خبراء بلوفة
05-16-2011 12:05 PM

ساخر سبيل

خبراء بلوفة

الفاتح جبرا

لابد من الإعتذار لك عزيزى القارئ لغيابي عنك طوال الأسبوعين الماضيين وذلك نسبة لسفري إلى دولة الأمارات العربية المتحدة بدعوة كريمة من الإتحاد الأماراتية للطيران ، ولما لم اقم بزيارة دولة الأمارات العربية من قبل فقد إندهشت غاية الدهشة من النهضة الحقيقية (الما كلااام) التى شاهدتها فى كافة أوجه الحياة .. شئ لا يصدق !
طيب تعالوا نجى (للكلام) ... قبل سفري بيوم واحد فقط داهمني فى منزلى (ببيت المال) عدد من نسوة الحي وهن يحملن زجاجات بها ماء ، بادرتنى إحداهن :
- عليك الله يا أستاذ ده اسمو كلام ؟ كمان جابت ليها موية بى (دود)؟
أمسكت بإحدى الزجاجات لأرى وبالعين المجردة (كائنات) غريبة الشكل تسبح فى (أمن وأمان) مما جعلنى أقوم بسؤال النسوة
- إنتو متأكدات إنو الموية الفيها الدود دى جات (بالحنفية) ؟
- خليك من كلامنا أفتح الحنفية وشوف بى نفسك !
بالفعل قمت بملء احدى الزجاجات والتى ما أن رفعتها إلى مستوى النظر حتى هالنى ما أرى من كائنات صغيرة متحركة مختلفة الأشكال .. شئ زى الهيلكوبتر .. وشئ زى فرس البحر .. وشئ زى الأخطبوط ... وهنا قمت بإرتداء ملابسى حاملاً الزجاجة (العينة) ذاهباً إلى مقر الصحيفة لتسليمها إلى أخونا (التاج عثمان) رئيس قسم التحقيقات لعمل اللازم وللأسف الشديد غادرت فى اليوم التالى إلى دولة الأمارات ولم أتابع الموضوع .
وأنا أقوم بمتابعة (أخبار البلد) عبر (النت) قرأت خبراً عن تظاهر مئات من مواطني أحياء بري اللاماب إحتجاجا على قطوعات المياه التى إستمرت لشهرين فقلت في نفسى : (يعنى حتى موية بى دود ما لاقينها) !
طفقت أتجول فى (النت) لمعرفة الأسباب وراء هذا القصور والعبث فى أهم (مادة) لحياة الإنسان وكافة الكائنات الحية وما لبث العم (قوقل) ان اتاني بتصريح والي ولاية الخرطوم، (عبدالرحمن الخضر) والذى عزا فيه هذه القطوعات إلى جهات سماها «بـالايادي المجهولة» والتى تعمل على تخريب شبكات المياه بالولاية، وإغلاق البلوفات الرئيسة بعدد من مناطق محليتي الخرطوم وأمدرمان.
حمدت الله كثيرا لوجودي فى (الأمارات) لحظة قراءتى لهذا التصريح عشان (نحنا ناس قلب) وتصريحات من هذه النوعية من شأنها أن تصيب الشريان (الأورطى) بإنفجار حاد علاوة على (الشلل الرباعى) الذى تتعرض له عضلات (القلب) وأهو لو ده حصل فالزول ح يلاقى ليهو رعاية طبية كويسه وكده !
(الوالي) الدكتور بيقول إنو (مافيش تقصير) ولا يحزنون كل القصة إنو في (أيادي مجهولة) قامت مشت قفلت البلوفة الرئيسية وأكيد عشان المسئولين والمهندسين يوصلوا للحقيقة دى فتشوا (الشبكة) صهريج صهريج .. ماسورة ماسورة .. بلف بلف .. كوع كوع .. لحدت ما توصلوا للحقيقة (بعد شهرين) وهي إنو البلوفة الرئيسية (مقفولة) !
وما قاله سعادة الوالي من تبرير وأياد خفية ومش عارف أيه غير أنو (كلام ما بخش الراس) فهو تبرير لا علاقه له بهندسة (المياه) إذ ان المعلوم أن (البلوفة) او نقاط توزيع المواسير بمختلف أحجامها تكون مؤمنة تأميناً عالياً كما أن كل بلف يقوم بإمداد منطقة أو أحياء معينة فإذا، توقف إمداد هذه (المنطقة المعنية) هرع المهندسون المختصون (للبلف المعنى) عشان يشوفوا الحاصل شنو؟ ودى ما عاوزة ليها (شهرين) ! وبالمناسبة ما حاولت أتعرض لتصريح مسئول المياه في ولاية الخرطوم عشان الزول (فى غربة وكده) وأحسن الزول يموت في (بلدو) !
من موقعي هنا حيث الماء المنهمر دون (دود) أو إنقطاع ليروى صحراء الأمارات ويحيلها إلى رياض خضراء غناء تسر الناظرين أتوجه إلى والي ولاية الخرطوم النيلية (المتصحرة) والمسئولين بمياه الولاية بأسمى آيات الشكر والعرفان لتحملهم مشاق البحث عن (البلوفة المقفولة) والعثور عليها دون الإستعانة (بالتومة الوداعية) التى إستعنا بها من قبل فى معرفة (شركات الحكومة الرايحة)
ونجدها فرصة سانحة لنصحة ونصح القائمين على أمر (المياه بالولاية) بأن يقوموا بتأمين هذه البلوفة بوضع حراسة عليها (زى منازل المسئولين كده) حتى لا يطالها عبث تلك (الأيادى المجهولة) وطالما إنو القصة جابت ليها (أيادى مجهولة) فلابد أيضاً من نصح القائمين على أمر (الكهرباء) برضو بتأمين وحراسة (محطات الكهرباء) والتوربيتات وأبراج (الضغط العالي) عشان ما يحصل ليها الحصل (للبلوفة القاعدة في السهلة ساااكت دى) خاصة ونحنا فى (عز الصيف).
وقبل أن أختم مقالي يلح على خاطري سؤال ساذج بسيط أوجهه للأخ والى الخرطوم حتى يقوم (بتبريره) لنا وهو إذا كان إنقطاع المياه بسبب اياد خفية قامت بقفل البلوفة الرئيسية كما يقول السيد الوالي ... أها (الدود الفى المويه ده) الختاهو منو؟
كسرة :
أقترح التعاقد مع (خبراء بلوفة) أجانب !!

تعليقات 31 | إهداء 4 | زيارات 7040

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#144240 [Ashraf Aldigoony]
0.00/5 (0 صوت)

05-18-2011 11:49 AM
أنا بس يا أستاذ إنت فى الإمارات شربت من ياتو صهريج؟ أكيد من صهريج الخيال الواسع ...


#143925 [بلتعة]
0.00/5 (0 صوت)

05-17-2011 10:53 PM
لقيتو ياجبرة ... دا الدود قرقر دخل وقفل البلف الدود المابنقدر قفال البلف الما بنكسر طق طق... طق طق ... هييييييييييييييع ... والله ديل خلونا الواحد ماش في الشارع ويتكلم براهو الله يخارجنا منهم كان قلنا الرووووووووووووووووووووب وما مخلننا


#143901 [الزول الكان سمح]
0.00/5 (0 صوت)

05-17-2011 09:32 PM


الأخ مدحت عروة

لك منى أجمل تحية...سنين ما شفناك ولا سمعنا عنك...والليلة لقيناك فى راكوبتنا دي نحمل هموم الوطن الإنقسم

واحد مشتاق...أرجو التواصل

0568371553



#143673 [مدحت عروة]
0.00/5 (0 صوت)

05-17-2011 02:07 PM
دى حكومة ما بتحترم عقول الناس و لو اصلها بتحترم السودانيين و عقولهم ما كانت بتقول كلام زى دا : اسرائيل ضربتنا عشان بنطبق الشريعة و العالم بيعادينا عشان ما بنركع لى زول و عشان طمعانين فى بترولنا و ثرواتنا و الايدى المجهولة التى تعبث فى بلوفة المياه و هلم جرا !!!! والله لو اصلوا بتقوم ثورة حقوا تقوم عشان الاستخفاف بالعقول و الحقارة دى!!! ولا عشان الفقر و الحرية و الديموقراطية و الذى منه!!!


#143640 [على كيفي]
0.00/5 (0 صوت)

05-17-2011 01:25 PM
ودي دايره ليها فهم كمان الديدان برضه جابتها الأيادي المعادية والأيادي المعادية عملت كدة عشان الشريعة والشريعة أمر رب الشعب( ونعم بالله وهي لله ولا اله الا الله)


#143527 [ام الحسن]
0.00/5 (0 صوت)

05-17-2011 11:04 AM
يابياع ...الامارات مانعين فيها الكتابة واللاحاولت تذوووغ ومالقيت ليك طريقة وقلت مافى حل غير ارجع للجماعة الطيبين ديل وللكتابة تانى نظام جرادة فى الكف و لا الف طايرة,,,الاحتمال التانى تكون اسبهليت من الشفتو وجاتك صدمة حضارية فقدتك المنطق ,,,,ياستاذ لا وجة للمقارنة فالامارات عندها بتررررررررررول.....والسودان عندو كييييييييييييزان اجارك الله,,,,كان كنا عارفنك قاعد تتضهب فى الامارات كان قدمنا ليك دعوة عشان تخرم للشرقية وتكمل الاسبهلال فى شاطئ نصف القمر وكرنيش الخبر...امال انت كان شفتا كوالا لامبور تقول شنو


#143502 [Neema]
0.00/5 (0 صوت)

05-17-2011 10:31 AM
ناس بري ديل ما عندهم ذوق ليه بيزعجو الحكومة المفروض يشيلو جرادل وينزلو البحر زي ما بنعمل في الشمالية والحكومة مجهزة ليكم الدفاع المدني في حال في زول غرق تاني تعمل ليكم شنو اكتر من كدة وبعدين هم ما فاضين اليومين ديل بيعملو حساب ما بعد التاسع من يوليو بالله ماتكرهوهم


#143358 [سمارة]
0.00/5 (0 صوت)

05-17-2011 08:05 AM
الحمد لله الوالي ما اتهم رئيس اثيوبيا بقفل الموية؟؟؟


#143286 [gous]
0.00/5 (0 صوت)

05-17-2011 01:33 AM
اسبوعين يا راجل خوفنا علك.
اكيد اكلات الكسرة وبعدها مشيت الحمام اقصد التوليت.
شوف فى كم حمام و توليت وسافون وكم دبلسي وحكاي كلها ماشى فى المياه الجوفية الباقى انتم عارفين


#143260 [معتز عبد الرحمن]
0.00/5 (0 صوت)

05-16-2011 11:20 PM
حمدلله على السلامه يا استاذ


#143259 [nubian]
0.00/5 (0 صوت)

05-16-2011 11:17 PM
الحمد للة الهواء مافيهو بلوفة ولا كان رحنا فى دهية


#143253 [سامى الكامل]
0.00/5 (0 صوت)

05-16-2011 10:54 PM
اسرور أعراض الدوده الدبوسيه هى جكه شديده بالليل وذلك لخروج الدوده ليلا للتبويض من خلال فتحه الاست -


#143248 [yahia ]
0.00/5 (0 صوت)

05-16-2011 10:38 PM
حمد للة علي السلامة دة لورجعت ولو ما رجعت كمان بقول ليك البرجعك شنو تقريبا انا مثلك لن اسهب في المفارقات بيننا وبين من انت بينهم لاني ومن غير رتوش حاليا هناك واديك وصف للحاجة الانت شفتها من تقدم وما قادر توصفها لي زول ما شافها (الامارات بتتشاف ما بتتحكي ) رحم اللة الشيخ زايد


#143244 [وحدوي ]
0.00/5 (0 صوت)

05-16-2011 10:20 PM
الاستاذ المبدع الفاتح جبرة ألف حمدلله علي السلامة والله كنت ابحث عن مقالاتك بشكل يوم لا خليت فيس بوك ولا عم قوقل وخليت افكاري تودي وتجيب والحمد لله قلت كنت في الامارات ومرة اخري حمدلله علي السلامة انت شخصية عامة وارجو المرة الجاية تزيع خبر سفرك مع دوام الصحة ان شاء الله علي فكرة انا من ابناء الجنوب شفت قلمك وحّد البلد كيف؟؟؟؟ .


#143230 [Mohanad]
0.00/5 (0 صوت)

05-16-2011 09:23 PM
إنت ذاتك يا جبرة تقول بقيت زي الجماعة ديل تبريراتك ما بتخش الراس اسبوعين ما قادر تكتب فيهم عشان في الإمارات طيب لو مشيت مليط تقول شنو ، وين التكنلوجيا والنت والإيميلات ،كان ممكن ترسل من هناك ، تاني ما تعمل كده


#143218 [سودانية]
0.00/5 (0 صوت)

05-16-2011 08:55 PM
حمدا لله استاذنا فقدناك قلنا لقيت ليك عقد عمل بركة الجيت تفشنا فى الناس الحاكمننا ديل قايلننا هنود الله يازاهم واحد واحد-


#143180 [امين الشريف]
0.00/5 (0 صوت)

05-16-2011 07:21 PM
ضربة اسرائيل الاخيرة لبورتسودان بررها وزير الدفاع انها بسبب تطبيقنا للشريعة ؟؟
انقطاع المياه بررها والي الخرطوم بان الايادي الخفية هي التي قفلت البلف الرئيسي !!!
وزير المالية نصح الناس با لرجوع للكسرة عشان الظروف الاقتصادية !!!!!
وكيل وزارة التربية والتعليم برر الحافز الكبير لامتحانات الشهادة السودانية بأنه لا يدري عن قيمته وتوجيهاته مسبقة لمدير مكتبه بصرفه على الفقراء والمساكين !!!!
الرئيس يبكي بعد اثنين وعشرين سنة ويقول انه ما عارف حاجه عن الفساد !!!!
قانون اقرار الذمة تمت اجازته سنة 1989 وتم تفعيله سنة 2011(الفرق كم سنه؟؟) والرئيس اول واحد قدم اقرار ذمته !!!!!
لمن دخل خليل امدرمان قالواعايزين يستدرجوه !!!!!!!
وهكذا تستمر دراما الكذب والنفاق والدجل على شعب استسلم لتجار الدين قاتلهم الله انى يؤفكون ..


#143179 [سرور عامر]
0.00/5 (0 صوت)

05-16-2011 07:17 PM
الوالى صحى بالجد كده قال الكلام ده والدود ده لمن المويه قطعت مشى وين الوالى الظاهر عندو دوده دبوسيه وهى عندها أعراض يسأل منها الوالى


#143165 [محمد احمد السودانى]
0.00/5 (0 صوت)

05-16-2011 06:38 PM
شكرا جبرة
اولا نترحم على حكيم العرب وقائدة الفذ الشيخ زايد رحمة اللة علية ولم نسمع ونقراء فى تاريخنا الحالى برجل دولة فذ مثلة علية رحمة اللة لقد انجز بالعمل والصبر والمتابعة والعدالة كل ما يسعد شعبة لة الرحمة


#143158 [mahmoudjadeed]
0.00/5 (0 صوت)

05-16-2011 06:18 PM
بدل الدود ده ما كان يكون سمك على الأقل الناس كانت شبعت ... جوع وعطش أسأل الله السلامة .


#143137 [mahmoudjadeed]
0.00/5 (0 صوت)

05-16-2011 05:34 PM
النيلين يحتضنا الخرطوم والناس ما لاقين الموية حبيبتي الموية .. وجعلنا من الماء كل شئ حي لكن لا حياة لمن تنادي أبسط شئ انك توفر موية خالي دون لسكان الخرطوم هذي زمانك يا مهازل فامرحي .


#143089 [زنقه زنقه]
0.00/5 (0 صوت)

05-16-2011 04:04 PM
يا بروف البلد نورت الف حمدالله علي السلامه بالله شفت البلد ديك حلوه كيف ونظيفه كيف وشوارع كيف ومولات كيف مش زي بلدنا مول واحد عامل زي دكان اليماني وشوارع مظلمه زي الكحل بالله شفت الامارات دي ليل ونهار واااااااااحد نحن الجلماعه الما طيبين ديل لو بياكلوا النص والنص بصلحوا بيه البلد كان بقينا زي الامارات


#143068 [محمد]
0.00/5 (0 صوت)

05-16-2011 03:20 PM
الحمدلله ماغالتكم إنواصلا المويه ماحصل قطعت ابدا وانت ناس مدسوسين ودايرين تخربو البلد التعبنا فيها مشروع حضاري وإسلامي وكباري وشواع وجامعات
تقول داف لينا م جيبو ؟؟؟؟؟


#143061 [omer]
0.00/5 (0 صوت)

05-16-2011 03:11 PM
يا استاذ الفاتح في الخرطوم الموية عندكم بتقطع ساعة وساعتين في الشهر والله والله اهلنا في فاشر السلطان في ناس موصلة الموية والله سنتين الماسورة ما قالت اخخ وفي ناس بتجيهم يوم الخميس باللييييييييييييل خالص بعد النوم بعدين لعلمك الماسورة الا ترقدا وتحنسها وتدلعها وتحفر ليها حفرة وتخت الزير في داخل الحفرة عشان تملي برميل موية يوم الخميس يعلم الله حيييييييييييي


#143029 [abuali]
0.00/5 (0 صوت)

05-16-2011 02:13 PM
الأستاذ....الفاتح جبرا حمد الله على سلامة الظهور الموقع
بعد التحية
فقدناك - إفادة الدكتور الوالي الخضر - غير علمية - ببساطة لأن نظام الضخ في شبكات المياه يتم من خلال شبكة ومحابس ومياه بضغط معين الخ ولو افترضنا (باستخدام قاعدة حسن الظن) ان هناك صمامات او محابس اقفلت عمدا من جهات مجهولة من أحياء بالكامل او شبه الكامل مثل بري والرياض الخ هذا معناه ان ضغط المياه في هذه المواسير صفر اي لا يوجد ماء وبما ان المياه تخرج بضغط معين من المحطة فذلك يعني مضاعفةالضغط في باقي الموسير للأحياء الأخرى وهذا يؤدي لانفجارها - يعني مفروض ان تكون نصف الخرطوم عطشانه والنصف الآخر غرقان لكن الواقع الفعلي يشير الى عكس ذلك لان النصف عطشان ماعندو موية والربع عندو مويه ضعيفة والربع الآخر لديه امداد عادي - يبقي السئوال او الكسرة ياوالينا الموية تبقى مشت وين؟؟؟؟


#143014 [هاشم عبد الماجد خالد]
0.00/5 (0 صوت)

05-16-2011 01:52 PM
سؤال للوالى بعد ما اكتشفتو الايادى المجهولة والشيوعيون الذين قفلوا البلوفة بعد ما فتحتوها الموية جات تانى والله لسة مافى موية


#142985 [عبد الماجد عثمان]
0.00/5 (0 صوت)

05-16-2011 01:17 PM
الاخ الفاتح (بلاش جبرا ) لك التحية والاحترام وحمدا لله علي السلامة انا عندي اختراع ( عفوا اقصد اختراح انو اي زول يتحمل المسؤلية بنفسه يعلي يكون طبيب (لزوم التطبيب له ولااسرته )(ومهندس لزوم الشوارع عشان عربيته لو كان عندو عربية)وسباك وجزار (مهنة تكميلية)وبناء (لزوم الترميم) ولاننسي اهم مهنة ان يكون مدرس والسلالم عليكم


#142968 [ود التوم ]
0.00/5 (0 صوت)

05-16-2011 12:52 PM
مشكلة يااستاذ الموية في بلد النيلين مافي ولامن تلقاها تخش ب100 وتطلع ب 300


اذا ساء فعل المرا ساءت ظنو نة عشان كدا يقولو تخريب ومعارضة


#142966 [Mamoun]
0.00/5 (0 صوت)

05-16-2011 12:50 PM
يا ها دى مظاهرات الموية البتودى الكيزان ديل فى ستين داهية الى جهنم وبئس المصير عليهم عليهم يارب خلص الشعب الفضل منهم _______ قولوا معاى اميييييييييييييييييييييييين


ردود على Mamoun
Sudan [Mohanad] 05-16-2011 09:25 PM
آمييييييييييييييييييييييييييييييييين


#142958 [محمد حسن - السعودية]
0.00/5 (0 صوت)

05-16-2011 12:38 PM
والله ناس الدود محظوظين لأنه الدود فيه بروتين .. نحنا من أرض المحنة وفي قلب الجزيرة مواسيرنا بتطلع منها مخاخيت عديل .. دي لوجات ..


#142957 [الزول الكان سمح]
0.00/5 (0 صوت)

05-16-2011 12:36 PM
يا أستاذ....حمد الله على السلامة

إن شاء الله الكتاب يكون جاب حقو..أنا لسع فاكرك فارش فى دار الشرطة وبتنادى علينا جاى

والدود النتر جوة المصارين توووف...دى عينة للتذكير بيوم القيامة


الفاتح جبرا
الفاتح جبرا

مساحة اعلانية
تقييم
9.01/10 (42 صوت)





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة