دي دقني!
09-25-2016 03:01 PM

بينما كنت اسير راجلاً في فرندات السوق العربي ظهيرة يوم غائظ الحر أحسست بالجوع (ناس سكري وكده) فطفقت أبحث عن مكان أتناول فيه بعض الغذاء الآمن (الفول في غيرو؟)
إلى أن وجدت في أحد الأزقة كراسي وترابيز مبعثرة في غير ترتيب يجلس عليها أقوام وامام كل منهم (صحن المونيوم مطرقع) وهم يزدردون الفول (الما بغباني)
ذهبت إلي ذلك الرجل النحيل ذي اللحية الذي يرتدي جلباباً (بني اللون) من الواضح أنه كان أبيضاً ، كان يضع أمامه (كرتونة) عليها بعض (الموارك) الملونة :
- بالله لو سمحتا فول سادة !
وناولته عشرة ألاف .. أعطاني (ماركة حمراء مستديرة) أمسكت بها داخل كفي ووقفت منتظرا الباقي ... طال إنتظاري وهو يقوم بالتعامل مع زبائن آخرين ...
- الباقي يا شخنا !
- باقي شنو؟ مش أديتني عشرة ألف ؟
- أيوه
- خلاس طلب الفول السادة بعشرة ألف !!!
عندما جلست على التربيزة واضعاً صحني كنت أردد :
- فول سادة بعشرة ألف ؟ فول سادة بعشرة ألف؟ طيب .. يعني فطور وغدا وعشا بي تلاتين ألف ... يعني الشهر تسعمية الف .. يعني مليون جنيه .. معقوله بس .. معقوله بس ..
وأنا في تلك الحالة (الإستغراشية) العارمة وجدت يداً تربت على كتفي ، إلتفت لأجدها يد شيخ يرتدي أثمالاُ رثة ذي دقن مسترسلة يمسك بيده اليمني مسبحة من اللالوب :
- بتتكلم براك مالك يا استاذ !
- الحاله بقت صعبه يا شيخنا .. طلب الفول السادة بعشرة ألف .. ده كلام بالله يا شيخنا ؟
- بدلاً من ان يجيبني (شيخنا) قام بجر أحد الكراسي وجلس ، اخذ نفس عميقاً وهو يحدق نحو المجهول ثم إلتفت نحوي قائلاً :
- غلبتكم يا أولاد اللذينا !!
- ما بتغلبنا كيف لكن يا شيخ .. طلب الفول السادة بعشرة ألف ؟
- شوف يا أستاذ .. طالما إنتا (كبيت الجرسة) كده .. أنا ح أديك سر يحل ليك كل مشاكلك كمواطن .. أعمل البقولو ليك ده بي حذافيرو ..
وبدا في وصفته الغريبة :
قم بحلاقة الجزء اليمين فقط من (شنبك) واترك اليسار وأنت تردد (حوالينا ما علينا) وبعد أن تقوم بالحلاقة تذهب إلى عطار باب محله من الخشب يفتح على شارع يفتح (شمال جغرافي) أدخل إلى المحل برجلك اليمني وأطلب من البائع ربع رطل (جاوي) ، خمسة وقيات (لسان عصور) ، نص رطل (لبان ضطر) ) ، وقية (زيت خروع ) ، ضع الجميع في كيس أسود اللون وتوجه إلى منزلك دون أن تتحدث لأي مخلوق وانت في طريق عودتك، في صباح اليوم التالي وفي ساعة (عطارد) قم بشراء كافة صحف اليوم ثم قم بإستقبال القبلة وضعهم أمامك وأنت تردد عشرين مرة (دجل ، شعوذة ، كضب) ثم اضرم فيهم النار ، ثم قم بقراءة (السلام الجمهوري) ثلاثة مرات مع ترديد (نطلب النجده باغلي ثمن ) بدلاً عن (المجد) ، أجلس على الأرض فوق قطعة قماش بيضاء طولها ثلاث أذرع ثم أمسح بزيت الخروع على كفيك ووجهك ، سيظهر لك ضب كبير الحجم (عيونو مربعة) وبدون ذيل فلا تلق له بالاً وكأنك لم تره وأنظر إلى الجهة المقابلة له وأقرأ (اللهم أرزقنا التحلل) خمس مرات فتجده قد اختفى وأحذر من أن يرعبك شكله إذ عندها سوف تفقد عقلك وتصبح (معتوه) وبدل (الصينية) تمشي (القصر)
في اليوم التالي أدخل إلي مكان خال من الناس وأجلس في غرفة لها باب واحد علي ان يكون ذلك اليوم يوم سبت (مغبر) وأنت صائم عن الأكل (ما إنتا أصلك صايم جات علي دي) وأنت تجلس في خلوتك أكتب علي كفك الشمال (أجهزة تنصت حساسة ) ويكون البخور على النار طوال فترة الترديد (لبان ضكر وجاوى ولسان عصفور) وقم بترديد هذه الأسماء :
(البيع – الدولار- ماليزيا - )
رددها كل يوم عشرة الآف مرة في اليوم الخامس (بالليل) سيخرج لك من شق في الجدار جني قزم يلبس (نضارات شمس) سوداء داكنة وجني آخر طويل أصلع لا بس شراب (وبس) و بدون نظارات فأفهم ترشد ، سيقولون لك السلام عليكم فلا ترد عليهم ، سيحاولون مرات ومرات فأنتبه لأنك إن رددت هلكت وصرت من (المعتوهين (هي ناقصة؟
أتركهم حتى يقولون لك (خط هيثرو)، هنا تبسم وقل لهم (النائب العام) فهذه هي كلمة السر فلا تخبر بها أحد ، ودعهم يجلسون بجانبك ثم قل لهم مشاكلك ، الغلاء ، الاسعار،المواصلات ، المحسوبية،إرتفاع سعر الدولار.. الما عارف شنوو .. وأطلب منهم حلها وإذا حلوها أهو دي دقني ... ثم إختفى الشيخ دون أن يترك له أثراً ..
كسرة :
شواطين مين ؟ نحن أصبحنا نحتاج إلى معجزة إلهية .. !!
الجريدة
______

تعليقات 10 | إهداء 0 | زيارات 6747

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1524115 [د. شادية الشيرباتى]
1.00/5 (1 صوت)

09-26-2016 06:21 PM
بصفتى باحث فى قسم السوادن بمركز الدراسات الاستراتيجية بالإسكندرية ومؤلف كتاب الأخلاق السوادنية (دار يعقوبيان للنشر 1977) فإننا نرى أن السوادنى و السوادنية يمتازو بخفض العقل و تدنى الحكمة والعجز و الكسل والنميمية( قالو لى.... قلت ليهو... قال. قال. قال) فلا يكون أمر مستغربا لو ماتت هذة الأمة...فهم فى طور الهلاك باى حال ولكن مصر لن تقف مكتوبه.. حقيقة تؤلم الآخري


ردود على د. شادية الشيرباتى
[محمد غالب] 09-28-2016 08:29 AM
الراقصة؟

Romania [Ali kareem] 09-26-2016 11:00 PM
هاهاها


#1523986 [مريود]
0.00/5 (0 صوت)

09-26-2016 12:50 PM
مقال معاد.


#1523960 [الناهه]
0.00/5 (0 صوت)

09-26-2016 11:52 AM
لا تيأس يااستاذ جبرة
ودعك من حكاية اللبان الضكر والضب والجني دي
وانا اقول لك بامانة تفاءل جدا لللاسباب الاتية :
الايام الفاتت رشحت اخبار با علاقتنا مع العدو الاسرائيلي الصهيوني قد تحسنت وقد ناشد العدو هذا حكومات العالم بتقديم العون لحكومة السودان حتى لا ينهار اقصادها وده معناهو ان خزينة الدولة ستمتلئ بالودائع والقروض بالدولارات والشيكل وحينزل سعر الفول السادة الى 3 جنيه زي زمن البترول او اقل .. اها .. ربنا شال مننا البترول ومكر الجنوبيين وقلعوهو مننا وربنا عوضنا بالعدو الاسرائيلي الصهيوني تعويضا لنا ... العبد في التفكير والرب في التدبير .. ومايهمك خط هيثرو حيرجع ولا نائب عام ولا غيره .. اصبر الدولارات والشيكلات في الطريق .. الصبر مفتاح الفرج


#1523697 [abdulbagi]
0.00/5 (0 صوت)

09-25-2016 09:07 PM
وين الغيبه ياجبرا اوعى تكون رحت عند بله الغائب تطلب الغرائب فى زمن العجائب


#1523643 [Almisahir fi izallail]
0.00/5 (0 صوت)

09-25-2016 07:11 PM
وما تنسى كمان يا اللعى فاتح الجبرا لما تمرق من محل الفول ابو عشر ألآف تمشى من ميسك (أوع تفتكر انه سيد الفنيله.. كان داخلك اى شك فى الموضوع خقّك بكون رااح) تمشى سوق القنأ بدون ما تتلفّت وتشترى قنايه طويلة وتختها فرق كرعينك وتمشئ بيها وانت راكبها زى ميل واحد بس ثم ببدأ تنضم وبفول"ايغموشَِن (الشين منصوبه)..ايغموشُن (مرفوعة الشين) ..ايغموشَن (مكسورة الشين ) كانها مرتبظة ب "لآ سيّما"! كدا يعنى زى ماتقول كمان فى مسافة ميل تانى ثم تصمت لمدة نص ساعه..وتبدا من جديد ايغموشن..ايغموشن لمدة نص ساعه ثم تجى راجع بنفس الطريق وتعيد العمليات كلّها مشى وكلام وصمت فيه كلام لحد ما ترجع لسيد الفول .. اطلب فول تانى( لآنك بتكون جعت .. لازمة المرّه دى اكل الفول يسبقه دخول بيت الادب فى محل الفول ان كان المحل فيهو بيت أدب وعلم .. لما ترجع بالسلامه من بيت الادب عشان تشيل الصحن .. جايز يكون فيه فول او مافيه,, ما تقول عير ايغموشن ميّة مرّه والقنايه الكنت راكبها على رجلينك لازمة تكون برضو فرق كرعينك .. اها كدا جرّب وادينا الخبر فى اول حلقه عشان نكمّل ليك الباقى ان شاء الله ومد فى الايام.


#1523616 [الدرب الطويل]
0.00/5 (0 صوت)

09-25-2016 06:10 PM
الجني ابو شراب حيوصف ليك نفرين.. واحد كركينو مقوسات ولابس فنيلة ميسي وعليها فوطة حمرا زي بتاعت مصارعة الثيران.. والتاني عامل زي البعرة ولابس نظارات شمس وعامل فيها ولد الزول الأول.. بجو شايلين كيزان المونيوم وعلب صلصة مطفجة وسخانة ومصدية وكل كوز وراه مصيبة.. ديل جايبين البلاء والفقر,,


#1523583 [حكم]
5.00/5 (1 صوت)

09-25-2016 05:06 PM
يا زول كل شىء ولا الجن وخاصة اللابس شراب بس دا

هو الملائكة الاسمهم ملائكة لمن حاربوا فى الجنوب فصلوهو ..كمان تجيب ليها جن؟

بعدين انت عاوز ليك جن اكتر من ناس الحكومة ديل؟؟


#1523577 [mustafa]
0.00/5 (0 صوت)

09-25-2016 04:57 PM
اولاد ام ....................


#1523560 [شاب داج]
5.00/5 (1 صوت)

09-25-2016 04:30 PM
يبدو يا استاذ شيخك دا بلة الفائب ولا الحوعة كانت قوية وين الكسرات الليها2000واو اخياره شنو

كسرة جديدة اخبار طه العاوز يحنك مرj المهندس شنو?


#1523533 [عبدالواحد المستغرب اشد الإستغراب!!]
0.00/5 (0 صوت)

09-25-2016 03:40 PM
عمكم الفاتج جبرا (وصل) يا ناس !!الحاضر يكلم الغائب !! عرفت كيف؟!! دى حاله عايزه ليها عرفه؟!! الزول فكت منو خلاس .. والدليل هو لسه عايش زمن الفول أبو عشره جنيه القال عليها عشره الف والله يا جبرا حسابك ده كان وقفت بيهو قدام اى قاضى سوى كنت مدعى او مدعى عليه خسارتك للقضيه حتكون زى خسارتك للواوات بتاعتك !! وياريت تقلع العمه وتلبس ليك (كسروله)الكيزان ديل خطوتهم الجايه توصيل الشعب للمرحله دى دون جدال!! ولتكن المبادر الأول لإتخاذ الخطوه الرائده دى والمرض ما عيب ولا شتيمه على الأقل ارحم من النفوق بإسهال معوى!! وبالمناسبه يا جبرا صحن الفول الاكلتو ده بيحسدوك عليه ناس ..ياما!! احمد ربك والمره الجايه اعمل حساب موية الفول لآن طلب (الفول الحب) حيكون بالكاد في قدرة الطبقه المتوسطه!! واهى دقنى كان ما وصلوك المرحله دى على كل حال نحن عملنا حسابنا وركبنا سنامات لزوم التخزين تحسبا لايام اسود من قرن الخروب !!.


الفاتح جبرا
الفاتح جبرا

مساحة اعلانية
تقييم
10.00/10 (3 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة