06-13-2011 11:10 AM

ساخر سبيل

النسخة السودانية


الفاتح جبرا

أرادت جوزفين أن تفاجئ زوجها (جون) فقامت بترتيب المنزل ورشت هلي جنباته عطراً ذورائحة جميلة .. غيرت من تسريحة شعرها وأردت أجمل ما عندها .. عندما دق حرس الباب فتحت لجون الباب فإستقبلها قائلا :

-ما هذا الجمال يا حبيبتى .. كم إنتى رائعة اليوم



النسخة السودانية :

أرادت سعاد أن تفاجئ عوض .. غيرت من تسريحة شعرها التى لم تغيرها منذ أن تزوجا قبل عشرة سنوات .. إرتدت فستاناً زاهياًً .. غيرت كل الملايات في البيت بأخري جديدة .. وضعت على المبخرة عروق من الصندل .. ما أن دق باب الشارع حتى هرعت تفتح الباب لعوض الذى نظر إليها وكأنه يراها لأول مرة قائلاً :

- إنتى جنيتى وللا شنو؟ شنو العاملاهو في روحك ده ؟

*************

بينما كان جون وجوزفين يسيران على شاطئ البحر إصطدمت رجل جوزفين بإحدى الحجارة فتأوهت من الألم .. خاطبها جون فى رفق وحنية :

- هل هي مؤلمة الضربة .. دعينى أعمل لها مساجاً



النسخة السودانية :

بينما كان عوض وسعاد يسيران بشارع الدكاترة .. أصدمت رجل سعاد بأحدى علب البارد الفارغة وقبل أن تتأوه سعاد من الألم خاطبها عوض قائلاً :

- عميانة؟ ما بتشوفى؟ ما تعاينى قدامك

*************

فى عيد زواجهما قالت جوزفين لجون تعاتبه :

- أنسيت أن اليوم عيد ميلاد زواجنا يا حبيبي

أخرج لها جون من حافظته تذكرتان لتناول العشاء في أحد المطاعم الفاخرة وهو يخاطبها :

- كيف انسى يا حبيبتى يوما جمعنى بك .. سوف نتناول طعام العشاء على ضوء الشموع

النسخة السودانية :

في عيد زواجهما قالت سعاد لعوض وهى تعاتبه :

- نسيت يا عوض إنو الليلة عيد زواجنا ؟

أخرج لها عوض من جيب الجلابية ورقة (الجمرة) وهو يخاطبها قائلاً :

- هو الواحد يشتري ليكم الجمرة وللا يتذكر ليكم الحاجات الهايفة دى؟

*************

وهما عائدان من الطبيب بعد ان أثبتت الفحوصات أن جوزفين مصابه بمرض إرتفاع السكر خاطبها جون مخففاً :

- لقد أخطأ السكر العنوان يا حبيبتى فأنتى أحلى من أن تصابين به فأنتى عسل يا حبيبتى

النسخة السودانية :

وهما عائدان من الطبيب بعد ان أثبتت الفحوصات أن سعاد مصابه بمرض (السكر) خاطبها عوض قائلاً ً :

- الما بجيب لك السكري شنو؟ اليوم كلو تضربى فى الباسطات والحلويات

*************

أرادت جوزفين أن تحضر أحد الأغراض من مخزن المنزل فباغتها فأراً يتجول .. هرعت خائفة نحو جون وهى تصيح مذعورة ، إحتضنها فى رفق قائلاً :

- لا تخافي يا حبيبتى الفئران غير مؤذية .. دعينى أذهب بدلا عنك لأحضر لك أغراضك

النسخة السودانية :

أرادت سعاد أن تحضر أحد الأغراض من مخزن المنزل فباغتها فأراً يتجول .. هرعت خائفة نحو عوض وهى تصيح مذعورة

- الفار يا عوض .. الفار يا عوض

أشاح عوض بالصحيفة التى كان يقرأ فيها جانباً وهو يخاطبها :

- مخلوعه كده مالك؟ هو أصلو فار وللا أسد ؟ وإنتى ذاااتو الوداكى تمشى تكابسى هناك شنو؟

*************

قالت جوزفين تخاطب جون وهى تشير إلى أحدى البلوزات وهما يتجولان في أحد المحلات :

- ما رائك يا حبيبي فى هذه البلوزة المحذقة ؟

خاطبها جون وعينيه تشع فرحاً :

- سوف تمون مذهلة عليك يا حبيبتى

النسخة السودانية :

قالت سعاد تخاطب عوض وهى تشير إلى أحد البلوزات وهما يتجولان في (سعد قشرة) :

- رائك شنو يا عوض فى البلوزة المحذقة دى ؟

رد عليها عوض :

- و (كرشك) دى توديها وين؟

*************

جاءت جوزفين وهى منهارة وإرتمت على أول كرسي إنزعج جون وسألها مستفسراً عما حدث أخبرته بأنها قد نجت بأعجوبه بعد أن كادت تسبب فى حادث مرورى وهى تقود سيارتها الجديدة ، قال لها جون بعد أن أحضر لها كوبا من العصير البارد :

- أحتسى هذا العصير يا حبيبتى .. غداً نذهب إلى مدرسة قيادة السيارات لتتمرنى أكثر على القيادة .. إطمئنى سوف تتحسن قيادتك كثيراً

النسخة السودانية :

جاءت سعاد وهى منهارة تماًما وجلست فى طرف السرير نظر إليها عوض فى إندهاش وهو يقول لها :

- مالك؟ الحاصل شنو؟

أخبرته بأنها طلعت من الموت بأعجوبه بعد أن كادت تدخل فى أحدى الحافلات ، قاطعها عوض قبل أن تكمل حديثها :

- ما قلنا ليك سواقتك التعبانة دى يوم بتجيب خبرك !ّ!

كسرة :

- (وهى تطلب منه شراء فستان لإحدى المناسبات) : أفتحي محفظة النقود وخذى ما شئتى ياحبيبتى ويا حبذا لو إشتريتى له حذاءاَ بنفس اللون حتى تكونى أجمل إمرأة في الحفل

- (عوض) : الشهر الفات ده ما إشتريتى ليكى فستان ؟ إنتى قايلانى كاسر ليا بنك وللا القروش دى قاعد أطبعا ؟





تعليقات 22 | إهداء 27 | زيارات 8327

خدمات المحتوى


التعليقات
#160495 [محسيه]
2.22/5 (6 صوت)

06-15-2011 10:46 AM
ابدعتا يا ستاذ جبره غيرتي صباحي والله العظيم انا كل ما اقراء سطر اضحك بسوط عالي لمن اقول استغفر الله

عشان عوض بتاعنا مقرفنا من الصباح


#160480 [Mabba]
2.88/5 (5 صوت)

06-15-2011 10:19 AM
يا اخوانا استاذ جبره لاينتقد الشخصيه السودانيه بصورتها الضيقه دي. الاستاذ ينتقد الظروف العامه الصعبه دي اللي خلت الشعب السوداني كلو بلا استثناء يحس بالضجر والاستياء من كل شيئ حوله من غير مايحس.


#159999 [تراك]
2.88/5 (5 صوت)

06-14-2011 02:06 PM
انت يا مجدي طلعت عوض ولا شنو؟ ياحليل سعاد الراجيه منك الفستان:D


#159976 [ابوبكر]
3.25/5 (5 صوت)

06-14-2011 01:40 PM
جوزفين لـ جون : صباح الخير يا حبيبي
جون لـ جوزفين : صباح الورد والفل والياسمين

سعاد لـ عوض : صباح الخير
عوض لـ سعاد : ياهو ده العلموك ليهو في المدارس


#159967 [معز]
2.75/5 (5 صوت)

06-14-2011 01:26 PM
انشاء الله انت يا استاز عوض ولا جون


#159927 [زهجان ]
3.50/5 (5 صوت)

06-14-2011 12:42 PM
استاذ جبرا ....كل الود والتحايا وانت بمثابة المراَة لنبض المجتمع بماتعكسة من واقع معاش ...الغريب جدا إنو حتى زمن قريب جدا كنا نحن الشعب المثالى بجدارة فى ادبيات التعامل خصوصا بين الزوج وزوجته ليس بالضرورة بنفس اسلوب جون وجوزفين ولكن باسلوب اخر توقر فيه الزوجة زوجها اكثر من تبجيلها لابيها ويحنو فيه الزوج على زوجته واولاده بطريقة قلما ان نجد لها نظير فى الشعوب الاخرى ...اعتقد ان الحياة تغيرت بتغير البيئة من حولنا والذى ادى بدوره الى تغير الشخوص واندثرت الثوابت الخلوقة فى مجتمعاتنا المعافاة ليحل محلها ....الايقاع السريع فى كل الدنيا بما فيها نحن ..ربما ياتى يوم نعود فيه الى سودانيتنا الجميلة اسال الله ان يكون قريبا....وارجو كذلك ان لانشطط فى التعليق بدرجة تفقدنا حلاوة المقال ونجانب بها الموضوعية والاقصائية وانتقاد الاخرين بلامبرر..


#159920 [MHMD AHMD]
2.75/5 (5 صوت)

06-14-2011 12:26 PM
اخونا مجدي تعليقك سخيف جدا والاسخف منو حكاية ام در دي ...... شنو شابكنا ام در ام در ام در ام در ؟؟؟؟ مع احترامي لامدر ولاهلا ............


#159805 [مجدي ]
2.82/5 (6 صوت)

06-14-2011 10:03 AM
الي (النفر عباس الاصم )
انا ما اتهمت الاستاذ بالسخف الوصف للعمل الادبي بتاعو ده انا شايفو سخيف و وجهته ليهو رسالة بذالك انت البخليك تقرا الحاجه دي شنو و كمان بتعلق و تتهمني بالسخافه الله يسامحك انت مسوال عن الحاجه الكتبتها دي
و كف بالاستاذ انو ود ام در
وريني انت من اولاد وين عشان اقدر ارد عليك حسب فهمك
مع الاعتزار للاستاذ من سوء فهم الصقته به وانا براء منه


#159799 [حادب]
3.13/5 (5 صوت)

06-14-2011 09:58 AM
الأستاذ جبرا فنان ومبدع ويمتص كثير من ضغوط الحياة وينتزع منا الابتسامة واحيانا الضحك فله الشكر والتقدير وكل كتاباته ترسل إشارات قوية في قالب فني نأمل أن يستوعبها الجميع وألا تنسينا رغبتنافي كا ما يخفف عنا من تمعن مضمونها.
أما مادرج البعض على إرساله من تعليقات خاصة تلك التي تسوق لتعاطي الدخان الأخضر بوصفه قرينة الإبداع الفني فذلك خطأ لأن لا علاقة بالإبداع بمثل هذه الأفعال ومثل هذا الخطأ الشايع مرده إفصاح البعض عن بعض ما يجول في خواطرهم من إبداع تحت تأثير هذه الأصناف فينكسر حجاب الحياء الذي هو سمة هذا النوع من الناس ,فأتقوا الله في الشباب ولتكن تعليقاتنا مسئولة. ولا يعنينا سلوك المبدع الشخصي بقدر ما يعنينا إنتاجه,فإن كنا نقدر أستاذنا الفاتح فلنقدر إبداعه وعدم لصق مثل هذه التعليقات المؤذية والمنفرة.


#159576 [خالد]
3.13/5 (5 صوت)

06-13-2011 10:56 PM
دى بى كرت ولا كرتين؟‎8


#159466 [السودانيه]
2.25/5 (5 صوت)

06-13-2011 06:23 PM
استاذنا جبرا قصد يعكس صورة المعامله السودانيه للزوج مع زوجته
وانا مع استاذنا مافي كلام معسول بعد الزواج وده من اسباب فتورالعلاقه الزوجيه


#159414 [د. عباس الأصم]
3.13/5 (5 صوت)

06-13-2011 04:11 PM
إلى (مجدي) صاحب التعليق الذي وصف فيه مقال الاستاذ جبرا بالسخافة والله إنت زول أسخف من سخيف في زول جابرك تقرأ مقالات الأستاذ؟ أمشى شوف ليك حاجه سخيفة زيك كده أقراها .. نحنا الأستاذ عاجبنا وبنقرأ ليهو وبنعتبروا فاكهة الصحافة السودانية .


#159392 [ابو سامي]
2.88/5 (5 صوت)

06-13-2011 03:37 PM
قال شباب الفيس بوك في دولة خليجية سوف يقومون باعتصام في ميدان تم تحديده مسبقا ............ اعلنت الحكومة عدة اصلاحات بما فيها تحسين الاجور توظيف العاطلين عن العمل ...... منح شهرية لمن لم يجد فرصة عمل ..........
أعلنت المعارضة عندنا أنها سوف تقوم باعتصام في ميدان ابو جنزير ...........
أعلنت الحكومة أنها لديها كتيبة من الدبابين سوف تسحق المعارضة ..............


#159375 [امين الشريف]
2.88/5 (5 صوت)

06-13-2011 03:08 PM
قمة الابداع عمنا الفاتح لكن الا تعتقد ان جيل اليوم ربما تجد فيه جوزفين وجون ؟؟؟


#159336 [الزول الكان سمح]
2.75/5 (5 صوت)

06-13-2011 02:27 PM

يا أستاذ جبرا

ملاحظ ليك مما رجعت من الأمارات ..بقيت تكتب العين غين والسين شين والبا نون والليلة الكاف ميم ..الظاهر النضارة الجبتها معاك دى الدكتور خماك فى فحصها

ماعلينا...أنا بإذن الله الشهر الجايي نازل إجازة للوطن الفضل وعايز أش-سجل ليك زياة ..ورجائى عندك ..تخلى لى حاجة من البتاعة الخلتك تفكر تكتب المقالة دى بالذات.

لك ودى


#159333 [مجدي ]
2.75/5 (5 صوت)

06-13-2011 02:19 PM
دي شنو
نقرا من تحت لي فوق ولا قصدك شنو من السخافه دي
انت ود ام در اكبر من كده دي شنو عليك الله
اخد اجازه اعمل اي حركه لكن اوعك تكتب بالطريقه دي





و الله انت زول عجيب
اسي انا فاتح لي كميوتر و نت و و مكلف نفسي و عامل فيها حرص انو الزول يقرا حاجه تنفعو القاك كاتب الكلام ده
بالله عاين لي نفسك من جوه


#159318 [سلايمان قش]
2.25/5 (5 صوت)

06-13-2011 01:52 PM
رائع ياجبرا تجلي عن الوصف...... نسخة سودانية مقال ما بطال


#159306 [ابو مبارك ]
3.25/5 (5 صوت)

06-13-2011 01:28 PM
بمعادلة حسابية بسيطه يا ابو الجبابر

مقدارالفرق بين تعامل جون لجوزفين وعوض لسعاد (يساوي) مقدار الفرق بين جمال جوزفين وجمال سعاد


#159263 [ابو سلول]
2.88/5 (5 صوت)

06-13-2011 12:20 PM
بلفها ساكت عمك دى القصة دى قديمة مع منتجة الاسماء استغفرالله ديل ما كفاهم العملوا قبل كده ياخينا لسه انت على اتصال بالناس ديل ؟؟؟؟؟؟؟؟ شكلهم غابوا عنك فترة انشاء الله المانع خير اللهم انا نبراء من هذا ...... ونسالك ان تغفر لنا ما مضي منا من ترويج نعلم ان كذب ولاحوله ولا قوة لا بالله


#159244 [قاسم خالد]
3.50/5 (5 صوت)

06-13-2011 11:55 AM
يا أستاذ ياخ ... ورينا الصنف ده بتجيبو من وين؟؟


#159222 [ala]
3.50/5 (5 صوت)

06-13-2011 11:20 AM
حاجات سودانية طبق الأصل ولا ينافسنا عليها أحد ,, ما عاد عندي شك انك يا دكتور بتلفها والا قل لي كيف يأتيك هذا الابداع؟


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة