06-09-2015 07:50 PM


في زمن الهرجلة والهيمنة والمحسوبية وفساد الذمم والتعامل اللامسئول مع المال العام يظل كل شيء ممكناً ومتاحاً ومن المحتمل حدوثه حتى وأن كان إزالة موقف للمواصلات كلف مليارات الجنيهات ولم يمر على إنشائه زمن قصير.

أصدر معتمد محلية الخرطوم اللواء عمر نمر قراراً بإزالة موقف مواصلات (كركر) نسبة للأخطاء الهندسية التي صاحبت التشغيل والتشييد واعتماد تصميم جديد للموقف لإعادة تشييده بعد اعتماده من مجلس وزراء الولاية وجهات الاختصاص الأخرى، وأكد المعتمد نمر خلال الاجتماع الموَّسع مع إدارة التخطيط العمراني بالمحلية والشركة الاستشارية المنفذة للموقف بشكله الجديد أن القرار جاء بناءً على توجيه السيد الوالي خلال زيارته الأخيرة للموقف نسبة للأخطاء الهندسية التي صاحبت تشييد وتشغيل الموقف خلال السنوات الأخيرة.
انتهى الخبر الذي يوضِّح كيفية تعامل مسؤولينا مع المال العام وإهداره بدم بارد ودون أن يرمش لهم جفن ودون أن تتم مساءلتهم على هذا (اللعب)، بل التلاعب في مثل هكذا مشروعات ممكن أن يقوم بتشييدها وتنفيذها طلاب كليات الهندسة دون أن تكون هناك أي أخطاء.
إن هذا الخبر الفاجعة يجعلنا نتساءل لماذا تم استلام هذا المشروع وهو يعج ويحفل بمثل هذه الأخطاء والذي قام سعادة الوالي برصدها أثناء زيارته للموقع على الرغم من وجودها منذ إنشاء الموقع (ليه هسع بالذات)؟
كما نتساءل أن كانت هناك بيوتات خبرة هندسية قد رصدت هذه الأخطاء أم أن سعادة الوالي (وحده كده) رأى هذه الأخطاء وهو من يحدد (وحده لا شريك معه) نوعية وخطورة هذه الأخطاء التي تقضي بالإزالة النهائية لمشروع كلف (الشيء الفلاني)؟
من قام بتنفيذ هذا المشروع الذي استوجب الإزالة لما به من أخطاء هندسية(//////)؟
وكيف استلم مهندس الولاية المشروع من الشركة المنفذة دون أن تتأكد من خلوِّه من أي عيوب هندسية؟ ولماذا لم يتم محاسبة هذه الجهة المنفذة ومطالبتها بإرجاع ما أخذت من أموال لعدم مطالبة المشروع لتصاميم الهندسية الأولية؟.
ومن يضمن لنا (مواطنون غلابة ) أن الجهة التي سوف يوكل لها أمر تشييد الموقف الجديد لن تكون كسابقتها( المشكلة يدوهو لسابقتها دي ذااا تا)؟
ختاماً .. لا نملك إلا أن نستشهد بتلك المقولة الذهبية ( من أمن العقاب ساء الأدب) .. ونهمس في أذن الوالي والمعتمد والشركة التي نفذت المشروع قائلين (اشتغلوا على كيفكم ما أصلها خربانه .. خربانه)

كسرة:
مفيش فائده!

كسرة ثابتة (قديمة) :
– أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+و+و

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+و+و





تعليقات 18 | إهداء 0 | زيارات 8660

خدمات المحتوى


التعليقات
#1283561 [الناهة]
0.00/5 (0 صوت)

06-11-2015 04:29 PM
خربانه..خربانة
وتكتر يااستاذ الفاتح جبرة يركب راس الجماعه العناد فيدمروا سودانير وسودان لاين والسكة حديد والخدمة المدنية
بعدين اصل الحكاية موقف كركر هذا تم بناؤه في الشتاء عشان كده اتنست حكاية مياه الخريف دي وقجاتن ظهرت مع الخريف يعني شنو يعني حتى في اروبا وامريكا بتحصل عادي يعني
احمدوا الله لقيتو ناس بيبنوا ويكسروا


#1283493 [محمد علي]
0.00/5 (0 صوت)

06-11-2015 02:25 PM
كان غلبك سدها وسع قدها..


#1283234 [افهموها]
0.00/5 (0 صوت)

06-11-2015 09:44 AM
جاتك ملعوبة يا عبد الرحيم وجاهزة بس تختها في القون زي ما ختيتا قبل كدة في جامعة الربط وفي معدات وآليات الجيش


#1283106 [ود العوض]
0.00/5 (0 صوت)

06-11-2015 07:29 AM
يا جماعة الخير الزول ما في حد يهديه؟؟؟ و انت مالك يا أخي هو كان موقف أبوك و لا بلد أمك ، يعملوه زي ما هم عايزين و يكسروه وقت ما هم عايزين ، تدفع الضرائب العليك وانت ساكت خلي العالم تشتغل،،،،الله!!!!!!!!!!!! هي لله مش ليك انت و أمثالك.


#1282858 [زيتنا في بيتنا]
0.00/5 (0 صوت)

06-10-2015 08:33 PM
رايك شنو حا يدوه لنفس الشركة وكان خلاص خجلوا حا يدوه شركة الوالي الجديد


#1282822 [سيف الدين الجميلى]
0.00/5 (0 صوت)

06-10-2015 07:10 PM
ياجبرة جاتك كسره أو كسر ياابوناجى ..ايه رايك تعمل كسر للميرغنى الصغير
تبداء من ال181يوم وانت نازل


#1282740 [awadalkareem ahmed]
0.00/5 (0 صوت)

06-10-2015 03:39 PM
خربانه خربانه من كباره يعنى شنو موقف فيه اخطاء المقاول قبض حقو وادى الجماعه حقهم ومافى زول قال فى مشكله لغاية ما السيد الوالى جاء بعد ان اتوزعت الغنيمه بين المشاركين فى مهرجان اللقف - يعنى الحا يسالهم منو قبل كده وزير الداخليه ر لمن وقعت عمارة كلية الشرطه كان حصل شنو الراجل شالوه من الداخليه ادوه وزارة الدفاع - وطبعا نجح نجاح منقطع النظير كوزير للدفاع - ماشاء الله عليه - ده برر بان الطائرات الضربت المصنع كانت طافيه الانوار - شوف الهبل- مافى زول ساله اله مين البنى عمارة كلية الشرطه مقاول شايل عدته فى هايلكس - كيف بقت شركه دى علمها عند وزيرنا الهمام - ها يالفاتح اخوىا الحين حولوه لوالى الخرطوم فكرك الوالى السابق خلا ليه عقاب لا اعتقد الاراضى كلها اتباعت والكبار كلها اتعملت والمواقف حقها اتلغف - لكم لا اعتقد انه محتاج العملوا فى الوزارتين يكفيه الى يوم القيامه وحايسال ده اللميتو ده من الداخليه والا الدفاع والا من ولاية الخرطوم - لا اعتقد ان الولايه سيسال عنها لان الوالى السابق وناس مكتبه وافراد اسرهم نظفوها بالكامل وتقول خربانه بس دى فاتت سوبا - رحم الله النميرى وغلندر ومن كان معهم


#1282694 [zool despond]
0.00/5 (0 صوت)

06-10-2015 02:08 PM
ناس المؤتمر الوطني ديل ما عندهم هم غير يجو يفتتحوا المشروع ويغنوا وينططوا زي القرود . بعدين كل الشركات البتاخد شغل لازم تكون دافعه ( ما تحت التربيزة ) على عينك يا مواطن . وبعد ما يدوها المشروع لو الإستشاري حاول يعمل فيها مهندس الله قال بي قولو من ناس الوزارة . وتجي أيام المشروع الأخيرة يجوك ناس ما معروف جايين من وين يكون المشروع داير شغل كتير .يقولوا بس نفتتح وده شغل سياسي وتعال شوف الجلبطة البتحصل .
يعملوا الكلام ده كله وهم مرتاحين لأنه ما في زول يحاسبهم . لكن بعدين شيلو شيلتكم.


#1282665 [جنرال زمان]
0.00/5 (0 صوت)

06-10-2015 01:32 PM
يا جبرة تاعب روحك ومقوم نفسك ليه؟ الوالي الزماااااان واحد بيطري وما مؤآخذ وهسع جانا الباشمهندس الكبير بي خبرته في البناء وكدا فأها أنشوف (دي من إعلان زيت ناشيونال الأصلي وكدا) حيحصل شنو.... ويا جبرة شوف لينا المواضيع التقيلة وخلينا من كركر وجاكسون اللي معتمد الخرطوم الأسد قال الجماعة بيعملوا العصاير في المنهولات (وأنا أقول ماله الجماعة ديل عصيرهم لذيذ كدي وفيهو نكهة)


#1282650 [صابر محمد صابر]
0.00/5 (0 صوت)

06-10-2015 01:15 PM
أين انت يا أستاذ من قرار وزارة التعليم العالي والبحث العلمي الخاص بتعديل معادلة القبول لطلاب الشهادة العربية ؟؟؟؟ والذي حدد 80% من إمتحان التحصيلي و 20% فقط من الإمتحان المدرسي !!!! ألم تسمع به ام انه قرار هامشي لا ضرر منه ؟؟؟ أم انك تدري ولكنك تغض الطرف عن كااارثة حقيقة ستلحق بابنائنا الطلاب ؟؟

القرار صدر منذ فترة وكتبنا فيه ما لم يكتب مالك في الخمر فلماذا لا تتحركون بأقلامكم وتقفون مع أبنائكم طلاب الشهادة العربية يكفيهم ما يعانونه في بلاد المهجر فما أقل من ان تبدو لهم حسن النية وتبذلوا لهم كل مساعدة ممكنة لدرء هذه الكارثة التي ستدمر مستقبلهم لا محالة !!!

إنهض انت ومن معك و تحركوا بشكل إيجابي واوصلوا صوتنا الى الوزيرة (( سمية أبو كشوة )) بدلا من هذه الكتابات الهامشية!


#1282520 [Abu Amer]
0.00/5 (0 صوت)

06-10-2015 10:08 AM
سبحان الله، سؤال منطقي .. كما ذكرت يا أستاذ، كيف للوالي والذي لم يكن مهندسا مدنيا ليلاحظ الأخطاء في زيارة، فكيف للمهندس المسؤول عن التنفيذ والمهندس المسؤول الاستشاري ومهندس الولاية المسؤول أن يستلم المشروع وهو مصاحب بأخطاء تنبه لها الوالي في زيارة قصيرة!! مستشارون وخبراء ومهندسون و..و


#1282505 [صبري صابر صبور صبار]
5.00/5 (1 صوت)

06-10-2015 09:55 AM
ياعمي دي نقاطة ليهم يبني ليكسر لتستمر النقاطة والمال العام سايب لا حسيب ولا رقيب والشعب ليه الله وانا لله وانا اليه راجعون اللهم اجرنا في مصيبتنا ولا تحاسبنا بما فعل السفاء منا ولا ول ولا قوة الا بالله


#1282300 [ود يوسف]
4.97/5 (8 صوت)

06-10-2015 06:36 AM
أراد باراك أوباما أن يدهن البيت الأبيض
فاستدعى ثلاثة مقاولين من دول مختلفة .
الأول صيني طلب 3 مليون دولار .
والثاني ألماني طلب 7 مليون دولار .
والثالث ..... طلب 10 مليون دولار ..
الصينى قال: مليون ثمن الدهان ومليون للخدمة ومليون فائدة لي .
الألماني قال: 3 مليون ثمن الدهان و 2 مليون للخدمة و 2 مليون فائدة لي .
الثالث أخذ أوباما إلى الزاوية و قال : يا أوباما صلي على النبي ، 3 مليون لك و 4 مليون لي ونعطي 3 مليون للصيني عشان يدهن .
السؤال: ماهي جنسية المقاول الثالث ولأي حزب ينتمي ؟


ردود على ود يوسف
European Union [نيض التعب] 06-10-2015 11:39 AM
مما قال: (صل علي النبي) جنسيتو معروفة .. وحزبو معلوم .. ولو ما لقيت إجابة ع أقترح عليك ياللجوء لصديق وتحديداً: (العارف عزو) حبيب وداد .. وأنا آآآآه يا وداد .. وأنا آآآآخ يا وداد!!.

[yassom] 06-10-2015 09:23 AM
هههههههههههههههههههههههههههههههههههههههههههههههههههههههههههههههههههههههههههههه
هههههههههههههههههههههههههههههههههههههههههههههههههههههههههههههههههههههههههههههه
ههههههههههههههههههههههههههههههههههه
سؤال صعب تصدق!!!!!!!!!!!!!!!!


#1282290 [ود يوسف]
5.00/5 (1 صوت)

06-10-2015 05:59 AM
السؤال المهم هو : كم كلف المشروع القديم وكم سيكلف المشروع الجديد ؟؟؟ طبعاً دي ولا بله الغائب ما بعرفها ... إلا الشركة المنفذة والجهة المشرفة ...


#1282215 [صادميم]
5.00/5 (1 صوت)

06-09-2015 10:26 PM
قامت الدنيا ولم تقعد عندما صرح والي الخرطوم الأسبق عبد الحليم المتعافي بان جميع المهندسين بالولاية عديمي الخبرة وان تعيينهم تم بالواسطة و اثبت الأيام صدق حديثه في الشوارع التي لا تتحمل قطرات مطرة لجسر تؤثر فيه أسنان جقر و غيرها ولن يكون موقف كركر بآخرها


#1282184 [كمساري الركشة]
5.00/5 (1 صوت)

06-09-2015 09:00 PM
و ايه تقول عن موقف شروني الذي تتم الاستغناء عنه بعد افتتاحه ؟ ؟ ؟


#1282173 [moiez]
5.00/5 (1 صوت)

06-09-2015 08:43 PM
توضيح ^ــ^ الوالي القال الكلام دا ياتو فيهم القديم ولا الجديد ولا اقول ليك ما فارقة كتير


#1282163 [موسى]
5.00/5 (3 صوت)

06-09-2015 08:17 PM
جاتك يا عبدالرحيم حسين مقشرة ما عليك الا تختها في المقص ليصبح اسرع هدف يحققه والي جديد قبل العيد ......


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة