المقالات
السياسة
ورمضان ما مسك زفر اللسان فيهم (شعر)
ورمضان ما مسك زفر اللسان فيهم (شعر)
06-19-2016 09:04 PM


بسم الله الرحمن الرحيم



عزيز انت..وعظيم انت ..وكريم انت..
ومتفرد..على كل مسلمي الدنيا
زادك بره في رمضان..
فطر للغاشي والماشي..
ضيوفك نور ضرا الجيران
وتتطاقش جكاكتنا وكبابينا ..
تبل الريق ..بعد يوم طاعة للرحمن
أكان عشت الفقر أو كنت زول غنيان..
ياها اللقمة والقراصة والسلطة..
مع البلحات .. وخمشات من بليلتنا..
تتشابه صوانينا ..وتتصافح أوانينا..
تزيد صفقات شجيرة الود مع الأيام..
والأرواح تكون مشتاقة لللمة ..وتتشابى
ونتسامر ونتعازم على الجبنات..والشايات
نفضفض من سخانة اليوم..
على الموية البقت قطير..وسلك الكهربا الفاضي
ونتحسر على زمناً جميل عشناه فى الماضي
ده ياهو صيامنا ..ياهو فطورنا ..
ده العارفنه من قمنا..
لا عزومة مراكبية..
لا إفطارات جماعية
لا نتباهى لا حمَّرنا
لا شمَّرنا لا ضبحنا
لا صورنا..لا سجلنا
لا اتكلمنا في فارغة
وناس تانين..أتاريهم
قلبوا الآية باسم الدين
فطورم في القصور محبوس
شباب ما بشيل صواني البيت
على الفرشة التنادي الضيف
يرمرموا في البنايات البقت كيف كيف
بعد يتطفحوا ..يملوا كروشم المبهولة
يقوم الشيخ..وشبه الشيخ
يفك زفر اللسان فينا
أنحنا الكنا عريانين
وسخانين وللصابونة
والكبريتة عدمانين
قبل ما يجونا عطشانين
وسجمانين ورمدانين
وناقصين دين
ما عارفينه كان بتفشى من ماضيه
كان في كلامه بعد الشبعة بتدشا
رمضان المسك مردة شياطين الإنس والجن
تقول ما مر بى قصورم
ولا هذب ملافيظم
وشان هو لعله للتقوى..
كشف زيفم
فعايلكم..وكلامكم في شهر الصوم
بكل قبيح ..هو عنوانكم
دليل عفنة دواخلكم
قرف يقرف مُواليكم
فيا شعباً عفيف النفس
يا شعباً كريم الأصل
لا تبالي بجهالاتم
ولا تهتم..
حتحرق بي إرادتك يوم كُناساتم
تجلّي الكلمة تبقى لطيفة..
طاهرة جميلة من تاني
وحتقول الكلام الوردة
بخور باطنا ريح المسك
بخور باطنا ريح المسك
معمر حسن محمد نور
19/ 6/2016
[email protected]

تعليقات 1 | إهداء 0 | زيارات 1590

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1478175 [ابوبكرنك]
5.00/5 (1 صوت)

06-20-2016 11:04 AM
انت جبت الزيت


معمر حسن محمد نور
مساحة اعلانية
تقييم
5.50/10 (2 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة