في



بيعونا ذاااتنا
09-20-2015 09:25 PM


العبدلله يعتقد بل يجزم تماماً بأنه ما من شعب على مر التاريخ وفي كافة العصور تمت إستباحة ممتلكاته بهذه الصورة (المقرفة) كما هذا الشعب في هذا العهد (المتوضئ) ، إستباحة لا يوجد لها مثيل على الإطلاق ، أصبح بيع أصول الدولة لصالح الأفراد (حاجة عادية) وإختلاس الأموال (أكتر من طبيعي) لا أحد يحاسب ولا أحد يحاكم ولا أحد يعاقب هكذا أستباحة (كاملة الدسم) والأمثلة (ما تديك الدرب) ، لم نسمع يوما واحدا أن (الحكومة) قد تعاملت مع أي منها بجدية بل لم يقف أحد من هؤلاء (اللصوص) الحرامية أمام القضاء طوال ربع قرن ويزيد من الأعوام !

ولعل واحدة من الحادثات المضحكات المبكيات تلك الحادثة التي خرج منها الجناة (ذي الشعرة من العجين) وتم قفل ملفها في (مهده) على الرغم من أنها تحتوي على عدد مقدر من المواد التي يحاكم عليها القانون الجنائي السوداني كخيانة الأمانة والتزوير وإنتحال الشخصية والتملك الجنائي وقد تم ذلك بإستخدام (مراقة ) كما يقول لاعبو (الويست) تتعارض تماما مع القانون وهي (التحلل) هذه المادة التي تستخدم لمالكي الأموال مجهولة المصدر (يعني مش قروشنا المعروووفة)
عندما تولي السيد/ عبدالرحيم محمد حسن منصب والي ولاية الخرطوم تلفت سيادته حوله فوجد أن الأراضى الحكومية قد إمتدت لها الأيادي ولم يتبق منها شئ ، مش كده وبس حتى الأراضى الزراعية هنالك من قام بتحويلها إلى (سكنية) وهاك يا (فلل) وعمارات حتى صارت غابة من الخرسانات المسلحة وحينها قال قولته : لاتوجد ( حته ) واحدة مابيعت !
تذكرت هذه المقولة للسيد والي الخرطوم وأنا أقرأ هذا الخبر الكارثة الذي اوردته الصحف والمواقع الاسفيرية ووسائل التواصل الإجتماعي والذي يقول بأن نواب بالمجلس التشريعي لولاية الخرطوم قد كشفوا عن وجود شركات تقوم بشراء أراضٍ من وزارة التخطيط العمراني بأسعار زهيدة، ومن ثم تبيعها بأضعاف سعرها.!!
وكما يقولون (إذا عرف السبب بطل العجب) .. أخيرا إكتشف السادة تواب مجلس تشريعي الخرطوم لماذا لم يجد السيد الوالي الجديد (حتة واحدة ما بيعت) ، من الواضح تماما أن إن صح ما قاله النواب (وهو الأرجح) أن هنالك (عصابة) وتكوين إجرامي من داخل وزارة (التخطيط العمراني) تقوم ببيع الأراضي الحكومية بسعار زهيدة تدخل (خزينة الدولة) ثم تقوم الجهة المشترية ببيعها بأسعارها الحقيقية ليدخل الفرق (الباهظ) إلى جيوب ناهبي ممتلكات الشعب السوداني (الفضل) …
هل نتوقع من السادة المسؤولين (الفوق) أن يقوموا بعمل تحقيق حول هذا الأمر وحصر الأراضي التي تم فيها التصرف بهذا الأسلوب الإجرامي؟ وتقديم الوالغين في هذا الأمر إلى العدالة ومحاكمتهم وتوقيع أقصى العقوبات عليهم لإستباحتهم ممتلكات هذا الشعب البائس الفقير؟ (وكمان معاهم ناس المدينة الرياضية) !
لقد تعاظمت قصص الفساد وأزكمت الأنوف وهي قصص واضحة للعيان (وما عايزة ليها مستندات) وآخرها (قصة) مقر وزارة الإصلاح الإداري دو الإيجار الشهري نص الملياري وقد تلتها بأيام قلائل (قصة) هذه الأراضي والتي كشف عنها نواب تشريعي الخرطوم ..
كل هذا الفساد والجهات المسؤولة (عاملة رايحة) وسادة دي بي طينة ودي بي عجينة وكأن أمر المحاسبة وتوقيع العقاب على المفسدين وإعادة (أموال) هذا الشعب الغلبان لا يعنيها في شئ.
إن الواحد منا ليتملكه (الإستغراش) من فوضى الفساد التي التي تحدث والتي ضربت بأطنابها كل المؤسسات والوزارات الحكومية والتي (تنهش) بغير رحمة في ممتلكات هذا الشعب (اليتيم) في بجاحة وقوة عين غير مسبوقة ولكن سرعان ما يزول الإستغراش فقديما قالوا : (من أمن العقوبة ساء الأدب)
كسرة :
بعد تنتهوا من الاراضي والممتلكات تعالوا بيعونا ذاااتنا !!
• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و
• كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و





تعليقات 22 | إهداء 0 | زيارات 7095

خدمات المحتوى


التعليقات
#1394201 [Ibrahim]
0.00/5 (0 صوت)

01-01-2016 06:40 PM
الاستاذ الفاتح عظم الله اجرك وانت تجاهد ضد الفساد المستفحل كل اركان الدولة المثل بيقول من امن العقاب ساء الادب


#1344462 [داوودي]
0.00/5 (0 صوت)

09-22-2015 09:14 PM
انا عارف وانت عارف يا أ.الفاتح وهم عارفين السبب شنو ، ولو ما تصرفات الحكومة ديما كدة كان ما لقيت مواضيع تتكلم فيها ( اهي برضو حسنة ليها) ...


#1344300 [وحيد]
0.00/5 (0 صوت)

09-22-2015 01:43 PM
لو يوم لقيت البوليس واقف قدام بيتك و معاهم واحد صيني عشان يستلم بيتك الباعتو ليهو الحكومة ما تستغرب ...
لو جو ناس الامن ساقوك من اضانك عشان يسلموك لواحد خليجي باعتك ليهو الحكومة .. ما تستغرش .. كله ممكن يحصل


#1343989 [صادميم]
0.00/5 (0 صوت)

09-21-2015 08:25 PM
لقد أكلونا لحماً و تركونا عظماً فأشك ان يوجد من يشترينا


#1343988 [الحل ينبع من فوهة البندقية]
0.00/5 (0 صوت)

09-21-2015 08:23 PM
الششاعر عثمان بشرى يقول:-
قالوا هذيانك يا ابن سيف العبور
صفاقين باقية
البذة والصقر اللامع واقية
لتشهدون يوماً يطير الحناجر من فوهة
القصير الى الهاوية
لعنة لا تشيب ولا تصغر وليس
لها من هذان
فباى ثقب تخرجان
انتما صورة الافك واندلاع البيان.


#1343959 [الداندورمي.]
0.00/5 (0 صوت)

09-21-2015 07:10 PM
الموضوع واضح مافيا كيزانيه تتحكم في
كل شئ في السودان،منو العنده قروش غير الكيزان؟
وأتباعهم هذا مخطط تحت بند التمكين من أفكار ثعلب السودان
ومدمره الحاقد الترابي الله يدمره ومن تبعه .


#1343890 [أبو أمجد]
3.00/5 (1 صوت)

09-21-2015 04:28 PM
ما تستعجل يا استاذ .. ما ذكرته ممكن يحصل ان استمر الحال على هذا المنوال .. وقول يا لطيف وقدر لنفسك حتجيب كم في سوق الله اكبر . وارجو المعذرة... ديل ممكن يعملوا اي حاجة ما تخطر ببال عاقل.


#1343842 [حنظلة]
5.00/5 (1 صوت)

09-21-2015 02:48 PM
بعد تنتهوا من الاراضي والممتلكات تعالوا بيعونا ذاااتنا !!


يا جبرة والقال ليك ما باعونا منوا .... كدي كان راجل اغترب واعرف البيع بالجد جد . ياخي يعلم الله التشادي بقي في الغربة احسن مننا (وليس انتقاصاً من التشادي)

ديل حرم باعوا هناينا ظاتوووووووووووا


#1343730 [السودانى الاصيل]
5.00/5 (1 صوت)

09-21-2015 11:41 AM
وبالله يا جبرا ما تنسى اعمل لينا كسرة لمرة الوزير الابت التفتيش


#1343685 [احد الناس]
5.00/5 (1 صوت)

09-21-2015 10:42 AM
الى متـــــــى (حتفضلو تتكلمو بس)..؟!!
زهجنا من الكلام اللابودي ولا بيجيب , الناس همها تسمع بس انتو بتقولو في شنو!
أرى الكل خلف حواسيب واجهزة لوحية يهتف (ويقوم ويقعد) وهو على وسادته المحشوة ولا نسمع منه غير فقط شهيق وزفير.

(لمتـــين)؟.


#1343632 [برعي]
0.00/5 (0 صوت)

09-21-2015 09:09 AM
يا اخوي انت ما سمعت باخبار قضية خط هثرو ولا شنو ؟ الموضوع مات خلاس والمتهمين فيه شخصيات هلامية من خارج الوطن زاتو ،،
شوف ليك كسره ثانية احسن ليك وخليك مع الزمن ، رياك شنو في كسرة عن اخبار قضايا شهداء سبتمبر شنو + و


#1343631 [habbani]
3.00/5 (1 صوت)

09-21-2015 09:05 AM
يا جبرا حتى المجمعات السكنية التى تقوم بها بعض الشركات اليس من الاولى ان توزع الاراضى للمواطنين اولا ثم اذا اراد المواطنين غير القادرين على البناءيمكن يبيعوا لهذه الشركات فيكون البائع هو المواطن الذى باع ارضه وليس الدولة التى باعت اراضى الناس فيما لا ينفعهم ؟ على الاقل صندوق غلام الدين اخير من هذه الشركات .


#1343572 [جنو منو]
4.00/5 (1 صوت)

09-21-2015 07:44 AM
انت ما باعوك زمان ياجبره .. الظاهر عليك عامل فيها رايح .. كدى راجع حساباتك
تانى ..!!


#1343561 [agadir]
5.00/5 (1 صوت)

09-21-2015 07:23 AM
كسره جديده ياابو على
بعد تجاح الكسره الثابته ديك
عرقنا اخبار الحط
شوف ليك كسره لمحامى الحكومه
8 سنبن مش كتيره


#1343559 [ضحى خالد]
5.00/5 (1 صوت)

09-21-2015 07:17 AM
في زول يا استاذ الفاتح بشيل إصبعه يدخلو في عينو...المسئولين هم الحرامية عشان كده ما في محاسبة


#1343556 [ابو الطماير]
5.00/5 (1 صوت)

09-21-2015 07:09 AM
يا استاذ جبرا هؤلاء ينطبق عليهم الحديث النبوي ( عن أبي مسعود رضي الله عنه قال : قال رسول الله صلى الله عليه وسلم : ( إن مما أدرك الناس من كلام النبوة الأولى : إذا لم تستح فاصنع ما شئت ) رواه البخاري ) فلا تتستغرب مما يفعلوهو نسال الله العافيه


#1343520 [كاسـتـرو عـبدالحـمـيـد]
3.50/5 (4 صوت)

09-21-2015 03:22 AM
ومع ذلك البشير ونائبه يتفاصحوا ويقولوا اى واحد يكشف عن فساد يبلغ عنه .


#1343518 [osman]
5.00/5 (1 صوت)

09-21-2015 03:11 AM
No comment


#1343494 [الغلبان]
5.00/5 (1 صوت)

09-21-2015 01:39 AM
وخط هيثرو راح يتحللو منه برضه


#1343484 [Hisho]
5.00/5 (2 صوت)

09-21-2015 12:31 AM
هناك شركة نهب اراضى يملكها رجل يمانى و90% من موظفى هذه الشركة من اليمانية , اسم هذه الشركة ( شركة سوقطرة) وهى شركة يملكها هذا اليمانى المتاسلم الذى جاء الى السودان ايام الهوس الترابى يمنى نفسه بالهجرة الى ارض الاسلام التى بزغ نورها فى قلب افريقياء رغم ان افريقياء غالبية اهلها من الاوثان والمسيحيين .
لقد ذكر لى صديقى اليمانى الطالب ان هذا الرجل ينتمى الى جزيرة فى الساحل اليمنى تسمى سوقطرة و جاء الى السودان (ماعندو سجم رمادو) ولكن تحول الى اكبر تاجر اراضى فى السودان يبيع الارض الى اهلها , لقد استولى هذا الرجل على ملايين الامتار المربعة ويسميها مخططات سكنية ويبيعها الى السودانيين قطع سكنية .. فارجو الانتباه وادراج اسمه من ضمن اللصوص المتخصصين فى الاراضى


#1343408 [عصمتووف]
5.00/5 (1 صوت)

09-20-2015 09:59 PM
حليلك م باعونا زمان لكن اسيادنا لم يظهروا بعد انتظر م تشفق سيدك بظهر ليك كم ظهر سيدي


#1343403 [متريح]
5.00/5 (2 صوت)

09-20-2015 09:43 PM
الظاهر يا الفاتح المقال ليهو اكتر من يومين و بالله بعد كدا حول الكسرا و قول بلاغ السيد وزير العدل ضد شركة عارف و اخرين الحصل فيهو شنو


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة