05-15-2011 10:39 AM

حاطب ليل

طاقية قطنية بيضا مكوية

عبد اللطيف البوني
[email protected]


تابعت باهتمام ردود الاستاذ احمد المصطفى ابراهيم على شركة الاقطان التي اتهمته بالكذب والافتراء عليها وبالطبع الموضوع المثار موضوع عام يتعلق باقتصاد البلاد وبالتالي يمكن لاي شخص ان يدلي بدلوه فيما اثير وانا هنا لا اود ان ادخل ك(حجازا) لانه في هذة الحالة ساكون متابطا (عكازي) وانا منحاز اصلا بل اود ان ادخل كطرف اصيل في الموضوع ليس لاني مزارع بل لان رد الشركة جاء فيه انهم يردون على( كاتب المقال وامثاله)فامثاله هذة طاقية يسعدني جدا ان البسها (لاادري ان كان الزملاء الطاهر ساتي وبله علي عمر وتاج السر ود الخير) لديهم رغبة في هذة الطاقية؟
ثم ثانيا انني مثله لاارى اي انجاز لهذة الشركة بل كلها اخفاقات في اخفاقات بدليل ان مساحة القطن قد اصبحت في عهدها اقل من اربعين الف فدان بعد كانت اكثر من خمسمائة الف فدان ومن رد الشركة يتضح لنا ان هذة الشركة (خربانة) مما جميعه حتى علاقتها العامة تحولت الي علاقات خاصة ففي ردها دخلت في امور شخصية وافترءات وكذب ويكفي زعمها ان احمد سقط في انتخابات محلية لابل في ذات الرد جاء (لعمري كم عجبت) من انت ايها المستخبئ ؟ خليك شجاع مرة في حياتك. ثم الاتهام بانه من التحالف ويريد تخريب الاقتصاد الوطني طيب اكان تضيفوا شيوعي وشعبي وطابور خامس ؟ كلام بايخ وقديم ودليل على انعدام الحجة ولايليق بعلاقات عامة . هنا يثور سؤال هل انتم حماة الوطن والارض والعرض ؟ وبامارة شنو ؟ الشركة الجديدة ؟. بما انني مساهم في شركة الاقطان اطالب برفت العلاقات العامة وكذلك المستشار الذي صاغ العقد الفضيحة بمناسبة هذا العقد جاء في الرد انه راعى حقوق كل الاطراف اتحداكم ان تعطونا بندا واحدا فيه مراعاة لحقوق المزارع
لم يترك احمد زيادة لمستزيد في كشف خبايا هذة الشركة السلعلع وبما انني لست متلقي حجج فاود ان اهمس في اذن علاقات الشركة العامة طالما انها فرد واذن مستشارها القانوني بان الذي يقوم به موظفوا الشركة الذين يطوفون على المزارعين هذة الايام للتختيم والبصمة اي والله العظيم بصمة لايعتبر موافقة على العقد الفضيحة ولن يلزم المزارعين باي شئ في النهاية وسوف ترون ذلك في حينه
والاهم من كل الذي تقدم ما ذكره احمد منسوبا للسيد عبد الوهاب عمر عضو المجلس الوطني ورئيس رابطة مياه بالجزيرة من انه ذهب للبنك الزراعي من اجل التمويل لزراعة القطن فقيل له ان شركة الاقطان الجهة الوحيدة المخول لها تمويل زراعة القطن من جانبي اتصلت بالسيد عبد الوهاب فاكد لي ذلك والله العظيم هذا فساد وتدمير للاقتصاد الوطني وتمزيق لقانون الجزيرة لعام 2005 لابل استهتاربالمزارعين ولعب على دقن اي مسئول في هذة البلاد ياجماعة الخير البلد الحصل ليها شنو لدرجة ان افرادا غير مؤهلين –لانريد ان نستخدم كلمة اخرى - يتحكمون في مثل هذا القرار الاستراتيجي ياموتمر ياوطني هل انت موجود ؟ هل انت داعم لهذة الشلة؟ من اين يستمد هؤلاء صلاحياتهم ومقابل ماذا ؟بالله مش حاجة ترفع الضغط وتهيج المرارة وتجعل الواحد يضرب راسه باقرب حيطة ؟ نحن لاندافع عن البنك الزراعي , البنك الزراعي في السما وكفاية العملها في تقاوي زهرة الشمس وقمح شمال الجزيرة والحاصدات الصينية لكننا في فكرة احتكار التمويل وهذا يعني انا كمزراع اما ان اخضع لعقد الاذعان هذا او اتحرم من التمويل. طيب رايكم شنو سوف اتمول ذاتيا ؟ سوف اتمول من جاري ؟خلي ود مقنعة يقيف قدامي
ياحكومة جمهورية السودان الثانية انت تعلمين ان القطن محصول نقدي هام وان اسعاره مرتفعة في هذة المواسم فهذة الميزة يجب ان تعود للمزارع وللخزينة العامة ليس لحفنة لاتعرف الا مصالحها الخاصة وكمان جابت ليها( ارض محنة) كسلعلع جديد اولا هذا الاسم الجميل ليس من حق احد ان يتلاعب به ثم ثانيا باى حق وباى قدرات تريدون ان تتحكموا في اقدار المزارعين هذة والله محنة (بكسر الميم ) . ان هؤلاء الغافلين غير مدركين للمتغيرات التي نجري في العالم حولنا لابل داخل السودان ان مزارع الجزيرة لم يعد لعبة في ايديكم فمن الاوفق ان تعيدوا النظر في طريقتكم هذة وباعجل ما تيسر هذا اذا اسعفكم الزمن

تعليقات 15 | إهداء 0 | زيارات 3633

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#143371 [متابع]
0.00/5 (0 صوت)

05-17-2011 08:35 AM

أحسنت يا دكتور في اختيار العنوان، وأجدت في الموضوع ،،، فالعنون يرتبط بالموضوع ارتباط وثيق ولا ينفك عنه.


#142712 [ابو ابراهيم]
0.00/5 (0 صوت)

05-16-2011 07:06 AM
يا دكتور هي بقت علي ديل بس ؟ الشغله كلها خربانه من راسا لي اساسا قول يا الله الخلاص


#142587 [محمد حامدى]
0.00/5 (0 صوت)

05-15-2011 06:39 PM
بسيطه المزارعين يمشوا المحكمه الدستوريه- تاعب نفسك وتاعبنا مالك الدستوريه هى الحل السحرى لجميع مشاكل السودان يرفدوك يغشوك تمشى الدستوريه طوالى بتجيب ليك حقك حتى لو كنت بره السودان او حتى ماسودانى -


#142551 [قرفان جدا جدا]
0.00/5 (0 صوت)

05-15-2011 04:38 PM
ياجماعة انا لست من الجزيرة وكنت فاكر ناس الجزيرة مروقين عشرة على عشرة ولكن البوني وبسبب عناوينه الفنانة جعلني اعرف الجزيرة فالكتابة الصحفية فن وهندسة مش كواريك ولغة طبنجات الكاتب الذكي هو الذي يسرق القاري سرقة لما يريد من فكرة . الابداع اهم اداة من اودات الكتابة الصحفية فمن فضلكم ما تخلونا عايشين في قرفنا ولما يكون في زول ممكن يدينا ليمونة تزيل القرف خلوه لينا انتو ماسمعتو بحكاية المتعة والفائدة ؟


#142526 [كرتوب باوالتاية]
0.00/5 (0 صوت)

05-15-2011 03:34 PM
السيد المحترم البونى .
أرى انك تشتكى للمؤتمر الوطنى وتطلب منهم الانصاف . هذه حقيقة محنة أن تطلب العون ممن قنن الفساد وجعله يمشى مختالا - الفساد والمؤتمر الطنى هما صنوان ولا انفصام بينهما .

الموقف الصحيح الذى يجب أن يقفه كل سودانى وبالذات الصحفيين - هو محاربة الفساد من منبعه -

وأنا رائى الشخصى أن الفساد فى الانظمة الاسلامية منذ عهد الامويين والى الان والى أن تقوم الساعة .


#142516 [mohamad]
0.00/5 (0 صوت)

05-15-2011 03:19 PM
استاذنا المبجل عبداللطيف البونى

اجل التحايا لك ولعمودك

استاذى ان هنالك فئة من اللذين تبوؤا مراكز ( اعتقد انهم لا يستحقوها) مسؤلية كبيرة وحساسة فى اقتصاديات البلاد . هؤلاء اما انهم ضيقى الافق او هم طابور خامس ومندسين يعملون ضد مصلحة البلد اوانهم مفسدون لا يرون الا مصالحمهم الذاتية . وايا كانوا فيجب ان يزاحو ويتركوا اماكنهم للوطنيين الاكفاء والاطهار الحادبين على مصلحة البلاد العليا ومصلحة الشعب.
استاذى يجب ان تشنوا عليهم حربا عشواء لا هوادة فيها باقلامكم وآرائكم وكتاباتكم الوطنية الحادبة على مصلحة الوطن .
هؤلاء دمروا الاقتصاد وارهقو العباد ولا يراعون فى المؤمنين المسكين الا ولا ذمة .
استاذى اسمح ان اسجل عليك عتابا خفيفا وهو ان العنوان لا يتناسب مع جدية الموضوع وخطورته . ولك الود والاحترام ....


#142504 [ود العبيد]
0.00/5 (0 صوت)

05-15-2011 03:09 PM
لاحول ولاقوة الا بالله العلي العظيم ياخ محمد حتى في اختيار الكاتب لعناوينه تريدون ان تتدخلوا؟ ياخي الكاتب حر في اختيار اسلوبه وطريقته فمامعول زول متلقي ما ينتجه الكاتب يصبح استاذا له في ويصحح له ما يكتبه القراءة فعل اختياري اذا لم يعجبك اسلوب الكاتب اتركه اما ان تختلف معه في قضية فهذا امر طبيعي لانه لااحد يملك ناصية الحكمة


#142441 [zahi]
0.00/5 (0 صوت)

05-15-2011 01:39 PM
هلا هلا ود البوني سلا سيفو .....................


#142437 [كاكوم]
0.00/5 (0 صوت)

05-15-2011 01:35 PM
عود احمد يا عزيز دنيانا بعد الغياب فى حى الاعراب لجزيرة الخير مطروحة الجبين من سوبا لى سنار نيلينك من غرامهم لبسوك سوار كما قال الشريف الهندى .ولكن ناس قريعتى راحت غبروها غبار والبسوها ثوب الحداد من اللعوتة لى ود الحداد ومن الجاموسى لى كاب الجداد وا نارى الما بقيت فنان امضى وابصم فى عقد الاذعان باشارة من رئيس الاقظان واضمن حقى فى قطن الكيمان واكون متعهد صاحب قندران والغف والهف بذرة بالاطنان منو الحاسبوه قبالى منو السالوه من ديون بس انتو ابصمو وادونا الورق اسرعو بكرة اخر يوم وبصم الغلبان وهتف ودالبونى يا جبان شيخ عباس فى الميدان تاكل نيم يا ود ابراهيم الدنيا صبحت يا دكتور شدوا حيلكم شدوا الجرذان كلى ثقة ان فجر الخلاص قد انبلج وان رميتكم صائبة وانى والله ارى راى العين ان الهنبول قد اقتلعته رياح الحق العاصفة وقد ازفت الازفة


#142414 [abuali]
0.00/5 (0 صوت)

05-15-2011 01:01 PM
ايوا كدا يامزارع يامثقف خلي قلمك يعبر عن المزارعين الكلام ذي السيف وديل مابختشوا لكن طالما صار عندنا مزارعين مثقفين يقيموا عليهم البينة الامور سوف تتحسن واذا ما اتحسنت سوف نجردهم ونعريهم حتى عندما يقابلوا ربهم يكون اقمنا عليهم الحجه


#142409 [سلايمان قش]
0.00/5 (0 صوت)

05-15-2011 12:55 PM
ود مقنعة الليلةيابروف جبتها كبيره !!!!!!ومن زمان خطاب شديد اللهجة دا كان وين ؟ المهم يااخوان ساعدو ابوحميد وارشدو المزارعين كفاية ضياع حقوق. ويكون اجمل لو في طريقة تمويل من بنوك اخري خلي البنك الزراعي يطير مش في السما انشاالله في جهنم وماسك معاه الشركة الملعونة


#142366 [عبد الرحمن ابراهيم]
0.00/5 (0 صوت)

05-15-2011 11:40 AM
دكتور بالله العظيم كل ما تجي سيرة المشروع بحس انا روح سوف تفارق بدني من الغل الذي ضرب ارض المحنة، شوف يا دكتور نحن مزارعو الجزيرة انتم قاتلوا بالكلمة وافضحوهم في الاعلام ونحن الروح سايمنها للخالق سبحانه يعني الموت الاحمر في الجزيرة ، بس انتظر يوم 9 يوليو اعلان الاستقلال دولة الجنوب وبعد داك ركوب التونيسية قرب فجر الخلاص. شركة الاقطان هؤلاء زي النبت الشيطاني لاحقوهم.
غير العنوان يا دكتور مفترض اكون عنوان المقال مولع نار حمره لانو احمد صحفي ومرزاع كمان وساكن في الحزيرة، وين كانوا عندما كانت الجامعات والمدارس المتوسطة والثانوية كلها داخليات وغير المشروع مافي حمًال تقيله.
والله الحصل في المشروع يستاهل تنصب لهم المشانق في الضحي الاعلي، يا شباب الجزيرة لا سكوت بعد اليوم الحقوق تنتزع تنتزع تنتزع تنتزع مثل روع الكافر برب العالمين.


#142351 [الزول الكان سمح]
0.00/5 (0 صوت)

05-15-2011 11:18 AM

يا بروف

عوداً حميداً ..كيف خليت حى العرب وناسها.. ( مايقوم أخوناشرف الدين كمان يزعل )

فى عهد البشير مافى حاجة ماخربت ...السكة حديد...هيئة الموانئ البحرية..سودانلاين

سودانير...مشروع الجزيرة...مشروع الرهد...سمعتنا... أخلاقياتنا ...كرامتنا..وطنيتنا...

مثلنا...تعليمنا.


#142348 [البعير]
0.00/5 (0 صوت)

05-15-2011 11:15 AM
الاستاذ البوني تحية طيبة وبعد هولاء العلوج تلاعبوا بالشعب السوداني يمين ويسار لانهم وجدوا الشعب لا بهيش ولا بنش شعب ميت ياكلوا حقو عينك يا تاجر ، لذلك لا تستغرب بان الفطايس الغير مؤهلة غير تاهيل الانتماء الي هولاء الظلمة ان يلعبوا باكبر مشروع في السودان بل في افريقيا ، وأملنا الوحيد في ثورة شعبية لرمي هذه الزبالة الي مزبلة التاريخ وأسترجاع حقوق الشعب السوداني واسترجاع كرامته
بعد ان اهينة وتشردنا بسبب هذه الفئة الضالة ، ومن هنا ندعوا الشباب والطلاب والعمال والمزارعين الي الخروج الي الشارع والي النضال من اجل استرداد حقوقنا وكرامتنا ( اذا الشعب اراد الحياة يوما فلا بد ان يستجيب القدر ولا بد لليل ان ينجلي )


#142346 [mohamed]
0.00/5 (0 صوت)

05-15-2011 11:13 AM
لما قريت عنوان المقال

كنت عايز اقول ليك انك افلست

بس حقو العنوان ما يكون بصورة هزار

لانو ده ارواح ناس ومستقبل اجيال

والا خلينا فى حى العرب


عبد اللطيف البوني
عبد اللطيف البوني

مساحة اعلانية
تقييم
1.08/10 (29 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة