08-08-2016 07:53 AM

قصيدة / السيل
image

كلمات قعقاع تبيدي ..

ريس البلد وينو
لا بان ولا طله ؟
لا جانا يتفقد
لا زارنا في الحله ..
لا شاف وقع كم بيت
لا جاب طحين لا زيت ..
لا كفن الميتين
الماتو جوا السيل ..
لا جابلو طوريا
ساعدنا شد الحيل ..
وأصبحنا نص الليل
ما جانا منك زول ..
ولا طله منك زول ..
فاطر في كافوري
وشعبك فطورو أنين ..
نايم وتتقلب
وشفع كتار صاحيين ..
متوسد الموكيت
وشعبك رقد في الطين ..
لاك البفرج الهم
ولاك العلينا أمين ..
ولاك البجير مظلوم
ساعة تدوربو سنين ..
لا بتنجد المسكين
لاك العلينا حنين ..
هسه أكان تصويت
أو حتى انتخابات ..
كان جيتنا تترقص
تقدل مع الخايبات ..
خاميها مليارات ..
وراكبها عربيات ..
وعاديها سفريات ..
عصابة شلليات ..
ونحن لينا الله
عادنها بس بكيات ..
لا علاج ولاتعليم
لا سكنه زي الناس ..
أحلامنا زي ركشات ..
وساكانا دوم كشات ..
لا قروش ولا كاشات ..
شعبك مرق بلبوص
لا عمه لا مركوب
لا لحمة لا طايوق ..
شعبك مرق ماينص
وحشاهو دوم محروق ..
صابر وعايش الويل
ما نصو في الغربة ..
والباقي شالو السيل ..

.






تعليقات 2 | إهداء 0 | زيارات 3061

خدمات المحتوى


التعليقات
#1500747 [زول الخلا]
0.00/5 (0 صوت)

08-09-2016 06:14 AM
الريس ممكن مشغول لكن برجع لينا وبواسينا.


#1500471 [البخاري]
0.00/5 (0 صوت)

08-08-2016 03:45 PM
لقد أسمعت لو ناديت حيا .................


قعقاع تبيدي ..
مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة