07-23-2017 09:11 PM

زكاة أعضاء

ما أن رآني جاري عوض وأنا أتجه نحو المنزل حتى هرع نحوي مسرعاً:
الجماعة ديل يا أستاذ حقو بعد ده يفكوا لينا التصدير؟
لعلمي التام بأن جاري (عوض) هو معلم بالمعاش وليس له أدنى علاقة بالتجارة ومعاملاتها فقد نظرت إليه نظرة فيها كثير من الاستغراش
تصدير شنوو يا أستاذ عوض؟ إنتا بقيت تتاجر من ورانا وللا شنووو؟
هسه يا أستاذ عليك الله معقولة المواطن يكون معدتو 40 متر ؟
ما فاهم؟
لا بالله هسه الفول ده عايز ليهو 40 متر؟ خمسة بس مش كفاية
يا أستاذ عوض إنتا الليلة بتتكلم بره من رأسك وللا شنو؟
بي مناسبة رأسي دي بالله القرف والمناظر الشايفنها والنفايات المالية الشوارع وخلق المسؤولين ديل عايزه ليها (عينين اتنين)؟ - مواصلاً- والله عين واحدة كفاية؟
...............
شوف يا أستاذ (القرنية) الواحدة بي كم؟ خليك من كده شووف العدسات ؟
...............
لا والكلى كمان.. كل واحد ماشي ليهو بي كليتين.. يعمل بيهم شنوووو؟ الواحدة بالشيء الفلاني
..............
خليك من ده كلو .. الإضنين الإتنين ديل في داعي ليهم ؟ عشان نسمع بيهم شنووو؟ تصريحات المسؤولين وللا (الغنا) المايص بتاع الأولاد الجداد ديل ؟ خلاس الواحد يفك ليهو طبلة بتاعت أضان واحدة ومعاها إذن وسطى
.....................
خليك من ده.. في داعي المواطن يكون عندو كمية الشرايين والأورده دي؟ هو ذاااتو (الدم) وينو؟ الشعب كولو مصاب بالأنيميا... ح يحصل شنوو لو نقصو ليهم عشرين تلاتين بوصة؟
...................
والعجب البنات؟
..............
هو ذاااتو عرس مااافي.. الواحدة تلاقيها ماشه ليها بي (مبيضين) يعني خلااااس العريس في خشم الباب ... واحد ذاااتو كتير والله
هسسه التصدير دخلو شنووو في كلامك ده يا عوض ياااخ
- كيفن دخلو شنووو؟ يا أستاذ براك شايف الحالة بقت صعبة والناس كلها بقت مفلسة والواحد بقى قاعد على الحديدة ، وقروش المعاش دي ما تجيب ليها 2 كيلو لحمة والواحد الدنيا ضلمت في وشو، علي بالحرام البيت هسه ما فيهو تعريفة وما عارف أقبل وين؟
- والله يا أستاذ عوض الناس كووولها تعبانة.. لكن قول ليا ده علاقتو بالتصدير شنووو؟
- يا أستاذ إنتا براك شايف اليومين ديل قالوا في عصابات بتختف الناس وببيعوا الأعضاء بتاعتهم !
- وده دخلو شنوووو؟
- دخلو شنووو كيف يا أستاذ ... بدل الشغل ده يكون (ختف) وعصابات وموت والناس تقعد (تزرزر) في الحكومة والحكومة تقعد (تتخرت) وبدل المواطنين ما (يتكتلو) ويتشلحوا ساااكت.. تشليح لي تشليح أخير يستفيدوا ويطلعوا ليهم بي قرشين حلوين والحكومة ذاااتا تستفيد أصلو جنهم قروش
- (وهو ينظر لعيوني المنططة): يا أستاذ مالك بتعاين ليا كده
- كلامك ده عجيب وغريب يا عوض
- يا أستاذ براااحة بررراحة أسمعني ح تلاقي كلامي قمة في المنطق والواقعية !!– مواصلا-
- شوف يا أستاذ .. الناس ديل يفتحوا لينا (التصدير) ذي إناث الإبل كده ..
- وبعدين؟
- المواطن يسافر عدييل كده ويدوهو فيزا (خروج أعضاء)
- طيب والحكومة تستفيد شنوووو؟
- المواطن هو طالع يقومو يعملو ليهو صور في القمسيون ويسجلو ليهو (الأعضاء) الطلع بيها في الجواز ... ولمن يجي راجع يعملوا ليهو (صور) يشوفوهو اتصرف في شنو وكم ويشيلو منو ضريبة على كل عضو!
- ....................
- بس أنا خايف من حاجة يا أستاذ
- شنوو؟
- بعد الضريبة دي تكون فيها (زكاة أعضاء) ونطلع بي قد (القفة) !!
كسرة:
فليكن شعار المرحلة المقبلة (التشليح عشان نعيش) !
• كسرة ثابتة (جديدة لنج):
أخبار إجابة رئيس الجهازالقضائي بالخرطوم على (الاستئناف أبويوم) شنو (و) !
• كسرة ثابتة (قديمة): أخبارملف خط هيثروالعند النائب العام شنو؟88 واو - (ليها سبع سنوات و4 شهور)؟
• كسرة ثابتة (جديدة):
أخبارتنفيذتوجيهات السيد الرئيس بخصوص ملف خط يثروشنو؟ 47 واو (ليها ثلاث سنوات وحداشرشهر)

الفاتح جبرا
الجريدة
______

تعليقات 7 | إهداء 0 | زيارات 10281

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1674929 [مراقب]
2.25/5 (3 صوت)

07-24-2017 02:29 PM
اخونا الكانب المحبوب الفاتح جبرا
افيد سيادتك علما ان القاضي المعني بخصوص الاستئناف ابويوم قد انتقل الى رحاب الله قبل أيام قبل ان يتسنى له الإجابة -وربما الاهتمام- على كسرتك الجديدة لنج
حالياً يدير عمل رئيس الجهاز القضائي بالخرطوم قاضي بالإنابة الى ان يتم تعيين رئيس جديد للجهاز القضائي للخرطوم ...
ليتهم يتعظون ان الموت سبيل الأولين والآخرين

[مراقب]

#1674735 [ِAbdulbagi]
2.63/5 (5 صوت)

07-24-2017 09:13 AM
ايه رأيك ياجبرا نتشارك انا وانت ونفتح وكالة تصدير اعضاء بشرية . اهو نوفر على صاحبك المعلم حق التذكرة وتعب السفر ونستفيد قرشين .

[ِAbdulbagi]

#1674640 [محمد]
3.25/5 (5 صوت)

07-24-2017 05:49 AM
هههههههههههههههههههههههههههههههههه
قوى قوى قول لينا الصنف دا لقيتو وين أخر نوع سمح كان من توريت لكن حسع ما ظنيتو بتلقى فى الخرتوم

[محمد]

#1674633 [زول]
1.94/5 (5 صوت)

07-24-2017 04:46 AM
انت ساحر سبيل عديل ياجبرا نقشت البفشل تجارة التصدير دي ! المعلم معاش كان حاسب الضريبة فقط وناسي الزكاة ~ أكيد لو زكوها حتكون بالخسارة دنيا وآخرة ديل أكلوا الربا عديل بمخارجات الكاروري ! قصة يشملوها بالزكاة دي يفتوا بيها بالاجماع علماء السبيلين والاضنين والكلاوي!!!

[زول]

الفاتح جبرا
الفاتح جبرا

مساحة اعلانية
تقييم
0.00/10 (0 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة