جابت ليها مسدسات
09-07-2015 06:10 PM


تكررت حالات الإعتداء من قبل مرافقي المرضى بكافة مستشفيات البلاد المختلفة وبخاصة المستشفيات الحكومية وقد تفاوتت حالات الإعتداء بين الشتم والإساءة مروراً (بالبونية) والإشتباك بالأيدي وصولاً إلى ما هو لا يمكن أن يخطر بالعقل وهو (إطلاق الذخيرة الحية) وهذا ما حدث في تمام الساعه التاسعه من مساء يوم الاحد الموافق 30 اغسطس 2015 حيث تعرض المدير الطبي المناوب لمستشفي بحري التعليمي لاطلاق رصاص ومعه اتنين من كادر التمريض داخل عنبر الباطنيه رجال والحمدلله (جات سلامة) ولم يصب أحد بأذي .

من الواضح أن معظم أفراد الشعب الفضل أصبحو شايلين في نفسهم على ابنائنا وأخواننا الأطباء وأضبح الكثيرون ينظرون إليهم وكأنهم (ما من البلد ده) علماً بأنهم أكثر الفئات التي تعطي دون من أو أذي في ظروف بالغة الرداءة وبعائد مادي لا يسد الرمق ولا يكفيهم (مواصلات وشاي) !
للأسف الشديد فإن كثرا بل معظم المواطنين يخلطون خلطاً عجيباً بين واجبات الطبيب وواجبات إدارة المستشفى .. يعني الزول لو مشى ليهو مستشفي مرافق ليهو مريض وقالو ليهو (أسطوانة أوكسجين) مافي او جهاز شفط السوائل (متعطل) أو مافيش جونتيات حقو يعرف إنو الحاجة دي الطبيب ما عندو بيها علاقة لأنو ببساطة شديدة دي من مهام إدارة المستشفي ، فيا سادة يا كرام ما تطلعو (غلكم) وحنقكم في الأطباء ساي .. وعينكم في الفيل ما تطعنو في ضلو والفيل هو (حكومتنا الرشيدة) التي تقوم بالصرف على (مسؤوليها) أضعاف أضعاف ما تصرفه على صحة مواطنيها ودونكم هذا الوضع الردئ والمؤسف لمستشفياتنا حيث تفتقر إلى كل شي ..ابتداء من الكادر البشري مرورا بالمعدات والاجهزة .. تخيلو معى يا سادة يا أفاضل إن مستشفى أم درمان (كمثال) لا يوجد به جهاز أشعة مقطعية (ما قلنا رنين) وثمنه يقل كثيراً عن أي من العربات البرادو المظللة التي ترونها يوميا في الشوارع وأمامها (موتر) ويييو ويييو وييو !!
يا أيها السادة الكرام يجب الإعتراف بأن الخدمات الصحية (الحكومية) في بلادنا متدنية تماماً فلا تجعلوا من الأطباء كبش فداء ، كما مطلوب منك أ تتثقفوا (طبياً) فالأخطاء الطبية لا تشمل التفاعلات الدوائية والاعراض الجانبية للادوية ولا تشمل مضاعفات العمليات التي تحصل بعد اجراء العمليات بنجاح يعني زول إتعملت ليهو عملية (استكشاف) مثلا وبعد فترة جاهو(فتاق) في مكان الجرح معقولة بس دي تكون مسؤولية الطبيب !!

كمان ماممكن تجي مرافق لمريض عندو سرطان رئة منتشر وعنده ضيق تنفس ولمن يموت في الطوارئ تقعد تفرد عضلاتك وتعمل فيها (جون سينا) يعني الطبيب في الحالة دي عايزو يعمل ليك شنوو؟
الطبيب يا جماعة الخير بشر .. وكمان في البشر (بشر سوداني) وقاعد معانا في السخانة دي .. سخانة الجو وسخانة (الجيوب) بيشتري الطماطم (أم خمسين ألف) والعجورة (أم عشرة ألف) بعاين للجمرة الخبيثة فضل فيها كم .. وبجيهو سيد البيت كل أول شهر عايز الإيجار وأولادو كل صباح عاوزين حق الفطور وكل صباح راسو بيكون ضارب يوصل للمستشفي كيف مع الزحمة دي وصعوبة المواصلات وبعد ده كوووولو شغالين في بيئة تفتقر إلى كل شيء ، وبعد ده كوووولو بيصرفو مرتبات (ملاليم) .. وبعد ده كووولو بيبذلوا أقصي جهدهم عشان (يعالجونا) والله أعرف الكثير من أولادنا الأطباء بيعملو (شيرينق) عشان يشتروا دواء لي مريض أو يعملو ليهو فحص !

ما بنقول إنو مافيش (أخطاء) طبية .. وكتبنا في الموضوع ده كتير لكن لو حصل خطأ طبي ناتج عن جهل (طبعن مستحيل يكون عن عمد) حقو الناس تلجأ للأسلوب الحضاري الراقي وتقدم شكوي للمجلس الطبي والقضاء ح يحسم الموضوع بدلاً عن الإشتباك … وكمان القصة جابت ليها (مسدسات)

كسرة :
عملية الزول في الطوارئ يرافقوهو (مية) زول دي إلا عندنا !!

• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و
• كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و

تعليقات 13 | إهداء 0 | زيارات 7603

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1336680 [كجراي]
0.00/5 (0 صوت)

09-09-2015 05:48 AM
انت في المسدسات ولا القمح القالت الحكومة داعماهو وطلع الشعب داعم القمح بمائة دولار للطن - يعني طن القمح بسعر السوق الحر في السودان كسبان مائة دولار من غير دعم


#1336499 [سلام]
0.00/5 (0 صوت)

09-08-2015 06:01 PM
ايوه نعم يجب علي المواطن التثقيف ايضا لان الطبيب احيانا قد ينسي ويسهو نتيجه لضغط الحياه والسخانه ذي ما قلت والمريض ايضا يوصف ليهو ادويه غلط عشان كدا لازو يكون داري ومثقف وايضا في حقيقه يجب ان نعترف بها وهي ان المريض في السودان غلطان انو هو مريض مش ابتلاء من الله ، معظم الاطباء عند زيارتهم في العياده لا بشرح ليك ولا بيعاين ليك في وشك كويس مع العلم انو الطب مهنه انسانيه في المقام الاول وفعلا معظم القصور ليس علي الطبيب ولكن ادارة المستشفيات رديئه وضعف الامكانيات ما ممكن نتغالط فيهو. ربنا يدي الصحه والعافيه للجميع


#1336443 [برعي]
0.00/5 (0 صوت)

09-08-2015 04:13 PM
والله كلام صاح الطبيب السوداني الشغال في السودان ده مفروض يدهو نيشان وينصبوه بطل من ابطال هذا الزمان .
هو عليك الله تمشي بي شارع المستشفي ساكت تقرف ويجيك المرض خلي تشتغل جواها ، لكم الله ايها الاطباء الشغاليين في السودان .
طبعا لكل قاعده شواذ وانا هنا اناصر الغالبية من اطباء شعبي البؤساء.


#1336246 [عشر]
0.00/5 (0 صوت)

09-08-2015 11:43 AM
قبل تثقيف المريض والمرافق يا استاذ يجب تثقيف الطبيب السوداني وتدريبه جيدا علي فن التعامل مع المرضى وعدم التعالى عليهموالاستخفاف بهم.


#1336209 [حمزاوي]
0.00/5 (0 صوت)

09-08-2015 10:58 AM
قدرنا أن أصبحنا في وطناً بلا حكومة ،، فهؤلاء الذين نصبوا أنفسهم ولاة للشعب كرهاً وخداعاً ونهبوا كل ثرواته دون استحياء ،، جعلوا فيه شعب يعيش في وطن بالإيجار ،، وليس في شريعتهم قوانين أو خطط مايعرف بمجانية الصحة ومجانية التعليم ويتصرفون في حكم الوطن وكأنهم وكالة علاقات عامة غير رسمية يسنون فيها القوانين التي تتوافق مع جداول أعمالهم و كل ما يستطيعون عمله من اجل إبقائنا منحصرين في دائرتي الجهل والمرض ، ليبقوا هم الوحيدون القادرين على الذهاب إلى البنوك.


#1336150 [Nureldin]
5.00/5 (1 صوت)

09-08-2015 09:45 AM
تحية للاخ الفاتح جبرة _ فعلا لا ذنب للطبيب فى عدم وجود المعدات فى المستشفلى ، لاكن لماذا يعمل طبيب فى مستشفى لا يوجد فيه حتى الشاش ، عبليه عن يمتنع عن العمل فى المستشفيات الغير مجهزة للاستقبال المرضى.


#1335987 [karbinto]
5.00/5 (3 صوت)

09-08-2015 05:46 AM
كمان يا الفاتح اولاد حميضة اما عدل لداعش وللا مدرا او وزرا
يعني الفي طواري ديل الشايلين التقيله كان اضربوا قالو تصحيح ظروف و امكانيات العمل نافخنهم ..و كان سكتوا قالو دا الموجود.. جابت لها مسدسات
رايك يسوو شنو


#1335918 [حاج احمد]
3.00/5 (2 صوت)

09-08-2015 12:23 AM
اخبار ملف خط هيثرو.. .
والله طلعت .... ومباري السيرة
الملف اتسرق من زمااااااان وحرقوهو بالنار حرق وتم ذر رمادو في يوم كانت فيهو سرعة الرياح في البطانة 259 كلم/ساعة
خلاص ارتاح ووقف الكسرات والواوات


#1335904 [العتباني]
5.00/5 (1 صوت)

09-07-2015 11:32 PM
كتر خيرك أستاذ جبرا انصفت اخوانا الأطباء من جور أولي القربي. .!
والناظر يري أن العلاقة بين المريض والطبيب مبنية علي التربص وهو ما يؤدي إلي نتيجة العراك لأتفه سبب ..فقط يكفي المريض إشارة توحي بتقصير الطبيب و-عينك ما تشوف إلا النور -.. عليه، أري انه من الاوجب تنوير وتثقيف المريض السوداني بدور وحدود الطبيب حتي يعرف من أين يأخذ حقوقه. .
وبالمناسبة العيان والمرافق عارفين حقوقهم عند منو بس حكم القوي. .يعملوا شنو لو حاولوا ينططوا بودوهم حتة أحسن منها المستشفي. .! عشان كدا بفرغوا في المساكين ديل ..غايتو الله غالب
وزي ما بقول أستاذنا فتحي: لابد للديمقراطية وإن طال السفر


#1335861 [طبيب سوداني]
4.63/5 (5 صوت)

09-07-2015 09:29 PM
أفضل مقال يتحدث عن الأطباء و المستشفيات ، شكرًا لك فقد أصبت كالعادة . والله يا أستاذ انت تنفع رئيس ، يعني هو العامل رئيس دا بيفهم ربع فهمك دا ؟


ردود على طبيب سوداني
European Union [الفطقي] 09-08-2015 01:42 PM
لكن هو بعرف الرقيص يا دكتور!!!؟؟ الرئيس لازم بعد دا يكون بعرف الرقيص عشان يقدر ينافس ذوالركب الصناعية (عرضة وراب وجب جبة ..وحتي رقيص عروس كمان)ولا رايك شنو يا الفاتح هثرو؟


#1335856 [الحل ينبع من فهة البندقية]
0.00/5 (0 صوت)

09-07-2015 09:23 PM
هل انت معي ؟


ردود على الحل ينبع من فهة البندقية
[صديق الشيخ حمد النيل] 09-08-2015 10:50 AM
الحل هو مزيد من المحاورة لتكسير الزمن ....


#1335839 [داوودي]
0.00/5 (0 صوت)

09-07-2015 08:50 PM
يا استاذنا كسراتك خلاص مدة صلاحيته انتهت حاول حدثة والله االبلد بقت كلها كسرات ، الله يلطف بينا بس .....


#1335835 [الداندورمي.]
5.00/5 (1 صوت)

09-07-2015 08:38 PM
والله قلته الحق ،الأطباء ماعندهم ذنب
الذنب ذنب الفيل ،لو،،،طلعتوا ،،،الأربجي للفيل
ليكم حق.


الفاتح جبرا
الفاتح جبرا

مساحة اعلانية
تقييم
1.00/10 (1 صوت)





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة