المقالات
السياسة
ارشيف مقالات سياسية
هذا ليس من حق المواطن السودانى عمر البشير!ا
هذا ليس من حق المواطن السودانى عمر البشير!ا
05-26-2011 02:31 PM

هذا ليس من حق المواطن السودانى عمر البشير!

تاج السر حسين
[email protected]

تعودنا من (رئيس المؤتمر الوطنى) عمر البشير التصريحات العنتريه المنفلته التى قد تلازمها حليفة طلاق (فشنك) تتم المخارجه منه على طريقة (على الطلاق ما تدخل أرض السودان قوات أجنبيه)، فتستبدل كلمة (اجنبيه) بكلمة (هجين) أو أن يدلع (محمد) ويصبح (حماده) كما قال السيد الصادق المهدى ذات يوم.
أو أن تعتبر القوات المصريه المشاركه فى تلك القوه والتى يزيد عددها عن الثلاثه الف جندى قوات سودانيه حسب اتفاقية (الحريات الأربع) المطبقه من جانب واحد والتى تشبه حالة حب من طرف واحد!
والتصريح الهمجى الغوغائى الذى أدلى به (البشير) عن مواطنى جنوب السودان وأن (الكشه) سوف تطاردهم بعد يوم 9/7/ 2011، حديث سخيف لا قيمة له ولا وزن.
فالسودانيين من جنوب السودان لهم حق فى هذا البلد وهم من أصلائه ومن حقهم أن يقيموا فى الشمال أو الجنوب (بمزاجهم) .. يقوموا ويقعدوا على كيفهم ويخلفوا رجل فوق رجل .. لا تفضلا أو كرما من البشير، الذى اجبرهم على أختيار الأنفصال لا التخلى عن شمال السودان وعن اخوانهم الذين امتزجت دمائهم بدمائهم فى ساحات المعارك ضد قوى التخلف والظلام والرجعيه وسوف يعود السودان شامخا وموحدا بين شماله وجنوبه ذات يوم وبعد أن تنقرض هذه الشخصيات امثال (البشير) الذين يحملون داخل روؤسهم عقولا متحجره وعنصريه وأقصائيه، وسوف يذكرهم التاريخ بأقبح الصفات وسوف تلعنهم الأجيال القادمه التى سوف تدرك الأمور جيدا، ولا يمكن أن تظل مضلله ومغيبه ومعتم عليها ووعيها (مغبش) ومشوش عليه.
واذا كان (البشير) يرى مثل خاله (الطيب مصطفى) بأنه (عربى) صرف، رغم انفه (الفطساء) وأن السودان وطن (للعرب) والمسلمين وحدهم، فعليه أن يعلم بأن (السودان) كان زنجيا ونوبيا وفوراويا وبيجاويا قبل أن يدخله العرب والمسلمين فى حوالى عام 30 هجرى أو 650 ميلادى غازين أو بتوقيع معاهدة البقط مع (عبدالله بن أبى السرح).
واذا كنا عن وعى تام لا نتنكر لثقافتنا العربيه لأخواننا (العرب) الخلص على قلتهم والذين يشاركوننا هذا الوطن، فأننا نعتز ونفتخر بتاريخنا الزنجى والنوبى والفوراوى والبجاوى وبحاكم مثل (بعانخى) الذى تدخل وفرض سلطته على دوله مجاوره قبل أكثر من 2700 سنه، من اجل حماية (الخيول) !! أى قبل أن تعرف الأنسانيه المحكمه الجنائيه التى تدخلت لحماية البنى آدميين من حرب الأباده والحروب ضد الأنسانيه!
ننصح أخواننا من ابناء الجنوب الذين تربطهم مصالح بالشمال وحقوق أو مزاجهم أن يبقوا فى الشمال، عليهم أن يتبعوا الطرق القانونيه مثلما فعلوا فى (ابيى) التى سوف يخرج منها (البشير) صاغرا، شاء أم ابى، وأن يطعنوا فى قرار (رئيس المؤتمر الوطنى) أمام المحكمه الدستوريه وأمام اى جهات عدليه دوليه، لأنهم اصحاب حق تاريخى وقانونى أصيل، والمواطن السودانى الذى يدخل السودان الشمالى ويخرج منه وهو يحمل الجنسيه الأنجليزيه أو الأمريكيه أو الكنديه أو الأمارتيه أو المصريه، ليس اولى من الجنوبيين فى التمتع بذلك الحق، الذى هو ليس منة وهبة من (البشير) الفاقد للشرعيه والذى اغتصب السلطه عن طريق انقلاب عسكرى ثم مدد فترة بقائه فى السلطه بانتخابات وأستفتاءات مزوره، لن نعترف بها، مثلما بقاء اهلنا الجنوبيين فى الشمال ليس منة أو كرما من الذين يظنون أن السودان بلد (العرب) والمسلمين وحدهم.
آخر كلام:-
قيادى (اخوانى) فى مصر من الذين جاء لنا (البشير) وزمرته بفكرهم الأقصائى الذى حكم السودان مدة 22 سنه، صرح بالأمس فى ندوه بأن (الأخ المسلم) يجب الا يتزوج من اى أمرأة مسلمه غير (أخوانيه) حتى لا يستبدل الأعلى بما هو أدنى!

تعليقات 11 | إهداء 0 | زيارات 2845

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#150527 [sham]
0.00/5 (0 صوت)

05-28-2011 11:20 PM
talk is cheap .we don\'t give a damn what the so call himself president omer .he is no longer ,as acivilian of this great country we are free to settle any where Igrew up in kordofan ilove every inch of this land .and if omer himself try to uproot us let him try and god will judge between us on earth or in heaven


#150371 [medooosh]
0.00/5 (0 صوت)

05-28-2011 04:45 PM
مشكلة سودانا الاساسية الخونة والمرتزقة والمأجورين واصحاب المصالح الشخصية........

بالله عليك زول قال ما دايرك بصريح العبارة وفضل انو يعيش في دولة جديدة تاني انت داير بيهو شنو

يا اخي خلي عندك شوية كرااااااااااااااااااااااامة واتنازل عن مصالحك الشخصية يا هذا !!!!!!!!!!

هم لو دايرين الشمال اختاروا الانفصال ليه..........

دايرين انفصال ودايرين يقعدوا في الشمال يا اخي ما تخجل من خزعبلاتك دي والله تستاهل يسحبو منك الجنسية السودانية التي نتشرف بها حتى الممات ....يا حليلكم جدودنا زمان........

الحمد لله الماتوا فبل ما يعرفوا احفادهم بقولوا شنو.........

يا اخي الحرة تموت ولا تشرب من ثديها!!!!!!!

يا اخي كلام السيد الرئيس حفظه الله ورعاه عين العقل مادايرين اي جنوبي في السودان ولا دايرين سوداني قي الجنوب.....

والله اني مندهش مما يخطه اصحاب الاقلام الرخيصة الدنيئة واللذين يبيعون وطنهم بابخس الاثمان في سبيل لقمة العيش..............

يا وطني العزيز يا اول واخر........

وطني ولا ملي بطني.........

بلادي وان جارت علي عزيزة واهلي وان ضنوا علي كراااااااااااااااااااااااااااام


#150005 [مندى]
0.00/5 (0 صوت)

05-27-2011 11:05 PM
لهواة الاصطياد في الماء العكر ومثيري الفتن ...... مع عدم احترامنا للبشير لكن الراجل قال الجنوبي جنوبي والشمالي شمالي يعني ما قال العربي عربي والجنوبي جنوبي....والشمالي دي تعني كل قبائل السودان بي شكلو الجديد من النوبة جنوبا الي النوبة شمالا ومن البجة شرقا الي الفور غربا عشان كده مافي داعي لتحوير كلام الراجل بالطريقة الخبيثة دي
نختلف مع الشير في كل حاجة الا موضوع الجنسية المزدوجة... استمع لاي شمالي عائد من الجنوب ليحكي ليك عن عنصرية الجنوبيين والحركة الشعبية لتحرير السودان ... ديل عايزين يحرروا السودان من منو ....لا النميري نفع معاهم ولا الصادق المهدي نفع معاهم ولا البشير نفع معاهم؟
الحركة الشعبية فكرتها قامت علي العنصرية بالاساس ....والله الجنوبيين علي عينا وراسنا لكن طالما اختاروا الانفصال عن الشمال معناها هم مستغنين عن جنسية الشمال لانو الشماليين عنصريين وكعبين وبعاملوهم كمواطنين درجة تانية...طيب وقت ربنا فتحها عليك وخارجك من الشماليين العنصريين عايز بي جنسيتهم شنو تانى؟ والله الجنوبيين مارسوا اسوا انواع الابتزاز والله الجنوبي ما تقدر تهبشو والا يجيب ليك سيرة العنصرية...والله الحكومة دي دلعتهم وطلعتم فوق راسنا والحقوق الكانو لاقنها نحن ما لاقنها والتعامل الهم لقوهو في الشمال الشماليين ما لقوا ربعو في الجنوب
مرحبا بالجنوبيين في الشمال كاجانب اما غير ذلك فلا
معقولة دولة تدي جنسيتها لشعب كامل.... يعني الجنوبيين فصلوا دولتهم وعايزين يشاركو الشماليين في دولتهم؟ والله دي قوة عين عديل


#149846 [ابونون]
0.00/5 (0 صوت)

05-27-2011 03:38 PM
والله يا تاج السر حيرتنا-- عاوز اسألك سؤال& انت عايش وين- لو فى السودان ما بتقول كلامك ده- انشاء الله ربنا يوم يوديك جوبا او واو او ملكال وتلف فى الشوارع زى الساعه 6 مساء يعنى تتفسح -- عشان يتفسحوا بيك يا مندى كورى- والله كرعينك ما يمرقوك-- وزى ما قال المثل البلقا هبوبو يضرى عيشو- شكلك خارج السودان والله يجيبك بالسلامه عشان تشوف وتآمن انو كلامك وكتاباتك دى ونسه فى ضل الضحى --- الجوبيين بدلولنا بالاحباش واليوغنديين واظنك ما قاعد تشوف الاخبار وما بتسمع بيها- فى استطلاع قناة ايبونى الجنوبيين زهجانين من اليوغنديين الضايقوهم فى عيشتهم ومن الاحباش الكرهوهم بلدهم= وبالرغم من ذلك قادة الحركه ما عاوزين شمالى زيك - افهم واسأل وتحرى وبعدين اكتب الحقيقه حتى تكون موضوعى--- يا تاج الحركه اقصد تاج السر-----


#149685 [ala]
0.00/5 (0 صوت)

05-27-2011 08:35 AM
Mr. Abdulamid..Yes it used to be their country and nobody denied them to be Sudanese.But now they are no longer so .As for those who came from west africa you have to know that they have chosen to be in Sudan and get its nationality.I think we are in agreement that Sudan is a melting-pot for all races and cultures which is good in itself


#149532 [ابو السرة]
0.00/5 (0 صوت)

05-26-2011 08:37 PM
ياشيخ تاج السر دا كلو كلام فارغ وفرفرة مذبوح.أنا رايي نحضرالمقشات ليوم 9 يوليولأنوعندنا نبطشية نضافة كتيراليوم داك. كنا قايلين الجماعة حيركزوا حتى نهاية السنة لاكين واضح الناس دي الفار لعب في عبها قبل سبعة اسابيع كاملة من الموعد المحدد. وباين الدخلت فيهم ما بتمرق بي اخوي واخوك. خطتهم الحالية وإلى إشعار آخر هي افتعال فرقعات كبيرة قبل 9 يوليو يشغلوا بيها الشمال - لاحظ انهم كل ما اتزنقوا في حاجة في الخرطوم او في بورسودان يفتعلوا حاجة في الجنوب. اها بعد الانفصال في 9 يوليو(حتى ولو النشالين ديل نشلو جيب ابييي كله) حيعملوا شنو بعد داك؟ جميع المراقبين كشفوا اللعبة الساذجة ونصحوا الجنوبيين بتهدئة اللعب لحدي 9 يوليو- اها بعد داك الرجال بانت وحيعملوا شنو في تفادي الازمات؟؟ الاجابة: لا شيء. ولماذا؟ لانهم حيكونوا راحوا محل ما راح عبود ونميري - تتذكر الاتحاد الاشتراكي؟ ومايو البطل؟ أين هو مايو الباطل والاتحاد الاشتراكي الزائل منذ 1985 ولحدي الآن؟ المشكلة حتكون في الجنايز الحثالة المتابعنهم هسع زي الغنم ديل نوديهم وين؟ كاب الجداد؟ والله كاب الجداد الطيبة ما تستاهل العفن والربوب والجنايز دي.


#149440 [كلمة حق]
0.00/5 (0 صوت)

05-26-2011 05:30 PM
كلام منطقى وحجة دامغة واسلوب راقى فى الطرح ولو كان البلد فيها حق وقانون لما نطق الراقص البشير بهذه التفاهات فليذهب إلى أهله العرب فى الخليج حتى يكون عامل تربية مواشى عندهم وعبيد صغير.
مع ان كثير من طواويس الإنقاذ يحملون جنسيات غربية وعوائلهم خارج السودان لم يفتينا الراقص أو حليفه أبو العفين بمطاردة الكشة لهم ( مع إحترامنا لعرب الخليج الذين يحترمون الهوية السودانية وليست العربية المزعومة )


#149439 [جاموس الخلا]
0.00/5 (0 صوت)

05-26-2011 05:28 PM
ومنو القال ليك يا ala انو القاعدين فى الشمال صوتو للانفصال دة اولا , ثانيا ما فى ناس كتار فى الحكومة دى عندهم جنسيتين المانع شنو يعنى اخوانا الجنوبيين يكون عندهم واحدة شمالية والتانية جنوبية , تالتا الجنوبيين الفى الشمال ليهم حق اكتر من اى جنسية اجنبية زى الحبش والمصريين وغيرو من الاجانب , حسع تلقاق عندك جنسييتين يا وهم يا عنصرى . يا خى حكومة الجنوب ممثلة فى سلفاكير قالت حتحمى اى شمالى مقيم فى الجنوب واى واحد يهبش شمالى كأنو هبش سلفاكير .شفت الفرق كيف القصة ما انفصال ودة شمالى ودة جنوبى القصة تاريخ ودم وثقافة ومواضيع انت راسك الضيق دة مابقدر عليها ولا عندو افق واسع يفهم بيهو خلى دماقك واعية وعالية القصة ما هلال مريخ يا عنصرى


#149435 [مدحت عروة]
0.00/5 (0 صوت)

05-26-2011 05:23 PM
من زمان الناس قالوا ليكم اعتزوا بهويتكم السودانية باقى العالم ح يحترمكم لكن تقعدو تعملوا فى عمايلكم دى لاتلقوا احترام العرب ولا الافارقة ولا حتى احترام انفسكم!!!! و الشعب السودانى شعب حضارته جذورها عميقة ودى ما عايزه كلام!!!! بعدين القيادى الاخوانى المصرى القال الكلام ده هو حقو يتشرف بالزواج من امراة مسلمة غير اخوانية حتى يرتفع مقامه لانه من تنظيم حقير و واطى يعلم الله ده اذا هى رضيت به و حقو ما ترضى به حتى لا تنزل هى للحضيض و تتخلق باخلاق تنظيمه الواطية الحقيرة!!!!! يالا بلا قرف!!!


#149384 [Abdulhamid]
0.00/5 (0 صوت)

05-26-2011 03:36 PM
Many thanks Mr.Tagelsir you have but in a complete clear words,thank you again.;) ;) ;) ;)


#149374 [ala]
0.00/5 (0 صوت)

05-26-2011 03:26 PM
يا كاتب يا محترم , هؤلاء الناس اختاروا الانفصال والعيش في دولة تخصهم فلماذا يكون لهم حق البقاء في بلد قطعوا اي علاقة لهم به؟مالكم كيف تحكمون؟ لا تقل ان البشير اجبرهم , حتي لو اجبرهم فقد صاروا اليوم مواطني دولة اخري لا يحق لهم وضع رجل في الخرطوم ورجل في جوبا .. واحد من اتنين : يا الخرطوم يا جوبا, هذا هو العالم الذي نعرفه


ردود على ala
Sudan [Abdulhamid] 05-26-2011 04:31 PM
Mr.Ala,this is their country if you like it or not.I would like to ask you a question,what about whmo orginally from West Africa and became now citizen even ministers like Haj Maled Sowar and Ahmed Mohammed Haroun.


تاج السر حسين
تاج السر حسين

مساحة اعلانية
تقييم
1.22/10 (11 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة