08-06-2017 05:34 PM


وسخ في كل شي ومكان!
وسخ الوان !
وسخ عم الجسد والروح!
وسخ في كل*
شي مشروح!
بلد غرقانة حد القيف!
فساد عم*
الحضر والريف
وناس جيعانة*
جوع كافر!
صبح مؤمن*
بحد السيف!
نص الشعب محتاجين!
ونصه الباقي شحادين!
بتشحدوا مين؟!
مانحن بقينا متساوين
بفضل سياسة التمكين!
ومسؤولينا للتزييف
يكرموا مرة في الشعراء
ويكرموا مرة فنانين!*
وعشان الكذبة تتمدد
وترحل من بلد لى بلد
يكرموا حتى مصريين!*
*وسخ الوان!*
بلد بالحاجة
*اصبح سوق !*
سوق وسخان!
مدارسنا استوت دكان!
تبيع الكسرة والدخان!
مكاتبنا ووزاراتنا
بقت مفتوحة
*سوق نسوان!
من الجزمة للستيان!
واوراق الشغل تلفت!*
حقوق الناس*
من الاخوان بقت*
موروثة للفيران!
حكومتنا بتكسب*
من غذا الاطفال!
تتاجر حتى في العيان!
وأحزاب لاسلك لاملك!
تسمسر في*
حقوق الشعب
راكعة في ذلّة!
راكعة هوان!
رجال بالجبة والقفطان!
باعوا كرامة السودان
وصاروا تنابلة للسلطان!
شباب فرش*
الشعر بالجل!
بنات دخانا بالبنبان!
مهر غالي*
وعريسنا جبان!
بلد وسخانة
*من الذمة للعمة!
وفساد قلب*
الحرام نعمة!
نزل جوة*
البطون لقمة!
وربت في*
زول بدون رحمه!
جبايات وانت*
جوه البيت!
جبايات وانت
*في الشارع
زيادة اسعار
*بدون اشعار
دي سرقة جهار
*بدون انذار!
ونواب جونا بالتزوير!
عشان يستكملوا التحقير!
يصفقوا للزيادات....وسخ
ويزغردوا للجبايات....وسخ
ويبشروا فينا بالجايات!
دهب فالصو
وجنيهن مات!
وسخ وسخان!!
دا شعب يتيم
بدون والدين!
وسخ في برلمان الطين!
دا بيت وسخان*
مجير دين!
وسخ في سائر الحاضرين!
وسخ في الكلمة واليدين!
وأرضك ياوطن في حروب!
شرق وغرب!
شمال وجنوب!
أب مكتول!
وأخ مفقود!
وأم مأسورة!
صغير يرضع
صباع مجروح!
حكومه تباهي*
بي شطورها!
وسخ في كامل الصورة!
وشعبك يابلد محروق
بيشكي في صمت
وبيبكي في ذوق!!!
دموع جفت!
وصوت مخنوق!
كل جميل صبح ذكرى!
وكل يوم احلى من بكرة
حرام في فرحة نتلما !
وحرام الضحكة والبسمة !
وبلدنا حزينة منقسمة !
وسخ !

* * * * * غازي محمد نصر


[email protected]





تعليقات 2 | إهداء 0 | زيارات 1628

خدمات المحتوى


التعليقات
#1680550 [عتمني]
2.75/5 (5 صوت)

08-07-2017 12:20 PM
برافو أستاذ غازي


#1680383 [زول]
2.63/5 (5 صوت)

08-06-2017 10:54 PM
اأهو دا لمشروخ الوسخاني


غازي محمد نصر
مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة