى اللَّهُ عَلَيْهِ وَسَلَّمَ يَقُولُ :
(( إِنَّ رِجَالًا يَتَخَوَّضُونَ فِي مَالِ اللَّهِ بِغَيْرِ حَقٍّ فَلَهُمْ النَّارُ يَوْمَ الْقِيَامَةِ ))
[ البخاري ، الترمذي ، أحمد ].


ردود على Tag.
United States [WAD OMO WA ABO] 05-25-2015 10:32 AM
أمنا بقول الرسول الكريم
لكن هل قال ان يتركوا ينهبون ما يريدون ولا حساب عليهم فى هذه الدنيا؟!
والله لو بقت كده الحراميين ح يبقوا اكتر مما يمكن ان يسرق


#1272458 [Tag.]
5.00/5 (2 صوت)

05-25-2015 08:08 AM
عَنْ أَبِي حُمَيْدٍ السَّاعِدِيِّ قَالَ :
(( اسْتَعْمَلَ رَسُولُ اللَّهِ صَلَّى اللَّهُ عَلَيْهِ وَسَلَّمَ رَجُلًا مِنْ الْأَسْدِ يُقَالُ لَهُ ابْنُ اللُّتْبِيَّةِ عَلَى الصَّدَقَةِ ، فَلَمَّا قَدِمَ قَالَ : هَذَا لَكُمْ ، وَهَذَا لِي ، أُهْدِيَ لِي ، قَالَ : فَقَامَ رَسُولُ اللَّهِ صَلَّى اللَّهُ عَلَيْهِ وَسَلَّمَ عَلَى الْمِنْبَرِ فَحَمِدَ اللَّهَ ، وَأَثْنَى عَلَيْهِ ، وَقَالَ : مَا بَالُ عَامِلٍ أَبْعَثُهُ فَيَقُولُ : هَذَا لَكُمْ ، وَهَذَا أُهْدِيَ لِي ، أَفَلَا قَعَدَ فِي بَيْتِ أَبِيهِ ، أَوْ فِي بَيْتِ أُمِّهِ حَتَّى يَنْظُرَ أَيُهْدَى إِلَيْهِ أَمْ لَا ؟ وَالَّذِي نَفْسُ مُحَمَّدٍ بِيَدِهِ لَا يَنَالُ أَحَدٌ مِنْكُمْ مِنْهَا شَيْئًا إِلَّا جَاءَ بِهِ يَوْمَ الْقِيَامَةِ يَحْمِلُهُ عَلَى عُنُقِهِ بَعِيرٌ لَهُ رُغَاءٌ ، أَوْ بَقَرَةٌ لَهَا خُوَارٌ ، أَوْ شَاةٌ تَيْعِرُ ، ثُمَّ رَفَعَ يَدَيْهِ حَتَّى رَأَيْنَا عُفْرَتَيْ إِبْطَيْهِ ، ثُمَّ قَالَ : اللَّهُمَّ هَلْ بَلَّغْتُ ، مَرَّتَيْنِ ))
[ البخاري ، مسلم ، أبو داود ، أحمد ، الدارمي].


#1272438 [ود يوسف]
5.00/5 (1 صوت)

05-25-2015 07:34 AM
بالمناسبة الخمسين ألف دولار ـ تبرع ديوان زكاة الخرطوم إلى قناة الضحى الوهمية ـ حصل فيها شنو ... يا أستاذ جبرا عاوزين كسرة للموضوع دا ...


#1272414 [عكود]
0.00/5 (0 صوت)

05-25-2015 06:01 AM
والله يا استاذ ده كلو جناه الشعب علي نفسه وهو فاز بولايه جديده خلي الشعب يدفع ثمن السكوت من الزكاة والضرائب والجبايات والقلع العديل ووووولاكن قلت ادب الولد الاسمو الهندي دا بالحيل مواجعاني وبيحتاج ليه تصفقه في جضوم الحكومه الصفر ديل دحين شوف لينا قلت الادب دي حدها فين قبل نصفقو ليك


#1272405 [Almisahir fi izallail]
0.00/5 (0 صوت)

05-25-2015 04:55 AM
يا فاتح الجبرا.. ياخى المال مال الله ..وناس الزكاة ديل عبيدو! وهم اقرب الناس اليه
وهم مقتنعين انه ما حيحاسبهم لو شالو منه..لأنهم مؤتمنين ومتوضين..انتو دخلكم شنووو!
*زمان ايام الالتزام بالضوابط والقوانين الماليه .. واحد ضابط مجلس بطريقه فهلويه سجل لبت ام روحو باللفه وبطريقه جهنميه بيت من بيوت الحكومه فى اسمو..وسكن فيهو!
بعض اصحابو ساءلوه مؤنبين ومستنكرين عملتو.. بكل برود رد عليهم : انتو الحكومه جات لواحد منّكم او جاتكم كووولكم اشتكت ليكم ان صاحبكم فلان سجل بيت من بيوتا فى اسمو وطلبت منكم ترجعوه ليها!
*وانت يا كبير متلقين الحجج..حسبو (النائب ألأأول) موش قالها لكم ان لو عاوزين نفتح الملف دا حنحاكم ناسنا كوولهم .. يعنى نفضح ناسنا ولآ كيف يعنى المعنى.. ما خلاص يا جماعة الخير قال ليكم نحن الزول بنّاديهو وبنوريه اننا "ناقشيييين" وعارفنّو عمل شنو.. وبنوعّيهو اولا ونحذرو ما يكرر عملتو لاكين برضو بنوريهو (كيف ان كرر الحكايه ما يستخدم نفس الاسلوب عشان ما يحرجنا ونضطر نحفّظو سورة البقره من ألآخر (او كما قال) كاشحهم!


#1272373 [Sarah Waleed]
3.00/5 (2 صوت)

05-25-2015 01:00 AM
كم هو مؤسف أن يصبح ما تكتب عنه يا أستاذ شيئ عاديّ (إتعودنا) على حدوثه .. و المؤسف أكثر أنّ ما كان يستدعيه من ألم قد بدأ يضمحل ..
ترى .. هل نستمر في (الأمل) بوجود ضوء في آخر النفق؟ ..
تحيّاتي ..


#1272367 [التمساح]
4.00/5 (3 صوت)

05-25-2015 12:23 AM
التانيب بتاعم يا استاذ جبره كان صورة
الكاريكاتيرست الكبير عمر دفع الله
الكوز الكبير بقول لي الصغير والله
تاني تلهط بدون علمي الا تحفظ سورة البقره
بالمقلوب اللهط عندهم ماعيب العيب انو واحد يتكشف
والباقين يكونوا ما عارفينوا


#1272357 [رحال]
1.00/5 (1 صوت)

05-24-2015 11:54 PM
يا استاذ الحرامية ديل قالوها زمان , انو بيناتهم يتبعون سياسة التقويم و ليس التجريم ,,


#1272317 [منتدي جبرا الثقافي]
3.00/5 (2 صوت)

05-24-2015 10:20 PM
أصحي يا استاذنا جبرا .. فقد امتد اليك تأنيب متصحف زمانه الهندي عز الدين في شهادته ( للشيطان ) اليوم الأحد 24 مايو .. و ليتك ترد علي ترهاته .. مع انه لا يستحق الالتفات اليه .. بس العيل زودها حبتين .. و سلمت من كيد الجهلة و تنابلة السلطان .


#1272306 [A. Rahman]
4.00/5 (3 صوت)

05-24-2015 09:20 PM
يا أستاذ، نحن كنا فاهمين انهم بياكلوا أي حاجة لحد مال النبي، هسع مال الله ذاته بقى في امراً ضيق؟ اما بالنسبة لجباياتهم و حجمها لتبرير اللهف، دعوني أحكي لكم قصة السفير السودتني الذي تولى إحدى السفارات الخليجية، و بعد مدة فاجأه أحد موظفيه بمبلغ محترم على انه نصيبه من سهم "العاملين عليها" فما كان من السفير إلا أن امره بارجاع المبلغ و كل ما أخذه جميع العاملين بالسفارة غلى الخزينة، و افهمهم أن "العاملين على الزكاة" هم من تتأثر اعمالهم و مصالحهم في سعيهم لجمع الزكاة، و جعل لهم هذا السهم كتعويض على تضرر مصالحهم، أما أنتم فموظفون في الحكومة التي تدفع رواتبكم و تؤجر لكم منازلكمن و ما تقومون به هو جزء من عملكم و في اثناء ساعات عملكم الرسمية. سامعين يا وزارة الأوقاف و الضلالية الذبن يسمون أنفسهم هيئة علماء و من لف لفهم. و ذلك السفير كان "كرير Career" و ليس "كرور" من الذين زحموا بهم وبهن السفارات. و لا ندري بصراحة بعد نقل ذلك السفير هل عادت ريما لعادتها القديمة أم لا.


ردود على A. Rahman
United States [كاسـترو عبدالحـمـيـد] 05-26-2015 03:05 PM
قصة هذا السفير ذكرتنى بقصة شبيهة حصلت للفريق المرحوم ابراهيم عبود الله يرحمه . حصل ان سافر الرئيس عبود فى زيارة رسمية لروسيا وبعد ان عاد الى الخرطوم قام سكرتيره الخاص المرحوم اللواء الفاتح بشارة بتقديم ظرف له بداخله بعض المال قائلا له : معاليك هذه " علاوة بدل سفرية عن رحلة روسيا " فقال له عبود: لماذا نأخذ بدل سفرية ونحن كنا فى ضيافة الروس ولم ندفع شيئا من نفقات الرحلة ؟ فقال له الفاتح بشارة : هذه هى القوانين يا معاليك . فقال له عبود : استعيد كل الأموال التى استلمها اعضاء الوفد وقم بتوريدها الى الخزينة . ثم اتصل بوزير المالية المرحوم عبدالماجد احمد واخبره بالأمر والغريبة ان وزير المالية نفسه قال له : انه ايضا استلم علاوة بدل السفرية فطلب منه عبود ان يرجع ايضا العلاوة الى خزينة الدولة . اما فى زمن هذا النظام فالمسولين يقومون بتدبير السفريات لصرف مخصصات السفر .

United States [WAD OMO WA ABO] 05-25-2015 10:40 AM
هذا سفير اندر من لبن الطير
لا وجود لمثله بتاتا فى هذا الزمان

الغريبة يا الجبراب ما لاحظتوا انو ناس الحكومة ( اقصد كبار المعفنين ) لا يموتون ؟! يعنى ناس بشبش وحسن عبدالله وعلى عثمان ونافع وبكرى ( خدرا ) وحسبو وووووو
انتو ديل حكايتهم شنو؟!

[mutasim] 05-25-2015 07:09 AM
السفير دا هسي اكيد في بيتهم ... صاح


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة