كاتبنى وين؟ ا
06-08-2011 01:11 PM

ساخر سبيل

كاتبنى وين؟

الفاتح جبرا

البقاء متّصلاً هل نسيت كلمة السر؟
التسجيليساعدك فيس بوك على التواصل والتشارك مع كل الأشخاص في حياتك.
الفاتح جبرا - ساخر سبيل

ملاحظات الفاتح جبرا - ساخر سبيل‏
ملاحظات حول الفاتح جبرا - ساخر سبيل‏

الاشتراك

ملاحظات الفاتح جبرا - ساخر سبيل‏

.
من الفاتح جبرا - ساخر سبيل في 07 يونيو، 2011‏، الساعة 11:35 مساءً‏‏



بالله ده إسمو كلام؟ أيه (الرزالة دى) قلتها فى نفسى بعد أن حركت مؤشر راديو العربة لأستمع إلى أحد المطربين الجدد وهو يغنى مخاطباً حبيبه قائلاً :

عشان تآمن وتقتنع أنا عمري ما نزلتا فيك نقطة دمع .. !! بداية الأمر توقعت أن تكون الأغنية (مصرية) يخاطب فيها الشاعر رئيسه المخلوع (مبارك) موضحاً عدم أسفه لذهابه وأعوانه من (أعوان النظام) ولكن بعد أن إستمر المطرب فى إكمال الأغنية تأكد لي أن الشاعر يخاطب محبوبه مؤكداً له بأن غدده الدمعية لم تفرز طيلة علاقته معه ولا (سى سى) دمع واحد !

هل إنتهى عهد العاشق الولهان؟ (البكاى) وإنتقلنا إلى عصر العاشق أبو (من غير دموع) ؟ لابد للإجابة أن تكون بنعم فى ظل التغيرات الدراماتيكية التى شهدها مجتمعنا مؤخراً فى كافة سلوكياته ألا يكفى بأن (الحرامى) فى الزمن الماضى (كان بيعاين في الواطة) وهسه بيعاين ليك جوة عينيك عدييييل !

أنظر عزيزى القارئ هذه التشوهات التى أصابت حتى أسمى العلاقات الإنسانية وهى (الحب) فبينما كان شعراؤنا فى وقت مضى تمتلئ أغانيهم بالدموع والآهات والأشواق باتت أغاني اليوم تمتلئ بالمسدسات والطبنجات والرشاشات والكلاشنكوفات حتى يظن المستمع أنه فى (مصراته) أو تعز أو الجبل الأخضر !

ماذا حدث لأولادنا ولماذا باتت مشاعرهم قاسية ومعدومة (الحنية)؟ ولماذا يلجأون لإستخدام القوة المفرطة فى تعاملهم مع المحبوب؟ أنظر عزيزى القارئ لأخدهم يخاطب محبويته مشككاً فى قواها الغقلية طالباً منها التوجه فوراُ لمستشفى (الأمراض العقلية والنفسية) لعمل الفحوصات اللازمة :

لو قايلة ريدتنا زي مهند ونور

تبقي عيانة وشوفي ليك دكتور ؟

ولم يكتف بذلك بل (الشغلانه جابت ليها حقارة) إذ خاطبها مجرداً أياها من أى مزايا جمالية قائلاً :

رغم انو هواك ليا فيهو دهور

انتي عادية لا ملاك لا حور

لا ومش كده بس ده حالف يمسح بيها الواطة إذ قال مواصلاً تشنيعه لها مصراً على هدم معنوياتها ووضعها في أعلي درجات الإحباط :

يعني هسه انتي عايشه الدور؟

هسة في الذمة انتي تشبهي نور ؟

ولن نفاجأ عزيزى القارئ إذا ما قامت المحبوبة (بعد ذهابها للتجاني الماخى وعمل الفحوصات اللازمة) أن ترد الصاع صاعين لحبيبها قائلة :

رغم إنو هواك تميت فيهو الحول

عاوزة أقول ليك إنتا زول دلدول

كل يوم بتورى إنك أكبر تور

يلا من وشى .. يلا أمشى الخور !

قلت في نفسى وأنا أحرك مؤشر الراديو لمحطة ثانية .. (خلاص مفيش حب وهيام وإخلاص وإحترام وللا ايه) ؟ حتى جأءنى صوت أحد المغنين يؤكد لي بأن (الدنيا لسه بخيرها) وإنو الحب الطاهر الجميل موجود لكن عاوز ليهو (سفلي) إذ يقول المغنى :

كاتبني وين وعند ياتو شيخ

خلاني اجري وراك كدا

انا ضقت طعم الريد كتير

مالقيت غرام بالشكل دا

وبعد أن يؤكد الحبيب بأن القصة تمت بدون خاطرو ا وإنو الجري و(التكسر) ده ما منو لكن من كتابة (الفكى) الشديدة يضيف بان المسالة فيها (محايات) وكمان (كشحات) مما يدل على أن المحبوب (نجض الشغلانية) تماماً مستخدماً جميع الاسلحة (السفلية) :

سقيتني موية الريد وين

وكشحتا لي كشح الهوا

مرضتا بيك وانت الدواء

بتعب كتير لمن تغيب

برتاح لمن نكون سوا

ويمضى المغنى مؤكداً خطورة (الشيخ) الخلاهو يباري فى محبوبه من مكان إلى آخر قائلاً :

شيخك خطير السوا ليك

عرق المحبة واكدا

لي مدة انا ماشديد

يامعاك يا عايز اجيك

من اي زول انا مصطفيك

ونأتى للحظة الحاسمة حينما يقوم (صاحبنا) بفك العمل ليكتشف (شناة محبوبه) وإنو (زول عااادى) وما بحتاج الجرى والتكسر ده كلو فبستطرد قائلاً :

مافيك شئ يخليك هواي

وريني ايه عاجبني فيك

شيخك صعب بالجد صعب

خلاني امشي وليك اسيل

واشوفك انت براك جميل

كاتبني وين وعند ياتو شيخ

عزيزى القارئ .. بعد إستعراضنا لهذه النماذج من الأغنيات يبدو لي أننا فى حوجة لإنشاء (مفوضية) لإعادة (الحب) إلى سيرته الأولى بكل (مخصصاته) من وجد وشوق وهيام وغرام

وقبل ذلك أن نقوم بعقد (مفاوضات) بين محبي (الزمن ده) والوصول إلى إتفاق بوقف أى أعمال عدائية والأهم من ده كلو ... وقف إطلاق النار !



كسرة :

هو يعنى الما (باظ) شنو؟ هى فضلت على (الحب) ؟

تعليقات 22 | إهداء 8 | زيارات 8285

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#157344 [قور]
0.00/5 (0 صوت)

06-09-2011 02:44 PM
انت لو سمعت اغنية حسنس ساتى تقول شنو ياجببببببرااااااااااا


#157223 [سمارة]
0.00/5 (0 صوت)

06-09-2011 12:11 PM
قالو صلاح الرعية باستقامة الراعي و العكس !!!


#157088 [طارق الكسلاوي]
0.00/5 (0 صوت)

06-09-2011 08:29 AM
بس ، الكسرة بتاعتك دي يا أستاذ لخصت الموضوع
الما باظ شنو يعني فعلا


#157056 [زول]
0.00/5 (0 صوت)

06-09-2011 02:46 AM
استاذنا جبرة في ندوة في جامعة امدرمان الاهليه منتصف التسعينات قال الاستاذ الكابلي ان الغناء ماهو الا انعكاس للوضع الاقتصادي والسياسي للبلاد ولذا فنحن في زمن مهند ونور وكتابة الشيوخ ولك الله ياوطن الجدود نعم الوظن خيراتو كم يتدفقن وجدودونا زمان وصونا علي الوطنعلما بان شعراء الحقيبه كانو يحفظون القران


#156913 [تاج السر]
0.00/5 (0 صوت)

06-08-2011 07:15 PM
يا الهى هل طال الفساد المشاعر والاحاسيس النبيلة


#156907 [علي]
0.00/5 (0 صوت)

06-08-2011 07:07 PM
لغيت كده كويس!! بكره بتسمع !!
جهزي الكوندم قالو المايقوما ملانه!!
وانا لي اسه مالاقي شغلانه!!
اسكن وين وابني ليك من وين وانتي زعلانه!!
ونحنه منصرخ وحكومتنا سجمانه!!
احزابنا بتفاوض والشغلانه خربانه!!
مابتلقي غيري وخريجنه عطلانه!!
المهندس عاطل ودكتورنا جيوبو فضيانه!!

;( ;( ;( ;( ;( ;( ;( ;(


#156886 [ابو امين]
0.00/5 (0 صوت)

06-08-2011 06:07 PM
انتا يا جبرا ماشى بعيد لحدى مصراتة وتعز مالك جنبك مافى كلاشات فى ابييى القريبة دى ولا بقيت تخاف ياحليل زمن الصحفين العينهم قوية وبقولوا الدايرنوا عدييييييييييييل


#156872 [مدادي]
0.00/5 (0 صوت)

06-08-2011 05:31 PM
أولاً من التجني على شباب اليوم أن نقيسهم بمقاييس الزمن الماضي ..أقصد زمنكم .. صحيح أنتو ترونه جميل وما في أحسن من كده ...هذه هي نظرتكم لزمنكم ...وعلى العين والرأس .. ولكن أن تسحبوا من الجيل الحالي تفكيره وطريقته في الحب وتناول أشياؤهه أكيد بتكونوا جانبتو الصواب ... هذا الجيل له مفرداته وله لغته الخاصة .. ليس جيل الأمس .. وليس جيل الغد .. هو جيل اليوم وسوف يأتي بعده جيل بحاجاته أيضا .. من عاش هذه الفترة وفكر في طريقتهم هذه يجد أنها وليدة تراكمات سنين ظهرت الآن وسوف تظهر غداً أكثر وضوحاً ... ماذا تريدون من هذا الجيل وأنتم لم تتركوا له وطن ينعم فيه بالاستقرار والحب النظيف ..أكثر من عقد وهم في حروب مرات وهمية ومرات غزو فكري .. ناسيين أنو العالم اليوم غير العالم غداً ..
أتركوا هذا الجيل يعبر عن ما يراه هو لا بما تروه أنتم ...


#156846 [بت ام الحسن]
0.00/5 (0 صوت)

06-08-2011 04:36 PM
هو يالسودانية انتو لاقين تاكلو عشان تحبو....عجايب....فكيتو الافلام الهندية وشبكتو فى المسلسلات التركية


#156844 [ام الحسن]
0.00/5 (0 صوت)

06-08-2011 04:32 PM
حمدى قنديل ما كضب فى قلم رصاص لما قال كنا امة محمد ....واصبحنا امة مهند


#156832 [أبورماز]
0.00/5 (0 صوت)

06-08-2011 04:11 PM
أبقى ليك صقر أختف لك السوسيوه ديك واللا أبقى ليك غراب يغنى ليك
إنت يا اللابسانى شيك .. ويا حلاوة البودره فيك

مطلع أغنيه يريد شاعرها ملحن وموزع ومؤدى .. العنوان .. جبرا ..


#156815 [الزول الكان سمح]
0.00/5 (0 صوت)

06-08-2011 03:41 PM

يا أستاذ جبرا

المصيبة مافى الأغانى ...المصيبة فى الإذاعات والفضائيات البتبث كل هذا اللإنحطاط والهبوط فى الكلمة الجميلة ..كل واحد مشى إشترى ليهو بدلة وعمليهو جل فى شعره وجاب ليهو بتاع أورغن وكامرة فيديو سجلليهو شريط ومشى دفع ليهو كم ألف جنيه لتلك الإذاعة أو القناة وعمل فيها فنان ...ياحليل وزارة الثقافة والإعلام وياحليل هيئة الإذاعة والتلفزيون ولجنة النصوص وإجازة الأصوات والأغانى..وين السموءل وكمال عبيد وسناء حمد...آآآآآه يابلد

بالله تخيل وقارن بين هذه وتلك:

جرحى الأليم الشايلو تذكــــــــــار.........طول حياتى أسى وهموم

جرحى الفين العذبـــــــــــــــــــك.........ياقلبى طول عـمرك أنيـن

ثقافة ناس مندور وحاج ماجد وربيع عبد العاطى.وإسحق فضل الله


#156810 [زهجان ]
0.00/5 (0 صوت)

06-08-2011 03:33 PM
لازم دا يحصل..... طالما كل سجمانة رمدانة قايلة نفسها ملكة غناء الجيل وهى سجم خشمها ماعندها مطلعها ليها ستين الف البوم لارقابة ولايحزنون قال مونيكا قال والله صحى الاختشوا ماتوا الله يرحم الفن السودانى الاصيل


#156792 [ابوبكر]
0.00/5 (0 صوت)

06-08-2011 03:06 PM
انتا البوديك تفتح الراديو شنو ...


#156763 [Ibrahim Khidir]
0.00/5 (0 صوت)

06-08-2011 02:24 PM
قبل اسبوعين فقط كنت مع اصدقاء نستمع لاغنية عشان خاطرنا...خلي عيونك الحلوات تخاطرنا واتونسنا وقلنا انو غنانا من ناحية الكلمة مافي اي غناء باللغة العربية بلحقنا وقبل تلات ايام سمعت اغاني من نوعية الاغني الانت ذكرتها دي وامبارح سمعت غنية بتقول انا اسي ضربت ليك تلفون ومابتردي ما تضمني الايام وانا زاتي ما مضمون...بطني طمت وماعرفت اقول شنو لنفسي ولا لاصدقاءي لكن من ما سمعت الاغاني دي وطفت بذاكرتي في قصص الحب عند الجيل الحالي الناس البقروا في الجامعات والثانويات والاتخرجوا حديثا بحبوا بطريقة انا ما بعرفها خالص ممكن تلقي اتنين بحبو الليلة بعد بكرة تلقي اي واحد \\ه بحب واحد\\ه تاني\\ه خالص الجماعة ديل ابتزلوا انبل عاطفة انسانية وشوهوا صورة اعظم علاقة انسانية ودمرو افضل ما يمكن ان يصل اليه الانسان الا وهو الحب...شعب ابتزل او يبتزل او فيهو الحب مبتزل ده شعب في ورطة كبيرة.
استاذ جبرا دي قصة المفاوضات ما بتنفع فيها دي دايرة تغير شامل كامل


#156760 [اسماعيل الجزولى]
0.00/5 (0 صوت)

06-08-2011 02:19 PM
الوصول لاتفاق ووقف ( رش موية النار )


#156756 [بنانكو]
0.00/5 (0 صوت)

06-08-2011 02:17 PM
اجمل حاجةالاعلان نهاية الكسرة : مسيار اون لاين .


#156753 [زوول]
0.00/5 (0 صوت)

06-08-2011 02:07 PM
يا استاذ انت سالت وجاوبت يعنى هو الماباظ شنو يعنى الا الحب عندما تبوظ كل الاشياء فاكيد الحب هو من هذه الاشياء لذلك فى عهد العصابة الجهنمية الاستغراب مرفوض مرفوض............ الى الامام استاذنا الكبير جبره


#156750 [أبو كلوة]
0.00/5 (0 صوت)

06-08-2011 02:05 PM
يا جبرا ياخوي انت اظنك ما متابع كويس...هناك أغنية أعجب بتقول :

معاي تضحك وبي وراي تقطع إنت ما زولي إنت مابتنفع
حلفت بالله ليكا ما أرجــــــــــع لو بالشوق قلبك اتقطــــع

فما قولك دام فضلك،،،659


#156733 [jalal elduma]
0.00/5 (0 صوت)

06-08-2011 01:45 PM
و الله ياستاذ بقينا ما عارفين نسمع كيف من التدهور الحاصل للاغنية السودانية ربنا يلزمنا الصبر بس شكلوا الشغلانا ماشه للاسؤا ;) ;) ;) ;) ;)


ردود على jalal elduma
Sudan [بيرو] 06-09-2011 08:56 AM
يا ناس البلد دى ماشة لى وين عشان نمشى بى وراها


الفاتح جبرا
الفاتح جبرا

مساحة اعلانية
تقييم
8.70/10 (24 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة