نص بخة وكده
07-02-2011 11:59 AM

ساخر سبيل

نص بخة وكده

الفاتح جبرا

لاشك عزيزى القارئ أن هنالك علاقة وثيقة بين الموازين والمكاييل وبين إستطاعة المواطن على الشراء .. فمثلاً لو قلنا أن الوحدة المستخدمة لبيع وشراء (الذهب) فى الأسواق للمواطنين هى (الطن) ونصف الطن وربع الطن إذن لما إشتري أو باع مواطن ذهباً .. إذن لابد أن تكون وحدات الموازين والمكاييل المستخدمة لسلعة ما فى متناول المواطن العادى حتى يستطيع أن يمتلكها !
مناسبة هذه المقدمة عزيزى القارئ هو الإرتفاع المتعاظم والمطرد لأسعار السلع الاستهلاكية الضرورية والمواد التموينية التى تشهده الأسواق الآن وبصورة (تخلى الزول يحتار) مما يجعل (المواطن) غير قادر على الشراء بالوحدات المستخدمة حالياً (فمثلاً) قد وصل سعر كيلو اللحم الضأني إلى ستة وعشرين جنيها والبقرى إلى عشرين جنيهاً فهل يصلح الكيلو لأن يكون وحدة (لوزن اللحم) يستطيع الشعب الفضل أن يتعامل معها أذا القصة مشت على نفس المنوال؟ بالطبع لا لذلك لابد من إيجاد وحدات موازين ومكاييل جديده تتناسب مع دخل المواطن حتى يستطيع التعامل معها فبدلا من أن ترى (اللحمة) معلقة قدامك ولا تستطيع شراء (تسع كيلو) منها فالعبد لله يقترح وحدة موازين (صغيرة) تعادل (عشرة جرامات فقط) تسمى مثلاً (الحوسة جرام) مقسمة على ألف وحدة تسمى كل منها ( الجرامحوس) !
وعااادى بعد ذلك يمكنك أن تقف أمام الجزار وتمد ليهو إتنين جنية وتقول ليهو بالله أدينى خمسة (جرامحوسات) وكمان تأشر ليهو على (الفخدة الجوانية)!!
أما سلع (الأحجام) فحكاية اللتر ونص اللتر دى بقت بعيده عن منال المواطن لذلك يجب الإستعاضة عنها بالـ( حوسة لتر) والذى يساوى (عشره ملي لتر فقط) بحيث يكون هذا الـ( الحوسة) مقسم على ألف وحده تسمى كل منها (ملى حوسة) !!
وعااادى بعد ذلك يمكنك أن تقف أمام بتاع البقالة وتمد ليهو (ميتين قرش حديد) وتقول ليهو بالله أدينى عشرين (ملى حوسة) ! زيت سمسم !!
أما المكاييل التى يتم بها حساب كمية البصل والويكة والشطة وخلافه فيمكن الإستعاضة عن الربع ونص الربع والملوة ونص الملوة بمكاييل صغيرة تتناسب وجيب المواطن بحيث يصبح ( عشر الملوة) هو الوحدة الكبيرة التى يحسب عليها باقى الوحدات ويمكن أن تسمى (الكستبان) بحيث يمكن لحاجة (نعيمة) مخاطبة (عوض التشاشى) :
- يا عوض عليك الله ختا ليا (كستبانين) ويكة فى فنجان القهوة ده !
أما عن جرعات الأدوية والتى ما عاد المواطن البسيط يستطيع التعامل معها فى ظل أرتفاع سعر الأدوية المتفاقم فمشكلة تجعل الواحد يسأل نفسو (لو أساسا عندو نفس) .. أيه هو الشئ الأثمن من صحة المواطن؟ !! وليه الحكومة من أساسو تضع (جمارك) ورسوم وما عارف شنو على الدواااااء ؟يعنى الناس تموت وللا شنو؟ هو الدواء ده عندو وظيفة تانى غير العلاج؟ !! يعنى ممكن المواطن يشيلو ويعمل بيهو (حاجة تانية) مثلاً غير ما يتعالج بيهو ؟
المهم إزاء هذا الإرتفاع الفاحش فى أسعار الدواء وحتى يستطيع المواطن الغلبان من أن يتعالج (إن شاء الله ربع علاج) فالعبد لله يقترح على الأطباء مراعاة لظروف المرضى (الغلابه) إعتماد (الحوسة مصة) والتى تعادل وضع المريض (للحبة) داخل فمه ومصها لمدة (دقيقة واحدة) ثم إخراجها كوحدة علاجية (لمداواة الشعب الفضل) فى عموم البلاد (زى المليجرام وكده).
وبدلاً من أن يقوم الطبيب بكتابة الروشته موضحاً عليها الجرعة وهى (3 حبات فى اليوم) لمدة أسبوع يعنى (21 حبه) بالشئ الفلانى عليه تغييرها إلى (3 حوسة مصة فى اليوم) لمدة أسبوع وفى هذه الحالة يمكن للمريض أن يقوم بشراء حبة واحده يقعد (يحوس) ويمص فيها (الأسبوع كلو) !
أما أصحاب الدخل المهدود فيمكن تغيير صيغة الروشتة إلى (3 حوسة لحسه ) والتى تعادل وضع المريض (للحبة) داخل فمه ومصها لمدة (نص دقيقة فقط) ثم إخراجها وأهو (3 حوسة لحسات) أخير من الزول ذااااتو (يتلحس) !
هذا عند إستخدام (الحبوب) أما (الدواء السائل) والذى تتعذر شراء قارورته (كاملة) فيمكن بيعه فى الصيدليات عن طريق وضع القارورة على الكاونتر وتحويل محتوياتها إلى بخاخ مع وضع إعلان على الكاونتر يوضح (سعر البخة) ! هذا إذا لم يدخل إلى الصيدلية مواطن أشعث أغبر يصيح متسائلاً :
- يا جماعة ما عندكم نظام بتاع (نص بخة) وكده!

كسرة :
غايتو مع اللحم السعرو بيزيد كل يوم ده ح يجيكم يوم الواحد يستلف على (مرتبو) عشان يشترى ليهو أربعة (جرامحوسات) لحم !!


الرأي العام

تعليقات 12 | إهداء 1 | زيارات 4892

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#171009 [عقرب]
0.00/5 (0 صوت)

07-03-2011 12:48 AM
كمان البتاع يتباع بى (حوسة را س)!!!!!


#170964 [موجوع شديد]
0.00/5 (0 صوت)

07-02-2011 09:54 PM
انا غايتو مع اخونا القال لحمة مستعملة يعني ممكن كل تلاتة جيران يشتركو في ربع كيلو لحمة كل واحد يطبخ ويطلعو من الحلة يديهو جارو التاني لحدي مايخلص الشهر

لفه: غايتو الحترب بتشيلو المره اللسانا طويل دا لو فيها حترب اصلا


#170887 [مغبون]
0.00/5 (0 صوت)

07-02-2011 06:05 PM
يااستاذ انت شكلك مرطب لانو من زمان نحنا عايشين الوضع مجازفات وقدرظروفك يعنى لو مشيت حمامات المؤتمرالوطنى فى الاسواق حتلقى صابونة الحمام مقسمة قطع زى الشكولاتة وفى الاسواق والجامعات كل الشباب عايشين مسيح كريمات وبخ ريحة قدرظروفك وعادى ممكن تشترى من افخم صيدلية نص الدواء وعصيرالبلح الزجاجة فيها اربعة كبايات ممكن تشترى كباية اما اللحمة فخليناها للضبان لانو اغلب الجزارين شغالين قدرظروفك يعنى كييييييييييرى


#170877 [toto]
0.00/5 (0 صوت)

07-02-2011 05:45 PM
يا ود جبرة علي قولتك بدل قدر ظروفك ممكن نقلبها قدر حوستك وعلي هذا المنوال نقيس كل شئ عارف منو الح يغنو ؟؟ ناس المايكروسكوبات عشان دقة الشوف والوزن وكدا شفت كيف والله يكون في عون الشعب المايكروسوداني الفضل


#170859 [عبد الملك]
0.00/5 (0 صوت)

07-02-2011 04:57 PM
أفكار رائعة خاصة المعيار الكستبانى (بس جماعة قدر ظروفك يستحقوا براءة الإختراع ) .


#170854 [mahmoudjadeed]
0.00/5 (0 صوت)

07-02-2011 04:44 PM
ممكن جداً يا استاذ الواحد يشتري لحمه عديل كده ربع كيلو مثلاً ويعمل بيها شوربه يشربها ويبيع اللحم لأي زول ( لحم مستعمل وكده ) وكمان ناس يبلوا البلح ويشربو مويتو وينشفو البلح تاني ويبيعوه بعد ما يفقد طعمو ويبقى زي نشارة الخشب .

كسرة : أنا أقصد موية التمر العادية أي قبل التخمير والتبخير والتعريق وهناك أشياء أخرى يمكن تتفتق عبقرية الانسان لسد العجز في الميزانية وكما تعلم الحاجة أم الاختراع.


#170801 [abuamin]
0.00/5 (0 صوت)

07-02-2011 02:47 PM

و الله يا استاذ الليله دى قوية اتشرطنا من الضحك!!! تتصور من كترة الضحك لما اللوز ظهرت و النفس اتكتم و بدل الطلوع من فوق نفس مكتوم كده زى مية كيلو حوسه طلع بى تحت لما الحاجه جات مخلوعه و مزعوجه من الحصل !!!!! وزى ما قال الزول الكان سمح الليلة ما يوم السبت عطلة
وإصطباحية بى مزاج. أظنها بى ( قندو وزنة ) ودى إنت فاهما ............. كنت ظنيت الـلـوثـة الجات لاخونا صاحب الوالى ود الخدر... الما بنظلم عندو احد.... و.... الما رجع للزول الما انتحر..... كشكو... و...اولادو.... الطشو..... عثمان ميرغنى الليله _بعد الشر عليك_ جاتك !!!!


#170745 [Abdullah]
0.00/5 (0 صوت)

07-02-2011 01:17 PM
انت ماشي بعيد ليه , ماهو الطالب يغشي الصباح الدكان الجمبهن يملأ قلمو حبر ويمشي مدرستو والاخر يشيل فرشتو ويمشي يعبيها معجون ويمكن يتسوك قدام الدكان.
ولسه نقوله نعم ليك يالقائد الملهم !!!!!!!


#170734 [awooda]
0.00/5 (0 صوت)

07-02-2011 01:01 PM
يا راجل دكرتنا ايام السجاير تتباع بالحبة والسجارة زاتا يخمسوها خمسة لانة الجماعة طلبة وكدى والمدارس مجانن ومافى داعى اهلك يدوك مصاريف فطور ولا مواصلات لانة المدرسة جنب البيت


#170731 [الزول الكان سمح]
0.00/5 (0 صوت)

07-02-2011 12:56 PM

ياأستاذ جبرا

للللللللالالالالا..الليلة دى قويييييية مرة واحدة..واللا آآآآآآ..الليلة ما يوم السبت عطلة
وإصطباحية بى مزاج. أظنها بى ( قندو وزنة ) ودى إنت فاهما ...يالئيم!!!

والبصل يتعمل شرايح بأحجام مختلفة ويتباع زى شرايح موباتيل وزين وإم تى إن وسودانى ون.

وبتاعين الصيدليات حا يلصقوا إعلانات ( قَدِرظروفك) ويتباع البندول بالحبة والأموكسلين والتترا سايكلين( شراب ) وحقن الملاريا بالمللى وناس الأزمة يشتروا بخة صباح وبخة ومساء.

أما بالنسبة للحمة يقومو الجزارين يشرمطوها وتتباع بالسنتيمتر ..20 جنيه لكل سنتى

والأخيرة دى أنا ضَر بتها على كَسرتَكْ.


#170725 [bagera]
0.00/5 (0 صوت)

07-02-2011 12:47 PM
ههههههههههههه .... بالنسبة للجرامحوسات لحم ... نحنا ندعو الشعب السوداني عشان يكون نباتي .... والمشكلة إنو الخضار ذاااااااتو غلا.... خلاص نرجع للسخينة بالكسرة الناشفة ... وأهي وجبة وبتشبع ونتم الباقي موية ... والمشكلة إنو الموية زاااااااتا زادت ... أنا شايفة إنو نمشي الصومال بتكون رخيه أكتر... ولا شنو


#170719 [طارق أب أحمد]
0.00/5 (0 صوت)

07-02-2011 12:32 PM
إحتسنا معاك فى سوح الوحسه دى ألف حوسه

البنزين كيف قالوا باكر الجالون حيطلع لى عشره جنيه
واحد عندو 10مايكروحوسه فهم قال نحنا غلينا السكر عشان الناس البيشربوا البيبسى و بياكلو الكستر


الفاتح جبرا
الفاتح جبرا

مساحة اعلانية
تقييم
2.88/10 (16 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة