04-10-2016 10:45 AM


يا جماعة الراكوبة بالله الليلة أدوني فرصة شوية أنزل من مدرجات المعلقين غير الراتبين واتطاول حبة واتوهم إني بقيت كاتبة ..طبعا مش بحجم الأساتذة الأدمنا قراية مقالاتهم زي ناس مولانا سيف الدولة ولا شريفة و هنادي و أخوانا أمثال شعيب وبرقاوي .. وغيرهم ..أنا بكتب بالبلدي كدا يعني علي طريقة أختنا اسماء الجنيد الإختفت يا حليلها مابعرف وين !
وطبعا الموضوع القلقني وخلاني ما أنوم من كم يوم .. الخبر القريتو عن نية رئيسنا وعريسنا نافض كيسنا و سواي رقيصنا بأنه عايز يخلينا بعد أربع سنين زي اليتامي ويمشي يخلينا لظلم وظلمات الليالي من بعده ونحن الإتعودنا على صورته الدايمة في التلفزيون وفي عدم منام العيون يا درنا المكنون وريسنا الحنون وعرفنا في عهده السعادة والأيام الطيبة !
وأكتر شي استفزاني في الخبر الفاجع .. إنه نحن داخرين ريسنا عشان يكون حاكمنا مدى الحياة ونضرب بيهو الرقم القياسي بين الرؤساء المكنكشين .. يعني مثلا ..رئيس زيمبابوي السيد موغابي أحسن منو في شنو .. ماهو عمره كم وتسعين وحاكم شعبه السعيد من يوم ما قالو استقلت بلدو ولسه مصر يوصل عملتو التلتماية مليون وحدة مقابل الدولار الواحد ..ودولارنا نفسه مقطوع وراء جنيهنا ولسه ما وصلو ميس الخمستاشر الف .. أها دي براها مش نعمه ورئيسنا لسه شباب في السبعينات وكمان مبدل ركب ويمكن يسبق كل الجماعة لو الحكاية فيها جري !
طيب رئيس جيبوتي السيد اسماعيل جيلة .. أقص ضفايري لو أنت يا ريسنا ما ساعدتو بحكاية المستشفى الإستفاد منو في الفوز أمس بالولاية الرابعة ومش الأخيرة .. والله كان تلب .. ولحق كفيلو ساركوزي!
أها نسيبنا السيد إدريس دبي منافس ليهو الليلة اربعتاشر راجل ينطح راجل وندى القلعة شالت دلوكتها مشت تسيرو لولاية جديدة .. يعني لو كنت ما ناسبتو كان بستمر..ولهّ كان ناس دارفور خلوهو لي هسع ..فكيف نرضى نحن إنك تكون صانع النجوم الدايمين و تقوم تغادرنا وانت يادوب حاتكمل التلانين سنة من حكمك الرشيد.. يعني داير تسمع لينا كلام بلة الغايب ويمشي كلامو على ارادتنا الشعبية .. عيب والله !
وكمان تشمت فينا المصرين الصبرو على السيد حسني مبارك تلاتة وتلاتين عام .. وإنت تفوت قبل ما تكمل مدتو .. خليهو القذافي داك كلامو تاني !
وبعدين أسع الولية الإسمها هيلاري كلينتون لو فازت باكر برئاسة أمريكا تقوم تفوت ليها البلد كدا ساكت عشان الأمريكان يقولو بتخاف من نسوانهم ويقومو يتبجحو يذكرونا بالحيزبون مادلين اولبرايت وراجل كلينتون لما ضربو ليك مصنع الشفاء .. تروح تخليهم ساكت من غير ما تتسدى في حرمة كلينتون و نخلي تارنا يروح شمار في مرقة وإنت الوعدتنا من الزمن داك بالرد في الوكت المناسب !
لا يا ريس لسع البلد حتاتا راقدة و المشترين علي قفا من يشيل بيع زي ما داير ..والخير بحرمليان و كيزان الدنيا كلها ما بتكملو .. بس إنت كمل جميلك معانا و أحكمنا على الأقل لحد نهاية القرن الواحد وعشرين دا بس.. طالبنها منك جميلة ولاهي مستحيلة وإنت ما بتغلب حيلة يا شيال التقيلة ..وخلى باقي القرون الجاية للبعدك بعد عمر طويل يا عشاء البايتات.. ما زال الليل طفلا يحبو .. وبنقولها ليك بالفم المليان..بدري يا ريس .. ما يصح توحشنا !

[email protected]


تعليقات 2 | إهداء 0 | زيارات 2260

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1442211 [أم أبوها]
0.00/5 (0 صوت)

04-10-2016 12:52 PM
عيني باردة .. و ما شاء الله بت الجنيد لقت ليها منافسة خطيرة .. لو ما كنتي انت هي باسم مستعار ..


#1442181 [Osama Dai Elnaiem]
1.00/5 (1 صوت)

04-10-2016 11:59 AM
لك الاجلال والتقدير --- انت نعمة من الله علينا ومواصلتك علي هذا السجع الجميل يجعله ماركة مسجلة ( نعمة) -- لك التحية.


نعمه صباحي
مساحة اعلانية
تقييم
10.00/10 (1 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة