المقالات
السياسة
ارشيف مقالات سياسية
المصريون (الحُمرة البريدها المهدي) ( الحلقة الأخيرة) !ا
المصريون (الحُمرة البريدها المهدي) ( الحلقة الأخيرة) !ا
06-17-2011 11:16 AM

المصريون (الحُمرة البريدها المهدي) ( الحلقة الأخيرة) !!

نادية عثمان مختار


في جولة مسائية مع صديقة لي بسيارتها في شوارع الخرطوم دار الحوار التالي:
هي: ياخ البلد دي كلها بقت ناس حُمر كدا مالها ؟!
أنا : يا زولة بطلي عنصرية بلاش حُمر بلاش كلام فارغ معاك !!
هي : ضاحكة.. والله ما عنصرية ولا بطيخ لكن بالجد وين ما تقبلي تلاقي الناس حمرااااء !!
أنا : ومالها الحُمرة! عيبيها لي ؟
هي : ياخ الحمرة دي أباها جدنا المهدي ذاتو !!
أنا : جدنا المهدي ابا حمرة الناس المستعمرة؛ لكن ديل زوار وسياح وأصحاب مصالح واستثمارات !!
هي : برضو عملوا لينا زحمة في البلد ، أي حتة الزول يمشي يلقاهم يختي !!
أنا : إنتي قاصدة ياتو حُمرة؟ ما ياهو البلد ما شاء الله حتى السودانيين كتااار منهم بقوا (حُمُرررر) ويتراقشوا زي الصيني، شي بالكريمات وشي ترطيبة ونوم في المكيفات وراحات ؟!
هي : انا قاصدة المصريين ديل، والله كتروا في بلدنا جنس كترة !!
أنا : وده مزعلك في شنو ما ياهو السودانيين مالين ليهم بلدهم اكتر من خمسة مليون سوداني غير الجنوبيين البقوا قريبات دي شعب دولة جارة !!
هي : لكن هم بلدهم باردة ومويتهم كتيرة وماملونة وكهربتم كتيييرة لا جمرة خبيثة لا حميدة يحمدوا سيدهم اها جايين مزاحمننا نحنا عندنا شنو ؟!
أنا : نحمد الله عندنا خير كتير يكفينا ويكفي جيرانا بس الله يصلح الحال وتقيف الحروب والمشاكل والله نبقى أغنى دولة وما في زول يلحقنا !!
هي : طيب ياخ لحدي ما يحصل ده ما يفارقونا برانا زهجانيين !!
توقف الحوار في أحد الاستوبات حيث ظهر شاب مصري يحمل في يده أشياء كثيرة للبيع منها ورود بلاستيكية، وفازات ورق الهدايا، وعرضها مستعجلا قبل أن تفتح الإشارة، فما كان من صديقتي إلا أن نهرته ( طير ياخ) !!
لا أظنه فهم معنى كلامها، ولكن تذكرت كيف أنني أغضب عندما يتفوه مصري بأي لفظ خارج أو مجرد كلمة استهزاء بسوداني أو سودانية !!
وفي السابق كان بعض السودانيين يسكتون لو أنهم وجدوا المضايقات من أخوانهم المصريين، ولسان الحال يقول ( البلد بلدهم وهم أسيادها)
أما الآن ومع هجرة المصريين للسودان واشتغالهم معززين مكرمين أجد أن اللسان السوداني في مصر لم يعد قصيرا بل طويلا جدا؛ وفي مرة كانت إحدى الأخوات من جنوب السودان ( قبل الانفصال) مع طفلها في مترو الأنفاق فحاول احد الشباب السخرية من طفلها، فما كان منها إلا أن أسمعته موشحا على الطريقة المصرية و(بعربي جوبا) فرفعت كلتا يديها وهي تصرخ في وجهه ( نأم نأم ياروه أمك ..ده إبني ياهبيبي .. أريف ياني ايه إبني) !!
فما كان مني إلا أن هتفت (عفيت منك يا بت أمي) !!
اعتقد أن العلاقة بيننا ومصر ستسير بصورة طيبة على المستوى الشعبي خاصة بعدما هاجر إلينا الأشقاء من مصر، وعاشوا في بلادنا الآن، كما عشنا معهم لعشرات السنين ، وهم بالتأكيد - بحكم العشرة- أصبحوا يعرفون الكثير عن النفسية والمزاج السوداني وطرائق التعامل معنا!
أعتقد أننا أصبحنا أكثر قربا من ذي قبل وسنتقارب أكثر لتتحقق المصالح الحقيقية في البلدين لتصب في مصلحة الشعبين بصورة مباشرة بإذن الله .
فقط لن يتم ذلك إلا لو أن حكامنا اتخذوا نهج الشفافية في حلحلة العالق من القضايا بين البلدين دون أي (دسدسة) !!
و
مصر يا أخت بلادي.. يا شقيقة !!

الاخبار





تعليقات 17 | إهداء 0 | زيارات 2194

خدمات المحتوى


التعليقات
#162308 [zoal sudanese zoal]
0.00/5 (0 صوت)

06-18-2011 04:48 PM
(0الخدرة هي التي أباها المهدي ,, وليست الحمرة)),,
وبالعامية عندنا بيقولوها كده : : ((الخدره اللباها المهدي )) , والخدرة هنا بمعنى الملاح الاخضر : لابياكل ملاح اخدر
ولا بيشرب خمر يسكر .. قيلت كمان في مناحة ((حليل موسى يا حليل موسى))
فعموماً يشاع حول الصالحين انهم لا يحبذون ولا يفضلون قدر الامكان اكل اللون الاخضر المباشر في طعامهم ,,, ولذلك تحليلاته وتفسيراته وتأويلاته لديهم ,,
عموماً,, الاستاذة نادية, وبقلمها المتنوع الثر, واضطلاعها المستمر, زادتنا علماً , وجعلتنا نبحث عن مصدر أبيان المهدي للحمرة في لون البشر,,فالحرة التي اباها المهدي لا شك انها تلك التي تصبغ جسم الخواجة ,محلاةً بعيون خضر ,, وليست تلك التي يبان في بشرة المصريين والتي اقرب للصفرة المخضرة


#162236 [Farouk Imam ]
0.00/5 (0 صوت)

06-18-2011 01:55 PM
و الله ... يا نادية ما عندك موضوع ...انتى مالك و مال المصريين ’, قبل كده كتبت و قلتى انو الناس بتقول عليكى بتعملى لصالح الاستخبارات المصرية , و الحين قاعدة تحكى لينا عن المصريين و مترو الانفاق و الشاب المصرى بياع الوردة البلاستيكية , لو بتحبيهم للدرجة دى امشى لييهم , هما كتار زى الهم على القلب , و بلدهم ما محتاجة ليهم ... يا نادية اتهدى شوية و اكتبى عن شى مفيد ينفعنا , و الله صحيح طابور خامس و سادس و سابع ..... و سلملى على مصر سلملى


#162102 [عادل عبدالحق]
0.00/5 (0 صوت)

06-18-2011 10:24 AM
شكرا أستاذه نادية: من عاش مع المصريين أو صادقهم سيدرك طيبة أهل مصر وبساطتهم وهذا ما أدركته منذ سنوات، فى نفس الوقت أستاء جدا من بعض السودانيين المتخلجنيين والذين يميلون لإرتداء عقال الخليجى ونظرته للناس وتنميطهم بصورة فجة، أغضب عندما يسئ أو يستاء سودانى من بائس جاء للعمل من مصر أو إثيوبيا أو بنغلاديش، ونسوا أننا من السودان ومايمرون به مررنا به ولا زلنا (أرض السودان هى أرض المحبة والتسامح وهذه ديدن شعبها منذ الأزل، كان الناس يأتون للسودان هاربين مذعورين من حروب ومجاعات وكوارث من مختلف الفجاج فيجدون لدى هذه الأرض الطيبة ما يطمنهم ويزيل عنهم ما عراهم).

المصريين شعب مظلوم للغاية من بقية شعوب المنطقة فهم يلصقون بهم صفات النصب والإحتيال، وهذه بالتأكيد موجودة ولكن ويشهد الله لدى تجارب مع المصريين أظهرت لى مدى أمانتهم وخوفهم من الله لو أننى حكيتها لوصف بعض الناس بالمبالغة.

أقدر لك كتابتك عن المصريين وسعيك لتمتين العلاقة بين الشعبين، وهذا يدل على أصلك وطيب معدنك وسعيك لرد الجميل وهذه صفة الكرام.

مصر وإثيوبيا وإرتريا وتشاد (أعشق شعوب هذه البلدان فهم أهلنا وأحبائنا ولا أخذهم بجريرة حكامهم كما أتمنى أن لا أخذ بجريرة حكام بلادى).


#162006 [ابو محمد]
0.00/5 (0 صوت)

06-18-2011 07:45 AM
لمن لايعلم المصرى لمن يقول ليك انتو ياسودانيه ...يقولما انتو ياسود..النية زى مايقول للفلسطينى فلس..طينى نبهنى لده مصرى نوبى كفايه عبط وسداجه !!!!


#161894 [سوداني مخلص]
0.00/5 (0 صوت)

06-17-2011 08:55 PM
ياحليل حلايب تاني نشمها قدحه دا كان لقينا القدحه


#161888 [ سودانى طافش ]
0.00/5 (0 صوت)

06-17-2011 08:37 PM
بصراحة مابنحبهم ولا بيحبونا .. وبعدين واحد ببيع فى ( ورود بلاستيكية ) فى الأستوب . يعنى ياهو ده الأستثمار والمستثمرين ! قالت شنو ! علاقة على مستوى شعبى ! أمشى إنتى سوى العلاقة ! خلى ( السودانيين ) فى حالهم ومشاكلهم


#161864 [احمد]
0.00/5 (0 صوت)

06-17-2011 06:56 PM

والله يا( ناديه هانم)
معظم او غالبيه المصريين يحملون للاشقاء السودانيين كل الود والاحترام
واحب انوه ان معظم المصريين وانا اولهم لايعرف اى تفاصيل عن موضوع حلايب ان كانت سودانيه او مصريه ربنا يسامح الساسه والاعلاميين اللى كانو السبب فى هده الخلافات رجاء اكتبى عن المصريين الحقيقيين اللى فى المناطق الشعبيه مثلا (الحسين-الجماليه-السيده زينب ....الخ
وان شاء الله مصر بعد الثوره كل شيء يرجع لسابق عهده ايم الزعيم جمال --والقائد السادات
فحسنى ادا كان ضر السودانيين فى شىء فانه ضر المصريين فى كل شىء
منتظريين منك ومن امثالك مداواه جميع الجراح ولم الشمل
وفقق الله لما هو خير للعباد


#161858 [حمدان]
0.00/5 (0 صوت)

06-17-2011 06:36 PM
افلاس تام !!!!


#161817 [gafar elmubarak]
0.00/5 (0 صوت)

06-17-2011 04:18 PM
I WOULD LIKE TO RECOMMEND TO NADIA TO READ THE ARTICLE WRITTEN BY TARQ MOHAMED A TRUE SUDANESE IT IS UNDER THE HEAD LINE OF POOR ALHADARI COMPLAINING ABOUT SUDAN SPORT MEDIA ,, READ IT YOU MAY LEARN SOMETHING FROM IT


#161810 [سومي العسل - الدمام]
0.00/5 (0 صوت)

06-17-2011 03:58 PM
عليك نور أيها الكاتبة ..
والله يعطيك العافية على مقالاتك الرائعة ..
وصراحة موضوعك جدير بالأهمية وأصبت كبد الحقيقة ..


#161803 [gafar elmubarak]
0.00/5 (0 صوت)

06-17-2011 03:45 PM
WHAT ARE YOU UP TO NADIA? ARE YOU LOOKING FOR FAVOURS FROM YOUR BELOVED EGYPTIANS ,IF SO YOU HAVE EARNED THAT.. YOU ARE FREE TO DO WHAT YOU LIKE, BUT NOT AT OUR EXPENSE , WE TRUE SUDANESE DO NOT WANT TO SEE THE EGYPTIANS TAKING OVER SUDAN, WE ALL FOLLOW THE TEACHING OF IMAM ALMAHDI. AND AVOID THEM BY ALL MEANS.. THEN YOU SAID THERE ARE 5 MILLION SUDANESE IN EGYPT , THAT HYPER INFLATED FIGURE INCLUDES THE EGYPTIAN NUBIANS,, WHO ARE TREATED LIKE SLAVES IN EGYPT,, IF EGYPT DECIDED TO SEND THES PEOPLE TO SUDAN INCLUDING YOURSELF,, THE DEAL SHOULD INCLUDE THE NUBA LAND SOUTH OF LUXUR


#161800 [فارس]
0.00/5 (0 صوت)

06-17-2011 03:34 PM
مقالاتك كلها سمجة .


#161796 [الصادق الهواري]
0.00/5 (0 صوت)

06-17-2011 03:03 PM
يعني عايزانا.. نبوس يد المحتل .. طيب مااحسن .. نطبع مع اسرائيل .. لان الاحتلال واحد لا يتجزء .. علي فكرة .. يا استاذة لا تزال العقلية المصرية ترانا..دون مستوي الندية في اقامة العلاقات المشتركة .. لانها ببساطة عقلية أستعمارية.. ولن تقوم للسودان قائمة طال يظل يدور في فلك الأخوة الناقصة بين السيد والعبد.. ..أزلية وأشقاء والهرج اليساسي هذا كوم..واحتلال حلاليب كوم يتخطي المقولة الساقطة نحن شعب واحد .. ونحن أخوات ..نرجو ان لا يكون مقالك يا استاذة يحمل جرثومة التطبيع .. وبصراحة شديدة اذا كنت تحتل جزء من وطني كيف تدعي انك اخي..وكيف تقنعني بان العلاقات بيني وبينك مميزة ومتينة وما الي ذلك من اسليب المكر والخداع


#161786 [سامى]
0.00/5 (0 صوت)

06-17-2011 02:29 PM
كرهتينا المصرين قصتك شنو مع المصرين الناس ديل محتلين حلايب وشلاتين ومداقرننا في مويه النيل ساهمو في فصل الجنوب واشعال الفتنه في دارفور وانتى لسه مصر يا أخت بلادي


#161751 [سوداني ]
0.00/5 (0 صوت)

06-17-2011 01:12 PM
مقالاتك سخيفة ومواضيعك انصرافية من الاشياء المهمة .. المصريون يحتلون حلايب وانت هنا تحاولين ان تلمعي صورهم


#161730 [أبو الكدس]
0.00/5 (0 صوت)

06-17-2011 12:12 PM
مقال ركيك بمعنى الكلمة وشكلك إنت وصحبتك ما عندكم شغلة


#161720 [زول ]
0.00/5 (0 صوت)

06-17-2011 11:47 AM
ياخي أنتي ما عندك شغلة دا شنو الهباب
دا ملاح شنو ياخي الناس ديل بلعو مثلث حلايب في بطنهم وبرضو
تقولي لي مصر يا شقيقة
ما في جايبنا لي ورا غيركم أنتو 1


ردود على زول
Sudan [علي] 06-17-2011 12:32 PM
ا ممكن نتعامل مع الموضوع بالعواطف و لازم نحسبها صح. يعني شنو مصلحتنا لمن يجونا آالف الأجانب مستوى تعليمي و مادي متدني .


نادية عثمان مختار
نادية عثمان مختار

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة