رسوم كربون
10-13-2015 11:45 PM


كانت إحدى شخصيات سيناريوهات الجمعة التي كان العبد لله يقوم بنشرها أسـبوعياً في زمن مضى هي شخصية (عبدالمنتقم) وهو مستشار وخبير في استنباط (الرسوم والجبايات) فما إن تريد أي محلية أن تقوم بزيادة إيراداتها حتى تتصل بالأستاذ عبدالمنتقم ليقوم بالواجب مبتدعا نوعا من الرسوم لا يمكن أن يتخيله أحد .
كنت أظن وليس بعض الظن إثم أن الأستاذ عبدالمنتقم قد ترجل (ونزل المعاش) بعد كل هذه السنوات الطويلة أو أنه بفضل دعاء المواطنين عليه قد إنتقل إلى الرفيق الأعلى أو أصيب بشلل رباعي ولكن ما أخبرني به (بالمستندات) المواطن الشاب (حسن عجب) قد جعلني أشك في ذلك.
فقد اطلعني هذا المواطن على إيصال 15 أليكتروني يوضح تفصيليا الرسوم الخاصة بترخيص عربته وقد كانت كالتالي:
380 جنيها ترخيص سنوي ملاكي كبير
41 دمغة
50 دمغة تنمية
75 طرق
450 ضريبة أرباح رأسمالية
100 تحويل ملكية
03 شرطة
05 تشجير
30 الكربون.. (ما تستغرش أيوه الكربون)!
سألني الشاب (حسن عجب) وهو يمسك بالإيصال: يا أستاذ (الكربون) ده شنو الأي زول بيرخص عربيتو بيدفعوهو 30 ألف رسوم عشانو؟
بالطبع العبدلله إستغرش (تماااامن) وتأكد تمام التأكد بأن الأستاذ عبدالمنتقم حي يرزق ويمارس في إستباط الجبايات .
إلتفت إلى (الابن حسن) شوف يا ابني غايتو (رسوم الكربون) دي والله ما عارفا شنو.. لكن خلينا ندخل النت (نقوقل) الكربون ده إحتمال نلاقي إجابة، وبالفعل قمنا بكتابة (الكربون) على (قوقل) فكانت أولى النتائج من نصيب موسوعة الويكيبيديا حيث جاء فيها:
(الكربون هو عنصر كيميائي له الرمز C والعدد الذرّي 6، ويقع ضمن عناصر الدورة الثانيّة وعلى رأس المجموعة الرابعة عشر في الجدول الدوري وذلك كعنصر مجموعة رئيسي، حيث أنّ مجموعته تسمّى باسمه مجموعة الكربون.
يصنّف الكربون ضمن اللا فلزّات، وهو عنصر رباعي التكافؤ، بحيث إنّ لديه أربع إلكترونات متاحة من أجل تشكيل روابط تساهميّة، كما أنّ له القدرة على الارتباط مع ذرّات كربون أخرى لتشكيل سلاسل كربونيّة طويلة، كما يرتبط مع عدد من العناصر الأخرى، بحيث يشكّل الملايين من المركّبات العضويّة.
يتوافر الكربون في كل أشكال الحياة العضويّة وهو أساس الكيمياء العضويّة، كما يوجد الكربون بصيغته اللاعضويّة في العديد من المركّبات والتي من أشهرها ثنائي أوكسيد الكربون وأملاح الكربونات.
نظراً للأهميّة الحيويّة للكربون، وتنوّعه وتشكيله لعدد كبير وضخم من المركّبات العضويّة، فإنّ الكربون يعدّ من العناصر الأساسيّة لوجود الحياة).
إنتهى تعريف الموسوعة للكربون، والذي لم يساعدنا في معرفة أصل وفصل هذا الكربون الذي يدفع المواطن من أجله 30 ألف جنيه عند ترخيص عربيتو !
قلت للابن حسن وأنا متهلل الوجه بعد أن (نحتا مخي) خلاس وجدتها.. وجدتها.. الكربون ده بيقصدو بيهو يكونو (ورق الكربون) القاعدين يختوهو بين ورق الإبصالات.. يكونو عملو الرسوم دي عشان يطلعو تمنو.. إلا أن ولدنا حسن أجهض فكرتي تماما وهو يرد علىَّ قائلاً:
• يا أستاذ ورق شنوو؟.. الإيصالات دي بقت أليكترونية !!
• طيب يا ابني ليه الكربون بالذات.. رسوم صوديوم مالو عيبو ليا؟..

وعدت إلى المنزل وأنا أقلب هذه المسألة في رأسي.. وأردد: يا عبدالمنتقم الله لا بارك فيك جبتا رسوم الكربون دي من وين؟ يا عبدالمنتقم الله لا بارك فيك جبتا رسوم الكربون دي من وين؟
أعزائي القراء الكرام:
من يستطيع أن يشرح للشعب السوداني الفضل ماهية رسوم الكربون هذه الذي يدفعها المواطن عند ترخيص عربته دون أن يعرف كنهها لديه جائزة قيمة عبارة عن (كورس) حبوب وقاية من فقعان (المرارة) يتسلمه من إستقبال الصحيفة.

كسرة:
ده كووولو كووم وخمسة آلاف التشجير دي بتمشي وين؟ قال أيه تشجير وكربون.. يكربنكم اللا نام ولا أكل طعام !!
كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و +و.
• كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+و.




التيار

تعليقات 26 | إهداء 0 | زيارات 6736

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1355408 [عبدالواحد المستغرب اشد الإستغراب!!]
0.00/5 (0 صوت)

10-16-2015 06:11 PM
يا جبرا والله صاحبك ده يحمد ربو ويشكرو على الأقل قوقل حلا ليكم مشكلتكم او بالأحرى خلتكم بين بين !! طيب تقول شنو في رسوم إضيفة للتجار البرخصو محلاتهم التجاريه وطبعا وبعد رصة رسوم ما ليها حد اخترعوا ليك رسم جديد مطبق من السنه الفاتت إسمها رسوم (إعلانات) وبالسؤال عن كنه هذا الإعلان وإذا ما كانت تتم من وراء أصحاب المحلات عبد المنتقم قال (أبدا.. انتو مش عاملين لافتات فوق محلاتكم) قلنا بصوت واحد (نعم!!) فقال لينا (ما تيب) تخيل لوحه تختها عشان المواطن الكده كده حيدفع الاندفع لعبد المنقم عشان يعرف المحل الحيتعامل معاه كان جزاره ولا محل شمار ولا حداده ولا ترزى تقوم الحكومه بتحصيل رسوم إعلان !! تقولى كربون؟!! والحمد لله الجات على كده!! انت ماعارف حكاية الطفايه وضرورة شرائك لها والحكايه دى ليها كم سنه مطبقه وما شفنا واحد قاعد يستعملا بينما بنشوف مركبات محروقه للآخر !! يا جبرا هو قالو ليك آلبياكلو آموال الناس بالباطل ديل جايين من كوكب تانى ؟!! ما ياهم آمثال عبد المنتقم ديل العدموا البلد البركه والسبب التهليب المقنن!! وبالمناسبه مافى قرش بيدخل الخزينه وإلا لعبد المنتقم وآمثاله لهم فيه نصيب عباره عن عموله والمدهش انت لما تقول ليهم عموله بيزعلوا جدا ويقولوا ليك يا أخى تآدب !!ده اسمو حافز ما إسمو عموله!! شفتو ليكم وقاحه اكتر من كده!! وهى لله هي لله !!


#1355316 [Mutasim]
0.00/5 (0 صوت)

10-16-2015 12:13 PM
يا جبرة دي دقست فيها مع انها واضحة ... انت موش قلت الفواكه برسومها بي حامض الكبريتيك بتاع البطاريات الجماعة دايرين حقهم في موية البطارية بتاعتك و ما ممكن يشيلو من بتاع الفواكه ولا البنشرجي


#1355247 [حمدالنيل]
0.00/5 (0 صوت)

10-16-2015 06:47 AM
الاخ جبره..ارجو التنبيه ..الله سبحانه وتعالى يقول ان بعض الظن اثم وانت تقول ليس بعض الظن اثم انتبه ماتورط..بعدين لابنغعك بشير ولابنفعك ساخر سبيل


#1355102 [كمال الهدع]
0.00/5 (0 صوت)

10-15-2015 05:26 PM
يا اخوى ياالفاتح جبرا انا جبتها ليك كان يسموها تلوث البئة بالكربون عشان المرة الجاية يقولو رسوم نفايات اللساتك وقطع الغيار وعوادم السيارات بدلا عن الكربون طبعا والى الخرطوم ما وجد اراضي يبيعها عشان كدا عاوز ليه اي رسوم يفرضها..


#1354910 [وحيد]
0.00/5 (0 صوت)

10-15-2015 10:30 AM
يكربنكم اللا نام ولا أكل طعام
آميييييييين


#1354794 [الغريب فى وطنه]
0.00/5 (0 صوت)

10-15-2015 07:48 AM
يا أستاذ جبرة / عبد المنتقم حي ولم يمت
قام بعاتي وسمى أسمه حاج ماجد سوار لكن المرة دي مجتهد مع المغتربين الله يكون في عونهم


#1354582 [الهائم]
0.00/5 (0 صوت)

10-14-2015 05:21 PM
لامانة اضحكني المقال لحد البكاء وهذه نصيحة لكل الاخوة اضحكوا بأعلى حس لقد اثبتت الابحاث والدراسات ان للضحك فوائد لا تحصى كما سيساعدكم ايضا على تغيير البرمجة العصبية الموجودة لديكم وهي الضحك بإستمرار عند مطالعتكم خبر من هذا النوع ومع التكرار ستجدون متعة في تلقي المزيد منها.انها حالة خاصة انه كوكب السودان .كربون كربون مامفترين!


#1354554 [جرتلى]
0.00/5 (0 صوت)

10-14-2015 03:30 PM
هات الحبوب يا جبره الرسوم هى عباره عن مخالفه انبعاث الدخان الاسود من عوادم السيارات فهى مخالفه عامه طالما العربه تسير بالوقود
اذا عندك عربه تسير بالكهرباء فانت معفى من رسوم الكربون


#1354507 [sasa]
5.00/5 (2 صوت)

10-14-2015 01:55 PM
كل مسميات الرسوم بالايصال غريبة وأغرب من ضريبة الكربون هي ضريبة الأرباح الرأسمالية على تجديد رخصة السيارة ،، لعنة الله على على عبد المنتقم (البشير وتابعيه) كسرة: ندعو لمؤتمر لتحديد الرسوم الواجبة والمستحقة ومقابلها من الخدمات وغزالة اي تشوهات أو مسميات مستفزة ،، كسرةة تانية: في ايصال جهاز المغتربين التعسفي قال أيه رسوم قناة فضائية قال وكمان خاتين لينا بدون خجلة رسوم لجامعة المغتربين وهي جباية لصالح فئة تسمت باسم المغتربين وعملت ليها جامعة خاصة بالقروش وبعد كده لقت امتيازات ,اراضي باسمنا وبعد ده بتشيل مننا رسوم ... أأأأخ ،، غايتو أنا ما عافيها ليكم ليوم القيامة ،،، ،، لعنة الله عليكم إلي يوم الدين،،


#1354461 [قاضي إشبيلية]
0.00/5 (0 صوت)

10-14-2015 12:54 PM
لو لاحظت با الفاتح .. هم دايرين يوصلوا رسوم الترخيص لمليون جنيه (بالقديم) بأي طريقة.. شفت الحرفنة دي كيف؟؟


#1354459 [المدعوم]
0.00/5 (0 صوت)

10-14-2015 12:52 PM
معاك كمان 03 شرطة... ياربى دى ما داخلة فى ال 380؟....رسوم بلا مقابل..رايحة حوار وانتخابات وعرس مسؤولين


#1354453 [المدعوم]
0.00/5 (0 صوت)

10-14-2015 12:46 PM
41 عرفناها دمغة تنميةز اها ال 50 دى دمغة شنو...؟ خليك من الكربون!!


#1354451 [ابو اشرف]
5.00/5 (1 صوت)

10-14-2015 12:45 PM
طبعا إجابة د. حسن محمدحسن صحيحة 100% لكن يفترض تذهب هذه الضريبة للغرض الذي اخذت من اجله وهو تخفيف التلوث الحادث من هذه السيارة .لكنهم بيقلدوا من غير فهم وممكن تشتكوهم للامم المتحدة بإعتبارهم مختلسين اموال تخص دعم البيئة


#1354392 [عارف]
5.00/5 (2 صوت)

10-14-2015 11:24 AM
اقتباس : "كما يوجد الكربون بصيغته اللاعضويّة في العديد من (المركّبات) والتي من أشهرها ثنائي أوكسيد الكربون وأملاح الكربونات.
نظراً للأهميّة الحيويّة للكربون، وتنوّعه وتشكيله لعدد كبير وضخم من (المركّبات) العضويّة، فإنّ الكربون يعدّ من العناصر الأساسيّة لوجود الحياة) ".
* هم قرأوها (المَرْكِبات)!!


#1354378 [زاهر]
5.00/5 (1 صوت)

10-14-2015 11:10 AM
كربنة اى خنقة وقطع نفسة وكربن الجو اى جعلة معكرا لا يرجى صفائة وكربن وجهة اى قطبة وجعلة عابسا قمطريرا وكربنت الحرمة ملاح الخدرة اى وضعت علية الكربونات كى يسهل فركة ويكون متجانسا وكدة وكربنت بطارية العربة اى اصبح توصيل الكهرباء عسير لوجود الكربون على البطارية وهو غير موصل للكهرباء حسب علمى والانبعاث الكربونى والذى ينتج من السيارات والمصانع ويلوث البيئة مثل هذا النوع من الكربنة وضعت لة رسوم لاذالتة واصحاح البيئة الا ان مثل هذا الاصحاح يحتاج لمعينات ومكنكة وتقانة غير موجودة فى البلاد مما يجعل السؤال عن رسوم الكربون مشروعا


#1354335 [زول 200%]
0.00/5 (0 صوت)

10-14-2015 10:27 AM
وتستخدم رسوم الكربون في التقليل ورتق ثقب الاوزون والمتسبب فيه ثاني اكسيد الكربون حيث ان العربات تساهم في انبعاثه بشكل كبير في السودان وشكرا ه>ا للتوضيح


ردود على زول 200%
[زاهر] 10-15-2015 10:00 AM
رتق ثقب الاوزون يحتاج لصاروخ او ماكوك فضائى وحسب علمى الاثنين ما موجودين فى السودان فالاحسن ان تخلينا على الارض وتقوم الحيكومة بردم الحفر الفى الشوارع والبتسبب موت المارين بالطريق واهو مد رجلك على قدر لحافك وما دايرين فلسفة وهرطقة وديماقوقية وارتجال وكربنة


#1354290 [محمد]
0.00/5 (0 صوت)

10-14-2015 09:44 AM
يا ابو الجبور... تحويل الملكية مش مية جنية.. الموضوع الف وتلتمية وحاجة بالجديد... شالو مني شهر تسعة الفات دا...


#1354287 [حنتوس]
0.00/5 (0 صوت)

10-14-2015 09:38 AM
تحياتى أستاذنا الكريم الفاتح جبرة لك الإحترام والتجلة ،، يمكن رسوم الكربون دى بتتاخد بأثر رجعى .. ولا أقول ليك يا أستاذنا جبرة ما تستغرش ولا حاجة،،أنا نحت مخى وخلاص عرفت رسوم الكربون دى عملوها لترضية وتعويض الموظف البقوم بتحصيل الرسوم لأنو عن طريق التحصيل اللإكترونى لا مجال للتلاعب والإختلاس مما يؤدى لكربنة وزعل المتحصل المعنى ومن هنا جاءت تسمية الرسم عشان سيادتو ما يتكربن وطبعن ما بنقدر نزعلو ونكربنو .. أها شفت كيف وجدت الحل .. الجايزة شنو يا ربى ؟؟ ورق كربون مستعمل !!!!


#1354279 [عصام محمد]
0.00/5 (0 صوت)

10-14-2015 09:27 AM
يا جبرة تحياتي واشواقي

ذهبت قبل أيام لجوازات المغتربين لإصدار تأشيرة خروج وفوجئت في اورنيك 15 الإليكتروني تفاصيل المدفوعات :

1296 جنيه زكاة العام 1436 هـ
160 جنيه خدمات
10 عودة طوعية
5 دعم جامعة المغتربين
1 دمغة
1 ضريبة
ما لفت نظري عودة طوعية وزمان كان 15 فضائية و25 دعم السلام وايام إعصار صيف العبور ومسك الختام دمغة جريح وبسمة شهيد وشهقة وليد وهلمجرا فاختلفت المسميات وبقيت الجبايات الله لا بارك فيهم آكلي السحت وفي مثنى وثلاث ورباع بتاعينهم


#1354206 [د. حسن محمد حسن]
5.00/5 (2 صوت)

10-14-2015 08:01 AM
وتمثل ضريبة الكربون ضريبة على انبعاثات غازات الدفيئة التي تسبب االاحتباس الحراري. و تطبقها الدول التي تنتج كميات كبيرة من هذه الغازات. و تعمل الدول الاخرى على زيادة التشجير حيث ان التشجير من اهم الوسائل التي تقلل من نسبة ثاني اكسيد الكربون. و يبدو ان صاحب العربية يدفع مرتين لنفس الغرض تشجير و كربون.


#1354203 [محجوب عبد المنعم حسن معني]
5.00/5 (4 صوت)

10-14-2015 07:56 AM
سلام يا خال
كان ممكن يختو رسوم الكربون مع التشجير وطبعاً عندهم علاقة ، يعني انت كل ما تزيد نسبة التشجير او زراعة الغابات تلقاياً بتقل نسبة الكربون او الانبعاث الحراري.
تخريمة يا اما
حصل تجنيب لقروش الكربون
او حصل تجنيب لقروش التشجير
مع مودتي


#1354191 [مريود]
5.00/5 (1 صوت)

10-14-2015 07:32 AM
يااا أستاذ جبرة دا كلام ؟

ما سمعت بي اتفاقية كيو تو ?
من ضمن بنودها ضريبة الكربون .



يعني الصين كدولة مالية العالم هتش ومالية الجو سموم تدفع ضريبة يصلحوا بيها قد الوزون . كلام كبير حق ناس فاضييييييين وماعندعهم هم قفة الملاح .

بس أمريكا قالت أنا مابوقع والماعاجبوا اللمارقني الخلا .


وناسنا كمان شفو الفكرة عشان يصلحوا قفة الملاح.


#1354168 [ود يوسف]
5.00/5 (1 صوت)

10-14-2015 06:59 AM
إنت في الكربون أبو 30 جنيه ولا ضريبة الأرباح الرأسمالية الأكتر من رسوم الترخيص نفسه ، بعدين دا ترخيص ملاكي .. أكرر ملاكي .. من وين جات الأرباح دي ؟؟؟ وبعدين شنو دمغة ودمغة تنمية ؟؟؟ ديل حيروا إبليس في النصب والاحتيال وأكل أموال الناس بالباطل ... نسأل الله تعالى أن يأخذهم أخذ عزيز مقتدر وأن ينتقم من أي عبد المنتقم في السودان ، وأن يرينا فيهم يوماً كيوم فرعون وهامان .. إنه سميع مجيب ...
حسبنا الله ونعم الوكيل .


#1354132 [زوزو]
5.00/5 (3 صوت)

10-14-2015 02:13 AM
يا جبرة ده ما انبعاث الكربون من العربية عند قيادتها والبسبب تلوث بئيى والجماعة طبعن بشيلو القروش دى بصلحو بيهو اليئة كده


ردود على زوزو
[جنو منو] 10-14-2015 07:09 AM
أثنى على أجابة الاخ زوزو وهى المقصوده ولكى تتأكد ويزول الاستغراش أرجو الاتصال
بالسيد الوزير حسن وزير البيئه الكان صحفى معاكم زمان وسوف يؤكد لك هذه الرسوم
اذ هى من بنات أفكارو .. يلا رسل الحبوب ب دى اتش ال ..!!


#1354126 [Mohammed]
5.00/5 (4 صوت)

10-14-2015 01:37 AM
ياجبرة كربون من كربنه اي خنقه بشده ود رسوم في اعتقادي تؤخذ غصب عنا لتذهب للذين يقومون بكربنتنا متي دعت الضرورة وانا ماقلت جهاز الامن عشان ما تأولوا الكلام
والله أعلم


#1354125 [Miedo]
5.00/5 (2 صوت)

10-14-2015 01:34 AM
عبد المنتقم شخصية واقعية تعيش بيننا....


الفاتح جبرا
الفاتح جبرا

مساحة اعلانية
تقييم
10.00/10 (3 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة