العيد
07-09-2016 07:37 PM


كل عيد لنصف قرن اتذكر اخي واستاذي مبارك بسطاوي . هذا العيد تذكرته كثيرا وتألمت لفراقه قبل نصف قرن من الزمان. لكم احس بالامتنان لذلك الرجل طيب الله ثراة زودني بكثير من النصائح . وعلمني معني الصداقة الحقيقية .
العيد قبل أربعين سنه


فى يوم العيد وقبل أربعين سنه بالظبط وانا على بعد خطوات من العشرين قضيت اليوم من الصبح الى المساء مرتدياً سروالاً عارى الصدر فى المقرن وابيع البطيخ مساعداً مبارك بسطاوى برفقه صديقى الحبيب الميكانيكى من المورده عثمان ناصر بلال وبعد ان بعنا مركباً كاملاً رجعنا بمركبنا الى الجزيره لنأكل أول وجبه بشهيه عارمه عباره عن كسره بمويه . ونحن سعداء لبيع كل البطيخ .
وهذا العيد يمر ومبارك قد فارقنا . ستكون ذكراه العاطره معى لبقيه حياتى . أحد ابناء مبارك يسوق البنطون بين توتى والخرطوم ويقال انه يشبه والده . لم اقابل مبارك منذ ظهر الخميس يوم 17 شهر 9 سنه 1964 . جزاه الله خيراً على الدروس التى علمنى لها.


الريح قلب

الريح قلب والموج فات الدير
والقريه ميلت وانقطعو العياير
مبارك ود بسطاوي وسط الفوارس امير
كنت بدور اشوفك لكن حكمو المغادير
وعرفت منك البجيبو الله خير في خير
والعمر عاريه ومابربطوه بي سير
واللدر العشاري يوما بياكلو الصير
ماطمعتا يوم في حاجه ومادرت حق الغير
مابتشكي ابدا انت والقليل تشوفو كتير
يالعوا والسماك المابداخلو هجير
يانسمه فجر وفي الفارغه ماك وكير
ساهل حلو وكريم صبرك يغلب العير
حليل سرتقنا داك والطوف وهيط وكبير
وبالنا دايما رايق برمهات ولا امشير
ثابت زي ام كبك والحال بدورلو نفير
نوم يافحل شبهك مابشتلوه كتير

الدير : هو حافة المركب
القريه: الصاري باللهجه السودانيه
العيايير: الحبال التي تشد القريه للكونيه
اللدر: التمساح
العشاري :مايبلغ طوله عشر ازرع
العوا والسماك: اثنان من منازل المطر
برمهات: شهر الربيع والريح الطيب في السودان
أمشير: شهر البرد ورياح النو
ام كبك: شبكه تثبت بصخور ضخمه في القاع

مبارك بسطاوي كان من اهالي توتي حلوا بسيطا هادئا وهو اكبر مدرس في حياتي لازمته لسنتين ونصف لم يعكر صفوها اي شئ. كان يزرع الجزيرة الهلاليه بين الموردة وجزيرة توتي الكبيره تقابلنا وانا في السابعه عشر من عمري وعمره ضعف ذلك وقتها كان له خمسه من الاطفال اثنين من البنات وثلاثه من الاولاد مرغني وعمر وصلاح. كان يزرع في الراس الطيني في في شمال الجزيره التي عرفت بالساري وام كيعان وهي اسماء بعض السواقي القديمه في توتي كنا نزرع البازنجان والباميه والسلج والطماطم دخن الجزائر الذي هو عشب لعرش البيوت وفي الطرح او المنطقه الرمليه كانت لنا مقا شرقيه وغربيه نزرع فيهم البطيخ والعجور والكورجيجه(بتعطيش الجيم) وتعرف للعامه بقرع كوسه ولان والده كان صاحب عطاء تشغيل معدية توتي ومعديتين صغيرتين بين توتي وبحري فلقد تعلمت علي يد الريس مرغني الذي يحمل شلوخ الشايقيه وهو من ودراوه تشغيل المعديه وعندما صرت في الثامنه عشر كنت ادير المعديه لوحدي في بعض الاحيان عندما يكون الريس مرتاحا في القيلوله او كنت اساعد الريس عندما يبلط الريح لجر المركب محملا بالدواب والبشر الي بورابوالبتول منطقه البرلمان السوداني الان ثم التجديف بقوة الي المشرع .
وهياني هذا للاختلاط بالحواته والنواته وصرت وكاني احدهم .
اتصور مبارك وهو مكبا علي عمله بجد ماسكا المسحه وهي طوريه عريضه لحفر كونيه في الرمل وهي حفره تملاء بالماروق وهي المخلفات البشريه التي نجمعها من المراحيض من المنازل ونبذر فيها البذور .

مبارك بسطاوي, الحاج, شرف حريقه, خوجلي رجلان وابودبوره والحواته العم الغول , قرض وحجير هم البسطاء الذين صنعوا ويصنعون الوطن بدون جعجعه. كرماء احرار كالسمك في النهر او الطير في السماء رزقهم في رحم الغيب الا انهم شجعان لايساومون صادقون مع نفسهم ومع الاخرين لا يسالون كثير
مبارك بسطاوي تقبلني بدون ان يسالني من انا ومن اين اتيت ولماذا اتواجد معه وتقبلني الاخرون وصار لنا سرتق اومركب حراز صغير بقماش ابيض نظيف وقبلها كان لنا طوف كبير من الطرور نستعمله في رمي الصريمه وهي مئات السنارات مربوطه في خيط قوي.
المني ان اسمع خبر موت مبارك بسطاوي قبل ايام فعندما حضر الهادي من كوبنهاجن لقضاء نهايه الاسبوع وفي محطة القطار قابل الاخ اوبي وهو من توتي ويحضر الان في جامعه غوتنبوري وطلب منه ان يبلغني ان مبارك قد غادرنا انا لم اقابل اوبي ولكن كنت قد افردت فصلا في كتاب حكاوي ام درمان لمبارك بسطاوي واهل توتي

رحم الله مبارك
شوقي بدري
[email protected]



تعليقات 13 | إهداء 0 | زيارات 5385

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1487014 [ود ابراهيم]
0.00/5 (0 صوت)

07-12-2016 10:45 AM
اللهم ارحمنا امواتنا واموات المسلمين العم شوقي كيف الاحساس بالعيد في السويد


ردود على ود ابراهيم
[shawgi badri] 07-12-2016 09:31 PM
ود ابراهيم هذا العيد كان رائعا جدا . لان عدد السودانيين قد تضاعف . وكانت هنالك لجنة من العجايز عسمت الجالية لفترة عملنا انفلاب وسلمنا الجالية لي شباب صغار العجايز ديل ما عارفيبن ام جركم ما بتاكل خريفين . طبعا انا مع الشباب الجامع الجديد تكامل والناس صلت في طابقين . عملنا حفلة جميلة بمناسبة العيد الاخ اسماعيل كان عندوه سماية عملها داخل الحفلة . قالوا الخروف كان تمام طبعا انا حاف من ما الانقاذ جات السلطة ما آكل لحم .الفنان حسن الشايقي لكن ظهروا بكاسي تمام .
امبارح جاء صاحبي الصربي من الاجازة عملتا ليه قهوة كاربة . انا مابشرب لا شاي لاقهوة . لكن الخواجة لما في الكعك والمنين . قربت اقرعو .


#1486026 [حفيد احد المهاجرين]
0.00/5 (0 صوت)

07-10-2016 03:55 PM
ك التحية العم شوقي علي المعلومة الضافية. انا من أبناء الأستاذ مصطفي محمد النور أحد مؤسسي مدرسة علي عبد اللطيف الوسطي و علي ما نعلم كانت معهم السيدة العازة ارملة البطل علي عبداللطيف (رحمهم الله جميعا).
متي كان تاريخ تسجيل المدرسة لو تذكر ؟


ردود على حفيد احد المهاجرين
[shawgi badri] 07-10-2016 09:57 PM
بما ان الشاعر سيد عبد العزيز قد ولد في 1900 ودرس الكتاب ثم عمل مع والده واعمامه في حلاقة الحمير وتجارة الماشية في البداية ثم التحق بمدرسة ابراهيم سوميت عبد اللطيف يعني ان علي عبد اللطيف او ابراهيم سوميت وجدت كمدرسة في العشرينات . ولكن كمدرسة وسطى لم يكن هنالك سوي الاهلية والاحفاد اسست في منتصف الثلاثينات وعلي عبد اللطيف الوسطي بعدها ولا استطيع التحديد .


#1485872 [abdelrazag]
0.00/5 (0 صوت)

07-10-2016 09:56 AM
احس الله عزاءك يا استاذ شوقي في صديقك بسطاوي...اللهم نور قبره وسهل امره واجعل البركة في ذريته واهله...انا لله وانا اليه راجعون. ..القصيدة جميلة بس هنالك بعض اﻻخطاء اﻻمﻻئية مثال المغادير الصواب المقادير من قدرة الخالق...تحياتي للجميع.


ردود على abdelrazag
[shawgi badri] 07-10-2016 01:36 PM
عبد الرزاق لك التحية . الغريبة انني قد امليت الموضوع علي شخص ، وقمت بالمراحعة ولكن فاتت علي قصة الغين والقاف . في السودان بنقول المقدر والمقادير بالقاف المعطشة او القاف اليمنية .


#1485867 [بنت الناظر]
0.00/5 (0 صوت)

07-10-2016 09:46 AM
الله يرحمه ويرحم كل الطيبين والشرفاء الذين رحلوا وتركوا ذكراهم العطرة..اللهم أجعل قبورهم روضة من رياض الجنة..

والله يا أستاذ شوقى أنا متأكده كثير من البقولوا ليك عم شوقى ممكن يكونوا قدرك فى العمر ده لو ماكانوا أكبر منك ..الله يديك الصحة والعافية وإنشالله تعود وتلقى سوداننا معافى... وطن خالى من الكيزان ...ويسع الجميع ويعود جنوبه لحضن الوطن الأم ويعيش الجميع فى أمن وسلام..


ردود على بنت الناظر
[shawgi badri] 07-10-2016 01:31 PM
لك التحية . لم اصادق قديما سوى الكادحين والبسطاء وجدت عندهم انبل العواطف واصدق اخوة . تعاملت مع الاثرياء والملونيرات والبليونيرات والحكام . لم اجد عندهم الوفاء والامانة . كان اهل السودان يقطرون كرما وعفة .


#1485802 [Adel]
5.00/5 (1 صوت)

07-10-2016 07:22 AM
شوقي سلام والعيد مبارك عليك
تكتب بأسلوب كان فيه مغنطيس، لا تترك مجال لاحد ان ينفك من كتابك حتى النهاية، وفى الخاطر عشم ان تستمر، حكيك مثل افلام السينما، بهجته كمشروب الحلومر لا تكتمل لذته الا بعد ان يضئ اناءه،

انت يا شوقي جربت كل المهن الا مهنة الحرامي (حاشاك)، وكمان في اشغال ندر ما نجد احد من العاصمة يشتغلها او حتى بعرف اسمها, (الماروق والمسحة)،

جد حياة فيها متعة وكفاح رائع تصلح ان تكون فلم يوثق عادات جميلة لمجتمع قل ما جادت به البشرية

اذا كان صديقك بسطاوى عليه رحمة الله، وفاته لخصلت لنا من ذاكرتك كل هذه الدرر فما بال اشياء اخرى ياشوقى ماذالت مطمورة عنا

تدوين مثل هذه القصص والحكايات في جمعها تقارب زقاق المدق والحارة

اطال الله عمرك
تسلم


ردود على Adel
[shawgi badri] 07-10-2016 01:33 PM
لك التحية يا عادل . اظن انني اكتب ما احب وبإيمان بما اكتب . شكرا علي الاشادة والمداخلة


#1485799 [ود الشريف]
4.00/5 (1 صوت)

07-10-2016 07:15 AM
كل سنة وانت طيب ربنا يديك الصحة والعافية ويرجعنا لأهلنا نقضي باقي عمرنا نحكي زكرياتنا عن سودان الزمن الجميل .....
وشكراً علي كل كلمة بتكتبا هنا والتحية وكل سنة وانت طيب


#1485785 [محمد نور مصطفي]
0.00/5 (0 صوت)

07-10-2016 05:35 AM
التحية لك العم شوقي و كل عام و أنتم بخير
بالاشارة لمدرسة علي عبداللطيف هل تقصد مدرسة علي عبداللطيف الوسطي ام هناك اكثر من مدرسة باسم علي عبداللطيف ؟


ردود على محمد نور مصطفي
[shawgi badri] 07-10-2016 01:25 PM
محمد نور لك التحية . العم سوميت اشتغل في سراي الحاكم العام . وابراهيم سومبت تخرج من كلية غردون . كان شديد البأس ومعتدا بنفسه . ارسل للعمل في السكك الحديدية واصطدم بمسئول بريطاني في كسلا . واحتد مع المسئول ارجع الي الخرطوم . وذهب الي مقابلة المدير البريطاني واحتد النقاش . وضرب ابراهيم سوميت مكتب المدير شلوت . اوقف من العمل بنصف ماهية حسب القانون ومنع من مقادرة امدرمان في فترة الايقاف . بعد مدة رفض نصف المرتب سجل مدرسة علي عبد اللطيف الذي حارب الانجليز . ولم يستطع الانجليز منعه لان القانون بجانبه . وهذه هي مدرسة علي عبد اللطيف . كان الاولاد البجننوا اهلهم بيرسلوهم لمدرسة ابراهيم سوميت الناظر الذي كان له انضباط عسكري . انها مدرسة علي عبد اللطيف الوسطى .


#1485752 [أحمد إبراهيم]
0.00/5 (0 صوت)

07-10-2016 01:51 AM
تحياتي الأخ شوقي
" فى يوم العيد وقبل أربعين سنه بالظبط وانا على بعد خطوات من العشرين ..."
يبدو إنك قاصد "... وقبل خمسين سنه بالظبط وانا على بعد خطوات من العشرين..."
عرفت كيف؟ لأننا نحن أولاد خريف واحد ...! وعارفك ما بتزوغ ليك بي فد عشيرة كان جات للزوغان !


ردود على أحمد إبراهيم
[أحمد إبراهيم] 07-10-2016 03:30 PM
تمام ، تمام . شورك عديل يا شوقي ؛ أنا شوري إنعوج . العفو .

[shawgi badri] 07-10-2016 12:04 PM
احمد اريتك عافية ز انت اتسرعت شوية . في بداية الموضوع زكرت نصف قرن من الزمان . العنوان بتاع العيد فقبل اربعين سنة تحت المقدمة . هذا الموضوعنشر مع القصيدة قبل 11 سنة فتك بعافية .


#1485751 [واحد من أياهم]
0.00/5 (0 صوت)

07-10-2016 01:47 AM
كل عام وأنت بخير ،عمنا شوقى والبركة فيكم وفى الباقين فى بقايا الوطن!


#1485746 [ود ابوراس]
0.00/5 (0 صوت)

07-10-2016 01:29 AM
يا سلام ياعم شوقى كم انت عظيم ٠انت من السودان وانت صغير كنت بتشتغل شغل التعب والعتاله حتى لما مشيت اوربا كمان بقيت عتالى ٠ انت عارف احسن حاجه فيك انك بتقول الحقيقه حتى لو كانت فيك ٠فعلا انت كبير وعظيم ربنا يدك الصحه والعافيه


#1485704 [قاضي]
5.00/5 (2 صوت)

07-09-2016 09:31 PM
منذسبتمبر 1964 وحتي الآن اثنا و خمسون عاما وليس أربعين. عاما كما أشار. العم شوقي ، يعني عمرك نحو اثنتان وسبعون عام ،عقبال 130 سنه!!!!!!!!!


ردود على قاضي
United States [عودة ديجانقو] 07-10-2016 07:21 AM
والله يا الأسمك عمر قالوا الفايق هموا يذموا وأنا ماعارف دى فياقه ولا هباله.
إنت لو شاطر فى الحساب زى ده أحسب لينا قروش البترول السرقها البشير كم ومشت وين.
أرحم نفسك

[shawgi badri] 07-10-2016 12:55 AM
القاضي لك التحية . القصيدة والموضوع لها 11 سنة .لاحظ في بداية الموضوغ قبل نصف قرن من الزمان . الاعمر اليوم 71 والحمد لله . ولهذا لانريد ولا نطمع في منصب جاه اومال . اسعدني الله بمصاحبة الشرفاء والبسطاء من الناس .

[عمر] 07-10-2016 12:12 AM
ركز معاي
سبتمبر 1964 دي كانت آخر مرة يقابل فيها بسطاوي , يعني قبل 52 سنة زي ماقلت
لما كانو ببيعو البطيخ في المقرن جدك شوقي زي ماقال هو كان علي بعد خطوات من العشرين .
اول مرة اتقابلو كان عمر جدك شوقي 17 سنة
يعني مستحيل يكون آخر لقاء هو يوم بيع البطيخ , لانو كده معناهو علاقتو بيهو استمرت 3 سنين بس وهي فترة غير كافية لتكوين صداقة قوية .
علي الاقل لما اتفارقو في سبتمبر 1964 , جدك شوقي بكون عمرو 25 سنة
يعني حاليا عمرو 77 سنة
زمان جدودنا كان بيرفضو يمشو المستشفي لما يكونو في فراش الموت والواحد فيهم يقول احسن لي اموت في بطن بيتي .
طبعا الموت ما عندو عمر محدد والاعمار بيد الله لكن الزول لما يكبر بقولو عليهو : علي شفا حفرة ( القبر ) .
فيا شوقي ياجدي احسن ليك تعال بلدك وموت في ام درمان العاجباك دي وطلعت عينا بيها .


#1485695 [الداندورمي.]
5.00/5 (1 صوت)

07-09-2016 08:40 PM
كل عام وأنتم بخير
أستاذنا شوقي ربنا ينعم عليك
بنعمة الصحه والعمر المديد هيجتني الذكري
مذكرتني بر أبو البتول وعنابر بوليس الحركه
وبوليس بلكات الرئاسه وشرق شارع المورده السجن الحربي
للشرطه العسكريه الآن قصر الشباب والأطفال وسابقا كانت
مقابر, والكسره الفتريته بالمويه ومفجخه فيها طماطم بزيت
السمسم والبصل والملح والشطه ،،،والله أيام جميله
وبسيطه.


ردود على الداندورمي.
[shawgi badri] 07-10-2016 12:59 AM
الداندورمي اريك عافية .وفي المواجهة اشلاقات الجيش ومدرسة علي عبد اللطيف ناظرها ابراهيم سوميت كانت تدرس الكبار اللغة الانجليزية . هل تصدق محل مدرسة المؤتمر المحطة اسمها الطيارات لانه في طيارات زمان جدا بتنزل هناك . حليل امدر حليل ناسا .


#1485689 [جدو]
5.00/5 (1 صوت)

07-09-2016 08:07 PM
البركة فيكم يا عم شوقي .. و شكرا على الذكريات الجميلة


ردود على جدو
[shawgi badri] 07-10-2016 01:02 AM
لك التحية جدو . هذه الوفاة حدثت قبل 11 سنة وكل سنة اتذكر استازي مبارك بسطاوي طيب الله ثراه وادعو له .


شوقي بدري
شوقي بدري

مساحة اعلانية
تقييم
10.00/10 (1 صوت)





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة