07-08-2015 02:50 PM


• يعني أيه لمن نكون بلد زراعي وسعر البطيخة يحصل 100ألف .. (ح نبيع الجلد)؟
• يعني أيه لمن معظم مدارسنا تكون آيلة للسقوط ونقوم (نهدي) لينا مركز للتدريب المهني بمواصفات عاليه ومزود بالاجهزة الحديثة والمعدات والآليات المتطورة والكوادر المدربة للإخوة في جذر القمر
• يعني أيه لمن نشتري لينا لاعب بي كم (مليون دولار) ومراكز غسيل الكلي تشكو من قل الماكينات
• يعني أيه لمن ينادي شيخ وإمام جامع بجمع مبلغ مليون دولار للإخوة في اليمن وأخوانو (الجوه) تعبانين تعب الموووت !

• يعني أيه لمن (كهربتنا بتقطع) ونقوم نعمل لينا أكبر مجمع لصناعة الطائرات في أفريقيا
• يعني أيه لمن يتم إيقاف التحصيل بواسطة أورنيك 15 الورقي والتحويل للأليكتروني دون أن يكون هنالك أستعداد (للقصة دي) فتتوقف أحوال العباد؟
• يعني أيه لمن الساحات في الأحياء كووولها تصبح بنايات وفلل وأولادنا ما يعرفو يمشوا وين؟
• يعني أيه لمن يكون عندنا ناقال وطني إسمو سودان (أير) وما عندو طيارة وااحده بتحلق في (الأير)
• يعني ايه لمن تكون (الموية) بتقطع ونقوم نعمل لينا (قصر جديد)
• يعني لمن (البنوك) كووولها تخلي شغلها ويبقى همها بيع السيارات والأراضي والبيوت بالأقساط (كده خلت لي عوضية الدلالية شنووو؟)
• يعني ايه لمن يكون إيجار الليلة الواحدة لغرفة العناية المكثفة في أرخص المستوصفات يفوق إيجار ليلة في هيلتون (أبوظبي)
• يعني أيه لمن شعب كااامل يكون مرضان بالكورة في حين إنو (ما عندوش) لاعب واحد محترف بالخارج
• يعني أية لمن زيارة المرضي تكون بي رسوم مع إنو الرسول (ص) أوصانا على زيارة المريض !
• يعني ايه لمن تفتح التلفزيون الأيام دي وتلاقي ألف إعلان لكليات وجامعات لم تسمع بها من قبل وأقل واحدة فيها تقوم بتدريس الطب !
• يعني ايه لمن وزير الصحة في (الأمازون) يكون عندو مستشفيات ووزير الزراعة عندو مشاريع زراعية ووزير الصناعة عندو مصانع (أفتكر بيكونو أدرى بطبيعة العمل ههههاي)
• يعني ايه لمن يتبرع ديوان الزكاة بخمسين ألف دولار لقناة فضائية (لم تنشأ للآن) بينما (يتبرع) بما يعادل (خمسين دولارا) لمريض تكفة عمليته 100 مليون جنيه
• يعني أيه لمن بعض ددراء إدارات الزكاة في أحدي الولايات (يلهطون) فلوس الزكاة فتكون العقوبة هي (التأنيب) فقط .. بينما تجلد فتاة لأنها لابسة بنطلون ! (هسه العاوز جلد منوووو)
• يعني أيه لمن معظم مطربي برنامج أغاني وأغاني يمارسون الجلوس بهذه الزاوية (المنفرجة) المخجلة ومافيش (حد) ينبههم لذلك
• يعني أيه لمن الممثل السوداني يكون (بيمثل)؟
• يعني أيه لمن محلية تقوم بتأجير (شوارع) للباعة فيفرشون عليها بضاعتهم فيجد المواكن صعوبة في دخول الأسواق؟
• يعني أيه لمن نكون الدولة الوحيدة في العالم العاصمتها (الحضارية) مافيها شبكة صرف صحي؟ا
• يعني أيه لمن أحدي الجامعات تحدد رسوم طلابها بمية وخمسين مليون في العام ومفيش (مسؤول) وااحد يقول ليها تلت التلاتة كم؟

كسرة :
• يعني أيه لمن البلد كووولها تكون (مطربين) و (مطربات) ؟ أقل حاجة نكون حققنا مشروع (فنان لكل مواطن) … فنان … ههههه
• كسرة ثابتة (قديمة) :
– أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+و+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو

تعليقات 9 | إهداء 0 | زيارات 6787

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1301411 [وجع وانفقع]
0.00/5 (0 صوت)

07-10-2015 06:05 PM
كل مرة طلاب الشهادة العربية وهلم جرا يجب معادلة هذه الشهادات بدقة ومهنية عالية وبعيدا عن المزايدات
البروف ابو كشوة تعاملت معها في حدود وهى والله ذات خلق ومهنية وليست من الساعين للمناصب وانسانة متواضعة لاخر حد وحقانتية واكيد استشارت المختصين في الوزارة
بصراحة ملينا الابتزاز وشهادة عربية فصلها من امريكا ولقفل الباب تقيم الشهادات وفصة ادوهو 10 واطرحوا وكدة ليست الا ترضيات
ارجممن البروف ان تبرز تزصيات لجانها الفنية في ه1ا الامر

ولا ضرر ولا ضرار

و


#1300593 [ابو الطماير]
0.00/5 (0 صوت)

07-09-2015 09:38 AM
لله درك


#1300532 [quickly]
0.00/5 (0 صوت)

07-09-2015 07:42 AM
يعني لقافة وشلاقة وسرقة معاها قلة أدب ياجبرة


#1300265 [الداندورمي.]
5.00/5 (1 صوت)

07-08-2015 07:16 PM
والله جلسة حسين الصادق جد مخجله
متفشق بصوره شاذه وكوم الكمونيه بتاعته
ظاهر يعني إيه البتتفاخر بيهوودهه،،،عند الككو موجود
أخجل يا،،،قليل الأدب.


#1300243 [همت]
5.00/5 (2 صوت)

07-08-2015 06:22 PM
يعني أن هذا نظام يستحق أن نكتب على وجهه: إزالة، ونخرج في الشوارع ونثور "ونقلبو" ونسحل قادته وسدنته في شوارع الخرطوم المسفلتة وغير المسفلتة


#1300242 [على]
5.00/5 (3 صوت)

07-08-2015 06:18 PM
يعنى شعب فاشل ماعنده اى قدرة لتغيير وضعه ويعنى ايه لمن تكون حلايب محتلة والناس ساكتة


#1300219 [صابر محمد صابر]
5.00/5 (1 صوت)

07-08-2015 04:59 PM
ويا الفاتح جبرة :

@ يعني إيه لمن الوزيرة سمية أبو كشوة تصدر قرار جائر ظالم بحق طلاب الشهادة العربية يقصيهم جميعا من فرصة التقديم للجامعات السودانية وانت صامت لا تعلق!


@ يعني لمن أولادنا طلاب الشهادة العربية ما يلاقو فرصة القراية داخل وطنهم وانت تتفرج ولا تكتب حرفا !!!


@ يعني إيه لمن تضيع احلام وامنيات اولادنا طلاب الشهادة العربية بجرة قلم من الوزيرة سمية أبو كشوة وأنت عااااااااارف الموضوع لكن جبنت ولم تعلق !!


@ يعني إيه لم يراسلوك أولياء أمور طلاب الشهادة العربية من على البعد أكثر من مرة وأنت عامل أضان الحامل طرشه !!

@ يعني يا الفاتح جبرة لمن النجاح يكون في الخرطوم فقط والمؤتمر الصحفي بتاع الوزيرة في الخرطوم فقط والتقديم للجامعات في الخرطوم فقط والزغاريد في الخرطوم فقط وأنت عاااارف كل ده -- ولا حياة لمن تنادي !


@ يعني إيه يا عم الفاتح جبرة لمن يصلك ايميل من زول محتاج وقفتك معاهو وتقوم ترمي ايميلو في (( الزبالة)) !!


@ يعني لمن تكون عارف إنو في شريحة من الطلاب إسمها طلاب الشهادة العربية يتعرضون لأزمة ومحنة حقيقة وتقوم (( تدس قلمك )) ولا تكتب حرفا لوجه الله!!

@ يعني لمن الصحفيين كووووووووووووووووووووووووووووولهم يطلعوا ناس بتاعين (( أونطة)) وعنجهة فااارغة وكتابات ممجوجة سمجة و لا يقفون مع محنة طلاب الشهادة العربية التي يعرفها القاصي والداني !!

===========================================================
ويعني إيه دي يا شيخ الفاتح جبرة (( كتيييرة)) وخلي الطابق مستور -- الكتابات الهامشية الساخرة ما عادت تجدي نفعا - إعملوا أقلامكم وأفكاركم في مواضيع ذات نفع ودعونا من الدوران والتوهان فقد تهنا معكم يرحمكم الله ..


#1300216 [Nader]
0.00/5 (0 صوت)

07-08-2015 04:49 PM
يعنى ايه لو تشترىكيلو السكر بى 8 الف فى بلد فيها اكتر من 5 مصانع سكر


#1300188 [ابو سحر]
0.00/5 (0 صوت)

07-08-2015 03:49 PM
لسة ما حققنا فنان لكل مواطن
حتي نعمل اغاني واغاني كل شهر وبطقم جديد يعني 48 فنان في السنة والسودان 38 مليون؟؟؟؟؟؟؟؟؟؟؟؟؟؟احسبها المرة الجاية كويس انا صايييييييييييييييييم


الفاتح جبرا
 الفاتح جبرا

مساحة اعلانية
تقييم
9.50/10 (2 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة