انظروا الي قنابيرنا
03-29-2011 09:28 AM

انظروا الي قنابيرنا

عبد اللطيف البوني
aalbony@yahoo.com

(غايتو انا ماعارف, ) لكن مستعد اقسم وعلى وضؤ ان المؤتمر الوطني اي حكومة الخرطوم تساعد المتمردين على حكومة الجنوب وان الحركة الشعبية اي حكومة الجنوب تساعد المتمردين على حكومة الشمال . ليس لدي دليل مادي في ايدي ولكن ربنا (عرفوه بالعقل وما شافوه بالعين ) واي مراقب للشان السياسي في بلادنا لديه الحد الادنى من البصر حتى ولو كان بدون بصيره سوف يقول ما ذهبت اليه . نعم قد يكون هناك جناح في المؤتمر الوطني يفعل ذلك دون علم الجناح الاخر ونفس الشئ يصدق في حالة الحركة الشعبية ولكن لن يستطيع احد في المؤتمر الوطني ان يقسم بان حزبه لايساعد المتمردين على الحركة الشعبية ونفس الشي ينطبق على منسوبي الحركة الشعبية عليه فالشغلانة ليست شغل المجانين في الحزبين انما مسؤلية الجميع
اعتقد ان القارئ الكريم يتفق معي فيما ذهبت اليه , مش؟ طيب ما دام الامر كذلك فانني نيابة عن القراء الكرام واصالة عن نفسي اطالب زعامات المؤتمر الوطني والحركة الشعبية ان تحترم عقولنا وتبطل حكاية النفي ونفي النفي والنفي المتبادل وحكاية ضربني بكى وسبقني اشتكى ونقول لهم بالفم المليان بطلوا لعب العيال البتعملوا فيه دا وخليكم واضحين فاذا كان المؤتمر الوطني يرى ان تغيير حكومة الحركة الشعبية في الجنوب او زعزعتها او عدم استقرار الجنوب فيه خير للشمال او للسودان كله فاليقل ذلك صراحة ويدعو اهل الشمال للالتفاف حوله وكذلك اذا كانت الحركة الشعبية ترى ضرورة زوال حكومة الموتمر الوطني او زعزعتها اوعدم استقرار الشمال او فيه مصلحة لدولتهم الجديدة او فيه مصلحة للمهمشين في الشمال او يمكن ان يؤدي الي سودان جديد او يمكن ان يؤدي الي اعادة الوحدة فالتقل ذلك صراحة وتدعو الشعب في الشمال والجنوب ان يعمل معها نحو هذة الغاية اما اذا كانت الحكاية تسديد فواتير قديمة فالتسكت عن ذلك
في تقديري ان هذا الذي يحدث الان بين الشريكين خطير و خطير جدا انه لعب حقيقي بالنار وانه قتح لطاقة جنهمية سوف تلتهم الشمال والجنوب معا انه نوع من حرب الوكالة الخبيث سوف يتعملق ويتحول الي حرب مباشرة بين الشقين وهذة المرة ستكون بين الدولتين وسوف تقول للحرب الاهلية السابقة (انتي شن بتعرفي) ان الجنرال اطور لن يسقط حكومة جوبا ومني اركو لن يسقط حكومة الخرطوم لكن سوف تدوخ كل منهما الاخرى وسيدفع الشعب المسكين في البلدين هذة الفاتورة اللعينة من دمه ولحمه وعظمه (طبعا الشحم مافي ) فيايها الشعب الصامت المعزول في البلدين قل للحزبين كفاية العملتوه في السودان وكفاية تقسيم البلاد يجب ان نطالبهم ان يربطوا مجانينهم واخبروهم ان ريالتنا ليست سائلة وان قنابيرنا حلقت من زمان لاننا دفعنا الوقية لابل دفعنا رطلا كاملا (على الطلاق ما اشرح دي) .





تعليقات 13 | إهداء 1 | زيارات 4117

خدمات المحتوى


التعليقات
#120281 [jilane]
0.00/5 (0 صوت)

03-31-2011 01:16 PM
والله المؤتمر الوطني ناسوا مجانين وناس الحركة الشعبية اجن منهم بس يابروف المشكلة في إنو الحركة الشعبية بي العملتو في الحكومة دي اخلف للوراها وللقداما هي في الحكومة وراكبة سرج المعارضة ووزير الخارجية الجنوبي يحرش في امريكا علي الشمال وباقان ماخلي امريكي ماجرب معاهو ودعم علني لي حركات دارفور المتمردة علنا . ودا البخلي الحكومة تركب راسها


#119423 [ابو علامة]
0.00/5 (0 صوت)

03-30-2011 01:21 AM
بروف البوني ........ لك كل الاحترام

موضوع ( الحرب بالوكالة ) والضرب تحت الحزام ده

ماركة مسجلة باسم الاسلامويين (بتوعنا ) !!!!!!!!!!!!!!

وكل الدول المجاورة تشهد على كده ودي ما دايره

ليها ( حليفة طلاق )!!!!!!!!!!!!!!!!!!!!!!!!!!!!!!!!!!!!!!!!!!!!!!!!



#119403 [ابوالسارة]
0.00/5 (0 صوت)

03-30-2011 12:06 AM
اخرج عن قميص يوسف يادكتور ومرحب بك كاتبا وناقدا ، تنصف نفسك قبل الآخرين ولا نقول لك انك في يوم من الايام كنت معهم ولكن نقول لك العودة للحق فضيلة والحصيف من تدارك نفسه قبل فوات الاوان ولا تهتم لمن يرموك بالقول فهذا هو حال الصحافة والكتاب .
نكرر مرحبا بك قلما بحدة السيف وسيفا بقوة القنبلة الذرية حتي تفجر لنا المستور والطاقات الكامنة كيما نرتقي معا من اجل الوطن


#119349 [الطاووووس]
0.00/5 (0 صوت)

03-29-2011 09:31 PM
باين الشهر ده ماقبض من ناس المؤتمر بعد الشمال ما فلس بيه الجنوب والناس بقت كومي وكومك ما فاضييين للمطبلاتيه:D :D :D :D


#119258 [محمد حامدى]
0.00/5 (0 صوت)

03-29-2011 05:49 PM
hgالبونى داير يخش السجن ويبقى مناضل بعد مواقفه المخزيه والشك والريبه فى لونه تجاه الانقاذ


#119232 [Saif AlHagg]
0.00/5 (0 صوت)

03-29-2011 04:51 PM
ياسلام عليك دكتور البونى

كلام فى صميم الصميم وعلى الطلاق ماعاوز شرح

لكن قنابيرنا وريالتنا السايلة دى بتتعرف بعدين ما احنا الجرذان والجراثيم البطرش الدم رطلين


#119206 [ahmed]
0.00/5 (0 صوت)

03-29-2011 04:06 PM
شوف يا بوووونى

المعادله كالاتى

المؤتمر عندو مصلحه فى زعزعة الجنوب

الحركه مطلوب منها تزعزع ناس المؤتمر مش الشعب فى الشمال

الشعب فى الشمال عايز الاستقرار للجنوب وحكومة الجنوب

والمهم ........ انت عايز شنو

بالمناسبه زمان قبل كم سنه شفنا اسمك فى لائحة المؤتمر الوطنى


#119201 [دعد]
0.00/5 (0 صوت)

03-29-2011 03:58 PM
يا ببونى (على الطلاق ما اشرحها دى )

القمبور بربوه لى شافع النديهه وبعد دفع وقية الدهب بحلقوهو فى البنية ولا ما كدا ..
نعم يا استاذ نحن بنحبك وبنحب افكارك بس بس ..واجعنا فى البحر السكات ؟؟
هكذا دايما قول الحقائق بى وضوح ومن غير تلميح انت صاحب كلمة يعنى قابض على الجمرة ..
الوطن يئن من الالم يحتاجكم انت الطبقة المثقفة لتقودوا شعبه الى النور فلا تلزموا الصمت خوفا او تجاهلا او لاى سبب قولو الكلمة على الملأ....

استاذى الوطن يحتاجك فلا تتردد فى قول الحق .. الوطن امانة فى اقلامكم فكونوا الحق فى وجه الظلام ...


#119132 [ام محمد]
0.00/5 (0 صوت)

03-29-2011 02:31 PM
والله مرات كتيرة اقول لو بقوك رئيسا للسودان بانتخابات طبعا 000البلد دى حالها ح ينصلح00لكن ارجع اقول الضمان شنو يابروف ما يصيبك داء العظمة وتسوليك مخطط جديد سبعة نجوم فى الخرطوم وتدق ليك فيهو بيرك مكتوب عليهو اللعوتة 2 والماعاجبو يلحس كوعو


#119102 [ام محمد]
0.00/5 (0 صوت)

03-29-2011 01:58 PM
احنا قنابيرنا صاح حلقوها لينا من زمان ودفعو وزنا دهب لكن يابروف ديل مابنظروا لقنابيرنا نحنا.... ديل عينهم على قنابير اولادنا واحفادنا اللسا ما اتحلقت 000اديك العافية


#118969 [ الزول]
0.00/5 (0 صوت)

03-29-2011 10:52 AM
كان بفهمون كلامك كده كنا بقينا ناس ودولة ;) ;) ;) ;) ;) ;) ;) ;)


#118953 [الزول السمح( الأصل )]
0.00/5 (0 صوت)

03-29-2011 10:35 AM

يابروف

إنت لسه فى الشغل واللا..ربنا يستر عليك


#118885 [الساير]
0.00/5 (0 صوت)

03-29-2011 09:35 AM
والله يا دكتور البوني أنت خطير




على الطلاق ما اشرح دي) .

وفي دي قلبت الهوبة عشرين مرة


ردود على الساير
Saudi Arabia [ابو عمر] 03-29-2011 01:21 PM
يا دكتور البوني امس في برنامج الطاهر التوم الزول المتعافي ده جاب سيرتك وقال يتحداك في الكلام البتكتب فيهو ده عن زراعة القطن في الجزيرة فشوف لينا الرد عليهو

Sudan [محب الامام الصادق] 03-29-2011 11:07 AM
اول مره تصرح ضد الموتمر اللاوطنى وتخرج من جحر الخوف الكنت فيهو
شوف البلد دى حا تفرح قريب طالما الامام الحبيب السيد الصادق المهدى قال:
الطبله يا تفتح يا تفلس


عبد اللطيف البوني
عبد اللطيف البوني

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة