06-04-2011 12:44 PM

حديث المدينة

ما في.. داعي..!!

عثمان ميرغني

الرئيس البشير.. في الجلسة الافتتاحية لشورى حزب المؤتمر الوطني مساء الخميس أمس الأول.. أعلن عن تكوين لجنة (عليا) يرأسها د.نافع على نافع.. مهمتها محاربة الجبايات (مصلحة مصلحة.. وزارة وزارة) ولم ترد عبارة (زنقة.. زنقة).. أي أنها ستدخل كل الوزارات مهما كبُرت.. وكل المصالح الحكومية مهما صغُرت.. يا سعادة الرئيس.. لجنتكم العليا لن تجد شيئاً.. إلا (شقي الحال.. الذي يقع في القيد..). وعليه.. لا حاجة إلى لجنة عليا ولا دُنيا.. إذا أراد السيد الرئيس محاربة الجبايات، فهناك لجنة (كبرى) مكونة من الشعب السوداني كله.. تعمل مجاناً لوجه الله.. ومستعدة أن تقبض له وفي اليوم التالي مباشرة على جميع أنواع الرسوم والجبايات التي تدفع خارج النظام المالي (أورنيك 15).. ولسبب بسيط.. لأن الشعب هو الذي يدفع هذه الجبايات.. إذا ذهب د.نافع وأعضاء لجنته إلى أي وزارة لن يجدوا جباياتٍ ولا رسوماً.. لأن (كتائب القذافي) ستخفي كل شيء قبل وصولهم.. فغالبية هذه الجبايات ليس لها من الأصل أورنيك أو إيصال استلام.. مثلاً: يذهب مواطن لاستخراج شهادة رسمية معينة.. قل شهادة ميلاد.. أو تسنين.. أو أي شهادة أخرى.. يتسلم منه الموظف (25) جنيهاً.. لكن يسلمه في المقابل أورنيك (15) ولا أروع.. ليس فيه (شق ولا طق).. سوى أن القيمة المكتوبة فيه (20) وليس (25) جنيهاً. وفي يوم الزيارة.. يوم زيارة اللجنة إلى أي مؤسسة حكومية.. لن تفعل كتائب القذافي شيئاً سوى كتابة المبلغ صحيحاً كما هو في الإيصال.. الأمر لا يحتاج من د.نافع أن يترك عمله ولا أعضاء لجنته العليا.. اتركوا الأمر للشعب.. فقط انشروا إعلانات عن رقم هاتف مجاني.. يتصل به الناس لتقديم الشكاوى.. وستجد الحكومة في اليوم الأول عشرة آلاف شكوى.. وفي اليوم الثاني (صفر) شكوى.. تختفي كل الشكاوى.. فجميع الوحدات الحكومية ستوقف الجبايات المسروقة فوراً، تماماً كما يضغط السائق على فرامل السيارة.. إلى (حين اتضاح الرؤية).. أتعلمون معنى كلمة (اتضاح الرؤية).. تعني لحين معرفة مصير الشكاوى. فإذا اتضح أن الحكومة اكتفت بالخبر في نشرة الساعة العاشرة في التلفزيون.. ولم تكسر خاطر موظف أو مدير أو وزير واحد ممن ضُبطوا يمارسون الجباية خارج عش الزوجية الشرعية.. فسيرجع الجابون إلى جبايتهم وهم يتذكرون لجاناً كثيرة سادت ثم بادت، قبل أن تبيد الجباية غير الشرعية.. تكوين لجنة (عليا) هو في حد ذاته.. عمل خارج أورنيك (15).. فالمفروض أن القانون واللوائح المالية واضحة وتسري حسب الـ(سيستم).. ومن يُضبط متلبساً بالخروج عليها.. يطاله القانون.. دون حاجة إلى لجنة عليا.. فالرسوم الحكومية عمل مستمر.. وأي لجنة تكون هي عمل مؤقت منقطع.. لكن إذا كانت كل مخالفة بحاجة إلى لجنة عليا.. فلن يكون هناك قانون أو لوائح.. فالعمل موكول إلى (اللجان العليا) منها والدُّنيا..

التيار





تعليقات 29 | إهداء 0 | زيارات 4801

خدمات المحتوى


التعليقات
#155640 [النصيحة]
0.00/5 (0 صوت)

06-06-2011 12:19 PM
على كثرة ما يكتب عثمان ميرغني ( هاوي الصحافة ) فانني رغم منطقية الكلام في الظاهر لكن أحس دائما باجندة ما تحرك قلمه وتحرض فكره , فيدس السم في الدسم ,, والشاهد ان هذا المقال الموجه للجبايات الغير قانونية , ومن المفترض ان تنصب حوله الافكار والمداخلات ,,تحول بقدرة قادر للقدح في البشير واخرين ,و ولا يهمني الدفاع عنهم لكن الموضوع ليس التستر وراء الكي بورد والردحي,, انشاء الله كدة حليتو مشكلة الجبايات وخلو المهندس يطلع بكرة بموضوع تاني وارجعوا اشتموا الرئيس وغيره ,, وتكونوا قد توصلتم للوصفة السحرية لحل مشاكل السودان والدول النايمة كلها ,, بالله شووووووف ((( هذا هو ترف الكلام ))) البتسوا فيهو دة ...


#155130 [Kalifa]
0.00/5 (0 صوت)

06-05-2011 04:37 PM
مقتبس من المقال : ( وتسري حسب الـ(سيستم).. ) يا أبوعفان هذا السيستم ومعاهو اورنيك 15 هم اول ضحايا إنقاذكم وتم احالتهم للصالح العام منذ22عاما....مال اللقف والهبر العملو بيهو ناس كرتي المصانع ده من وين ؟؟؟؟ ومن أين للبدريين الفلل الفاخرة والعمارات والفارهات من السيارات والنساء ,,,المثني...والثلاث والرباع !!!! اصحي يا بريش..... ده كلو بعد ضرب السيستم العايز تونسه بيهو اليوم !!! تاريخ عصابة الأخوان المسلمين الشخصي معروف وواضح زي شمس الضحي للشعب وعدد بيوتهم في مديرية الخرطوم تعد على الأصابع وجلهم دخل الخرطوم بشنطة صفيح من غير طبلة والمنقنق بترفلنق باق رحلة سعيدة......اين هم اليوم وماذا يملكون ؟؟؟؟؟؟ أنت أدري وسيد العارفين....... فهولاء زملاء دربك الاخونجي الضربو السيستم بأسم التمكين وما ادراك ما التمكين.....آل سيستم آل
كسرة :
ما أخبار الوالي الذي.................. والراجل بتاع الكشك حصل عليهو شنو؟؟؟؟؟؟؟


#154823 [عبدالله محمد الامام.ودالشقل]
0.00/5 (0 صوت)

06-05-2011 08:21 AM
ياأخوانا عثمان ميرغنى ده زول لعاب كتب ليكم موضوع الجبايات عشان تنسوا

موضوع صاحبه الوالى الذى لايظلم عنده احد الصادر الكشك من الراجل العاوز

انتحر ولسع ماانتحر واولادو الطشوا ولسع مارجعوا


#154784 [ابو صالح]
0.00/5 (0 صوت)

06-05-2011 07:21 AM


مقالك جيد ولكن قل ما هي القرارات التي اتخذها البشير لمحاربة الفساد و تم تطبيقها؟

ثم يا اخي ماذا تم بموضوع صاحب الكشك الذي صادره المسئول الكبير الذي تتحدث دائما ان احدا لا يظلم عنده؟

ابو صالح
مؤسس رابطة مناصري صاحب الكشك


#154754 [عبد اللة]
0.00/5 (0 صوت)

06-05-2011 06:26 AM
عليك اللة يا عثمان اكتب ولو مقالة واحدة عن الراجل وصاحبك ود الخضر وريح الناس عن السؤال اليومى


#154740 [somer]
0.00/5 (0 صوت)

06-05-2011 05:51 AM
شوف يا عثمان لو مشى البشير بنفسه سوف لن يتوقف هؤلاء عما تعودوا عليه الرئيس اطلق العديد من القرارات والقوانين في هذا الموضوع ولم ينفذ منها أي شيء أصلا العرف السائد في البلد الآن هو آخر قرار يمكن أن يحترم هو القرارات التي يطلقها رئيس الجمهورية. أنا صراحة لم أرى رئيس غير محترم مثلر البشير هذا الرجل يصيح وينادي ويهدر ويتوعد ولكن ما فيش حد شغال بي كلامه. قبل شهرين بكى في المسجد مدعيا أنه لم يعلم أن هناك فساد - طيب الآن علمت - كون لجنة لمحاربة الفساد والآن لم نسمع عنها شيء. السودان كله كان يتكلم عن عقد تزظيف مدير سوق الخرطوم للأوراق المالية والبشير برضو عامل ما سامع حاجة - أجريت اللقاءات الصحفية مع شقيقه وكانت أجوبته شيء مخجل جدا لا تنم عن شيء غير أن هذا الرجل غارق في الفساد حتى أذنيه وبرضو أنت يا البشير مع سامع حاجة وبرضو يا أوسمان عايز تقول لي الرئيس قال-من خلال التجربة فإن أي كلام يقوله الرئيس فهو يدعو لعكسه تماما ما في جبايات يالله أسرحوا وأمرحوا في الجبايات. وبالمناسبة وين أعلي أوسمان


#154737 [jamal]
0.00/5 (0 صوت)

06-05-2011 05:28 AM
ابو صالح
بما انك رئيس منظمة الكشك فانا اتقدم لاحتلال منصب مالية منظمة الكشك فانا كووووز لا يشق لي غبار ولسه داخل الكوزنة وعندي عدة اقتراحات


#154697 [مدحت عروة]
0.00/5 (0 صوت)

06-04-2011 11:53 PM
لجان و اورنيك 15 و زيارة الوزارات و الجبايات ده شنو الكلام الفارغ ده عيزين توقفوا الفساد و الجبايات الغير قانونية و اصلاح حال البلاد و العباد الحل واحد مافى غيره اقامة دولة المؤسسات و سيادة القانون و فصل السلطات و حرية الصحافة و حقها فى تملك المعلومات من اى جهة الا التى تتعلق او تؤثر على حياة الجنود و الامن القومى للبلاد و غير كده مافى اى ز ول فوق القانون رئيس او وزير او والى او موظف او غفير و لا اى زول مهما كان!!!! ولا ما عايزين تتشبهوا بالكفار و الغرب الصليبى و الصهاينة!!!!!! الكلام ده عايز ليه درس عصر ما راعى الضان فى الخلاء عارفه؟؟؟؟ الا يكون فى اجندة تانية انحنا ما عارفنها!!!!


#154696 [مندى]
0.00/5 (0 صوت)

06-04-2011 11:48 PM
يا بامشمهندس اذا كان ( اللجنة العليا لمحاربة الجبايات) رئيسها نافع علي نافع فهي لجنة مي نافعة لانو نافع ده ما في فرق بينو وبين صاحبك الوالي الذي لا يظلم عنده احد الما رجع الكشك للزول الكان داير ينتحر ولسة ما انتحر والاولادو طشو ولسة مارجعوا
ياخي انتو ما قدرتو ترجعوا للراجل كشكو حتحارب الجبايات كيف؟


#154688 [ود البلد]
0.00/5 (0 صوت)

06-04-2011 11:18 PM
والله عشنا وشوفنا .يعني النظام في ذات نفسه يلف ويدور على بعض .اها بعد كدي في رجا يا اخوانا حتى رئاسة الجمهورية فقدت هيبتها وبقت تفتش يعني ما عندها كلمة . ياناس الحكاية بايظة ما ينفع الا قلع من العروق


#154668 [مرتضي]
0.00/5 (0 صوت)

06-04-2011 10:20 PM
لك التحيه الاستاذ عثمان هذا هو الكلا م الصاح واذكرك بحادثه حصلت لي انا شخصيا في وكاله نيابه الخرطوم شمال ذهبت لاستخراج شهاده فقدان فقال لي العسكري الذي يوجد في البةابه اذا عاوز شهادت الفقدان سريعه قبل ان ياتي وكيل النيابه او القاضي عليك ان تدفع خمسه عشر جنيه واذا اردت ان تنتطر القاضي تدفع سته جنيه وهذا الكلام انا مسول منه


#154650 [الساير]
0.00/5 (0 صوت)

06-04-2011 09:19 PM

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ظ؟؟؟؟

لأول مرة تكتب صاح
المهم التنفيذ
لنا قناعة تامة بأن هذا لعب منافقين وبس
لا لجنة ولا يحزنون
ولا حيعملو حاجة
انتهي الموضوع بتكوين اللجنة
واتحداك يا عصمان ان تكتب لنا ولو بعد سنة نتيجة ايجابية لهذه اللجنة

اها الكشك اخباره شنو ؟؟؟؟؟


؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


#154601 [ابو عماد]
0.00/5 (0 صوت)

06-04-2011 07:33 PM
لا ادري ان كنت تصدق ما يقوله رئيسكم ........ ام انك تريدنا نحن ان نصدق بان قرارات رئيسكم تجد التنفيذ ..... بالله عليك كم مرة صدرت قرارات من رئيسكم هذا بمنع هذه الجبايات ...فهل اوقفت هل سمعت بان احدا حوكم او فصل لمخالفة قرارات الرئيس ...... هل تقتنع بان ما يقوله الرجل فعلا قرارات .... هل يصدق الرجل فيما يقول .... سمعنا رئيسكم يقسم مرة بانه سيترك الرئاسة وسيذهب ليقاتل اي قوات اممية اذا ما دخلت السودان ...... دخلت القوات الاممية وجابت السودان شرقا وغربا ورئيسك (محلك سر ) لم يترك الرئاسة ومتاعها وربما يكون قد فكر في( الثالثة ) فالمثل المصري يقول ( التالتة تابتة )
ربما اعتقد الرجل ( بسبب سطوة نافع عليه وعلى قراراته ) ان بامكان عين نافع الحمراء (عليه طبعا) ان تخيف الاخرين


#154587 [وحدوي ]
0.00/5 (0 صوت)

06-04-2011 07:16 PM
والله وبقيت تكتب ياعثمان !!!!! النشوف !!!! ياريت تنحاز للشعب حتي استطيع ان اكنيك بكلمة : الاستاذ : عثمان ميرغني ......... خبر الكشك شنو


#154577 [الزول الكان سمح]
0.00/5 (0 صوت)

06-04-2011 06:56 PM


يا عثمان ميرغنى

أحلى ما فى المقال قصة كتايب القذافى ( للتورية)

كلامك منطقى لحد ما..وهذه وجهة نظرى..متين يتم المنطق؟؟؟

لما يبدأ العمل فى محليات ولاية صاحبك الما رجع للراجل الما إنتحر كشكو ..وأولادو الطشو...ويمسكوا الحرامية الطابعين الدفاتر البرانية عشان ( يملصو ) بيها المعلوم من ستات الشاى...وكارو حمار..والمدردقين الصغار فى السوق المحلى..وبياعين الموية
وبتاعين الركشات إلخ...

خلى البشير يطبق الموضوع ده فى ولاية الخرطوم وسوف لن تسمع به فى باقى الوطن الفضل..
ونحنا مستنيين عنوان الزول الما إنتحر


#154551 [د.بشير]
0.00/5 (0 صوت)

06-04-2011 05:43 PM
اول مرة اقرا ليك مقال فيهو فايدة...


#154548 [اقتربت قيامة الكيزان]
0.00/5 (0 صوت)

06-04-2011 05:36 PM
بصراحة استاذ عثمان لقد فقدنا الثقة في هذا البشير تماما نرجوا منك في المرات القادمة ان تنصحه بالرحيل الفوري حفظا للدماء التي امرت بان تسيل من اجل ان يرحل عن رئاسة السودان قبل الترحيل القاسي الذي قد كتب في رحم الغيب وفي تلك الحالة سيخسر الكل.
البشير بعد 22 سنة من السير في استقامة ملتوية يطلب منا نحن ان نعدل له الطريق لانه اصبح لا يري بعد ان فقد الرؤية ,,,,,,
الثورة الدموية قادمة يا استاذ وكلمة دموية هذه ليست من عندنا ولكن من عند الصقور امثال نافع ومندور ...لاننا لن نبدأ اراقة الدماء السودانية الطاهرة الا اللهم في حالة الدفاع عن النفس كما يدافع ثوار ليبيا عن نفسهم .....


#154547 [أبو محمد]
0.00/5 (0 صوت)

06-04-2011 05:34 PM
فعلاً إذا كان طريق التواصل بين الشعب والقيادة سالكاً فلن تنعدم سبل الإصلاح، وما أضر بنا غير هذه اللجان التى ينتظرها هؤلاء بفارغ الصبر لتعلن تقريرها بأن كل شيئ تمام، وإنما الأمر أن بعض المعارضين يريدون الإصطياد فى الماء العكر بتلفيق أكاذيب عن رسوم وجبايات، فها هي اللجنة لم تجد شيئاً.
أجعلوا فى رئاسة الجمهورية جهازاً نافذاً بسلطات كبيرة يتلقى مجاناً كل شكوى فى هذا الشأن ويقوم بتصحيحها فوراً ومعاقبة المخالفين إدارياً أو قضائياً.


#154531 [عمر]
0.00/5 (0 صوت)

06-04-2011 05:03 PM
يا عالم نفذوا هذا الكلام لنشوف اخرته والارضه جربت الحجر


#154527 [اقتربت قيامة الكيزان]
0.00/5 (0 صوت)

06-04-2011 05:00 PM
بصراحة استاذ عثمان لقد فقدنا الثقة في هذا البشير تماما نرجوا منك في المرات القادمة ان تنصحه بالرحيل الفوري حفظا للدماء التي امرت بان تسيل من اجل ان يرحل عن رئاسة السودان قبل الترحيل القاسي الذي قد كتب في رحم الغيب وفي تلك الحالة سيخسر الكل.
البشير بعد 22 سنة من السير في استقامة ملتوية يطلب منا نحن ان نعدل له الطريق لانه اصبح لا يري بعد ان فقد الرؤية ,,,,,,
الثورة الدموية قادمة يا استاذ وكلمة دموية هذه ليست من عندنا ولكن من عند الصقور امثال نافع ومندور ...لاننا لن نبدأ اراقة الدماء السودانية الطاهرة الا اللهم في حالة الدفاع عن النفس كما يدافع ثوار ليبيا عن نفسهم .....


#154503 [A.nasir]
0.00/5 (0 صوت)

06-04-2011 04:14 PM
سجل عندك اول بلاغ ياريس قبل خمسة يوم في الميناء دفعت 11 جنيه 11تاني والايصال غير انو ما ارنيك 15 مكتوب فيهو 10جنيه لاغير 1 1 1

الغريبة في جدة تمر مرور الكرام لا قرش ولا تعريفة


#154501 [احمد القهران]
0.00/5 (0 صوت)

06-04-2011 04:11 PM
اشكرك يا أستاذ على هذا المقال اتمنى ان تصل الرساله الى المسؤلين نحن تعبنا من اللجان ده كل مره لجنه مرة محاسبة المسولين ومره ...........الخ


#154496 [العجب]
0.00/5 (0 صوت)

06-04-2011 04:03 PM
الأخ الاستاذ / عثمان ميرغني - لك التحية
قد لا اجيد التعليق لمقالك ( ما في داعي )
اقول لك
مافي داعي لكترة الشكاوي *** لا حكيم بكشف لا دكتور بداوي
واهديك هذه الخاطرة
شقي الحال يقع في القيد !!!
________________________________________
داخل تلك الشاحنة ( الأوسن ) القادم من ( الصعيد ) ديار أهلنا الغبش في جنوب ولاية النيل الأبيض - وفي الساعات الأولي من الفجر - ونسيم الشتاء القارص يلفح الوجوه – وعلى ( جنبات )اللوري يتعلق المسافرون وكأنهم مشابك على حبل ( المشر ) - في مؤخرة اللوري مع الزاوية جلس - (عوض الله ) - كبير مساعدي سائق اللوري ) - يتباها بمهارته وقدرته على التعشلق وفن العنكشة - في مقابلته تماما وعلى الزاوية الأمامية كانت تجلس ( نفيسة ) - دافنة وجهها الشاحب بين ركبتيها - اتقاء للفحات البرد - بدأت تنظر تجاه عوض الله وبادلها هو الآخر النظرات تغزلا - وشد ما لفت نظره تجاهها عيناها الكبيرتين ووجهها الأبيض الناصع وخصلتاها المسدولة على كتفيها - وبدأ يغمز لها بعينيه تارة وبيده أخري غير عابه بالقوم الذين حوله - وكانت هي تبتسم في وجهه دون أن تعرف ما يصبو إليه - وفجأة تنتابها النوبات التي بسببها هي ترزح في القيد الذي كبل يداها مع قدميها فيهدئها ( مسعود ) أخاها الذي كان يقف على رأسها - ما كان من شحوب وجهها وشعرها المنكوش إلا لأنها مصابة ( مجنونة )فرجعت إلى هدوئها المعهود بعد تلك النوبة ومدت لسانها تجاه عوض الله وقالت ( المجانين كتااااار بس شقي الحال واقع في القيد ) ومن هنا أقول لأخوتنا في عالم الصحافة ( المجرمين كتاااااار وشقي الحال واقع في الصحافة ) فليطمئن مدير سوق الأوراق المالية وكل من كان في شاكلته !!!!



#154483 [سلايمان قش]
0.00/5 (0 صوت)

06-04-2011 03:25 PM
ممتاز ياعثمان مرغني .... نعم مافي لزوم لتشكيل لجان الامر واضح لمن اراد!!!!!واجمل مافي المقال يا سيد عثمان بقيت تعاين للموضوع من واقع الشعب !!!!!عشان كده بنناشدك ان تمدنا بعنوان الزول صاحب الكشك بعد ما قنعنا من ود الخضر ولك الشكر


#154473 [عيد الواحد المستغرب جدا!!]
0.00/5 (0 صوت)

06-04-2011 03:11 PM
أرجو من القراء الاعزاء أن يقرأوا تعليقى على شكل هتاف !! (عداك العيب يا عثمان**قلت الحق ياأبوعفان ) لاول مره الراجل بيتكلم صح - اها يالزول الكان سمح ويا ابو امين ويا سليمان قش الراجل طلع بيتكلم صح وإنتوا شابكنوا ود الخدر الما بيظلم عندوا احد !!والكشكو المارجع والاولادو طشو وهو انتحر وخجيتوا ليهو مخوا لغاية ما أثمر !! والى الامام يا ابوعفان وهندس ياهندسة الكفاح مستمر ضد الخونه والعملاء ولا نامت اعين الجبناء !!-


#154468 [abuamin]
0.00/5 (0 صوت)

06-04-2011 03:01 PM


با عثمان دى نعترف ليك بيها فقد قلت كلاما مقبولا لحد ما!!!!!!! لكن انت عارف و انا عارف انو لا اللجنة العليا و لا اى قوة حتقدر على البلاوى المتلتلة على الخلق طالما هناك لجان جوة المؤتمر الوطنى بتحاسب المسئولين ( حسب زعمهم ) سكيتى و بشنو !!!! قالوا بفقه السترة !!!!! واخد بالك معاى؟؟؟

صحيح نافع دا رجل الانقاذ القوى لكن براهو ما حيلف على حاره حاره و زنقه زنقه!!!!! حيبعت العفاريت من البطانه بتاعتو الحيعملو زى ما دايرين ........... و الجبايات يا حدق لو ما زادت ابقى قابلنى!!!!!!!!

و بعدين يا عثمان بقولك ..((إلى (حين اتضاح الرؤية).. أتعلمون معنى كلمة (اتضاح الرؤية)..))
من المخاطب؟؟ نحن الغلابه ديل واللا سيد الكلام؟؟؟؟ خليك واضح وقول اتعلم سيدى الرئيس معنى كلمة اتضاح الرؤية ؟؟؟؟ ما كنت ماشى معانا كويس واللا تذكرت صاحبك الوالى........ ود الخدر....... الما بنظلم عندو احد .....لو رجع للزول الما انتحر ....كشكو.... و.... اولادو...... الطشو




#154438 [emad]
0.00/5 (0 صوت)

06-04-2011 01:55 PM
oh alas!!!!!!!!!!!!!!!!!!!


#154401 [واحد ]
0.00/5 (0 صوت)

06-04-2011 01:10 PM
أتمنى أن يقرأ البشير ونافع والبقية الباقية هذا المقال فهو لسان حالنا _ يعنى لسان حال الشعب

السودانى المغلوب على أمره __

برافو أستاذ عثمان فقد أصبت فى مقتل ____


عثمان ميرغني
 عثمان ميرغني

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة