08-17-2015 11:26 PM


المواطن السوداني (محمد الصديق) المقيم بمدينة لندن بعث لي برسالة ساخطة ومستغرشة وسوف تسخطون وتستغرشون تماماً عندما تلموا بالتفاصيل التي تقول :
قام المواطن المذكور بإرسال طرد بريدي صغير عبر شركة (DHL) المعروفة ببوليصة رقم 606826060 وذلك في يوم 15 /7/2015 ، محتويات الطرد يا سادتي الأفاضل كالآتي :
عدد 2 فتيل دواء شراب أطفال ، عدد 1 صندوق شاي زنة 180 جرام مع (ورقة) تحتوي على (إقرار) وورقة أخرى تحتوي على (توكيل) ..

وصل الطرد إلى مخازن ((DHL بالخرطوم م وقامت الشركة بإخطار المستلم (شقيق زوجة المواطن) ولكن عند ذهابه للإستلام في الساعة العاشرة يوم الثلاثاء 4/8/2015م أخبرته الشركة بأن الطرد (حجزوهو ناس الجمارك) فتوجه في الحال للجمارك حيث أخبروه بأن الضابط المسؤول (مشى ليهو فاتحة) وعليه الإنتظار حتى يعود, إنتظر صاحبنا حتى الساعة الثانية ولم يحضر الضابط من الفاتحة (يكون خرم على البيت) فقالوا ليهو (الضابط بعد ده ما بجي تعال بكرة) !
جاء صاحبنا تاني يوم للجمارك قالوا ليهو الضابط في الفطور ، وعندما عاد الضابط شرح له الموضوع وأعطاه (البوليصة) قال له الضابط :
– شوف قيمة الظرف ده 50 جنيه إسترليني فيهو شاي حب وفتيلين دواء شراب فلازم (نجمركو) وتشوف ليك مخلص
– (في إستغراش) : يا جماعة جمارك شنو ومخلص شنو .. وخمسين جنيه إسترليني بتاعت شنو؟
ده شاي (حب) ودايل فتيلين دواء أطفال وديل ورقتين واحدة توكيل والتانية إقرار لإستخراج جواز لي طفل ماشي القاهرة يتعالج !
– يا شيخنا ده (قانون) ولازم تدفع جمارك على الحاجات دي ما يعادل 50 جنيه إسترليني زي ما مكتوب على الظرف !
– يا جماعة المكتوب على الظرف ده دي قيمة الرسوم الإندفعت في السفرة للتوكيل والإقرار دخلها هسه شنو في الموضوع !
– شوف أنحنا ح نشيل 50 ألف جمارك لصندوق الشاي ، و 280 ألف للورقتين (التوكيل والإقرار) و 50 ألأف لي فتيلين الدواء و 20 ألف رسوم أرضية .. والمخلص بيشيل ليهو 220 ألف جنيه يعني الموضوع كدة 620 جنيه !
– (أعصابو باظت وجاب ليهو كوز فاضي) : مش الشاي ده أهو كبيتو ليكم في الكوز .. ما عايزو .. ومش فتيلين الدواء ديل برضو ما عاوزهم … بس أدوني الورقتين ديل !
– يا شيخنا مافي كلام زي ده .. يا تدفع وتشيلهم كوووولهم يا تخليهم كوووولهم !
لم يكن أمام صاحبنا إلا الإنصياع (للحكومة) ، وكسباً للوقت قام بدفع المبلغ الذي حددته (الحكومة) حتى يستلم الورقتين (التوكيل+الإقرار) ليتمكن الطفل المريض من السفر ..
نقول للمواطن السوداني (محمد الصديق) ياااخ جات سلامة فقد كان من الممكن أن تتم (جمركة) الإقرار والتوكيل عن طريق عدد الأحرف أو الكلمات أو نوعية الطباعة (ليزر ، عادي، خط يد) أو نوعية الورق (مصقول شفاف عادي) أو وزنه (80 جرام ، 90 جرام، 100 جرام) وكمان أسود وللا ملون !
بالطبع هذا مبلغ خرافي لطرد صغير قد لا يصل وزنه (نص كيلو) ولا يحتوي علي أغراض ثمينة وهذا المبلغ بالفعل يدعو للإستغراش ولكن ما يدعو للإستغراش الشديد هو إنو الورقة بتاعت الإقرار والورقة بتاعت التوكيل عليهم جمارك؟ شئ فعلا يدعو للإستغراب والتأمل ؟
دعونا نتساءل وريالة الأطفال في (أفواهنا) ما هي الأسباب المنطقية التي تجعل السلطات تاخد جمارك 120 ألف على ورقة مطبوعة واااحدة ؟ … غايتو يا ناس الجمارك بتباااالغو !!

كسرة :
سؤال غبي : الحكومة بتشيل (جمارك) على الدواء عشان ترجعا للمواطن في شنوووو يعني أحسن من صحتو ؟؟

• كسرة ثابتة (قديمة) :
• – أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و)+و

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و)+و
عن هذه الإعلانات

تعليقات 23 | إهداء 0 | زيارات 9162

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1329387 [ودالحاجة]
0.00/5 (0 صوت)

08-27-2015 07:28 PM
.. الراجل جاب ليكم :

1- إسم المرسل
2- مكان وتاريخ الشحن
3- إسم شركة الشحن
5- تاريخ ووقت الإستلام
6- محتويات الطرد

تاني عاوزنوا يجيب ليكم شنو؟ بعدين لو كلامه ده غلط ولا كضب ناس الجمارك ديل ما يفتحو فيه بلاغ ..

قام المواطن المذكور بإرسال طرد بريدي صغير عبر شركة (DHL) المعروفة ببوليصة رقم 606826060 وذلك في يوم 15 /7/2015 إلخ


والله بعد ده الا يجيب ليكم فصيلة دم المرسل والمستلم


#1323702 [yassirsalih]
0.00/5 (0 صوت)

08-19-2015 11:37 AM
اللهم لا تؤخذنا بما فعل السفاء منا


#1323652 [غايتو]
0.00/5 (0 صوت)

08-19-2015 10:33 AM
دا كله كوم ولزوم تواجد مخلص جمركى لتخليص طرد صغير كوم اخر .... الأجانب غى السعودية هنود بنغال باكستان فلبين و ...... جميعهم يرسلون طرودهم واحتياجات أسرهم تسليم البيت بمبلغ رمزى شامل .
يجب أن تحدد كميات وأحجام وأوزان الطرود التى تحتاج لمخلص جمركى وأن تكون تجارية فقط .


#1323623 [الداندورمي.]
0.00/5 (0 صوت)

08-19-2015 09:56 AM
أغبي حكومه وأبلد نظام جمركي
والله الواحد يرسل أي حاجه للأهل بسبب هؤلاء الحراميه
داهيه تخمكم من قشيركم لأصغر كووووووز.


#1323553 [وراق احمد]
5.00/5 (2 صوت)

08-19-2015 08:30 AM
ده كلام لا يصدقه عقل ابدا ولكن هل تثبت من الواقعة قبل النشر ؟واللا( بيست كوبي) علي طول.
كنا نتمني ان نسمع بانك استقصيت الامر من الجهة ذات العلاقة.
ولكن للاسف دوما العاطفة سابقة في كل شئ غند الصحفي السوداني .
جمارك علي اقرار وتوكيل وفتيلين دوا ههههههههههههههههههههههههه


#1323368 [Herona]
0.00/5 (0 صوت)

08-18-2015 07:57 PM
يا جماعة السودان ده اصبح بلد ما بلدنا عديل كده.


#1323233 [هردبيس مسكيت حسن كفتة]
0.00/5 (0 صوت)

08-18-2015 03:03 PM
يا اخ يا جبرة صاحبنا الاشتكى ليك ده وانت اللى بتدافع عنه بالحماس ده يعنى ناس جابوا ليكم شاى ودواء وورقتين توكيل واقرار من عاصمة الضباب لندن ومستكثرين عليهم 650 جنيه عليكم الله لو نفرين بس مشو اتعشوا فى مطعم اللامواج او مطعم بورتنسودان موش بدفعوا 700 جنيه خليك 650 وكما محتجين صحى الاختشوا ماتوا موتة الله


ردود على هردبيس مسكيت حسن كفتة
[azhari] 08-19-2015 09:40 AM
والله العظيم نوعك دة المطلع ميتينااااااااااااااااااااااااااا زاتو...

[salama] 08-19-2015 05:15 AM
هردبيس

[حسن الباقر] 08-18-2015 07:14 PM
يعني عشان شغال في لندن وعندو قروش اقلعوها منو هسي دا منطق....شكلك من نوع الناس الانتكالي


#1323141 [محمد فريد]
0.00/5 (0 صوت)

08-18-2015 01:04 PM
حرقت دمى والله لكن بس نقول حسبنا الله ونعم الوكيل على كل من طغى وتجبر


#1323131 [المغترب]
0.00/5 (0 صوت)

08-18-2015 12:57 PM
لا يمكن لهذه الرواية أن تكون صحيحة مطلقا إلا لأسباب أخفاها مرسلها ولم يتأكد الكاتب من مصداقيتها وأنا شخصيا قمت بإرسال هدد كبير من الطرود البريدية التي فيها مواد غذائية يحوي الطرد الواحد عشرات الأصناف وملابس دون أن يتعرض حتى للفتح وأعرف العشرات ممن يقومون بذلك كل أسبوع وإن زعم الكاتب أو غيره عدم صحة كلامي فعليه أن يراهن وسأقوم بإرسال طرد بريدي باسمه ولا توجد رسوم سوى 70 ألف فقط لطرد يزن 30 كيلوغرام ، علما بأنني في دولة خليجية غير السعودية.


ردود على المغترب
[لفافات الصبر] 09-08-2015 02:20 PM
تاكيدا لكلامك انا من السعودية ارسلت طرد بالبريد السعودى وتم استلامه بدون اى مشاكل فى خلال اسبوع , هذا الموضوع كالاسرائليات لا نصدقه ولا نكذبه

United States [مغترب برضو] 08-24-2015 04:06 PM
يا زول انا قبل سنة رسلتا طرد عبارة عن شنطة مدرسة وفيها 4 بيجامات طلعت جماركها 590 جنيه. لو بتعرف زول في الجمارك دي حاجة تانية


#1323092 [أبوشولرب]
0.00/5 (0 صوت)

08-18-2015 12:24 PM
أها والمبالغ دى داخلة فى ال 176000 رسم ولا جديده

لأنو يطرشنى ما سمعت بتوكيل و لا اقرار بياخدو فيهو رسوم


#1323074 [الطيب]
0.00/5 (0 صوت)

08-18-2015 11:58 AM
مالك يا أستاذ جبرة عاوز تجننا!


#1323003 [عمر الحسن]
0.00/5 (0 صوت)

08-18-2015 10:27 AM
اهم حاجة استلم ايصال مالي ورقي ام الكتروني!!!!!!!!!
اه انا من وجع المرارة وضربات القلب ... (ياولد جيب الحبوب )


#1322967 [عبادي]
5.00/5 (2 صوت)

08-18-2015 09:49 AM
دا عادي من ناس الجمارك
ويما ناس ارسلو مواد غذائية من السعودية
ناس الجمارك بسرقوها عديل ويقول لي
ما جات مع الطرد
حاليا ناس البريد في السعودية اى طرد فيه مواد غذائية
ما بشجنو ليك وقولو ليك ناس البريد في السودان بفتحو الطرد
وبيشيلو اللبن والشاى والحاجات زى دى


ردود على عبادي
[أبوالكجص] 08-18-2015 12:40 PM
ههههههههههههههههههههههههههههههههههههههههههههههههههههههههههههههههها. ... وههههههههههههههههههها وشر البليه مايضحك . دي رذالة شنو دي فضحتونا ياناس الجمارك وعمال التفريغ ماخليتو ليكم شنطة ماقديتوها وخمشتو منها.


#1322965 [لوكاكو]
5.00/5 (6 صوت)

08-18-2015 09:49 AM
اللهم أجعل معيشتنا فى السودان شفاعتاً لنا يوم القيامه....


#1322946 [سودانى حر]
5.00/5 (2 صوت)

08-18-2015 09:33 AM
ملعون ابوهم من اصغر و احدث جندى شرطة متخرج للتيس عصمت و زير المأكلية ( الداخلية) الحلبى العفن الظراط؟؟؟؟؟؟؟تفوووووووووووه علية وعلى عمر البشير زاتو والله عمك حسن أحمد البشير و الحاجة هدية ليلتهم ديك اكان ناموا ساى كان ربنا حلانا من البلوة و المصيبة اللى جابوها لين؟؟؟


ردود على سودانى حر
[زول قرفان] 08-18-2015 01:51 PM
ههههه ينموا ساي يا شقي الحال


#1322914 [ابو احمد الشاطر]
5.00/5 (4 صوت)

08-18-2015 08:41 AM
الاستاذ العم الفاتح
فتح الله عليك من نعيمه في الدنيا والاخره
قصه مشابهه حصلت معنا عندما احتاجت الوالده رحمها الله الي جهاز يكثف الاكسجين وان تستعمله 16 ساعه يوميا دفعنا الجمارك وكراعنا في رقبتنا وطلبوا شهاده من القمسيون الطبي انها فعلا محتاجه هذا الجهاز وبعد جدال وسجال طلع الجهاز
واهلنا قالوا تعيش كتير تشوف كتير


#1322902 [faris]
5.00/5 (1 صوت)

08-18-2015 08:31 AM
كلام عجيب بس انا المستغربو اكثر . الشاي المرسل من لندن . معقولة دى ؟اسي قيمة سعر (الدي اتش ال) مش اغلى من قيمة الاشياء المرسلة .


#1322897 [المظلوم]
5.00/5 (1 صوت)

08-18-2015 08:25 AM
بالغنا إنحنا الصابرين لحد الآن!!!!


#1322870 [حافظ]
0.00/5 (0 صوت)

08-18-2015 07:35 AM
والله انت كاذب والمواطن الرسل ليك كاذب .. ياخي طن الشاي جماركوا ما 620 خلي باكو بعدين انحنا ما عديمي الفهم عشان نصدق من لندنا الواحد يرسل باكو شاي .
ثانيا انت بتاع تفتيش عشان تعرف الفتيل دا فيه دواء ولا مخدرات.
اتقي الله انت بتشكل مفاهيم الشعب


ردود على حافظ
European Union [السودانى الاصيل] 08-19-2015 10:17 AM
والله يا جماعة على الرغم من تشريد الكيزان لنا ولكن الحق يقال نحن الواحد بجى بمطار الخرطوم دا فى الاجازة شايل مواد تموينية كثيرة واشياء اخرى من ملابس ووغيرها و الله مافى حد يوم واحد سأل دا شايلنو ليه ولا قال ادفعوا جمارك بالعكس بمشوك بارسع مايمكن وهذا تحت مسؤوليتى .

United States [فنجاط] 08-18-2015 04:08 PM
بتحلف بالله كمان طيب انت الصادق وصدقناك مناي حليفة يلا قوم شوف ليك تيس احلبوا .

[ابومحمد] 08-18-2015 03:42 PM
الحراميه والمنتفعين وآكلي السحت ومغذيي اولادهم بالحرام بدأو بالظهور واولهم حافظ وبدأ يدافع عن الجمارك السودانيه المعروف نتانة سمعتها التي تزكم الانوف في جميع انحاء العالم

[أبوالكجص] 08-18-2015 12:47 PM
يا أخي أقرأ مابين السطور. الشخص المرسل من لندن ليس غايته الشاي والدواء وإنما الأوراق المرسلة وأكيد أسرته قالوا ليهو مادام بترسلها بالبريد السريع رسل معاها شاي ودواء وهذا يحصل دائما في مثل هذه الحالات. وكما تلاحظ أن نصف مبلغ الجمارك المفروض كان على الأوراق و35% من كامل المبلغ للمخلص الجمركي.

[أبوشولرب] 08-18-2015 12:21 PM
والله وقفت مده طويلة عشان ارد عليك
ما لقيت أىّ كلمة مهذبة تليق بنوعيتك دى

باختصار ذى الكلام دا ماليك .................. أختانا

[ياحافظ!!] 08-18-2015 11:42 AM
ياحافظ لا تحلف !
عادي دا بحصل في الجمارك!
وكيف انت عرفت محتويات الفتيل؟
طيب لو فيهو مخدرات كيف جمركوه؟
انت مش عديم فهم انت مستهبل
ياحافظ ياحفيظ من نوعك


#1322800 [نص صديري]
0.00/5 (0 صوت)

08-18-2015 01:28 AM
ياخي وصلنا مرحلة الطراش موش الاستغراش بس
ياخ اهلنا كانو بيلعنوا زمن التركية والتعايشية والله فعله البشير بالبلد فاق اسوأ مامر به شعب في العالم


#1322776 [كاسـترو عبدالحـمـيـد]
5.00/5 (1 صوت)

08-18-2015 12:38 AM
الأهم من ذلك كله , هل تم توريد الجمارك عن طريق اورنيك (15) الأليكترونى ؟


ردود على كاسـترو عبدالحـمـيـد
[جنو منو] 08-18-2015 08:38 AM
شرحو ..؟


#1322764 [ابوتوفيق]
5.00/5 (1 صوت)

08-17-2015 11:42 PM
والله لوالحكايةدي حقيقية يااخ الفاتح يفترض ان كل الشعب السوداني يتحول الى دواعش داخل السودان ويقضي على كل عضو في المؤتمر الوطنى والاحزاب المشاركة معه في الحكم وننسى موضوع خط هيثرو وموضوع مشروع الجزيرة والفلفل الرئاسية وكل الاشياء الكبيرة الاخرى ونبدا في سودان جديد بشعب جديد


#1322762 [د.مصطفى]
5.00/5 (2 صوت)

08-17-2015 11:41 PM
نحن زمااان قلنا بان من يحكمون السودان هم حثالة وحرامية وعصابة ليس لها هدف سوى بهدلة الناس واهانتهم ..
يدفع المسكين عشان تمشي لناس الحكومة واسرهم .. بالله ديل ناس ديل
يا رب عجل بخلاصك لنا ..

قف


الفاتح جبرا
 الفاتح جبرا

مساحة اعلانية
تقييم
10.00/10 (2 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة