المقالات
منوعات
كدراوية ..
كدراوية ..
01-12-2016 04:14 PM


سؤال برئ والله ..ليه بعض النساء اللاتي يقدن سيارات ..دائما ما يحملن مفتاح العربة في ايديهن ؟؟ بالرغم من ان الواحدة منهن تكون حاملة شنطة على الكتف ومحفظة نقود في اليد ؟؟ ..هل هناك اجابة شافية ؟؟..لاحظت هذا الامر كثيرا ..خاصة في التسوق ..تجد الواحدة تشير بمفتاح السيارة الى اللحوم وتقول بكل نعومة (عليك الله اتنين كيلو شية ..ولو سمحت قطعها لي رفيعة كدا )..كانت هذه الملاحظة في قاع الذاكرة عندي حتى حدث هذا الموقف الذي استنفر كل المشاهد القديمة ..اقتادتني صديقتي مها الى حلقة دينية ..لانني طلبت منها ان تذكر لي اسم (شيخة) اسالها عن بعض الامور الفقهية ..امتدحت مها هذه الشيخة والتي كانت تقيم حلقة كل اسبوع بمنزل شقيقة مها في ذلك الحي الراقي ...وصلنا متاخرين بعض الشئ ..جلسنا خلف الشيخة مباشرة ..حيث صرنا نرى كل الموجودات .. كانت المحاضرة في اخرها ..لم نلبث قليلا حتى بدأ الدعاء ..كانت الشيخة تدعو بخشوع ..حيث ساد الصمت واغمضت الأعين ..فجأة فتحت عيني لأرى عجبا ...كانت كل النساء المجتمعات رافعات اكفهن للسماء ..وتتدلى مفاتيح السيارات من السبابة لكل منهن ..كأن هناك اتفاق ما ..بلا استثناء ...الا انا والكاشف اخوي (مها) ..سألت الشيخة ما أريد ..وقد كانت اجابتها شافية جزاها الله خيرا ..بمجرد خروجنا ..صحت في مها (سبب واحد يخليك تجيبيني للحلقة دي مافي ..ياخي جاتني عقدة ..النسوان كلهن معلقات مفاتيح العربات ..انا وانت الوحيدات الماشين كداري ياخ )..ضحكت مها (يا زولة نحن غنى لينا النور الجيلاني كدراوية )...(بالله شوفي الزولة دي ..النور الجيلاني غنى لي واحدة ساكنة الكدرو.. مش زولة ماشة كداري) ..ردت وهي تغالب الضحك (خلاص يمكن الكدرو دي جاية من الكداري ..) ..يعني انا المغسة كاتلاني وهي تضحك ..(شوفي يا مها ..نحن لازم نشوف حل لموضوع الكداري دا ..تعالي نعمل صندوق ادخار انا وانتي ..وبعد عشرة سنوات كدا نشتري عربية ..تبقى عندنا الخطة العشرية لشراء العربية )..فكرت قليلا وهزت رأسها غير موافقة (يا زولة مين يعيش ...شوفي انت مشكلتك ما في الكداري ..مشكلتك في مفتاح العربية العمل ليك عقدة نفسية ...يبقى بسيطة ..نشوف ليك مفتاح عربية تعليقهو في يدك في اي لمة نسائية ولا لما تمشي تشتري حاجات الاسبوع تأشري بيهو علي اللحمة)...لا..بالجد .. مها الصنف بتاعها عالي اليوم ..(يا عبقرينو ..اجيب مفتاح عربية من غير عربية كيف ؟؟) ...قالت وقد اكتسى وجهها بكل علامات التفكير العميق ..(نقع الصين بس ..مش عملوا دهب صيني للبروليتاريا المسحوقة ..والجاندرما المعذبة ..نطلب منهم يعملوا مفاتيح عربات من غير عربات للمتكدرات المضطهدات ) ...الحقيقة ضحكت حتى لم استطع الرد ..المهم في النهاية ..وحتى تنجلي الغمة ..وتاتي المفاتيح الصينية ..او شركات الاتصالات تخليني افوز بي عربية ..اتقدم برجاء خاص لحاملات لواء التغيير ..رائدات نون النسون ..واخوات مهيرة ..رجاء خاص ..ادخلي مفتاح السيارة داخل الحقيبة ..صدقيني ما بضيع ..رفقا بالمتكدرات المضطهدات ...والتحية لادم هذا الصباح والمسجل يصدح باغنية كدراوية ..(الدنيا رايحة ..فايتة رايحة ..لا دايمة ليك ..ولا دايمة ليا )


‏‫

تعليقات 13 | إهداء 0 | زيارات 6679

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1400687 [Abu_Mohammed]
0.00/5 (0 صوت)

01-16-2016 10:53 AM
علي كرتي اتلوم ... يسوي اختك مراتو سفيرة و مايديكي عربية!!!!

يا علي كرتي: شحنة حديد بتاعت لوري واحد تشتري لي لاخت مرتك مرسيدس.


#1400215 [الدياني]
5.00/5 (1 صوت)

01-14-2016 02:28 PM
تقول لي البلد سوف تتقدم في يوم من الأيام!

مشيت لي شيخة في حي الراقي، يا اختي ما تاكلي فولك وترجي الله في الكربة ... شيخة عشان تعمل ليك شنو، وبعدين كلهن عندهن مفاتيح عربات إلا أنا، ما انت عارفة انو الشعب السوداني شعب بتاع بوبار مما ربنا خلق الدنيا وأكثر خلق الله بوباراً النساء كما أكثر أهل النار من النساء.

يا اختي ما تشوفي ليك موضوع دا هسه كلام تكتبيهو، بعد شوية بنسمع بيك رئيسة تحرير في الصحف السودانية المهببة دي، ألا رحم الله الصحافة وغفر لمؤسسيها الفطاحلة.

كتبت الكلام دا وبلعت حبتين بنادول لزوم أي صداع أو شقيقة محتملة.


#1400209 [leno]
0.00/5 (0 صوت)

01-14-2016 02:05 PM
يا بنت انت وقت ما عندك عربية ولا بتعرفى فى العربات شنو البوريك المفتاح بضيع والله ما يضيع اكتبي عديل وشوف الناس فى شنو والله لو اراد الناس ده كلها بتركب عربات وانشاء الله ربنا يديك عربيه عشان تعرفي مفتاح العربية ده للراجل والمره ما بزح من ايديه واكتر شي تقعد تدور علي .


#1399903 [sami]
0.00/5 (0 صوت)

01-14-2016 07:00 AM
لاتؤذه بقتار قدرك؟
بعدين روحي لمصنعين النسخ واشتري ليك
مفتاح .
وحلي العقدة


#1399884 [عبدالرحيم]
0.00/5 (0 صوت)

01-14-2016 06:11 AM
إن شاء الله يا بت قرناص - لو ما كنت قريبة اميرة قرناص زوجة على كرتي - ان شاء الله ربنا يديكي ويديكي وتسوى زيهن .. وما في احسن من حد ومحل رقيقي تنقطع.. انتن البوديكم لحلقات الكيزان شنو؟

الم تعلمي ان الكيزان والكوزات بعضهم من بعض؟ الدين عندهم مظاهر وبوبار والواحد يحضر حلقة كل اسبوع او يقيم قراءة قرآن ويفتكروا انفسهم انه لا احد غيرهم قاعد يعمل في خير قط ..

وبهذه الطاعات التي يفعلونها (بغض النظر عن النية) فإنهم يريدون مكافأتهم عليها عاجلاً في الدنيا بل ويأخذون مكافأتهم قلع من الناس.

واذا كان النور الجيلاني غنى لكدراوية كمان الذين غنو لصاحب العربية والكريسدا واللكزس والبي ام والمرسيدس كثيرين ..

الا اننا لم نجد حتى الان من يتغنى بالشفر والكابريس والجمس والرود ماستر (سيد الطريق) والليكولن لانها سيارات امريكية وبالتالي نطالب بفك المقاطعة الامريكية عن السودان حتى يعم البترول ارض السودان ونتغنى بالسيارات الامريكية كما تغنينا باليابانية والكورية بدل التغني بكدراويةاو حتى شمباتية ..

على العموم مقال اجتماعي جميل وسرد واضح .. الله يوفقك


#1399740 [الاندلسى]
1.00/5 (1 صوت)

01-13-2016 04:23 PM
الكلام سمح لكن حساده .... جنس حساده ..... هههههههه


#1399703 [ممغوص]
0.00/5 (0 صوت)

01-13-2016 02:20 PM
البوباااااااااااار


#1399672 [محلل تعليقاات]
0.00/5 (0 صوت)

01-13-2016 01:10 PM
دي طلة جديدة يا بنت العم قرناص بعدما امتعتينا في الفيس. شيل المفتاح دا ما زي عادة كدا ومرات اطمئنان على المفتاح. أنا عندي العادة دي (انتبهي أنا رجل ولست ستا) لكن مرات حساسية السودانيين أو نقول الحياء والخوف من كلام قالوا زي كلامك دا بيخلينى انتبه وادخله في الجيب برغم اني ما برتاح بثقله في الجيب ومعاه طبعا مفاتيح اخرى شتى. اما التقطيع الرفيع للكباب وبقولة "عليك الله" ما دي من صفاتكم انتو يا ستات وفيها الرقة والجاذبة المفضية للفت النظر للطرف الاخر من الجنس. لكن غايتو المفتاح دا لو ما عندك الحكاية ما بتشبهك يا بت العز والصندوق فكرة بس تكونوا عدد بايام الاسبوع مش اتنين بس وكمان وجيران. كل يوم لواحدة والجمعة راحة للعربية. كدا لو بقيتو ستة تشتروا العربية في 3 سنوات بدل العشرة. فكرى ولو وافقت أنا بقسط ليك صندوقك ذاتو بس تكريما ليك. ولو قلت انت منو اقول انا قريبك وما قريبك وبحبك شديد. بس ما بحيك حب كدا عشوائي ولا عشان حلاوتك وابتسامتك الجذابة لكن بالجد بحبك لكتابتك.


#1399635 [السره بت جاج سعيد]
0.00/5 (0 صوت)

01-13-2016 12:20 PM
لو انتي د. ناهض قرناص ما عنك عربية ومال نحن لا دكتوراه . ولا عربية شن بنسوي . بالله ما تستغفلينا يا دكتورة قولى عربيتك شن هي ؟ BM ولا Mercedes


#1399501 [لوراااااااا]
0.00/5 (0 صوت)

01-13-2016 09:10 AM
قلبي مشغول بيكي ---- ييييا


#1399442 [ساري]
0.00/5 (0 صوت)

01-13-2016 07:10 AM
لا اظن انه تباهي ولكن تعود فقط بعض من الناس حتى لاينسى شئ يجعله دائما قريبا منه سبحة جوال اومفتاح السيارة فبمرور الوقت يصبح عادة.


#1399294 [عمر الحاج حلفاوي]
0.00/5 (0 صوت)

01-12-2016 06:55 PM
لا اعيب علي النساء الافتتان والتباهي بالاشياء لكنه الامر المؤسف مع الرجال ومانراه من تباهي الجميع بما لديهم واعرف كثيريين لا يفرحون بما يملكون الا اذا كات الامر مغيظا للاخريين كما انني رغم عدم تفقهي في امور الدين اري ان الدعاء الجماعي بدعة وان الله قريب من عبده المحتاج فالتوسل اليه مباشرة السنة كما سمعت من فقهاء . في زمان سابق كان الناس يتباهون بالجوالات وفي الخليج من لا تكون لديها سائق وخادمة تتواري من الانظار وبالطبع ستخفي مفتاح السيارة لكيلا يحسبوها السائقة-عموما موضوع جميل وليس بمستغرب عليكم يا آل قرناص الكرماء.


#1399243 [truth]
0.00/5 (0 صوت)

01-12-2016 04:58 PM
تمشى كدارى ليه ما كرتى نسيبكم و يشوف ليك واحد من ناسو الهبرو و طرطبى ...بالله ناقشى مشاكل الغلابة و خليك من نسوان الرياض و العربات


ردود على truth
[العائد] 01-14-2016 10:38 PM
اخي Hulfa اقرأ القرآن بتمعن ستعرف كيف تكتب الياء الواقعة في ناهية الكلمة (دائما غير منقطة).

[hulfa] 01-13-2016 11:18 AM
رد على [nadus]ترطبي وليس ترطبى (يعني بالياء وليس بالالف المقصورة(ى))...زي ما بصلح للاخرين نحن برضو نصلح لك وهذا للمصلحة العامة لاني لاحظت كل السودانيين المقيمين داخل السودان بكتبوا الياء المعرجة الف مقصورة اي من غير نقطتين ..وسلام

[nadus] 01-12-2016 07:54 PM
كلام موضوعى عن (البوبار) والزيف والتباهى (الارعن) بمال الغلابة ...ثم قبل الانقاذ كم أمراة كانت تقود سيارة فى شوارع الخرطوم؟؟؟
هذه اموال الغفلة المهدرة ومنهوبة من عرق وكدح الاخرين ...
كسرة
ترطبى وليس (ط)


د.ناهدقرناص
د.ناهدقرناص

مساحة اعلانية
تقييم
10.00/10 (2 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة