المقالات
السياسة
ارشيف مقالات سياسية
قبح الله بنو إنقاذ اينما حلوا
قبح الله بنو إنقاذ اينما حلوا
05-18-2011 06:31 AM

قبح الله بنو إنقاذ اينما حلوا

أسماء الجنيد
[email protected]

سلام لكل الأهل والحبان في كل مكان
داخل وخارج السودان
الشكر والتقدير لكل من راسلوني وهاتفوني ولكل من سطر حرفا معقبا سلبا ام
إيجابا على كتاباتي المتواضعة , لكم التحية والتقدير جميعا ,,,
اها نجي لي ناس بنو إنقاذ أو بنو جكة ,,
زمان لامن بدوا يغشوا في الناس مع بداية حكمهم , شبعوا خلق الله جري سااااااي في الشارع
التلاميذ الموظفين الناس الكبار يا حليهم وما بقدروا على المشي , برضو ادهوم جكة بي إسم الدين .
النعمنو يجروا ويفنجطوا ويقولوا الجكة دي لله ,, الجرية دي لله , لله لله ,,
نفااااااااق بالكوم وبالجري وبالجكة ,, وبدوا مشوار دمارهم في البلد ,
غايتو يا ناس الإنقاذ الخراب والدمار الزرعتوه في السودان في ال 22 سنة الفاتت
تاني 22 سنة ضوئية لي قدام ما بتعدل الحال
جيل كامل يبلغ من العمر 22 سنة من الجنسيين
انتهيتو منو نهاية بطل,,
طبعا انا بتكلم عن الغالبية للأسف الشديد ,,
لا اخلاق لا تعليم لا مباديء ’ مبادئنا الكنا بنصرخ بيها في وش اي عربي أو اجنبي ، ونتحدي بيها كل الجنسيات التانية ، انتهيتوا منها نهاية مؤسفة ومحزنة حد النواح.
الشعب الواحد ده التقول سقيتوه محاية, الشكية لي الله والرسول .. بالله الحرارة والهاشمية اللتنا الزمان ديك طشت مع الشبكة وخترت في بكانا كتر, عليم الله وين راحت ما معروف ,, قدر ما تقوم نصيبة نقول الليلة الشعب بمشي القصر كداري ويعضعض البشير والمعاهو ، والزارعا غير الله اليجي يقلعا,, وحاتكم ولا حياة لمن تنادي , شدة مو القلوب ماتت و يقنت من تالاهم وصهينت, لامن هم زاتهم ناموا واخدولهم شخرة ، ويقنوا تب من تالا الشعب .. وكمان عينهم قوت وبقت المجاهرة بي الشينة الضحى الأعلى, ومن قهرهم وفجورهم , قفلوا الموية من الناس وعطشوا الناس من طرف , منو البصدق في قلب العاصمة ونيلين شاقات البلد ـ والموية يبيعوا فيها بالترلات والبراميل وعربات الموية !!! والله ده براهو سبب يخلي الناس دي كلها تمشي تصلهم في بيوتهم وتعمل الدايراهو والأسباب واضحة,, لكن للأسف حصل البحصل كل مرة وصمت أهل القبور هو سيد الموقف ,
عشان كده ناس الحكومة ابدا ما مليومين . ولسه حانشوف منهم الكتير والتقيل . لأنه الناس قابلة ورضيانة, بالوضع المزري !! آي نعم مغلوبة على امرها , لكن اهلنا زمان ما كان بسكتوا ولا برضوا بالحقارة,
ولا فيهم زولا بتلبد ولا بتضارا, كلمة الحق دي بقولوها، ولو على رقبتهم سيف موت موت حياة حياة.
إن زاد سعر السكر باكر تلقاهم في الشارع, واقفين للحكومات في حلوقها,
وإن زاد سعر الرغيف ولا الجاز ولا اي شيء ، الحكومة الله قال بي قولها .
ومظاهراتهم تخوف الجيش كلو وفي كل بلد, بالله تحلف تقول الناس ضربولها جرس, كلهم بره في كل البلدان والقرى . اي رئيس بعمل الف حساب للمواطن السوداني , علموا الشعوب التانية الأنقلابات والمظاهرات والثورات , كنا رمز لأكبر 3 ثورات هزت العالم العربي والأفريقي,, وبقت تاريخ نفتخر بيهو مدى الحياة,,
لكن السكات ده من كل الشعب على بنو إنقاذ ، ابدا ماهو رضا ولا قناعة بيهم, لكن المحيرني قدروا غشوا الناس بي الدلاليك والصفقة والمزيكة العالية والرقيص في الهينة والقاسية, يرقصوا ويكبروا في نفس الوقت, نفاق ودجل واااااضح تقشعر له الأبدان . وفساد يزكم الأنوف ,, وبعد د الموجعنى بالحيل وواجع الكتيرين من الناس القلوبهم حارة , كان جوة كان برة .
الناس المبارياهم في ايتها لمة لي أي واحد من الدجالين ديل , جاي ومعاهو فنانو المفضل المطبل للخمة والجوطة وشغل الناس الما فرحانة ولا مبسوطة,, ورغم ده يتهوززوا معاهم ويكبروا وراهم , رغم الجوع والمرض والغلاء وجاء عليها العطش,, وبعد تنتهي الحفلة مع نهاية اللقاء ، ديلك يرجعوا لي قصورهم بعرباتهم الفخمة المكندشة ، ويخلوا الغلابىة ديل وسط العلالة والكتاحة لي مرضهم وجوعهم وفقرهم, وهكذا تتكرر المأسأة دي في كل لقاء كيزاني منافق , وما زال الشعب صامت صمت اهل القبور.
سرقوا البلد عينك يا تاجر, التجار الزمان الجابينها بي عرق الجبين , ما عندهم هسه البملأ الهين,,, فكوا شوية صعاليك في السوق لا بفهموا في التجارة ولا بعرفوا الربح والخسارة, بقوا ينهبوا ويضربوا في بعض, ولدوا الجشع والطمع والخوف والجوع , بالله الواحد تلقاهو نهب لامن بقي صاحب عمارات , وبقى ليهو فقرة بي السرقة والنهب والربا , وبرضو يزازي يسرق في شوية جنيهات, العين ما ملانة ’ لأنه من يوم جاي نابل جاي حرامي ومرتشي وما بخاف الله.. منزوعة من قلوبهم الرحمة والرحمن قبلهم ووحدهم..
التعليم خميتوهو كلو ودفنتوه تحت التراب, محتاجين تاني عشرات السنين عشان يتنفض ويزيلوا منو الشوائب عشان يبقى تعليم زي زمان, عشرات السنين عشان اولادنا وبناتنا يعرفوا يكتبوا عربي كويس!! والإنجليزي ده خلوه مات زمااااان وراح في خبر كان . زمان التلاميذ في الإبتدائي يكتبوا عربي بي قواعد تحير المعلم زاتو. هسه الخريج الجامعي خطاب ما يقدر يكتبوا ولا حتى يقراهو!! اخطاء إملائية فادحة تقص القلب ، والعجب ناس التلفزيون خاصة المذيعين والمذيعات وعلى الهواء كمان !!! وزراء ومسؤولين وموظفين في اماكن يفترض إنها تكون مرموقة . لكن بي الجهل البقى اكبر كارثة لي أي سوداني اصبحت مهزلة وفضيحة بجلاجل..
الصحة دي كوم براها, الله يرحم الدوش صدق لما قال بجي زمن نعبيء الزهج والقرف في اكياس ونبيعوا في الأسواق,,
المريض يمشي مغلوب على امره لي العلاج يشبع إهانة ومرمطة , احسن ليهو يقعد في بيتو بي مرضو لما الله يفرجا عليهو,, وزمان التطعيم بجينا في المدارس
هسة إن مشيت عيان ما تتعالج,
الشكية لي الله السمح كلو في البلد قدرتو عليهو بعمايلكم السوداء البتشبهكم إنكم تغيروهو وتمسخوهو وتقبحوهو
أما الأخلاق والشهامة السودانية الأصيلة دي براها كوم تاني. انتهت كلو كلو وانعدمت نهاااااااائي إلا من رحم ربي ,,
زمان في المواصلات الشباب الصغار ديل من مصروف المدرسة بتشابوا يدفعوا لي اعمامهم الكبار وخالاتهم وخياتهم .هسة الواحد بي عين قوية تلقاهو قاعد في الكرسي ويفرطق في اللبانة ولا يصوت في موبايلو ، ومركبلوا سماعات في إضني يسمع في الأغاني الهابطة وغنا الخواجات الما ناقش فيهو فد حرف ,, وتجي حبوبة قدر حبوبة امو ولا جد اكبر من جد ابوهو ، وحاتكم يكون واقف مشمع يعاينولو بي طرف العين زي ا لما حصل شيء , , قمة في تندي الأخلاق , جيل العيب ده ما علموهم ليهو! يتعلموا وين وكيف؟ إذا كان البعلموهم كلهم من مباديء وخلق رفيع هجوا برة البلد, بسبب الإنقاذ الغتست حجر البلد !!! اي بيت تلقى الابو مافي والأم مشغولة بمشاغل المعيشة واللهطي وما عندها زمن للتربية, ولا المتابعة,, أو الأم مافي والأبو جاري ورا الأرزاق المداقراهم فيها الحكومة من جبايات وضرائب ورسوم يشيلوها من عرق ودم الغلابة ويكبوها في كروشهم, بتدخل عليكم زي النار وتحرق بطونكم, واحيانا الأخ ولا الأخت الكبيرة برضو هجوا برة البلد عشان توفير مصاريف تكفي لقمة العيش لي أهلهم الجوة البلد ومطحونين,,
واجعني معظم الشباب الضاع , ضاعوا بسبب الإنقاذ وسوء عمايلها ,شغلوا افكارهم بي حاجات ثانوية لا تسمن ولا تغني من جوع , نقصوا أهم المواد الدارسية ونقصوا عدد سنين الدراسة , عشان الطالب لما يصل الجامعة يكون لسة صغير في السن ، ويقدروا يتحكموا فيهو ويحركوه عن طريق كلاب امنهم زي ما دايرين وعشان الجيل ده ما يتعلم ولا يمشي لي قدام. ويعرف و يفتح ويكون ليهم بالمرصاد. حاجات كتيرة كنا بنعرفها من الصف السادس الإبتدائي , هسة ناس في الثانوي ما عارفنها!! عملوا ليهم غسيل مخ وضيعوا الغالبية ,, 22 سنة زرعوا جواسيسهم في الجامعات , الجامعات بعدما نقصوا الأعوام الدراسية , بقى الطالب الجامعي شافع عديل , في سنو دي المفروض يكون في بداية الثانوي, يدخلوهم الجامعة صغار وفي طور مراهقة , ويفكوا جواسيسهم المشتتين زي الألغام في كل مكان , خاصة الجامعات ويغسلوا للشباب الضحايا ديل امخاخهم ويحطموا مستقبلهم ويشلوا طموحاتهم . ويبدلوا افكارهم .
عارفين زي جوع بطنهم إنهم دمروا التعليم ووصلوهو الحضيض, عشان كده اولادهم بسفروهم يدرسوا ويتعلموا بره بقروش اهلنا الماصين دمهم بي الغلاء والجبايات والضرائب الفارضنها بقوانينهم الظالمة .
اتحدى اي مسؤل كبير تابع للكيزان غير ناس الحكومة زاتهم ، اتحداهم كلهم لو اولادهم وبناتهم درسوا وإتعلموا في السودان !!!
كلهم في اوربا وفي ماليزيا ,, ضيعوا البلد وشباب البلد وقعدوا ممدين لي الشعب في قلبو من جوه ,, مرضتونا الله يمرضكم ويلفحكم بركة جاه النبي من وشنا كلنا ,,,
عشان كده ناس الإنقاذ ديل كان جبناهم وختيانهم في وسط البلد وطلعنا فيهم بي دفار وهرسنا عضمهم على لحمهم ما بنفش غبينتنا فيهم الما بتنفش ، ولا بنعالج مشاكلنا الما بتتعالج.
السودان الوطن الواحد كان رمز للسوداني الغيور , السوداني المتعلم المثقف
في اي دولة عربية يقول ليك الموظف السوداني, تعليم واخلاق, امانة وإحترام,,
هزوا صورة البلد وقسموه نصين وحرقوا حشاهو وطلقوا الفتنة والباقي من البلد ولعوا فيهو نيران الله اعلم النيلين الجاريات وسط البلد يطفنها,
وبعد ده استغرب وكتيرين من اهلنا البسطاء بستغربوا في العالم البتطبل وتدافع عن هؤلاء الحرامية سارقي قوت الشعب آكلي السحت تجار الدين!!!
نصيحة لكل مواطن غيور من شعبنا الفضل,,
الناس ديل اتنزعت منهم الرحمة من قلوبهم , واتحجرت كل حواسهم.
وما هاميهم لا مواطن ولا بلد. اكتر من السوهو فينا ده تاني فضل شنو ..؟؟
مافي غير التغيير.. والتغيير ما بجي بي اخوي واخوك , والتغيير بطلع من بيت كل سوداني
مش في العاصمة بس ! لا في كل المدن والقرى , في كل شوارعنا وحوارينا . في كل الحلال , انفضوا الغبار العالق في الذاكرة, واملوا قلوبكم إيمان وعزيمة وإصرار, . ومافي غير التغير, وماهو شيتا صعب, لا ناس جايين من القمر ولا ناس جايين من كوكب آخر..
حتقدروا عليهم حتقدروا عليهم مافي شك ،
ياما غيرهم حكومات كشحها الشعب الواحد ده بالعزيمة والإرادة والإصرار وحب الوطن السودان الواحد.. اهم شيء التكاتف والتعاضد من اجل الوطن الواحد ومن أجل ان يخلو السودان من كل جراثيم الإنقاذ, لازم ننضف البلد منهم ونطهرها من رجسهم ونجاستهم..
ما تنسوا إننا نحن شعب ما بنقبل لا بالحقارة ولا بالظلم ولا بالذل ولا الهوان,,
وده كلو شفناهو من الكيزان .
كلو حاصل وبحصل في كل لحظة وفي كل يوم وفي كل مكان في السودان.
قبحهم الله دنيا وآخرة وفتنهم فيما بينهم وجعل كيدهم في نحرهم وخلص اهلنا المطحونين من بطشهم وظلمهم, اللهم آمين يا رب العالمين
عليكم الله ادعوا عليهم في كل صلاة ربنا يخلص اهلنا منهم الليلة قبال باكر
يمهل ولا يهمل
ودعتكم الله
أسماء الجنيد





تعليقات 14 | إهداء 3 | زيارات 4016

خدمات المحتوى


التعليقات
#145041 [الزول السمح]
0.00/5 (0 صوت)

05-19-2011 04:25 PM
أختي كتاباتك جميلة لكن خليك ذي عمنا الصحفي الرقم ودالمرغني الموضوع مختصر وجميل وفي نصف صفحة لان الناس تعودت على السرعة والخفة وكده ولا شنو ياجماعة؟


#144788 [الزهجان]
0.00/5 (0 صوت)

05-19-2011 09:19 AM
سلام عليكم


واحد من الاخوان قاليك قومو شوفو شغلة تانية بمفهو الكيزان اما ان يكون كوز مندس اوجردل لا يدرى مابداخله



لكن اامر صعب جد والاصلاح يقاس السنة الضوية ذي ماتفضلتئ لكن الياس ممنوع


علي سبيل المثال الصحة فيها 60في المئة منهم و30 مندسين والله يكون في العون


د الزهجان


#144786 [ناصر]
0.00/5 (0 صوت)

05-19-2011 09:19 AM
للأسف حتى لو ذهبت هذه الحكومه منو البيحكم بعدهم ومنو المقنع النقول ده معقول وممكن يصلح حال البلد .... أحسن شئ نرسل للإنجليز ونقول لهم تعالو راجعين نحنا آسفين ما قدرنا نحكم البلد بت الكلب تعالو استلموها ونحن ندمانيين وسافين التراب ... وللأسف حتى الناس المعلقين هنا ما عشان مصلحة البلد ولكن عشان كل واحد منتمى لجهه معينه ومصلحة الجهه دى قبل مصلحة البلد وكل البكائيات دى عشان نا س زعيط ومعيط المابختلفو عن الموجودين فى شئ ويمكن يكونو أسوء منهم ... لك الله يا وطنى


#144662 [kadr]
0.00/5 (0 صوت)

05-18-2011 11:23 PM
يا اخوانا البلاء مافي الانقاذ وحدها اليلاء في الصوفية الدايشين وانصار السنة الجارين وراء الدنيا باختصار يا اخوانا السودان انتهى قوموا شفوا ليكم شغلة تفضوها


#144556 [ uncleabdalraheem]
0.00/5 (0 صوت)

05-18-2011 06:53 PM
لا حياة لمن تنادى وربنا يكون فى عون الناس الشايلة هم البلد وحارقها غم الظلم والفساد والانكسار .. كونى على يقين وبمنطق التاريخ ان لهذه الفئة الظالمة نهاية ولو بكيد بعضهم لبعض أما أهلنا السودانين الباقين فى السودان كأنهم بلا روح أو إحساس مخدرين ومفدرين بإسم الدين وسياسة التمكين والجرى وراء لقمة العيش .. الحاصل يحزن القلب ويفطر الكبد لكن لكل ظالم نهاية .. البلد ضاعت والناس الغبيانة بتصدق وتجرى وراء الخواف وناس تانية جارية وراء اللهف واللغف وما هامهم دين ولا دنيا .. بارك الله فيك وراك ورنا يسر قلبك وقلوب الجميع بالنصر وطرد هؤلاء السفلة أو موتهم ( ما كنت اتوقع ان تصدق مقولة الاستاذ / محمود محمد طه فيهم لكن شكلها هى الحا تكون )


#144408 [Abo Nahla]
0.00/5 (0 صوت)

05-18-2011 02:36 PM
( all engaziuon but you wrong becuese some people from alengaz very good y) Hi you cerful why ? you talk about lik that write not good for you and thanks alot


#144220 [زوول]
0.00/5 (0 صوت)

05-18-2011 10:22 AM
بت الجنيد شكرا لك كفيت ووفيت واشفيت غليلنا من هؤلاء النجوس الفساق باسم الدين لقد مرمطوا الشعب السودانى واهانوه اهانة لم تحدث من قبل حتى من المحتلين الانجليز او الاتراك هذه العصابة الماجنة المجرمة تفننت فى تعذيبنا بكل الاساليب نسال الله العظيم ان يرينا فيهم يوما كيوم عاد وثمود


#144203 [محمد الامين]
0.00/5 (0 صوت)

05-18-2011 10:00 AM
اولا مهما كتبتي ومهما قولتي مافي زول بطلع ليك في الشارع انت عارفة ليه اولا زمان الشارع بحركوه الطلبة والعاملين وليه الطلبة لان الطالب الابوه موظف ولا عامل كان بعاني والعمال كانت قياداتها حره لكن اليوم الموظفين مراتيح وكذلك العمال الثابتين وبقية الناس طبقة كادحة يعني لو وقف يوم واحد ما بيأكل ولا عيالو بياكلو وديل معاهم مية المية املا في الوعودالفضفاضة البسمعوها منهم يعني جوع كلبك يتبعك وبعدين كمان الموظفين القياديين كل واحد رموا ليهو السنارة حتى اصطادوهو حرامي بالدليل القاطع ومسكوها عليهو ورقة ضغط يسيروهو بيها ذي مادايرين يعني النا س ديل سكتوا الفئات البتحرك الشارع اما الريف من زمان الحكومة عندهم هي الخريف خريفا جاء سمح والناس عيشت وبهايمن انبسطت الحكومة سمحة خريفا جاء كعب الحكومة سودة وشوم والله يقلعهاوهكذا نحن ودي لعنة نميري المات فقير وفي بيت ابوه وكان اعظم قائد في افريقيا0


ردود على محمد الامين
United Arab Emirates [Ali Abdelgewwi] 05-18-2011 04:32 PM
يا محمد الامين

نميري الاهبل داك كان اعظم قائد في افريقيا؟ ليه هو كان مانديلا و لا لوممبا و لا سيكوتوري و لا سنجور و لا جمال عبد الناصر و لا و لا و لا؟ لعلمك هو جزء مما نعاني الان بسبب اشراكه لهؤلاء الكيزان في الحكم بدأ من 1981 بدأ مسلسل انهيار السودان بسبب ذلك الخنيس الترابي.


#144175 [orass]
0.00/5 (0 صوت)

05-18-2011 09:35 AM
والله يا بت الناس إن ما عملتي حسابك بجيكي ضغط وسكري .. مالك حارقا زرك .. تجيهم من الله ... قولي آمين.
ناس الإنقاذ زاتم فتروا من الشعب التعبان دا (جوعوا ما نفع , ضربوا وعذبوا في بيوت الإشباح ما نفع .. قطعوا منو الموية ما نفع) .
والله ما فضل إلا الحكومة تخرج في مظاهرة وتقول الحكومة تريد وأد الشعب حيا.
الشعب ما مستعجل عايز يموت ببطء.

(إن الله ليمد للظالم حتى إذا أخذه لا يفلته).
.


#144165 [ابومحمد]
0.00/5 (0 صوت)

05-18-2011 09:27 AM
الكلام كتر الربة بتين تقوم شباب تونس ومصر وليبيا واليمن وسوريا تحركوا وشبابنا منتظر العجائز يعملوا ليه ربة يعنب شباب بيفكر بطريقة رجعية


#144102 [العمدة الماحي]
0.00/5 (0 صوت)

05-18-2011 08:28 AM
يا بت الجنيد الله يريح با لك بما تكتبيه وهو لسان حال أهلنا الغلابة ربنا يسمع منك ومنا الدعاء يا بت البلد الواطية الجمرة والقابضة عليها وربنا يشفي صدور قومٍ مؤمنين والنصر قريب إن شاء الله .


#144069 [hanfoli]
0.00/5 (0 صوت)

05-18-2011 07:56 AM
بارك الله فيك، أختصرتي الحاصل في السودان كله في مقالك ده....
ربنا يحلنا منهم الكيزان ديل ويجعل كيدهم في نحرهم ويفتنهم في بعضهم أكثر من كده، ويخرج الشعب السوداني من ظلمات الانقاذ الى نور الحق والحرية والديمقراطية...
آمين


#144064 [wahda men alnas]
0.00/5 (0 صوت)

05-18-2011 07:47 AM
آآآآآآآآآآآآآآآآآآآآآآآآآآآآآآآآآآخ ديل عملو كل شي في الشعب ده فضل بس زي ما قالوا يركبو سرج لكل واحد منو ,صدقتي نحنا انتهينا وما اظن بنرجع تاني
وربنا قال في كتابه الكريم ((إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ))والسودانين لو ما غيروا من انفسهم ونفاقهم ده ربنا حيسلط عليهم من لا يرحمهم ,لكن أملنا الكبير في رحمة ربنا التي شملت كل شيء وانو لا يرضى الظلم على عبيده المستضعفين,ويمكن يكون الفرج في استجابة دعوة مظلوم مستضعف وتزول الغمه برحمة ربنا , أما السودانين وشجاعتهم وبسالتهم كلو طلع فشننننننننننننننننننننك


#144060 [نهى أبراهيم]
0.00/5 (0 صوت)

05-18-2011 07:44 AM
يا أختي ياأسماء أناشدك الراى ونسأل الله زول هذه الحكومه الظالمه ومن هذا الممبر أقول لهم أطلقو سراح عمر الضي محمد فانه بري وأشهد الله علي ذلك أنه الان معتقل وأرجو منكم المساعده بالقلم لاخراج عمر الضئ محمد


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة