تهاجروا تخلووونا؟؟
06-07-2016 11:47 AM




طقس من الطقوس اليومية التي اعتدت عليها منذ سنوات لا أعرف كم عددها .. أن أقوم صباحا بالذهاب إلى (كشك الجرائد) القريب أشتري صحيفتين سياسيتين .. ما أن أدخل إلى المنزل حتى أتوجه (للراكوبة) التي تفتح على المطبخ حيث أضع الصحيفتين على أحد الأسرة وأدلف إلى المطبخ لأصنع كوب قهوتي الصباحية !أثناء وجودي بالمطبخ كانت جارتنا الحاجة (صفية) التي درجت على شرب القهوة الصباحية أحيناً معي تتصفح الصحيفتين .. تنظر إلى (الصور) إذ أنها أمية (جيل ما قبل المدارس) ،لم تتلق تعليماً لكنها ذات فهمٍ عالٍ ومتابعة لما يدور من أحداث، ما أن حملت فنجاني القهوة ووضعته بيننا على التربيزة الحديدية وجلست على السرير حتى خاطبتني (الحاجة صفية) قائلة وهي تشير إلى صورة بالصفحة الأولى :- الزول أبو دقينة .. أب وشن صباح خير الرافع العصاية لي فوق ده مالو؟
• ده يا حاجة اسمو (الحسن)
• وموضوعو شنووو؟
• ده زعيم في الحركة الإسلامية .. بيقول إنو عندهم برنامج اسمو (الهجرة إلى الله ) يعني عاوزين يهاجروا إلى الله
• وهو لي هسه ما هاجروا مالهم السنين دي كوووولها؟ راجين شنووو؟
• يا حاجة الظاهر كانوا مشغوليين بالدنيا وكده
• والله كلامك صاح يا أستاذ .. بعد ما ظبطو روحهم واطمأنو على مستقبل أولادهم .. بعد ده ما في مشكلة اليهاجرو .. (مواصلة) والنساوين الكتااار ديل ح يهاجرو معاهم وللا ح يخلوهم لينا !
• والله يا حاجة علمي علمك لكن أفتكر إنو هم ح يهاجرو شوية ... ويرجعو ليهم شوية
• يعني ما ح يهاجرو بي وشهم ..
• ما ظنيت يا حاجة البهاجر بي وشو ده خلاس علاقتو بالدنيا بتنتهي
• والله يا أستاذ كلامك صاح الجماعة ديل علاقتهم بالدنيا شديدة خلاس
وطفقت الحاجة صفية تحدثني عن قريب لها لم يكن شيئاً مذكورا :
• والله يا أستاذ كان زول عاادي مأجر ليهو بيت جالوص بابو (زنك) متكول بي صفيحة .. وهسه ساكن ليهو في عمارة خمسة طوابق .. الحوش مليان عربات .. شي كبار وشي سغار .. ومعرس أربعة نسوان كل مرا مسكنا في طابق .. العفش ده كووولو من إيطاليا .. والسفر ده خليهو ساااي ... يوم ماليزيا ويوم الصين ويوم ما تعرف وين .. وكل ما أمشي ليهم ألاقي (الخروف) معلق في الباب والجزار بيسلخ فيهو ! .. قلتا ليهم فلان ده شغال شنوو .. قالو ليا ده (أمين) شنوو كده ما عارفة .. أها ده كلام ناس تهاجر !
• هم يا حاجة مش ح يهاجرو بالكامل يعني !
• شنو. هجرة نص نص
• عليك نووور يا حاجة .. يعني زي ما تقولي الواحد ح يهاجر كده من صلاة الصبح لحدت العصرية كده .. ويرجع من هجرتو ويقبل على الطيبات !
• طيب ما قولو (إعارة) .. انتداب .. دي هجرة شنووو؟
بيني وبينكم .. كلام حاجة صفية معقول .. قصة (الهجرة إلى الله) الذي ينادي بها الإخوة والأبناء في تنظيم الحركة الإسلامية دي واسعة شوية .. وكا أظنهم بعد هذه (التوسعة) بيقدروا عليها لذلك أضم صوتي إلى صوتها وأقترح عليهم أنو يقلبو القصة (إعارة) أو (انتداب) أو حتى (ورديات) !!
عشان موضوع الهجرة ده مااا بقدرو عليهو ... ومتطلباتو حاااارة وكده !
كسرة :
تهاجروا تخلووونا ... معقولة ياااخ
كسرة ثابتة (قديمة) :أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووووووووووو)+و +و+(و))
كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+و+(و)
الجريدة
______

تعليقات 14 | إهداء 0 | زيارات 6427

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1473126 [على]
1.00/5 (1 صوت)

06-08-2016 06:39 PM
اخبار حلايب وشلاتين عندك شنووووووووووووووووووووووووووووووووو


#1472930 [محمدوردي محمدالامين]
0.00/5 (0 صوت)

06-08-2016 11:15 AM
ياخي انت كالنسمه في (الحرايه) دي والمويه القاطعه والكهرباء المافي كلو كلو
مقالك ده بالذات جانا ونحن (مدبرسين)من الفلس وهاربين من التزامات رمضان
وحاجات العيد للاطفال والمرا وتري كنا منتظرين الناس دي تهاجر كان يشيلوا فقرهم
ده معاهم ونلقي لينا رزق نسترزق بيهو لكن زي ما قلت القصه اظنها (ورديات )ومافي امل ينصرفوا من وشنا ويشيلو (كجهم) معاهم....الله يصبرنا


#1472734 [سوداني]
5.00/5 (1 صوت)

06-08-2016 01:52 AM
الله (والشعب) يمهل ولا يهمل
١. اذا "هاجروا الي الله = فكوا البيرق" الآن، فستعيدهم منظمة الانتربول الي دولة السودان الجديدة بعد نجاح ثورتها القادمة ان شاء الله قريبا لمواجهة القضاء والقصاص كمجرمين هاربين قتلوا وسرقوا واغتصبوا
٢. واذا غامروا وقامروا وقالوا لانفسهم: "كان ما صفرجت ما بنمرق منها" فهم لا يعرفون ان اول اوليات القوات السودانية المسلحة الشريفة عند ساعة الصفر وانحيازهم الي حانب الشعب السوداني لتسديد الضربة القاضية لهذه الطغمة المجرمة ستكون هذا الامر الداخلي 【باك القيامة】 الذي اقسموا عليه بالدم:

"ضبانة ما تمرق! لا بطيارة، لا عربية، لا جمل، لا حصان، لا حمار، لا كداري!"

بعدين قصة "التهجير قصاصا الي الله" دي حيقوم بيها الشعب الثائر كخدمة اخيرة لهم بكل سرور

وبيننا وبينكم الايام!


#1472589 [A. Rahman]
0.00/5 (0 صوت)

06-07-2016 07:27 PM
يا أستاذ هم لقوا حكاية "الهجرة إلى الله" دي ماشة، أو الحقيقة نحن بنمشيها ليهم، عشان كدا أنا أقترح إنه كل واحد مننا يسمعهم يقولوها لازم يضحك بصوت عالي و فيه استفزاز و تريكة، كمانلما تسمعهم يكضبوا تصيح بصوت عالي "الجاااااااك" عشان يمكن يبطلوا التمثيل علينا.


#1472568 [البلوم الشارد]
0.00/5 (0 صوت)

06-07-2016 06:09 PM
جبر الله كسرك الفاتح جبرا دول لكن بيقدروا علي الغربه ولا الراتب فيها بالدولار والسكن المؤسس بتسع لاربعه مقاعد من الحريم


#1472556 [julgam]
3.00/5 (1 صوت)

06-07-2016 05:06 PM
الله يخت محنك ياود جبرا..بس انا ماغسنى واحد هاجر لسويسرا..شحادين دا شفناهو برلوم ليهو قدوم وصاحبو هناى بتاع الخارجيه ابوجضوم.وشنطة الزنك تكركب تحميك النوم..بس تعال شوفهم بعد موسم الهجره الى الله عاد دا كلو كوم..مثنى ورباع وذات دفع رباعى وبيوت كالقلاع..مخير هو ياود جبرا..


#1472509 [Nader]
0.00/5 (0 صوت)

06-07-2016 02:43 PM
باب زنكى متكول بصفيحه دى لذيذه منك
طيب اسمع واحده شافت احد ناس الهجره الى الله ديل ايام بلملموهم للتكبير والتهليل لزوم متاجره بالدين وكده
قامت قالت ليه ( هي يا نصرون درب قزازة عرقيك لى اسع هداك تحت العنقريب بقيت واعظ بين ليلة وضحاها )


#1472508 [عبده]
0.00/5 (0 صوت)

06-07-2016 02:42 PM
الله يطول عمرك يا مبدع

رمضان كريم وكل عام وانت بالف خير


#1472491 [أبو محمد الأصلي]
0.00/5 (0 صوت)

06-07-2016 02:17 PM
معقولة يا اخي تهاجروا إلى الله وتخلونا يااخي حرام عليكم نحنا أيتام ما عندنا والي غيركم تخلونا لمنو وتمشوا سايبين الدنيا دي لمنو . الله ينعل أبو اهلنا نحنا ذاته الما لاقين لينا زول يوافق يقعد معانا وما يخلينا ويستحملنا زي ما صبرتوا علينا اكتر من زوجاتكم ، نحنا ناس فقر اصلا ما بعجبنا عجب ولا صيام في رجب ولا اي حاجة . غايته كدي حاولوا وفكروا كويس قبل ما تهاجروا .


#1472460 [الشعب الضائع]
0.00/5 (0 صوت)

06-07-2016 01:01 PM
حبيب الشعب المعبر عن كل آلامه و آهاته جبرا جبر الله كل ما ينقصك و جعلك الله من عتقاء هذا الشهر المبارك الفضيل و بارك لك فى ذريتك، تعرف يا جبرا نوعك دة مكانه محافظ الخرطوم ( كلمة والى و محلية بقينا نتحسس منها ) والله غيرة و عفة يد ساكت نطير السماء أصلو البلد راميها الفساد و ميتة القلب


#1472441 [الحلومر/خريج الابتدائية]
0.00/5 (0 صوت)

06-07-2016 12:36 PM
والله العظيم يا كابتن جبرا الكرت الأحمر زادك ابداع
تديل يهاجروا وين ويخلوا النسوان السمحات ديل؟
حامد ممتاز قال ليكم نحن قاعدين مائة سنة
يا فيها يا نطفيها دا برنامج طويل الامد اسمو ( تحوطنا بأمر الله )
الهجرة الي الله انتهت بالقصور والفارهات وتعدد الزوجات والآن بدأت مرحلة تحوطنا بأمر الله


#1472422 [المستعرب الخلوى]
0.00/5 (0 صوت)

06-07-2016 12:08 PM
أودعكم .. افارقكم .. لالالا ما بقدر ..
اودع اودع أفارق كيف ؟؟
رحمة الله تغشاك يا سيد خليفة ..


#1472418 [مواطن سودانى]
0.00/5 (0 صوت)

06-07-2016 11:59 AM
يا اخونا حكايتم معنا شنو
نقعد معكم تكوركو
نهاجر نخليكم تحننو


#1472417 [Ali Sankal]
0.00/5 (0 صوت)

06-07-2016 11:59 AM
الله يجازي محنك يا الفاتح جبرا.


الفاتح جبرا
الفاتح جبرا

مساحة اعلانية
تقييم
5.50/10 (3 صوت)





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة