المقالات
السياسة
ارشيف مقالات سياسية
لا للعنصرية ونعم لاغلاق قروب اولاد امدرمان في الفيسبوك
لا للعنصرية ونعم لاغلاق قروب اولاد امدرمان في الفيسبوك
07-09-2011 09:52 AM

لا للعنصرية ونعم لاغلاق قروب اولاد امدرمان في الفيسبوك
اسامة مامون
[email protected]


يعيش السودان هذه الايام احداثا جسام وتحولا كبيرا انتهي بتقسيمه لدولتين شمال وجنوب في زمان تتوحد فيه دول متنافرة وتوحد عملاتها وانظمتها التجاريه والاقتصادية سعيا للوصول الى الاستقرار بكل جوانبه.

خطاب الكراهية المسموم والمتبني لعنصرية بغيضة تجاه الجنوبيين وكل من هو غير (عربي) هو في تقديري احد الاسباب المؤثرة والداعمة سلبا لاختيار الاخوة الجنوبيين لخيار الانفصال بدلا من الاستمرار في دولة يعيش موطنوها اوهاما تاريخية مشكوك في صحة اغلبها بالانتماء لقارة اخرى ولعرق لايحملون من جيناته المورثة ولا ملامحه شيئا ولا يتعدى انتماءهم حد استخدام تلك اللغه. وفي نفس الوقت يدعون بانهم اولاد بلد واصحاب حق لا يقبل النقاش في حكم بلد في قارة اخرى واقصاء ونبذ كل من ينتمى لثقافة السكان الاصليين ووصمها بالتخلف والاستعلاء عليهم والسعي لوضعهم في مرتبة ادنى من حيث التمتع بالحقوق السياسيه والاجتماعية والاقتصادية.
هي اذن عقلية استعمارية تسعى للقضاء على الاخر وابادته كما فعل الاستعماريون البيض في قارات العلم الجديد. المؤسف ان يتنامى هذا الخطاب البغيض محتميا بعباءة الاسلام والاسلام منهم براء والتكرار الممجوج بالادعاء لسماحة الاسلام ورفضه للتمييز ضد الاخرين من غير المسلمين مما لايستقيم عقلا مع واقع يباد فيه حتى المسلم من غير مدعي العروبه وما الحروب والجرائم ضد الانسانية في دارفور وجنوب كردفان وتاجيج النيران للحرب القادمة في النيل الازرق .

هذا الخطاب العنصري والذي يدعو للكراهية انتقل من خطاب سلطوي يبث سمومه عبر الحزب الحاكم جناح الخال الرئاسي او بعبارة اخرى الباب الاخر لنفس الحوش وكلابه التي تعوي وتسب وتشتم ليل نهار في الصحف الصفراء التي تفوح منها النتانه التي تزكم رائحتها الانوف الى الفضاء الاسفيري ومنتدياته ومواقعه المتعددة.
ففي احدى المجموعات الاجتماعية في موقع الفيسبوك للتواصل الاجتماعي والتي سميت باسم اولاد امدرمان وهي من مؤسسها براء. فالكل –الا من جهل-يعلم دور امدرمان كمدينة توحدت وانصهرت فيها اعراق واجناس من كل الارجاء وصارت نموذا في التحول من مجتمع القبيل والانتماء الصارم والاعمى لها الى انتماء للمكان كوطن يحمل ملامح مستمدة من سمات قبلية عدة. مما جعلها –اي امدرمان- تحمل عبئا ثقيلا في التأسيس لوطن كان مقداره مليون ميلا الى الامس. ـاسست الجمعيات والجماعت الثقافية وكانت نواة لاحقا للاحزاب الوطنية المتولدة من حراك الخريجين ومؤتمرهم وصولا للاستقلال.

اولاد امدرمان يقوم مؤسسها بسب الجنوبيين وتشبيههم بالاوساخ وبان امدر ستصبح نضيفة بعد الانفصال. وعندما رد عليه اعضاء المجموعة مستنكرين ما قاله وطولب بالاعتذار، رفض ذلك الامر واضاف بانه عنصري في غباء يشكر عليه لان العنصرية مرض اجتماعي وسبة ينكرها كل عاقل حتى ولو كان يمارسها في سلوكه ولكنها تندرج تحت المقولة الاثورة الشينة منكورة. غضب بالاعضاء لذلك وقام بعضهم بارسال تقرير للموقع بان المؤسس /الادمن لالموقع ذو توجه عنصري ولا يخفيه ويصرح به جهارا نهارا رغم انه يعيش على حسب المعلومات الموجودة في صفحته في الولايات المتحدة بولاية فيرجينيا مغفلا ان مايكتبه في صفحات الفيسبوك يمكن ان يؤدي حسب قوانين البلد الذي يعيش فيه الى مقاضاته وفقدانه لكثير من الحقوق التى ماكان بانكانه الحلم بها لولا نضال الامريكيون الافارقة في حركة الحقوق المدنية التي توجها تولي الرئيس الحالي سدة الحكم.
من هنا ادعو كل صاحب حساب في الفيسبوك عموما وابناء امدرمان خصوصا من قراء الراكوبه بالمبادرة بالدعوه لغلق القروب الذي يقوم فكر مؤسسه على العنصرية والكراهية. وسعيا للتوثيق ارفق لكم المعلومات التي تخص ادمن المجموعة وارائه التي يطرحها بدون خجل مع تعليقات اعضاء المجموعه.



Arabi M Mohamed …………………….. عربى محمد مكى محمد مهدى

Works at A 2 Z EXPORT L.L.C USA .KSA. UEA. BRK
Studied at el Bayan College for Science and Technology
Lives in Falls Church, Virginia
From Omdurman, Al Kharţūm, Sudan



اجمل شي امدر حترجع نضيفة بعد الانفصال
دايما النضافة بتكون من شنو؟؟
صح لسانك انا عنصرى شديد
يا جماعة هوي. دا راي وانا حر فيهو. ولو عندكم راي قولو لحكومتكم. أنا مع الانفصال. و عنصري. وين العيب. و تاني. انحنا اولاد بلد نقعد نقوم علي كيفنا
يا شباب لو فى ايو زوووووول زعلان و عاوز يفارق قروبنا طوالى اكلمنا هنا مافى داعى للزعل طوالى بنخلى اسافر

يا بيكا يا حبيينا انت ما عارف اولاد امدرمان ولا شنو ما بحنسو زوووول كلو كلو فا يعنى زووول ما عاجبو الحال بنرضيهو طوالى و مقشاشتنا جاهزة

الحمد لله تفكينا من الجنوب و البلد حتنضف بس ابعدو عننا بعيد الله افكنا من اذيالهم
الرجاء مشاهدة الجزيرة الان عشان تعرفو البلد حتنضف من شنو
من عنصريتى
 يا ... دا كان راى و ببساطة شديدة و من حقو راى ما يعجبو بس ما من حقو اقول اعتذر و انا ما بعتذر حتى لو حصل ايو شى و انحنا بالجد اولاد قلبا و لو قمنا بنقلبا
فا فا النهاية انا ما بعتذر واعلى مافي خيلك اركبوا





ردود اعضاء القروب

ادمن القروب/عربي...انت مطالب بالاعتذار عن كلامك عن امدرمان التي ستصبح نضيفه بعد الانفصال...,

الشتيمة في حق الجنوبيين وتشبيههم بالوساخ امر لا يشرف ام درمان واهلها...واكرر السباب لا يعد باي حال من الاحوال رأيا..


البوست دا غيرمقبول دينيا\" ولا أخلاقيا\"..دا قروب عام يجب أن تراعى فيه إحترام الشعور الإنساني العام..والتزام الذوق..كلنا خلقنا من تراب وسنعود إليه من دون تحديد عرق أو جهويه..ارجو من الأخ عربي الإعتذار..دي واجهة أولاد أمدرمان ومابصح نشوهها..
يا زول مالو كلامك بقي زي كلام نافع انت مادام عملت ليك قروب وسميتو امدرمان بجلالة قدرها ماتطفش الناسً منو ولو كنت فظا غليظ القلب لانفض الناس من حولك


بامدرمانيتي والله والله والله والله الزي رفع السماء بلا عمد لو قامت حرب بكره بين امدرمان وقبيلتي إلانا منها والله والله اقطع ليك رقاب كل القبيله عشان امدرمان والله بحبها لي درجه الجنون واجمل ما فيها وإلحاحه البتميزنا من غيرنا التنوع الثقافي والاندماج القبلي الفيها مع احترامي للجميع بس انحنا كلنا .... سودانين وامدرمانين

مع احنرامي للاج عربي من خلال مداخلاتك واسلوب طرحك لي قضايه مهمه للمصلحه العامه ..للاسف اختيارك للكلمات سوقي وفيه كثير من الالفاظ الشوارعيه زي اعمل رايخ ..لغة رندوك وزي ماقلته وتمنيت النظافه اتمني ان تنتقي الكلمات

ثقافة الاستعلاء و العجرفة هي زاته المؤخرة حالتنا بعدين امدرمان العاصمة الوطنية ولولا مزيج التنوع لما كانت امدرمان

انا بستغرب لسة فى عقلية رجعية فى جيلننا دا بتستمد مرجعيتة ما اشخاص مريضين لك الله ياوطن

فهم منسحبون و انا برضوا بضم صوتى معاهم يا حبيبنا والله اذا كان دى الفكرة من اولاد ام درمان

شباب سعدت عندما علمت بان هناك موقع لاولاد امدرمان و سعيت للانضمام اليه و لكن اذا كان الموقع يحرض على العنصرية و اثارة الكراهية و النعرات القبلية ... ارجو سحب طلب عضويتى منذ الان ولكم الشكر راي شنو يا اخ

يا عربي يا ود جدنا الخليفة مكي زي ما قال البعض نفسك حار اكتر من اللزوم الاخ الفاتح خليل وهو من ابناء الركابية واكبر منك سنا بمراحل وهو يمت للخليفه علي ودمكاوي والخليفة مكي بقرابة ، ده ما الموضوع وليس ذو اهمية فما تبقي مدير طارد للناس با

ارجو ان تفرق ...شتان ما بين السباب والراي...

تعليقات 9 | إهداء 1 | زيارات 4932

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#175638 [صلاح فضل السيد حامد]
1.00/5 (1 صوت)

07-10-2011 01:23 PM
يظهر أن صاحب القروب ما يعرف شئ عن أمدرمان خالص ونحنا إولاد الخرطوم وعارفين كل الأسر الخرطومية (العاصمة المثلثة) وبقول لأخونا إن أمدرمان هذه 90% من سكانها من إصول جنوبية بحته وهذه ما دايره نقاش وخذ مثلاً أخوتا الذين يسكنون جنوب العرضة ناس بانت والمورده والعباسية ديل كلهم من جنوب السودان وتحديداً من قبيلة الدينكا وعند ظهور المهدي سمعت قبيلة الدينكا بالمهدي وحكاية المهدي هذه تشبه إلى حد كبير معتقد عند قبيلة الدينكا إنه سوف يظهر شخص بمواصفات المهدي ويجب إتباعه وكما أسلفت عند سماعهم بالمهدي أتوا فرادا وجماعات وشاركوا في بناء أمدرمان ولله الحمد قد إنصهروا في المجتمع الامدرماني ويكفي ما قاله المؤرخ الأمريكي بهذا الخصوص بشأن التعايش ما بين العرب والأصول الأفريقية بالسودان وإنه نموذج يجب أن يحتذى .


#175308 [gazal]
1.00/5 (1 صوت)

07-09-2011 11:48 PM
دعوها فانها منتنة .. دعوها فانها منتنة .. دعوها فانها منتنة ..

صدق رسول الله صلى الله عليه وسلم ..صدق رسول الله


ردود على gazal
Sudan [شمالي زعلان] 07-10-2011 01:22 PM
بس اقول ليه لو على العنصريه انت مفروض يطلعوك من امريكا .. لانو رئيسها اسود


#175264 [اسامه مامون]
1.00/5 (1 صوت)

07-09-2011 10:14 PM
لعجز المدعو عربي ادمن المجموعه عن مقارعة الحجة بالحجة واحساسه بالهزيمة بعد قراءته للتعليقات على هذا المقال بموقع الراكوبة قام بحذف اسمي من قائمة اعضاء القروب. الخطوة التاليه هي اغلاق القروب وملاحقته حتى يمنع من الانضمام للفيسبوك والنظر في امرملاحقته قانونيا حيث يقيم من قبل المتضررين من دعوته تاعنصريه والمقيمين معه في نفس البلد عقابا على مايبثه من مشاعر الكراهية ضد الجنوبيين.


#175193 [amin]
1.00/5 (1 صوت)

07-09-2011 06:43 PM
دة ما بشبه أمدرمان و لا بشبه ناسها.


#175130 [حسين]
0.00/5 (0 صوت)

07-09-2011 03:35 PM
معليش لم يقرأ للاستاذ / شوقى بدرى / , وأولاد أمدرمان منهم الأصولو جنوبية ونوبية والاسر الكبيرة الكثير منهم جزوره من غربنا الحبيب وبعدين امدرمان تمددت أنظر لامبدة ومن فيها , فلنترك العنصرية .


#175047 [Kamal Mustafa]
0.00/5 (0 صوت)

07-09-2011 01:00 PM
السؤال اذا كان هو عربي أو ما عربي ده سؤال غير مهم ، فالعرب ليسوا من السودان من الاساس ، فالسودان يمثله العنصر الزنجي وسمي السودان بالنسبه لسواد لون بشرة أهله ، أما من يدعون انهم شماليين وانهم أهل بلد ، ديل متوهمين وامدرمان نشأت في عهد المهديه فاين اصول أهل امدرمان ، انهم من بقاع هذا الوطني الذي قسموه اليوم ، وكمدينة مدني وكوستي فهي مدن تمثل السودان الحقيقي نحن اخوان لاتفرقنا الالوان ولا الاديان ، فهذا الشخص العنصري واحد من اثنين يا انه اساسا غير سوداني أو يكون ابن حرام عديل كده وحاقد علي الجميع


#174956 [حامد ابوعبدالمجيد ]
0.00/5 (0 صوت)

07-09-2011 10:22 AM
تحياتي للراكوبه وناسها الحنان الجميلين

اتو متأكدين الزول عربي ده عاش وترعرع في امدرمان ماظنيت .دايما ناس امدرمان ومدني وكوستي بدون تحسس ماعنصريين والابداع العندهم في جميع النواحي الثقافية والاجتماعيه والسياسية سببو التمازج وروح المحبة والاحترام بيناتم ولو مفتكر انو انتماءك لقبيلة ممكن يرفع اسهمك او ينزلها فانت واهم وغلطان ومافي وسخ علا الكتبتو ده الجنوب انفصل بسبب الانطباع القالو سلفاكير بانو مواطن درجه تانية وهو نايب رئيس وقالو منى اركو مناوي مساعد حله مبسوط لذهاب الجنوب هلل وكورك باعلى صوتك بس بدون تجريح واساءة
ناس القروب الامدرمانييين وروك ليو بيان بالعمل والمفروض تخجل وتتفكفك من القروب لو عندك احساس ولو ماعندك نخجل ليك نحنا ديل وبكره خريطتكم المشرتمة دي بتتشرتم اكتر بس زيدو نفخ الكير ياشوقي بدري قتا بيسخرو من الفلاته اهو اضيف معاك الجنوبيين كمان تعال نضف ورا عمنا ده
تصبحوا علي وطن


اسامة مامون
مساحة اعلانية
تقييم
1.15/10 (9 صوت)





الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة