05-22-2016 01:58 PM


من أمن العقوبة ساء الأدب كما تقول المقولة ونضيف إليها (وسدر في غيه) ، العبدلله يستقبل بصفة شبه مستمرة شكاوى من المواطنين القادمين عبر مطار الخرطوم يقولون فيها أنهم بعد إستلام (شنطهم) من (سير العفش) يفاجأون بأنها قد فتحت أو (شرطت) وتم الإستيلاء على أشياء قيمة منها !

وقد كتبنا كثيراً حول هذه الظاهرة كان آخر ما كتبنا مقالاً بعنوان (سرقات المطار لمتين) سردنا فيه قصة الراكبة (شوق عماد الدين عبدالقادر) التي كانت قادمة من الرياض بالمملكة العربية السعودية على الرحلة رقم 457 – الخطوط السعودية- بتاريخ السبت 9 أبريل والتي هبطت بمطار الخرطوم في الشاعة 10:20 مساءاً .. الراكبة رأت شخصاً خلف (سير العفش) وهو يقوم بفتح شنطتها وأخذ موبايل جلاكسي S6 جديد ، (ثمنه أكثر من 7 مليون جنيه) وهي تصيح فيه :
– يا عمو دي شنطتي .. يا عمو ما تشيل الموبايل .. يا جماعة الزول ده بيسرق في شنطتي !
أخذ صاحبنا الموبايل وإختفي من وراء نافذة السير كما ولم يحفل بصراخ الشاكية أحد ولم تجد مسؤولاً لتحكي له ما حدث (ببساطة كده) !
وعلى الرغم من إننا قمنا بتوفير كافة البيانات اللازمة والتي من شأنها إجراء تحقيق والتوصل إلى (الحرامي) إلا أن الجهات المسؤولة عن أمن وسلامة الركاب وممتلكاتهم بالمطار (ما قالو لينا بتقولو في شنووو) !
وقبل ذلك كتبنا مقالاً بعنوان (موبايل د. عدلي) سردنا فيه سرقة موبايل الدكتور باهظ الثمن ماركة (آيفون 6) وقد ذكرنا في المقال كل المعلومات التي من شأنها فتح تحقيق (مكتمل) لإستعادة هاتف الدكتور ، فقد ذكرنا أن (السرقة) تمت في مساء يوم الإتنين الموافق 23 أغسطس الماضي ، وأن الدكتور (عدلي) كان قادماً من الولايات المتحدة الأمريكية عبر دولة قطرويجلس على المقعد رقم (28) في مقاعد الرحلة القادمة من الدوحة عبر طيران الخطوط القطرية ، وإن زمن الهبوط بمطار الخرطوم كان في تمام الساعة الحادية عشر مساء (ما فضل إلا فصيلة الدم) !
رغم أن المعلومات أعلاه كفيله كما ذكرت بفتح تحقيق وإخطارنا بما توصل إليه إلا ان الإخوة في شرطة وأمن المطار (ما إشتغلوا بينا شغلة) وراح موبايل الدكتور (شمار في مرقة) !
وبعد أن صارت مسألة سرقة مقتنيات القادمين عبر مطار الخرطوم وقمنا بتسطير الكثير من المقالات إنبرى لنا أحد المسؤولين بالمطار نافياً ما يحدث ذاكراً بان هذه السرقات تتم في مطارات القدوم أي المطارات التي يسافر منها الركاب المسافرين !
طيب أيه راي (المسؤول الفوق ده) وكافة المسؤولين عن الأمن بمطار الخرطوم في (سرقة شنطة) راكب مغادر !! عشان بس تعرفوا إنو (مطاركم ده) أصبح (ذي سوق الملجة)
القصة يا سادتي الأماجد حدثت مع الدكتور/حلمي نور المسافر على الرحلة رقم 1395 الخطوط القطرية (الخرطوم – الدوحة- كازابلانكا) والتي غادرت في الساعة 2:20 فجر الخميس الموافق 12 مايو الجاري ، الدكتور حلمي إختصاصي نساء وتوليد وقد تمت دعوته مع أطباء آخرين لحضور أحد المؤتمرات الهامة بكازابلانكا ،
حضر الدكتور حلمي إلى المطار قبل وقت كاف وعندما تم فتح الميزان للرحلة توجه إلى كاونتر (القطرية) أعطي الموظفة الجواز والتذكرة ووضع شنطنه على الميزان إلا أن الموظفه أعادتها له بحجة عدم وجود تأشيرة الخروج ، أخبرها بأنه يعلم ذلك (وح يمشي يعمل التأشيرة ويجي راجع) وترك لديهم الشنطه ريثما يعود ، قام الدكتور حلمي بعمل التأشيرة ثم عاد ليجد (الشنطة إتسرقت) … نعم إتسرقت الواااااحدة دي … بسؤال موظفة (القطرية) أجابته في إستعلاء و (قلاصة) لا مبرر له بإنو دي ما مسؤوليتا !! مستخدمة كلمة (يا بابا) مما حدا به أن يطلب منها أن تتحدث (بأدب) !
قام الدكتور حلمي بعرض مشكلة (شنطتو الرايحة) عل كل المسؤولين عن الأمن وإدارة المطار (إبتداءا من مدير الصالة ) ولكن كانت الشنطة فص (ملح وذاب) ، سألهم عن كاميرات المراقبة فأجابوا بأنه لا توجد كاميرات مراقبة (تخيلو) مطار بدون (كاميرات مراقبة) مع إنو (الوزارات دي كووولها) فيها كاميرات مراقبة !!!
ولما جاء موعد إقلاع الرحلة .. إتجه د. حلمي إلى الطائرة وهو يحمل حقيبة أوراقه فقط ! ومن حسن حظه أنه كان يحمل معه بعض النقود التي مكنته من (النزول للسوق) وشراء ملابس لائقه ليظهر بها في المؤتمر الذي كان إنعقاده في اليوم التالي !
عاد الدكتور بعد أسبوع للبلاد وإتجه إلى مدير صالة المطار متسائلاً عن مصير (شنطتو) وتم توجيهه للذهاب إلى مخزن (المهملات) وهو مخزن مليء بالشنط والكراتين المتراكة التي تختلط محتويات بعضها ببعض في عشوائية غريبة … وبالطبع لم يجد الشنطة لأنها ببساطه لم تكن (مهملة) بل كانت عندما (سرقت) موجودة أمام ميزان (القطرية) !

كسرة :
أها يا ناس مطار الخرطوم … سرقة ممتلكات الناس الجايين عرفناها .. كمان جابت ليها سرقة ممتلكات المغادرين؟ !!

كسرة تانية :
إلى متي صمت المسؤولين عن هذه المهازل !!!!!!

كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووووووووووو)+و +(و)

 كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+(و)

كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنوووووووو؟ : (و) ….

تعليقات 19 | إهداء 0 | زيارات 6137

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1465629 [رؤيا]
0.00/5 (0 صوت)

05-24-2016 09:41 AM
والله يا جبرا انا من الخرطوم ماشة دبي على - فلاى دبي - ومعاى زوجى لما جينا للوزن وزنا طلع بسيط زوجى قال لى خلاص اشحنى الشنطة الجارها دى بدل تتعذبى -- وما عرف العذاب وين -- المهم شحنت الشنطة يا مؤمن يا مصدق مطار دولى وشنطه مقفولة بس ما فيها طلبة لانى كنت حاجرها في يدى المهم محفظتى فيها ونسيت قصة المحفظة وما خطر على بالى انها تتفتح وتتسرق .. فتحوها وسرقوا دولارات ودراهم .. وصلنا مطار دبي علشان نشترى من السوق الحر فتحت الشنطة على أساس اشيل القروش لقيناها مفتوحة ومنتفة حتة حتة والحمدد لله برضو طلع فيهم شوية ضمير خلوا لى بطاقتى ورخصتى وغيرها .. المهم اتصلنا على اخوى وراجع المطار وقالوا بكون في مطار الوصول .. استغفر الله والله في دبي ابرة لو وقعت من شنطتك يوصولها ليك ومعاها اعتذار قمة الاحترام والتقدير والأمانة.

المهم ومن يومها ولليوم وليوم الدين الشال قروشى تتشال من عافيتو وصحتو وصحة أولاده وتدخل عليهو بالمرض والهم وحسبى الله عليه دنيا واخرة ..


#1465307 [AAA]
4.16/5 (10 صوت)

05-23-2016 01:19 PM
من الحيثيات..الشنطة دي لم تسرق..بل تم اختطافها....


#1465294 [مريود]
4.16/5 (10 صوت)

05-23-2016 12:46 PM
غايو لسا صابرين عليك وبنقرا ليك علي قديمك.


#1465178 [وحيد]
4.16/5 (10 صوت)

05-23-2016 10:01 AM
عندنا قريبنا مشى عقد في جامع سيدة سنهوري و تصادف ذلك اليوم حضور المشير و المبي و جماعتهم لعقد في نفس المسجد .. تمت سرقة محفظته و تلفونه داخل المسجد و رجع خشمه ملح ملح ... قلت ليهو ياخي دي غلطتك... الحرامية كووووولهم في الجامع تمشي تخش عليهم بي كرعيك و عايو ما تتسرق؟
البلد خربانه من كبارها


#1465174 [ابو جلال]
4.16/5 (10 صوت)

05-23-2016 09:55 AM
السرقه فى الشنط صحبه الراكب ربما تكون بسيطه مرة مرة يعنى السرقه الجد جد فى العفش المشحون عبر مخازن المطار دى معلومة أتتقصى منها راسك حيشيب فى اسبوع بس


#1465162 [NANA]
4.16/5 (10 صوت)

05-23-2016 09:38 AM
لعناية السيد مدير المطار و السيد مدير الطيران المدنى و السيد مدير الشرطة و السيد وزير الداخلية:
عليكم الله عليم الله خلوا لينا امل نرجع بيه و نشوف اهلنا و نشوف بلدنا - و الله كرهتونا الحياة كلها! بعد ما خلينا البلد عسى و لعل الواحد يستقر ماديا و نفسيا ! فارقنا اهلنا و فارقنا بلدنا و ضحينا بعمرنا جينا بلاد لا اسلامية ولا عربية و ادتنا كل شى ! لكن الاخبار الجاية من سودانا و الله سارقة مننا كل شى - البلد حروب و غلاء نسال الله يفرجها و دولار كل يوم ماشى اسرع و خطف شنط و هواتف فى الشوارع . برضو تجى من ناس المطار! بالله عليكم خلوا لينا حاجة نرجع عليها - يعنى المغترب لو فكر يرجع يخط ايدو فى قلبه - و احسن ليه مايفكر من اول .


#1465157 [AbuAreej]
4.16/5 (10 صوت)

05-23-2016 09:19 AM
طبعاً دي مشكلة كبيرة انه تتسرق أشياء المسافرين سواء قادمين او طايرين من البلد . وانعدام امن . ولكن اعتقد ان الدكتور نفسه فرّط في شنطته.. ما كان له ان يترك شنطته وراءه وهو يعلم الحال في السودان اللهم الا اذا كان عائشاً خارج السودان طول عمره .. كان عليه ان يأخذ شنطته معه .. بعض الأحيان تتسرق شنطتك وانت واقف قريب منها فما بالك تتركها.


#1465107 [صابر الصابر]
4.16/5 (10 صوت)

05-23-2016 08:30 AM
ديل كلهم حرامية .. يجب الحرص وعدم الاهمال والاشياء الثمينة يجب حملها صحبة راكب ..البلد فيها مجاعة غير معلنة الفقر والعوز يؤدي الى اكثر من ذلك ..كل شيئ سيئ ارتبط بحكومة هؤلاؤ الخرفان في الماضي لم تكن لمثل هذه الاحداث ان تظهر بمثل هذه الصورة الناس بقوا ياكلو في المال الحرام زي البسكويت هذه الحكومة افقرت الشعب بينما المسئولين واقاربهم يعشون في بحبوحة .نسال الله ان ياخذهم اخذ عزيز مقتدر ونطلب من كل من وقع عليه ظلم من هذه الطقمة الفاسدة ان يرفع يديه بالدعاء عليهم صباح مساء فدعوة المظلوم ليس بينها ولبن الله حجاب.


#1465036 [كاسـترو عـبدالحـمــيـد]
4.16/5 (10 صوت)

05-23-2016 04:22 AM
الآن كل المدن تركب كاميرات فى الشوارع والأسواق ومحطات البصات والمترو والدكاكين والصيدليات وباختصار كل منشئة يرتادها الناس سواء كانت للشراء أو العلاج أو اى شئ تجد الكاميرات بداخلها ترصد حركة الجمهور. اما عندنا فى المطار فالعملية مقصودة من مسؤلى المطار وعلى رأسهم مدير المطار ومسؤول الأمن ويظهر انهم بتقاسموا المسروقات مع الحرامية من العمال والموظفين . وهذا اتهام لهم مالم يثبتوا العكس . المفروض يكون تواجدهم عند وصول كل طائرة مع الركاب لأثبات تحملهم لمسؤلياتهم وحتى يطمئن الركاب على شنطهم ويخاف الحرامية من الموظفين والعمال لما يشاهدوا المسؤولين يراقبوا سير العمل , يجب اقالة مدير المطار فورا وكل رؤساء الأقسام اذا تكرر ذلك مرة اخرى . هذا ما يجب ان يتم. وعلى كل حال السودان دولة منتهية . لم يعد ينفع الأحتجاج والشكوى . هو اصلا فى طائرات .شوية الطائرات الخردة التى تعمل الآن سوف تسقط آجلا او عاجلا وتتسبب فى كارثة وهى عن قريب سوف تتوقف .


#1464997 [عوض]
4.16/5 (10 صوت)

05-22-2016 11:47 PM
اعملها كسرة جديدة اخبار سنطة د حلمى شنو


#1464911 [سعيد فقير]
4.16/5 (10 صوت)

05-22-2016 08:04 PM
يا استاذ ...
ديل ناس سرقوا الوطن الكامل بليل .... ما يسرقوا شنطة (حمزة) والعياذ بالله ...؟؟؟


ردود على سعيد فقير
[كاسـترو عـبدالحـمـيد] 05-23-2016 04:34 AM
يا اخ/ سعيد فقير العملية كلها عمل عصابات . ويديرها رؤساء الأقسام اصحاب الرتب العليا وينفذها الموظفين الصغار وذوى الرتب الصغيرة وكل واحد بياخذ نصيبه من السرقة . وان بعض الظن اثم و لو لا مخافة الله يمكن وزير الداخلية نفسه يكون مشترك فيها.


#1464869 [Zombie]
4.16/5 (10 صوت)

05-22-2016 06:22 PM
لا لا لا والله شيء يخوف ..
يا دكتور يعني نعمل شنو لشنطنا علشان ما تتسرق:
-ننزل السودان بشنط مليانة شطة حمراء وخضراء ولا شنو؟
-نعمل كاميرا ( خفية) علي الشنط؟
-نعمل جرس إنذار علي الشنط؟
-نعمل شرك( قلوبية ) علي الشنط؟
-نضع ثعابين وعقارب في الشنط؟


#1464840 [هوارى]
4.16/5 (10 صوت)

05-22-2016 05:23 PM
يا استاذ السودان ده اصبح حالة ميئوس منها اكتر بلد اوالبلد الوحيد فى العالم الدى تضربه الفوضى فى كل شى وانعدام للقانون واللامبلاه فى كل شئ واكتر بلد فى الدنيا المسؤولين فيه قليلين ادب ورافعين مناخيرهم فى الفاضى واتفه موظف فى اتفه وزارة او ادارة حكومية يمكنه ان يخرق القوانين او يعطل مصالح الناس كأن البلد حقت ابوه وحتة جربوع بتاع امن فى المطار يمكنه بكل سهوله ان يوقف من يشاءويمنع من يشاء من الدخول او الخروج وقس على ذلك موظفى الجمارك والاراضى والمرور والمستشفيات وسائقى الحافلات نحن شعب غير مهذب ومتخلف وشعب حالم وموهوم


#1464829 [زول]
4.16/5 (10 صوت)

05-22-2016 04:59 PM
الناس على دين ملوكها


#1464786 [babco]
4.16/5 (10 صوت)

05-22-2016 03:27 PM
حصل مع بنتي بمطار الخرطوم على رحلة السعودية المتجهة إلى جدة وفي نفس اللحظة تم البلاغ والمتابعة وقالوا الشنطة في أيدي أمينة وسوف يعرفوا ما حصل بمراجعة الكاميرات ولكن النتيجة لم تعلن.
توجد كميرات وهي تعمل وسبق وأن رصدت الشباب الذين سافروا إلى تركيا من جامعة مامون حميدة كما يعلم الكل.
هذه جريمة سرقة في مرفق حيوي
هذه جريمة تستر مستمر
لمصلحة منو؟
؟


ردود على babco
[كاسـترو عـبدالحـمـيـد] 05-23-2016 04:29 AM
دى عايزة كلام , طبعا لمصلحة مدير المطار ومسؤول الأمن . فهم لهم نصيب فى المسروقات . العملية شغل عصابات . كل واحد اصبح يسرق على عينك يا تاجر ولو سألتوا مش حرام عليك تطعم اولادك مال حرام ؟ يقول ليك :يا اخى المرتب ما بيكفى اسبوع . يعنى اعمل شنو ؟ والمسؤلين عارفين ظروفنا وما بيقول لينا حاجة . هذه الرواية يرويها كل رجال الشرطة فى الشوارع والمكاتب واصبحت اسطوانة . السودان انتهى يا عزيزى وعليه العوض .


#1464782 [عمر الحسن]
4.16/5 (10 صوت)

05-22-2016 03:19 PM
عارف ياجبرا لو موظفي المطار ديل ومعاهم المسؤولين اخدوا ليهم جلدة حااااارة من المسافرين ما كانوا استمروا في البعملوا فيه ده ....... لانهم شايفين الكبار شغالين لهط والناس ساكتة وتعاين مافي زول بقول بغم .


#1464773 [ود الفاضل]
4.16/5 (10 صوت)

05-22-2016 03:06 PM
بقت على الشنط والمبايلات ياجبرا هي البلد كلها مسروقة من ربع قرن
يحليل السودان زاتو راح شمار فى مرقة لحم حمير كمان !!!!!


#1464772 [تم دوره ادور]
4.16/5 (10 صوت)

05-22-2016 03:05 PM
وإذ أخذ الله ميثاق الذين أوتوا الكتاب لتبيننه للناس ولا تكتمونه فنبذوه وراء ظهورهم واشتروا به ثمنا قليلا فبئس ما يشترون ) [


#1464748 [الحقاني]
4.17/5 (12 صوت)

05-22-2016 02:35 PM
تباري لي الكسرات دي لحدي ما نلقاك واقف في صينيه


الفاتح جبرا
الفاتح جبرا

مساحة اعلانية
تقييم
4.50/10 (2 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة