في



الخط إتسرق ... يا رجاااالة
06-29-2011 12:48 PM

ساخر سبيل

الخط إتسرق ... يا رجاااالة

الفاتح جبرا

الخطوط أنواع وأشكال .. فى الكتابة عندك خط الرقعة وخط النسخ وبقية الخطوط . وفى الكورة عندك خط ستة وخط طمنطاشر وخط التماس وفى الجغرافية عندك كمان خط الإستواء وخط قرينتش وخط الطول وخط العرض وبرضو عندك خطوط تانية زى خط المواصلات وخط الموبايل وخط الفقر وخط المشاة وخط الطيران
جميع هذه الخطوط عزيزى القارئ تشترك فى خاصية واحدة رغم تباينها .. هل تدري ما هى هذه الخاصية ! وما الذى يجمع بين خط طمنطاشر وخط الإستواء وخط الطيران؟ سوف تشحذ ذهنك عزيزى القارئ ولو أديتك ستين سنة عشان تفكر أنا متأكد تماما أنك سوف تفشل فى إيجاد هذا الشئ المشترك بين كل هذه الخطوط !
طيب أنا أوفر عليك الستين سنة وأقول ليك الإجابة وهى أن جميع هذه الخطوط لا يمكن أن تسرق !! يعنى حصل يوم شفتو ليكم (خط قرينتش إتسرق) وللا (خط مشاة إتسرق) وللا أى واحد من الخطوط دى زول (نشلو ونام بيهو) !
لكن طبعن لأنو نحنا عندنا ناس يسرقوا (الكحل من العين) ويسرقو ليك خط ستة ذاااتو لحدت ما (الحكم) يودوهو الإنعاش من المفاجأة فقد تمت سرقة خط (طيران سودانى) يملكه الشعب الفضل !! قامت جهه ما بسرقة خط (الخرطوم - هيثرو) الجوى وباعته (كسر) لأحد الجهات التى تتعامل في المال المسروق !!
فجأتن اكتشف أحد المسئولين إختفاء أحد أهم خطوط الطيران لديه فصاح بأعلى صوته :
- خط (الخرطوم -هيثرو) إتسرق يا رجاااالة !!
هنا تجمع الجيران وبعض المارة (بتاعين الشمارات) وأخذوا يهدأون من روع المسئول
- صوت 1 : يا سعادتك كدى فتش براااحة بررراحة إحتمال تلاقيهو !
- رد : ألاقيهو دى شنو؟ الخط ده مفقود وأنا ما شايفو ليهو تلاتة أربعة سنين !
- صوت 2 : وإنتو يا سعادتك نايمين التلاتة أربعة سنين دى وجايين تسألوا عنو هسه ؟
- رد : هى لاكن نحنا قايلين فى زول ممكن يسرق ليهو خط طيران ويبيعوا؟
- صوت 4 : والله يا سعادتك عندنا ناس يسرقوا ليك الجنريتر والحفلة شغالة !
- صوت 5 : مش إحتمال يعنى يمكن تكونوا إتزنقتوا كده مرة لى قروش وقمتو مشيتو بعتوهو ؟
- رد : إتزنقنا وبعناهو دى شنو؟ مش كان على الأقل تكون فى مبايعة موجودة عندنا مثلاً
- صوت 6: أها يعنى يكون الخط ده مشى وين يعنى؟
للإجابة على تساؤل (الصوت 6) نقول ليهو إنو (أمنا الحكومة) ما سكتت على (السرقة العارفاها ليها تلاتة سنين وشوية) وقامت طواااالى شكلت لجنة تحقيق عشان تحدد الجهات المتورطة وأعطت اللجنة دى الحق فى إنها تتعاقد ليها مع (متحري إنجليزى خاص) عشان يتابع الموضوع في بريطانيا ولمن يعرف الناس (السرقوا الخط) يقوم
يفتح ليهم بلاغ فى (القسم الجنوبى الإنجليزى) ويختو الخط (معروضات) !
عليكم الله دى مش حاجة تحير؟ لجنة شنو؟ وتحريات أيه؟ وبتاع مين؟ هسه الموضوع ده عاوز ليهو لجنة؟ هو فى (كم زول) فى السودان ممكن يبيعوا ليهم (خط طيران) ؟ وكم زول ممكن يكون عندو أوراق ومستندات (تقنع المشترى) بإنو هو شخص مخول ليهو يبيع الخط ؟
وبعدين المشكلة وين؟ هى أصلو الحكاية كيمياء .. الحكومة (إتنشلت) ووجدت الحاجة النشلوها منها (قاشر بيها زول تانى) .. خلاس تخاطب (الزول التانى) ده بصورة رسمية وقانونية وتطلب منو إنو يوريها (الخط المسروق) ده جابو ليهو (ياتو حرامى) !!
غايتو على الشعب السودانى الفضل أن يمتثل إلى الحكمة الصينية القديمة التى تقول : (يهاو فينج زهاو ينج بينج) وترجمته الحرفية (الجاتك فى خطك سامحتك) !
كسرة :
لولا أن (التومة الوداعية) الشافت شركات الحكومة (الرايحة) فى العمرة ولسه ما جات .. كان ختينا ليها (النية) عشان تشوف لينا الخط ده (النشلو منو) .. بعدين يا جماعة مع (رايحاتكم الكتيرة دى) حقو (التومة) دى تشغلوها معاكم إن شاء الله تشغلوها (مستشار لمعرفة الرايحة) !!






تعليقات 24 | إهداء 1 | زيارات 5534

خدمات المحتوى


التعليقات
#169659 [ أ . د]
0.00/5 (0 صوت)

06-30-2011 12:04 PM

المصيبه أنو الشركه تذوب يوميا وولاة الأمر فى أنتظار توصيات اللجان والتى عندما تصدر تكون الشركه فى مقابر احمد شرفى والقائمين عليها مشغولين بأخر يد وحسبنا الله ونعم الوكيل


#169558 [طارق الكسلاوي]
0.00/5 (0 صوت)

06-30-2011 09:50 AM
صوت 7 : هو مين الأهبل اللي بيسافر لندن بي سودان طير بتاعتنا دي؟؟!!!!!!!!!!!


#169478 [مونتي رغلو ]
0.00/5 (0 صوت)

06-30-2011 06:31 AM
وفي خط طلعو لينا بنات الكيزان اسمو خط اظهار الرقم مالكم نسيتو ؟؟؟؟


#169445 [abuamin]
0.00/5 (0 صوت)

06-30-2011 12:49 AM

اخى الفاتح دى قصة جميله تستحق عليها تكبيره و تهليـله !!!!!!!

و بعدين قريبتك الوداعيه الاستاذه التومه لو عينوها مستشارة حقها حيروح فى حق الله مع ناس التفل المعجزه وود الامام و الكورجه ديك و ما حتقدر تبرز مواهبا معاهم !!!!! افتكر انسب مكان يعينوها فيهو فى وزارة الاعلام فى وظيفة (خـبـيـر وطـنـى) بدرجة وزير دوله مع ناس هنايه ديك و هناى داك ........ يعنى ديل احسن منها بشنو؟؟؟


#169385 [عمر]
0.00/5 (0 صوت)

06-29-2011 09:17 PM
يا جبرا تسألنا نحنا ما تسأل الحكومة هو نحنا بنعرف اكتر من الحكومة طيب عندي سؤال جاي بي شلاليفو يعني شنو قالو انت زول متبحر في المواضيع دي


#169328 [ام الحسن]
0.00/5 (0 صوت)

06-29-2011 06:55 PM
كان كدى التومة دى الله فتحها عليها....اريتنا بى حالها ...اقل مستشار راتبو فى الشهر 30-40 مليون فى الشهر ده غير (المخصخصات)...قول للتومة تسرع الايام دى هم فى حوجة للوداعيات وجماعتك الايام دى مزنوقين فى وداعية تعرف ليهم طيارة بشبش رجعتها سالكة واللافيها مطبات.....والله شكلك كدى التومة ورتك الجماعة ديل يومهم قرب و ورتك بغورو متين بس انت ماقادر تصرح وماقادر تبوح


#169318 [habbani]
0.00/5 (0 صوت)

06-29-2011 06:33 PM
يا جبرة هو خط ول حق إمتياز الهبوط فى مطار هيثرو _ ودا حق ليه أكثر من خمسين سنة وبالأصح مع عمر سودانير .وأقول ليك دا إتباع ب 30 مليون إسترلينى أى حوالى 60 مليون دولار .والمدهش إنه سودانير إتباعت بى 40 مليون دولار .
وحكومتنا ما كانت عارفة إنه ممكن إتباع ولا عارفة سعر بيعه لكن فى ناس ..عارف ..يالطاهر عارفين لأنه المدير إنجليزى


#169302 [حسكو]
0.00/5 (0 صوت)

06-29-2011 05:54 PM
والله يا جبرا جنس السخرية القاعد تكشحها دي لو الزبالة القاعد تكبها فيهم ديل عندهم ملة او دين اكان حرقتهم لكن ديل دايرين ليهم خراتة زي الخرتت مبارك والصعاليك المعاه ويوم الخرت يامن يجي الحثالة العاملين رايحين ديل .... دي ما بتتقال هنا


#169292 [awooda]
0.00/5 (0 صوت)

06-29-2011 05:13 PM
ياخوانا ما تتهمو ود يوسف جبرة بحكاية البابور دى وكدى..الراجل دا خلى الحكاية دى من زماااان لكن اخر واحدة شبكت معاهو وكدا وخلتو فى الهتوشات الانتو شايفنها دى .. طبعن هو قاصد خط تانى كولكم ما ناقشنة بيستعملوة ناس البدرة الناصعة البياض..دا طبعن بعد التطور الحصل عندنا بعد البترول ولا هش كدى يا الفاتح اخوى


#169276 [سمارة]
0.00/5 (0 صوت)

06-29-2011 04:34 PM
انت فاكهة الراكوبة ,بصراحة متعة والله وانت الوحيد البتفرفش لينا الله يحفظك


#169266 [س سرق]
0.00/5 (0 صوت)

06-29-2011 04:04 PM
ما احنا زاتنا اتسرقنا ;(


#169249 [الساير]
0.00/5 (0 صوت)

06-29-2011 03:41 PM
ظظظظظظظظظظظظظظظظظظظظظظظظظظظظظظظظظظظظظظظظظظ

يا جبرا نشغلها خبير وطني خطي مخطط خطوط ( كيتن فيك )

قال كسرة قال !!!!! لا أحسن عصيدة عديل !!!!


#169240 [عبدالمنعم ]
0.00/5 (0 صوت)

06-29-2011 03:29 PM
ياجبرة الله يديك العافية


اضحكتنا اضحكتنا بمبكياتنا الكثيرة

كسرة : الخط دة ياجبرة يا اخوي يكون اتنشل في الجو ولا اللعب كان ارضي ؟؟؟

بعدين الزول القدر سرق خط طيرانا دة هو زاتو القدر يسرق الخط الفاصل في 1/1/ 1956م ويخلي جودة تبقى اخر نقطة لحدودنا الجديدة !!!

وهو زاتو السرق خط 22 درجة شمال الاستواء الخلا حلايب بقت مصرية !!!

وهو زاتو السرق خط الموية عشان يملا حوض السباحة الخاص باحد البدريين ويخلي بري عطشانة عدمانة الموية ام دود !!1
وهو زاتو ياجبرة السرق اعظم الخطوط خط القيم السودانية وخلانا نشك في بعض والاب يغتصب ابنته والابن يقتل والده والمايقوما تعج عجا بشعب مستقبل السودان !!!

اه ياجبرة جبر الله الحال اميييييييييييييييييييييييييييييين .



#169234 [الزول الكان سمح]
0.00/5 (0 صوت)

06-29-2011 03:25 PM

يا أستاذ جبرا

والله نسيت أهم الخطوط....خطوط حمار الوحش..ودى ربنا سبحانه وتعالى حباهو بيها عشان التمويه...والزول السرق الخط بتاع الخرطوم هيثرو دا برضو بكون مموه بفقه الحماية الإنقاذية ..يعنى مرة تشوف ..ومرة ماتشوف..

وأنا بقول للشعب السودانى بالصينية ( زنق..زاو بو رو ) ودى معناها(أعملوا حسابكم على عفشكم.).

وأحلى مافى المقال إنو يعينوا التومة الوداعية كمستشار لمعرفة الرايحات...دى مش بالغت فيها دى ...(لفيتها ليها)


#169220 [الخالدي]
0.00/5 (0 صوت)

06-29-2011 03:05 PM
يا عمنا الخط لا انسرق ولا شيتين الخط سيدو مادافع الفاتورة ليهو 3 4 سنين وماقاعد يتكلم بيهو زي الناس مجنن الناس با لمسكولات والجماعة ناقشين الفلم لكن اعيق الخط مخصوص لانو رقمو مميز وحاتشوف الايام الجاية يكونو ودو مكانو منو وحاتعرف براك اللعبة كولها المشكلة ما في انك تعرف سيد اللعبة الحلوة دي منو المشكلة هي انو ماف شي بيجيهو غير دعوة المظاليم يعني يالمختصر كده حقنا بناخدو عند المولى بأن الله


#169203 [العجب]
0.00/5 (0 صوت)

06-29-2011 02:46 PM
الأخ / الفاتح - ردا على كسرتك - اقول ليك انا توم التومة - وبشوف في الودعات السبعة - الخط دا سرقة الوحيد - وجابو ليهو تالت التلاتة - ومعاه ود الصرة - ومتحمد فيهو تاني اخوه ابو حقيبتن يابسة - ( بعد دا ممكن تعرف الحرامي )


#169198 [zahi]
0.00/5 (0 صوت)

06-29-2011 02:40 PM
سلامات استاذ جبرا مثال : اذا كان عند عربيه و عاجباك خلااااااااس وجاتك زنقه وبعتها لي زول بي 30 مليون اهاااااااااااااااااا بعد فتره الله فرجا عليك ومشيت للزول الاشتري منك العربيه و قلت ليهو انا عايز اشتري العربيه دي واديتو 35 مليون اهااااا بعد البيعه تمت و استلمت العربيه ورجعت البيت لقيت انو الزول ده غشاك وغير المكنه وركب للعربيه مكنه نص عمر تعمل شنووووووووووووو ؟ مااااااااااااااااااااا ماسووووووره وركبتها ............. الله يزيل الغمه ........ و يفكنا من السماسره الحاكمننا ديل ........................ قولو امييييييييييييييييييييييييييييييييييييين


#169170 [ايمن محمد عبدالله]
0.00/5 (0 صوت)

06-29-2011 02:09 PM
ابداااااااع يا استاذ الفاتح, ربنا يديك العافية

قلت مستشار شئوون الرايحة والله التومة تستاهل



#169154 [سودانى]
0.00/5 (0 صوت)

06-29-2011 01:50 PM
غرفنا مشكله خط هيثرو 0 مشكلة خط البشير شنو ؟


#169150 [متابع]
0.00/5 (0 صوت)

06-29-2011 01:44 PM

وبيت السودانيين في لندن للمرحوم السيد عبدالرحمن المهدي حا يتباع برضو علمأً أنه بالقرب من خط جرينتش،،،،،،


#169149 [ناصح]
0.00/5 (0 صوت)

06-29-2011 01:43 PM
حسع إنت ما شفت طيارة(هناي) ما راحت في الجو , واتأخرت يوم كامل ! وكان ما (هناي) قال ليهو أرجع لي تاني , كانت (هناية) لمت فيهو , وساقتو لناس (هناي) الهناك في البلد البسموها لاهاي ! وتاني دايرين لينا قصاص , يقص درب (هناي) في مشياتو البقت معدودة ومعروفة , علشان ناس (هناية) ناوين ليهو نية قوية , وبرسلوا ليه (هنايات) فوق في الجو , يجيبو خبرو .


#169144 [Alshaik]
0.00/5 (0 صوت)

06-29-2011 01:25 PM
الخط ما اتسرق ياجبرة !! الخط تم مقايضتة بخط تركمنستان مع تحصيل فرق السعر


#169142 [ imad]
0.00/5 (0 صوت)

06-29-2011 01:24 PM
اصلوا المغسل وشو بي مرقة ما كتير عليهو يسرق البزة من خشم الرضيع.!!!
الحكومة في الولاية الشمالية اليومين ديل لافة على الطلاب في المدارس فيما يسمى نفرة كردفان ،لجمع الأموال من الطلاب الما قادرين علي مصاريف الإجلاس والرسوم ووووووو.
بالله فضل لهم شنو؟؟؟


#169131 [وقيع الله]
0.00/5 (0 صوت)

06-29-2011 01:09 PM
انت يا بروف خليك من خط هيثرو خلينا في خط الرئيس في اسيا من طهران الى تركمستان الى هبهان
دي وزارة الخارجية ماعارفة رئيس البلد وين .
و قال نجاح الدبلوماسية السودانية .
انا خايف على طريقة الدفاع الشعبي كنا عطشانين وربنا انزل لينا مطرة في الشتاء في الجنوب تخيل و نحنا نسمع و نقول سبحان الله . و البشرف علي ساحات الفداء مهندس اسحاق احمد فضل الله و هو موجود وكمان يكتب . عن السياسة سبحان الله .


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة