حاميها حراميها



في بلد ذي بلدنا دي عندها مسئولين كتار شديد لدرجة ما معروف عددهم كم ولا معروف وظيفتهم شنو.. مش كدا وبس دا نحن عندنا مسئولين معروف وظيفتهم شنو وفي نفس الوقت ما مسئولين عن أي شيء يحصل في الحتة الهم مسئولين منها.
ما علينا.. أها مسعوليننا كل يوم تصريح للإعلام.. ماف صباح إلا ويطلع تصريح.. وتصريحاتهم زي مسئولياتهم الهلامية.. تصريحات هلامية ما بتقدر تفرز سعادة المسئول دا صرح التصريح دا عشان ليه؟.. تصريحات ساي.. مرات يطلع مسئول يشتم الشعب.. مرات يشتم دولة تانية.. مرات يشتم مسئول تاني معاو.. لكن التصريحات الما مفهوم ليه قالوها أصلاً هي تصريحاتهم عن السرقة والفساد.. لما يجيك مسعول يقول في سرقة في الحته الفلانية وبقيمة كدا وخلاص.. هل دا خبر؟!
عندك مثلاً تصريح وزير صحة الخرطوم مأمون حميدة قبل كم يوم إنو تم ضبط أدوية بقيمة تفوق مليار ونص جنيه ينطح أخوه الجنيه.. بينها أدوية منقذه للحياة كالأنسولين بتاع السكري وأدوية الضغط..
هل دا يعتبر خبراً في بلدنا؟.. طبعاً لا ...
سعادتو قال الأدوية كانت مخزنة في حتة ساكنة فيها فيران.. آي والله فيران الواااحدة دي.. مش كدا وبس دا قال فيها فضلات فيران ..
أها دا برضو ما خبر؟ ..
الدكتور الهمام دا طمنا وقال إنو في قوانين رادعة من بينها مصادرة الأدوية دي لمصلحة المواطن ..
قايل دا الخبر عزيزي المواطن؟.. نووو ابسلوتلي.. دا ما خبر ..
سعادة الوزير قال بعض الأدوية منتهية الصلاحية أو قاربت على الإنتهاء .
أها دا برررضو ما خبر ...
المهم سعادتو قال ليك الحتة الطلعت منها أدوية بالقيمة المليارية دي هي الإمدادات الطبية.. الهي الجهة المفترض هي ذاتها بتلعب دور رقابي... ومفترض تراقب النوعية دي من الأدوية بالذات وتحرص إنو ما تطلع إلا للمواطن المستهدف بالعلاج مش لأي جهة تانية ..
طبعًا عزيزي المواطن إنت إفتكرت دا الخبر... مش؟
يؤسفني أقولل يك لا دا ما خبر برضو .. عادي السرقة في بلدنا.. وعادي حاميها حراميها ....
الخبر أصلاً ما إتقال في تصريحات سعادتو زيو وزي زمايلو المسئولين ... الخبر المفترض يتقال إنو المسئولين عن سرقة دواء الأنسولين وأدوية الضغط من الإمدادات الطبية هم فلان وعلان ووقفناهم عن العمل وتم تحويلهم إلىة التحقيق.
ياخي ما تقولوا إتحولو ولا شيء.. على الأقل قول وقفناهم من العمل عشان نحن المواطنين نحس إنو خلاص المسألة دي على الأقل ما ح تحصل قريب تاني ...
يا سعادتو أقولل يك حاجة... ياخ على الأقل طمنونا إنو فتحتوا تحقيق في المسألة دي وإنو ح نعلن النتائج قريباً ولي قدام خت القضية مع أخواتها من قضايا سرقة أموالنا في الدرج المعين داك... ونوعدك سعادتك نحن كشعب متعاون مع حكومتو.. ما بنسألك عنو.
لكن بس سعادتك راعوا لمشاعرنا.. ما تجهجهونا.. قصص زي دي يا تقبضوا الحرامي وترجعوا القروش.. يا كمان أعملوا غمرانين من الأول وما تورونا .


أخبار الوطن

نادر سخانة | 03-05-2018 02:10 PM


التعليقات
#1748580 United States [Assudanalbadeel]
0.00]/5 (0 صوت)

03-05-2018 07:26 PM
يا نادر التسخين .. ليك حق النهارده تسخِّن! ليه؟ مسؤولين الانقاذ ليهم قرابة ال 30 سنه بيكلموكم جنس كلام المامون صاحب الزيتونه والناس كوووبهم عارفين وفايت اضنيهم! اظنك انت الوحيد بزات اللى النقش الخبر المهم اللى هو انُّ الوزيرين المسؤولين عن الصحه متماسكين الحزز.. واحد منهم قال حيشتكى التانى للقضاء بدون ما يقول السبب بالواضح..كل واحد منهماتفرّغ لمواجهة التانى..اها كل واحد ومعاهو المؤيدينو من الدكاتره بكل تخصصاتم ومعاهم الموالين للدكاتره من مساعدين الحكما والتمرجيه "ذكورا وذوات ثدى" ما تفتكر بقوا شايلين من بعض..وطبعن دا اثّر على اداءهم كلهم والمتاثرين بالحكايه دى هم طبعن العيانين ..وديل برضهم حيقيفو مع واحد من الوزيرين ..وما تنسى اهل المرضانين برضهم لا بُدّن حينحازو يمين او شمال!
اها الخوف دائرة الانحياز توسع والحكومه كولها بعد ما كانت حكومة وفاق تقوم
تنقسم بين الوزيرين وتصبح بتاعة شقاق! ومخرجات الحوار اللى قال عليها صاحب الشرعيه الدستوريه انها مطابقه لاحلام وامنيات الشعب وتطلعاتو ما تلقالا متابعه كويسه لآنزالا لارض الواقع! وتكون 29 سنه راحت بدون الناس ما تنّط ويستمروا فى التقبّض وما يحصل اندغام واهم اهداف الحواراللى هوّ"الاسترداف" ما يحصل.. وتضطر الحكومه الى حوار من جديد! بس الشيخ سيد الحوار انتقل ليهو سنتين.. رحمه الله!

[Assudanalbadeel]


Powered by Dimofinf cms Version 3.0.0
Copyright© Dimensions Of Information Inc.