06-09-2011 12:31 PM

هموم مهاجر

أسماء الجنيد
[email protected]

سلام يا اهلنا الطيبين ..

الشوق محنه ..

والريد قطوف..

والود خدار...

مهما غلبتنا الظروف ..وبعدتنا المسافات..

وجودكم فى البال والخاطر بتحدى كل الظروف

وبقرب كل المسافات..

التحيه ضفاف رويانه متلكم بالمحبه ..

واليكم هموم مهاجر ..

ربنا يخفف الهموم ..ويرد المظلوم

ويرجعنا للوطن الحنون..

***هموم مهاجر***

قدر الهم الطولو صفوف

وقدر الجوع الضرب الجوف

وقدر الخوف الطالنا سقوف

وقدر الكي البى المخلوف

وفيك يا الضلمه المابنشوف

شحدت المولى الفوقنا بشوف

يزيل الغمه تلالي حروف

تضوي قميره وتجلى سيوف

تشيل الرقبة الطايله كفوف

سندت حيلها على المضيوف

و قلبت آية المعروف

بدل الكرم الفوقنا بطوف

بدل اللبن الزبدو ولوف..

وبدل العيش الطعموشغوف

وبدل الخَدر ضهرو قيوف

وبدل الشتل النخله جروف

جاب الطعمو مرارة..

وما موصوف..

وجاب الربحو خسارة..

وكيف معيو ف

وجاب الشين العندو بشارة..

وكيف مخيوف

وولع منو شراره

تحرق الجوف..

حتى حريرنا الناعم..

بدلوا صوف

وشمس صباحنا..

صبحت عميا ء وما بتشوف

وبدل القمر العاشقو لهوف

طل سمانا كلو خسوف

كلو خسوف ....
اسماء الجنيد





تعليقات 5 | إهداء 0 | زيارات 3472

خدمات المحتوى


التعليقات
#157822 [osman]
0.00/5 (0 صوت)

06-10-2011 05:14 PM
سلام ومليون تحية أكويتى بنار القربه زينا عشر سنين والجرح بينزف ومالاقي طبيب والحال ياهو الحال والامل عند رب الكون والله كلامك بسد الجوف بس النار فوقها الرماد وقولت اوف بتولع وتحرق


#157483 [ود العبيد]
0.00/5 (0 صوت)

06-09-2011 07:09 PM
القصيدة متكأة على خيال الشاعر اللما واقعي وشايفو براهو النظم فيه نوع من الركاكة يعنى ما مشاترة شديد فهى على ما يبدو تجرى على نسق غنا الحبوبات ودعاهم لاحفادم او بمعنى اقرب تشبه لولاي النوم للاطفال فهي خالية من الاخيلة الجميلة وبعض المفردات لاوية رقبته مما اخل بموسيقى القصيدة عليه انت ممكن تجتهدي واحتمال في مرات قادمات تقدري تكتبي قصيدة تصعد بيك اذا عملت بالملاحظات القلناها ليك دي اما هذه القصيدة سوف تقف بك عند هذه المنصة فقط لا تعدو بك للمنصة القادمة وشكرا


#157460 [خالد]
0.00/5 (0 صوت)

06-09-2011 06:26 PM
الله يصلح حال السودان والبلوم يرجع لاعشاشه
الكلام الجميل ده بتجيبيهو من وين انتي اكيد امك رضعتك شيكولاته سويسريه ومارون جيلاسيه فرنساوي
عشتي وعشعشتي ياسكر الجنيد


#157338 [علي الطيب خيار]
0.00/5 (0 صوت)

06-09-2011 01:37 PM
شكرا كتير كتير استازة اسماء جمل كل حرف يحمل معني
عود يا وطن كما كنت


#157334 [الجعلى]
0.00/5 (0 صوت)

06-09-2011 01:32 PM
روعة يابت الجنيد والله ،،،،ربنا يرد غربتكم وتعودوا سالمين وغانمين ،،، وكمان نحن برضو ربنا يرد غربتنا ونحن مغتربين في بلدنا يعني غريبين الجيب والخشم و


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة