المقالات
السياسة
ارشيف مقالات سياسية
موية موية ,, جغمة ,, جغمة ,, بقة ,, بقة
موية موية ,, جغمة ,, جغمة ,, بقة ,, بقة
05-13-2011 04:42 PM

موية موية ,, جغمة ,, جغمة ,, بقة ,, بقة

أسماء الجنيد
[email protected]

العطش آ ناس العطش عدو الإنسان والحيوان
الموية شريان الحياة, إن عدمت الموية تاني فضل شنو ,
ياهو الموت زاتو بعد كده !!! , اي حركة في الدنيا دي بالموية ، وخسوسا في البيت ..
الشراب ا ، لأكل ، الوضوء، النضافة ، كلو برا الموية ما ببقى ضمة.
الشكية لي الله لحقتوا تقرطوا الموية ؟؟؟؟ الله بهلها من السماء ورحم العباد بالماء والهواء , جيتو إنتو تحمدو سيدكم كملتوا الخراب كلو . ما فضلتو شيء من خراب ودمار, بكل الطرق والسبل , قبلتوا على الموية وبتدوروا تعطشوا الناس بعدما جوعتوهم ؟؟؟
كل شيء عرفناه النهب ، السلب ، اللفحي ، الهجائم ، الرجائم ، الكضب ، إنتهاك الحرمات ، بيوت الأشباح ، الإعتقالات ، والخج في الإنتخابات .
التزوير، و التجارة ،بالدين , قتل الأبرياء وأكل مال اليتامى.
تأكلوا الأكلتو بت بابكير , ويلم فيكم مرض السل يخرت لحمكم ويخلي عضامكم زي جناح الطير ,,
بنيتوا العمارات ومليتوا البنوك بالدولارات ، ضيقتوا المعيشة على خلق الله , وشردتوا الناس وشتتوهم بالبلود. وقسمتوا البلد نصين....
وبعد ده كلوووو لا كليتوا لا مليتوا , برضوا بتتسابقوا على عذاب البسطاء من الشعب الفضل!!!
السويتوهو كلووووو ده ما كفاكم ولا غناكم ، وما شايفين روحكم ظالمين الشعب المسكين .مخير الله ..
الشعب البقابض رزق اليوم باليوم ! الغلابة البعيشوا بي رزق اليومية برضو لحقتوهم وداقرتوهم في رزقهم البسيط.
و شلتوها منهم جبايات وحق نفايات , هو نفايات زاتو ما عندهم عشان تجوا تزاحموهم في رزق اليومية الملقط بي عرق الجبين وما لاحق يملأ .الهين .
يرجعوا آخر اليوم وجع في اليدين والكرعين , وهموم تكفي كل الفاتوا والقاعدين من الحيين والميتين .
وبي حالتهم دي كلها برضو ساكنهم وتلاقطوا منهم ؟؟
يلقطكم دابي الحواشات اليرقدكم ود الأحد كلكم في فد يوم ..
زي ما لقطتوا رزق الغلابة والتعابة وسويتوه عمارات وعربات.
ده كلو عرفناهو ، كمان بتدوروا تحرموا خلق الله من الموية ؟؟؟؟ الموية الزرقاء دي يا الشرفانين !!!!!
بحريـــــــــن إتنين شاقات البلد نصين , يشقكم تمساح الدميرة ويخلي باقيكم مخاريق و ركب ....
ناس بري ان تاوقوا ساي بالحيطة بشوفوا الموية الجارية من طرف البحر .
بي قوة عين وإهمال يدخلكم موسوعة جينيس العالمية ، تقوموا تقرطوها عليهم وتضيقوها وتعطشوهم بالأيام ؟؟
عطش عدــــــيل كده والبحر يقدل في نص البلد و موجاته تتخابت ليل نهار تقالد القيف؟ يقلدكم نكير واحد ورا التاني زي ما استكتروا الموية على عباد الله ؟؟ موية !!!! موية يا ناس !!! موية الله البهلها على العباد . تمسكوها وتعطشوا الناس ؟؟هسه عليكم الله ما بتخجلوا ؟ دي ما خيبة كبيرة عليكم قدام كل العالم ؟ قاعدين في القصور وتأكلوا من الصباح للسحور , وتشربوا العصائر والشواهي واللذي منو يا تجار الدين . وتحرموا الناس من موية البحر؟؟ تشربوا الزاد المو رقاد بركة رب العباد وخير المراد,,
شاحدة ليكم الله تشربوا موية نار تحرق حشاكم وتهرد بطونكم ، زي ما هردتوا حشا الغلابة وضيقتوها عليهم وين ما قبلوا. تضيق عليكم وين ما قبلتوا وموية النار تشربوها جغمة جغمة وتسقوا رفاقتكم بقة بقة , كل واحد فيكم يتكي التاني ويرسف حلقوا, لامن تبقوا ساردين فاقد التعليب....
غايتو بعد سواتكم الما سبقكم عليها فرعون زات نفسو ، باقي ليكم تتربسوا الهواء ,, آآي والله ياهو الفضل ليكم الهواء زااتو.
تقوموا تعملوا جباية وضريبة على هبوب الله , وتمنعوا بيع الهبابات في السوق . عشان المهمشين والغلابة الما عندهم مرواح, ما يتهببوا ,
النعمنو هبيبهم بنقص ليكم الهواء الفي سماء الله والرسول,..
وتقصروا العمم والتياب والطرح في السوق , عشان الغلابة برضو من ابهاتنا واعمامنا ما يتهببوا ,, و امهاتنا وبنوتنا ما يتهببن بي طرف توبهن وطرحتهن .
كل الرجال تحموهم لباس العمم , آآي عشان ما يتهببوا , يتهببوا ليه ؟؟؟ يلبسوا طواقي بس..
قوم يا ابو العفين لف السوق واطلق شفعك من كلاب الأمن الملقطهم من طايوقك, وقول ليهم امسكوا الهواء من عباد الله , ياهو الفضل ليكم هو بس , حتى الجرائد بعدما يقروها الناس ، شيلوها منهم من المواصلات , عشان ما يتهببوا بيها.
الشعب ده ما لازم يموت عشان إنتو ترتاحوا , آآي يموت كلو , وتقعد إنت والديناصورات رفاقتك تقدلوا وتبرطعوا بي حقهم النهبتوهو وسرقتوهو, تقعدوا براااااكم تتراقصوا ، مو ياهو ده تفكيرك آآآآ المشاتر ؟؟
اكيد نافوخك بقول ليك كده , مو نافوخ مصوفن ومعفن ..
لكن مي دايمة ليك يا المنطط عينيك، ومدرق إضنيك .
وحات الله مي دايمة ليك ام بنايا قش ... هلا ،، هلا على الختروا وخلوها كيمان كيمان القروش .. و مشوا فاضيين قبلهم وقبالهم معلمين الله من فضائل الدين.. اطراهم كان فيك قلب !!
كان بتدوم كان دامت لي غيرك, اتلفت عاين وراك وقدامك ، جوة وبرة البلد، وشوف الظلمة الزيك , جارت عليهم الدنيا وبقوا عبرة لمن يعتبر. وحق الناس الله بخلصوا في الدنيا دي قبال الآخرة , كان بتخافوا الله وبتتذكروا الموت البفرق الناس, لو بتطروا القبر وعذابو.
لكن الزيكم يا ابو العفين وجماعتك التانيين ناس دنيا سااااااي ودنيا ما زي دنيتنا وكل خلق الله , لا لا إنتو دنيتكم حقتكم براكم , معاكم الأباليس والشياطين البشبهوكم , مبروكين عليكم
يا ويلكم وسواد ليلكم من عذاب الغلابة.. يا ويلكم وسهر ليلكم من دعوة المظاليم المافي بينها وبين رب العباد حاجز ولا حجاب..
اتقوا الله ووقفوا ظلمكم الفات كل ظلم العالم ، و رجعوا الموية للعباد.
بخلص منكم عطشهم بقة بقة ,, وجغمة جغمة .. اللهم آمين
يمهل ولا يهمل .
نواصل إن شاء الله ...
ودعتكم الله

تعليقات 14 | إهداء 3 | زيارات 3095

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#142939 [ود الغرب]
0.00/5 (0 صوت)

05-16-2011 12:05 PM
عافين منك يابت الجنيد..والله ارجل من رجال..نجضوا الناس نجاط .وبقول شعر عرضوا زمان تضمانا معاك:ــ

نزل المطر ورعده يهدر هدر
سيل تقيل مسح القرى والحضر
مطر عذاب وسيل فساد ماخلى جحرا
فيهو فارا
ماخلى ماعونا للحريم ولا عود إلا جراه جر
يازول سيل تقيل قلع الشجر
وشال الفيهو خير والفيهو شر
وحتىوتد حمار شيخ حمد شالو السيل المنحدر
لاخلا شرق ولا غرب حتى فى بربر
ما خلاهم اخر الليل يصلوا الوتر
ماسيل فساد وعندو تار مع ناس عمر
والله تارا زى نار الكماين حار جمر
والتار شابك شبكة زى شوك الكتر
مالناس مغبونة وصارهو صر
فى دار فور الناس تقول جاية من القبور
دفنو الكبرياء وفى الخيام منتظرين الأمريكان
أبو كلام يقول قبيل شن قولنا
وامريكا روسيا سما مقامها
والأمريكان الليكم إنبطحنا
وعشان الجيوب والبيوت لكم تصالحنا
والعالم يقول لكم تفرجنا
والصبية عاوزه فتات عصيدة بدون ملاح
لا حبوبةتحكى ولا شليل وشليل من زمان راح
فى عهد الإنكسار والإنبطاح الفى أفق لاح
و العسكر في رمضان فقدوا الطابور
و الظلم شبعان دماء من البطر لما إنتحر
والترابي عامل مجنون ....
فى محياه ابتسامة الغدر الملعون
ولع حرايق قتل الشباب فى عز الدرر
والنار ولعت ورقص البشير
وشر إحلام البنات فى حبال الصبر شر
وخل آمالهم فى ضل عمود بزواج الكفر
ما فقه الترابي الفقد بوصلة الفكر
ضحك الترابي ضحكتو الفاقدة الوقار
قال مشروعنا المزعوم كأس وانكسر
والزجاج الإنكسر مابنجبر
واقتبس بقول الشــاعر( المشرور)
((إن القلوب اذا تناثر ودها
مثل الزجاج تكسرا لا يجبر))
نقول نحن الغلابة الشايلين العار
وأوزار من خربوا الديار
وإن الشعوب إذا تناثر مجدهم
مثل عذراء فقدت كفيف البصر
جـــرح بليغ بفج عميق مايندمل
فيهو حسره وانهزام طول العمر
قال سيبك ديوان العرب فى البورصة بدون سعر
خليك مع الرسالة الثالثة فيها دينا يكون حر
دين بلا حدود بلا (قواعد للجهاد) ولانذير ولانذر
الثانية مع اخى محمود ماتقولو راح ولاانتحر
وماقتلوه ماشنقوه وفكرو حايم بين البشر
رقص الوسواس الفى دمو إنتشر
قال له الوسواس إن اتهموك بالكفر
قل:بالأمس لم أبلغ الحلم
واليوم كما ترون رفع عنى القلم
أنت اللزج إنشاء الله تنقص و تتقلم
شافك واحد في المنام
العلماء تفتى فى سؤال وانت تبصق في الحلم
التفسير يقول ما بتسلم
ادعوك بالرحمن راجع كلامك عشان تسلم
أنا عبد فقير.و شايل لك هم
حاولنا نكويك بالكلام عشان تتلم
إلحق قبل سبق القول وتفتات الندم
باقى العمر
جاى يوم فيهو غم
يوم تفر منك سارة وعصام
والله اعلم فى اليوم العبوس يكون أكلك زقوم
ولا كلام ولا شمار ولا توم
الله اعلم بيوم غيومو هموم
الله ينجينا من يوما فيهو الناس بدون هدوم
يوما فيهو مطارين للقدوم
مطار الفيهو من النعيم طاير يحوم
ومطار بساطو نار ونسيمو سموم
بعد ده كلو مادام ماقرقرت حالك مابدوم
لك خيار السفر لاحد صالات القدوم
وكلنا نسأل الله ان ينجينا من حر السموم





#142163 [دائرين نشم الهواء]
0.00/5 (0 صوت)

05-14-2011 10:37 PM
السلام عليكم الاخت اسماء الجنيد والله انا احد الذين يكره اظلم الاخرين وهضم حقوقهم وبكره ناس الحكومه الظالمين الشعب و مطلعين روحو

وحقيقه مجوعين ومعطشين الشعب بس الحمد لله انو الهواء عند الخالق

واكيد عندهم يوم بتحاسبو فيه


والمظلومين ياخذو حقهم
بس الدعاء ده كتير عليهم اديهم شويه شويه


#142088 [ودالزين]
0.00/5 (0 صوت)

05-14-2011 06:24 PM
غايتو يابت الجنيد الدعاء على الناس بقلب على الداعي اكتبي من غير ما تداعي افضل وانا ما ظني دا اسمك ورسمك ؟؟ ( ) ( )


#142053 [محمد احمد]
0.00/5 (0 صوت)

05-14-2011 04:54 PM
عفيت منك يا بنت الشيخ .. باقي انحنا خابرنك بت نجيضة .. على بالطلاق أنجض من الرقاص أب جاعورة الما عندو كلمة وسط رفاقتو .. والما عندو همة وشخصية وسط حريمو سارقات أموال الزكاة ... حسبنا الله عليهو وعلى حريمو


#142043 [الشاذلى عبدالسلام]
0.00/5 (0 صوت)

05-14-2011 04:25 PM
سمعتى -- ناس الحتانة الواحد يعوم فى البحر و يجى البيت ما يلقا موية للوضوء ---


#142041 [toto]
0.00/5 (0 صوت)

05-14-2011 04:12 PM
والله ضحكتيني يا بت الجنيد لكن الؤسف الجماعة ديل ما بحوق فيهم الكلام دا :D :D :D ;)


#141989 [الكردفانى ]
0.00/5 (0 صوت)

05-14-2011 02:04 PM
يا بت الجنيد اكيد بتكتبى عمودك ده بعد قهوه الضهر 0 نازله عليهم بالتقيل
ايوه اديهم كمان وكمان لانهم بالغوا فى عزاب الشعب المسكين ده


#141941 [حامدابوعبدالمجيد]
0.00/5 (0 صوت)

05-14-2011 12:03 PM
الراكوبة تحياتي
خبر عاجل سيف الدين اخوي توصل لحل عاجل لمشكلة البلوفا تحفر حفرة بعمق مترين للماسورة بتاعت الحوش وتنزل الصهريج واطه تفتحو من فوق تجيب جردل وتنوم الماسورة على صفحتها تخت الجردل وتشتغل بالنقاطة شرطا تكون بتصلي الصبح حاضر وتكون بترابط يوم بعد يوم وبتحب الشعيرية باللبن ولانامت اعين الخونة قفالين البلوفة
سوما بت الحبوبات لو قتا ليك لو طلعتا راس البيت بشوف البحرين مالبحرين الفيها الجسر بتاع الملك فهد لا البحرين فى مقرن النيلين جنب المنتزه وحدائق مايو ابريل وهسع حديقة الصراصير وعلى قولت الحجة ربنا يغتى عليها وامهاتكم جميعا حليل جدي وحليل فسحنا ولحمتنا وشيتنا وسمكنا وضحكنا وونستنا وجنينتنا بتاعت الحيوانات وفريع البان جامعتنا والري المصري ذاتو
تصبحوا على وطن


#141859 [عزالدين فضل الله]
0.00/5 (0 صوت)

05-14-2011 09:09 AM
انشاءالله ربنا ينتقم منهم . ربك كريم يمهل والايهمل . ديل ناس الدقون وناس الكروش المليانه بعرق المساكين .


#141797 [شنقيطى]
0.00/5 (0 صوت)

05-14-2011 04:34 AM
والله عندك جنس ردحى غايتو اكان ما لهجتك شايقية اكان نقول مصريه
غايتو الله احفضك انتى يا بت الجنيد ماك خايفى
كمان خاته اسمك ورسمك
والله دى رجال ماعملوها


#141692 [ودالشايقى]
0.00/5 (0 صوت)

05-13-2011 07:16 PM
الدعاء دة كلو انشاء االلة ربنا يستجيب ليهو امين امين امين امين امين يارب العالمين امين


#141687 [عادل ]
0.00/5 (0 صوت)

05-13-2011 06:56 PM
بسم الله الرحمن الرحيم
الله اديك العافية يا بت الجنيد
بالله كتري وزيدي في دعاك
عسى ربنا يستجيب ويزيح عنا هذه الغمة
هذا السرطان الابليسي الكيزاني هذه البلوة
برميل الموية في قلب العاصمة الخرطوم 25 جنيه
وزي ما قلت ديل ابيعوا الهواء عشان كروشهم وزوجاتهم وعرباتهم وقصورهم
ديل بتكلموا عن ياتو اسلام
ديل ما بجوا الا بالجزمة عشان كده شفتي لمن الناس طلعوا جروا جابو فناطيس
الموية
ومدير الهيئة الجبان قال في ناس قفلوا البلوفة الله يقفل بلفك
ديل لو ضربتنا طيارة يقولوا عشان الشريعة
مقالاتك رائعة اخت اسماء ما تطولي مننا


#141686 [abo alshosh]
0.00/5 (0 صوت)

05-13-2011 06:54 PM
ان شاء موية النار تمرق منهم دموع بالعين لا عرق لا بالدرب العديل
ان شاء يمسكهم امساك ما يعرفو بكان يقبلو عليه الا لاهاي
وقت يصلوها ان شاء دفاقهم ما يقيف


#141680 [قاسم خالد]
0.00/5 (0 صوت)

05-13-2011 06:33 PM
و الله يا بت الجنيد ما خليت ليهم صفحة يرقدوا عليها ... و الله فشيتنا عديل كده ....يسلم قلمك يا أستاذة يا رائعة ... ينصر دينك .


أسماء الجنيد
أسماء الجنيد

مساحة اعلانية
تقييم
1.85/10 (22 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة