في



الأخبار
أخبار السودان
البرلماني المثير للجدل "دفع الله حسب الرسول" : أي زول خايف من مرتو يصم خشمو عليهو ويسكت.
البرلماني المثير للجدل "دفع الله حسب الرسول" : أي زول خايف من مرتو يصم خشمو عليهو ويسكت.
 البرلماني المثير للجدل


أنا خليني وأعفيني من السؤال ده.. أنا متزوج أكتر من واحدة
06-10-2013 07:47 AM
حوار - محمد إبراهيم الحاج

ذات صباح فوجئ نواب المجلس الوطني بنائب برلماني قصير القامة كثيف اللحية حاد النظرات، وهو يلوح بصورة المطربة المصرية "شيرين عبد الوهاب" أثناء اعتزام بعض الجهات تنظيم حفل جماهيري لها بالخرطوم، وطالب - وقتها - بمنع من سمَّاها بالـ (المرأة) من الحضور للسودان، وأغلظ - ساعتها - في انتقاد الجهات الشعبية والحكومية المنظمة للحفل.. ثم تتالت بعد ذلك تصريحاته التي اعتبرها البعض انصرافيّة ولا تخدم المصالح العامة في شىء، فيما رأى آخرون أنه يبحث عن فرقعات إعلامية. ورغم كل النقد الذي قوبل به الشيخ "دفع الله حسب الرسول" من الصحافيين وكتاب الرأي، إلا أن عزمه لم ينقص (مثقال تصريح) في مواجهة كثير مما يراها قضايا ملحة ولا يمكن السكوت عليها.. بينما يراها آخرون غير ذلك ولا تعدو أن تكون مجرد قضايا (انصرافيّة) و(غير واقعية).. وآخر ما صدر عن الشيخ "دفع الله" - الذي يقول عن نفسه إنه فعل لأهل دائرته ما لم يفعله غيره، وذهب مجاهداً أكثر من (11) مرة - كانت دعوته إلى تعدد الزوجات حتى ينجبوا الأبناء القادرين على الدفاع وحماية البلد.
(المجهر) حاصرت النائب البرلماني بأسئلة واستفهامات ساخنة جداً.. رد على أغلبها بغضب شديد وصل حد أن حمل حقيبته وهدد بإلغاء الحوار.. فكيف سألناه.. وبماذا رد؟ هذا ما تطالعونه في المساحة التالية:

{ ماهى الدوافع الحقيقية لإطلاق دعوتك لتعدد الزوجات؟
- أنا قلت البلد مستهدفة، وحفظاً للأرض والعرض والدين وأرواح الناس لا بد أن يكون هناك مجاهدون ومقاتلون.. و(ديل) مصانعهم هي الزواج، وهذا الحديث لم أقله أنا، بل قاله الله سبحانه وتعالى، وقاله الرسول (ص)، و(أي زول خايف من مرتو يصم خشمو عليهو ويسكت لأنو ده كلام دين).
{ هل من الممكن أن يكون ما دفعت به حلا لضائقة العنوسة؟!
- بالطبع ما في شك.. هسّه أدخل الوزارات، حتلقاها كلها مليانة بنات في غاية الأدب والجمال والحشمة، وأعمارهن تتجاوز الثلاثين وتقارب الأربعين.. ديل بيتزوجوهم أولادنا؟! ديل نحن البنتزوجهم... والناس العندهم زوجات هم البيعرسوهن، والإسلام ده عندو حل لأي مشكلة.. مشكلة البنات الفائضات الما لاقيات الزواج ديل نتزوجهم نحن المتزوجين ديل.. أصلو ما في صحابي عندو زوجة واحدة.
{ وإنت متزوج كم؟!
-أنا خليني وأعفيني من السؤال ده.. أنا متزوج أكتر من واحدة.. بس أنا عايز أقول ليك نحن الآن دخلت علينا الفيديوهات وغيرها وثقافة المرأة الواحدة.. وهذا يضيع دينكم وعرضكم وببوِّر بناتكم.
{ هل تعتقد أن القضية الأكثر إلحاحاً الآن في إنجاب أكثر عدد من الأبناء للانخراط في جبهات القتال؟
- نحن شوية.. والعالم كلو ضدنا.. أمريكا وإسرائيل وأوروبا والكنائس العالمية كلها ضدنا، ناس الجنوب والحركات الثورية ضدنا...نحن قدر شنو الآن؟ لازم (نلد كتير).. الآن أمريكا أكبر جيش في العالم تستخدم المرتزقة حتى يقاتلوا.. وعندما فُتحت جبهة قتال الطلاب اضطروا يقفلوا الجامعات ويشيلو بنادقهم ويمشوا يقاتلوا.. لازم نعمل احتياطاتنا لكل شيء.
{ بعض المراقبين يقولون عن دعوتك: معقول ننتظر (18) سنة عشان نحرر (كاودا) بيقولوا ده فهم عقيم؟
- الناس هسه بيتزوجوا، وقبل كده بيتزوجوا، والدعوة ماشة.. والحرب ليها خمسين سنة ماشة، لازم تعمل إستراتيجتك.. كل الناس البيعارضوا في المسألة دي أنا متأكد أنهم بيخافوا من نسوانهم، وفيه ناس متزوجين من داخل الكنيسة.. وبيصارعوا فينا، وكلامك ده ما صاح.
{ الأمر ليس قضية كثرة.. ولكنك دائماً ما تثير الجدل حولك بقضايا انصرافية كما يقول البعض ؟
- بعض الصحفيين تقول له "علي" يسمعها "عبدالله".. تكتبها "زينب" ويقرأها "ست الدار".. ما عندهم فهم، إنت حتعمل شنو.. (انصرافية) يعنى شنو؟! هسه دى قضية انصرافية؟!
{ أنت يا شيخ "حسبو" تختزل كل قضايا البلاد في المرأة، مثلاً عند قدوم "شيرين" نعتها بأقذع الأوصاف.. وعند غزو قوات الجبهة الثورية لأم روابة و(أبوكرشولا) أرجعت السبب في ذلك للعب النساء للكرة، وسبق أن أثرت قضية الواقي الذكري، وأنت الآن تدعو للتعدد.. وكلها قضايا يراها الكثيرون هامشية، مقارنة بما تعانيه البلاد الآن من مشاكل سياسية واجتماعية واقتصادية ملحة وعاجلة؟
- أولاً الواقي الذكري ده شغلانية بتاعة أمم متحدة، عايزين يشيعوا الفاحشة في السودان، وبيقسموهو في الجامعات للطلاب والطالبات.. نحن نسكت على الكلام ده؟ جاوب إنت؟!
{ بس أنا المفروض أسأل وأنت المفروض ترد؟
- ده بيشيع الزنا.. وأنا ما حأكمل الحوار لو ما رديت عليّ!
{ (وقتها حمل الشيخ "دفع الله" متعلقاته وغادر المكان ثم أعدته مرة أخرى إلى طاولة الحوار وهو يفور غضباً.. ثم استرسل):
- (أنا بقول ليك ديل ما عندهم أخلاق، بيبيعوا الواقي الذكري لابنتك وأختك في الجامعة.. ماذا يعني ذلك؟! معناها أمشي أزني.. ده نسكت نخليهو وتقول لي قضية انصرافية؟! أي زول بيقول دي قضية انصرافية ده زول ما فاهم.
{ نحن في حوار وأنا أطرح الأسئلة التي تدور في الأذهان.
- أنا هسه بسألك: هل بترضى انو يبيعوا الواقي الذكرى لبنتك ولا أختك؟ الما بترضاهو لي نفسك لا ترضاهو للآخرين.. وبعدين لما احتلوا هجليج سقط الشهداء والجرحى والأسرى، وديل جايبين "شيرين" عشان تغني في دار الرياضة.. ده شنو ده؟! ناس يموتوا وناس يرقصوا بالليل؟! ده أدب.. ده ذوق.. دى رجالة!! ده كلام فارغ، تتكلم في قضية زي دي يقولوا كلامو كلو في المرأة.. في الدين ما في حاجة اسمها قضية انصرافية.. لقيت حاجة ما كويسة تصلحها.. الأمم المتحدة فرضت علينا رياضة النسوان.. بنات يلبسن (هناي) ويمشن يلعبن في أوروبا وأمريكا هل تسكت على ده؟!
{ هناك قضايا أكثر إلحاحاً كان عليك طرحها من موقعك كنائب عن الشعب؟!
- لا توجد قضايا أكثر إلحاحاً.. ده كلام ناس علمانيين وكلام بتاع ناس انصرافيين.. الشوكة دي لو لقيتها في الطريق تشيلها من الطريق.
{ ألا ترى أن محاسبة المقصرين في الجهاز التنفيذي ومحاربة الفقر والعطالة وغيرها أهم؟
- والبنتكلم فيهو ده شنو.. ده جهاز تنفيذي، كونو تلعب الفتيات كرة القدم ده تقصير جهاز تنفيذي.. كونو يتم توزيع الواقي الذكرى ده تقصير جهاز تنفيذي. أنا أتكلم عن قضايا ترتبط مباشرة بمعيشة السواد الأعظم من الناس، مثل الفقر وغلاء الأسعار والعطالة والتجار والمضاربين بقوت الشعب والإخفاقات الأخرى الكثيرة.. هذه قضايا تمس الناس بصورة مباشرة.. أنا مشيت الجهاد (11) مرة.
{ في الجنوب ولا دارفور؟
- دارفور دي مشيتها عشرين مرة، مشيتها داعية.. مشيت جنوب دارفور ووسط دارفور وكلمت المسلمين.. ومشيت الجنوب (11) مرة كمقاتل، إمّا نسكت على الغلط أو يقولوا لينا قضايا انصرافية!!
{ عدد كبير من الكتاب والصحفيين وقادة الرأي اعتبروك مفجراً لقضايا غير حقيقية؟!
- نحن ماعندنا كتاب أعمدة.. مشكلتنا ما عندنا كتاب أعمدة إلا قليل جداً تحسبهم على أصابعينك.. الباقي كلو أي كلام، بيكتبو كلام يمكن يكون كلام زول ما واعي ولا ناضج.. في صحفي كتب فيني اتهامات فتحت فيهو بلاغ هو ورئيس تحرير الصحيفة.. جاءوا بعد ذلك يعتذروا.. وقالوا نحن المحامي بتاعنا عيان، والقاضي أداهم أسبوع، ونصحهم قال ليهم أمشوا صالحوه ولو ماصالحتوه حيدينكم.. أنا لو بفتح بلاغ في أي صحفي والله كلهم أختهم في السجن!!
{ بتفتكر إنو كلهم غلطوا عليك؟!
- طبعاً.. طبعاً.. أرجو أن لا تحرف إنت برضو كلامي دا.
{ البعض يرى أنك تحاول خلق إثارة حولك من قضاياك التي تثيرها..
- ده كلام دين.. ده ما كلامي أنا.. كونوا الزول يتزوج تاني وتالت ورابع ما قلتها أنا قالها الله سبحانه وتعالى ..عشان تجيبوا شباب يحموا ليكم أرضكم دى، وإلا أرضكم حتضيع ودينكم بيضيع، وأعداؤكم يلدوا ساي من غير عدد وإنتو قاعدين.. أي امرأة تمت خمسين سنة مفروض راجلها يعرس فوقها عشان يجيب أولاد.
{ هل مشكلتنا الآن أصبحت فقط في كثرة دخول الشباب للجيش؟
- نحن في السودان ما عندنا مشكلة سلاح، ولكن منو البشيل السلاح، خدها معلومة مني إنو نحن عايزين رجال..
{ الناس في الدول الأخرى ينجبوا الأطفال ليعلموهم ويوفروا لهم حياة كريمة وأفضل.. لماذا تفترض أن حروبنا سوف تستمر عدة قرون بدلاً من ان ننعم بالأمن والسلام والطمأنينة؟!
- الناس تتكاثر عشان تتعلم وتنتج وتدافع عن بلدها .
{ كيف ترد على حديث وزير الصحة الذي قال إن من سمَّاهم بـ (الدروايش) هم من يسعون إلى منع الواقي الذكري؟
- الواقي الذكري يوزع بين الطلاب في المدارس.. معناها أمشوا مارسوا الزنا.
{ نعم، ولكن من يمارسون الزنا قد يتعرضون لأمراض قاتلة، فهل يكون جزاؤهم الموت لارتكابهم تلك المعصية، ويمكن أن يتم تقويمهم بعد ذلك ليكونوا أفرادا صالحين في المجتمع؟
- من يزنى إن شاء الله ربنا يقتلوا الليلة وليس غداً.. لكن أنت كمسؤول تجيب حاجات زي دي وتوزعها على الطلاب لتمنع عنهم المرض.. هو في الحقيقة ليس ليمنعهم من المرض ولكن ليمنعهم من الحمل.. ودي إشاعة للفحشاء..
{ طيب قاصد شنو بالدراويش.. هل بتفتكر إنو بيقصدك بالكلام ده؟!
- لست وحدي، ولكن فيه كتير من العلماء اتكلموا في المسألة دي.
{ طيب بصفتك أحد الذين تحدثوا في هذه المسألة بماذا ترد؟
-الكلام ده ما صحيح.. الواقي الذكري ده خليهو يكون في الإجزخانة.. الداير يتم الرضاعة ممكن يستخدموا.. والمريض الذي لا يريد أن يعادي زوجته يمكن أن يستخدمه، ولكن لا يوزع بين الطلاب في الجامعات.. أنا عندي دليل قاطع إنو بيتم توزيعه في الجامعات.. عندي مستندات إنهم جوا للطبيب في الجامعة وقالوا ليهو عايزين نجيب الواقي الذكري للأولاد.. قال ليهم: لا مفروض توافق الجامعة...وأنا لما قلت الكلام ده أحضروا الطبيب وسألوه هنا في المجلس، وقال الكلام ده صحيح.. وهناك طبيبة أتت له ولكنه رفض استلام الواقي الذكري منها إلا بعد موافقة الجامعة على ذلك، والجامعة طبعاً ما حتوافق.. لكن فيه جامعات حتوافق.. هناك جامعات غير الفساد ما عندها شغلة.
{ ننتقل إلى محور آخر هل تعتقد أن الدائرة التي أتت بك إلى البرلمان قد أعطيتها حقها كاملاً ومستحقاً.
- الدائرة التي أتت بي إلى البرلمان هي دائرة أم درمان الرابعة، وهي دائرة حضارية جداً وأهلها فاهمين.. من ناحية دنيا حفرت فيها سبعين بئراً، وعامل فيها قرابة الخمسين مسجداً وأدخلت فيها الكهرباء لعدد كبير من القرى، وأجلسنا كل الطلاب وساعدنا الناس خارج السودان ووزير المالية - وقتها - "غلام الدين عثمان" قال لي: أنت مثال للنائب ومعجب بأدائك وأتبرع ليك بي ثلاثين مليوناً.. وحفرت بيها سبعة آبار.
وأنا عاهدت الناس الانتخبوني إنو أنا مع الفضيلة وضد الرذيلة ما زي البيقولوه بعض الصحافيين.
{ ولكن بعض الصحافيين وكتاب الرأى الذين انتقدوك هم كتاب معروفون وقيمتهم كبيرة في الصحافة السودانية؟
- والله ماعندهم قيمة.. في زول عندو دين بيهاجم الشريعة وبيهاجم الدين؟!
{ البعض يرى أن لدينا قضايا مصيرية مثل الفقر والتشرد والنزوح، ويرى أنك صوت للحكومة لإلهاء الناس عن تلك القضايا؟
- أنا بتكلم إنو الناس عندهم دين وأخلاق وما نستورد مغنيات يجوا يغنوا في الخرطوم، والرجال يتزوجوا عشان ينجبوا أبناء لحماية الأرض دي هويتنا.
{ ولكن حتى "شيرين عبد الوهاب" التي انتقدتها جاءت قبل ذلك في حفل (فور دارفور) وتبرعت بآلاف الدولارات لنازحي دارفور.
- إن الله طيب لا يقبل إلا طيبا.. ناس دارفور مستغنين عن قروش تجي بواسطة الرذيلة.. امرأة متعرية بتغني قدام الشباب.. دي قروش رذيلة لا يقبلها الله.. حتى الزول المشى الحج بمال غير حلال ويقول لبيك اللهم لبيك.. الملائكة تقول ليهو لا لبيك ولا سعديك مالك حرام وحجك مردود اليك..
{ دي قضايا إنسانية و.....
- مقاطعاً: ياخ عليك الله ما تقول لي قضايا إنسانية.. هسه الواحدة تمشي تزني وتتبرع بقروشها وتقول قضايا انسانية!! واحدة بتغني والغناء ده شنو؟ بيقتل قلوب الشباب وبيميع أي حاجة.. وناس دارفور بريئين منها..
{ إذن بنفس منطقك هل يمكن أن نعتبر أموال المنظمات الاجنبية حرام؟
- نحن عندنا مقياس وعندنا دين بنقيس بيهو..
{ ماذا عن أموال المنظمات الأجنبية؟
- دي مجهولة الأصل، لكن دي - بتاعة "شيرين" - ما مجهولة.. زول عمل حفلات واتبرع بالقروش لي دارفور.. هل دارفور محتاجة لـ (وسخ) بالشكل ده.. دارفور دي المنطقة الوحيدة الما فيها مسيحي واحد.. تمشي تجيب ليها أموال المغنيات؟!
{ هل الأفضل الأموال التي تأتينا من مسلمين أم من مسيحيين.. "شيرين عبد الوهاب" مسلمة وكثير من المنظمات مسيحية.. أيهما أفضل؟!
- أموال "مصر" بنحبها، وبنحب رئيس مصر جداً، لكن مغنيي مصر حاجة تانية.. ليتني كنت شعرة في لحية "محمد مرسي".
{ أنا أتحدث عن شيرين العربية المسلمة؟
- الغلط ده غلط.. إذا كان مسلم أو غير مسلم..
{ ولكن الغناء يثير حماسة الناس ودوره كان كبيراً في حركات التحرر الوطني من المستعمر؟
- الغناء زي الكلام.. فيه الحلال والحرام.. وأنا ما بقول الغنا حرام..
{ اذا أخذنا هذا المنطق، فمن المفترض أن نكون نحن كمسلمين أفضل الناس، والغرب الكافر والمسيحي هم أسوأ الناس؟
- أنت كمسلم تهدي النصر لأعدائك بمعاصيك.. وليس بعد الكفر ذنب.. الكفار ماعندهم ذنوب..
{ يعنى ليهم الدنيا ولينا الآخرة؟
- لا، الدنيا لنا والآخرة أيضاً لنا.
{ هل تعتقد أننا قد حزنا على نصيبنا من الدنيا؟
- أي زول بيدعو لي فضيلة هناك صحفيين ينتقدوونه.. الإساءة التي يوجها لي صحافيون اعتقد أن فيها محمدة ولو لاقيتهم حأديهم هدية.. نادينا بمنع "شيرين" من الغناء.. منع البنات ما يلعبن كورة.. منع القمار في الشركات.. الرجال يتزوجوا أربع عشان يجيبوا مجاهدين...
{ ولكن قضايانا ليست كلها مرتبطة بالمرأة لدينا قضايا حياتية؟
- ما تقول نحن عندنا أشياء حياتية.. الدين شامل لكل شيء، شرابك للمياه.. الجهاد والصلاة والحج.. كلها أشياء من الدين.. نحن ما عندنا زي المسيحيين ما لله لله وما لقيصر لقيصر.. نحن كل شىء عندنا لله.
- محور أخير.. هل جاء "دفع الله" إلى البرلمان بوصفه داعية أم رجل سياسة يبحث عن وضع أفضل لأبناء دائرته التي دفعت به إلى المجلس الوطني؟
- مشكلتك بتفرق بين الداعية والسياسي.. الناس الفي المجلس الوطني ديل كلهم لو قلت ليهم إنتو ما دعاة سياسيين حيشاكلوك.. وفي الإسلام لا يوجد فرق.. والسياسة إدارة شؤون الناس بطريقة حكيمة.. وربنا يقول: (وَمَنْ لَمْ يَحْكُمْ بِمَا أَنْزَلَ اللَّهُ فَأُولَئِكَ هُمُ الْكَافِرُونَ). كيف تقول ما في سياسة في الدين؟
{ الداعية مهمته تبصير الناس بأمور دينهم.. ومهمة السياسي المنافحة والمدافعة عن قضايا الناس.
- ده فهمك انت.
{ الشيخ "دفع الله" حوّل البرلمان من جهاز لمراقبة الجهاز التنفيذي إلى جهاز لمراقبة الناس ومراقبة المجتمع، وهو تحور خطير في أداء الجهاز التشريعي الرئيسي بالبلاد؟
- انا كنائب أسكت عن الواقي الذكري مثلاً؟! لا يوجد حاجة اسمها دين أو سياسة.. الواقي الذكري بيشيع الفاحشة بين الناس.. ودي قضايا بتهم الناس.. ووزارة الصحة - يا أيها الصحفي المحترم - توزعه بين الناس.
{ حتى الآن لم ترد على سؤالي حول مراقبة الناس والمجتمع والمرأة بدلاً عن مراقبة أداء الحكومة؟
- جانا "أسامة عبد الله" وقال داير يعمل سد مروي وجايبين قروض، أنا النائب الوقفت وقلت القروض دى لا تجوز.. دى هسه ليها علاقة بالمرأة؟! أنا اتكلمت في الكلام ده واتكلمت في المياه..
{ حاجة أخيرة.. بعض الشباب في (الفيس) صمموا صفحها اسمها (حسبو نسوان) ما هو تعليقك؟!
- ما شفتها ولاعايز أشوفها.


المجهر السياسي






تعليقات 44 | إهداء 0 | زيارات 10547

التعليقات
#693440 [ود أمريوم]
0.00/5 (0 صوت)

06-11-2013 01:39 AM
*قال رسول الله صلى الله عليه وسلم: (إنما أخاف على أمتي الأئمة المضلين).

*قال رسول الله صلى الله عليه وسلم: (يوشك الأمم أن تداعى عليكم كما تداعى الأكلة إلى قصعتها فقال قائل ومن قلة نحن يومئذ قال بل أنتم يومئذ كثير ولكنكم غثاء كغثاء السيل ولينزعن الله من صدور عدوكم المهابة منكم وليقذفن الله في قلوبكم الوهن فقال قائل يا رسول الله وما الوهن قال حب الدنيا وكراهية الموت).

*قال رسول الله صلى الله عليه وسلم: (يجاء برجل فيطرح في النار، فيطحن فيها كطحن الحمار برحاه، فيطيف به أهل النار فيقولون: أي فلان، ألست كنت تأمر بالمعروف وتنهى عن المنكر؟ فيقول: إني كنت آمر بالمعروف ولا أفعله، وأنهى عن المنكر وأفعله).

*قال رسول الله صلى الله عليه وسلم: (يخرج في آخر الزمان قوم أحداث الأسنان سفهاء الأحلام يقرؤون القرآن لا يجاوز تراقيهم يقولون من قول خير البرية يمرقون من الدين كما يمرق السهم من الرمية).

*قال رسول الله صلى الله عليه وسلم: (ألا أخبركم بخيار أمرائكم وشرارهم, خيارهم الذين تحبونهم ويحبونكم وتدعون لهم ويدعون لكم وشرار أمرائكم الذين تبغضونهم ويبغضونكم وتلعنونهم ويلعنونكم).

*قال رسول الله صلى الله عليه وسلم: (اسمعوا هل سمعتم أنه سيكون بعدي أمراء فمن دخل عليهم فصدقهم بكذبهم وأعانهم على ظلمهم فليس مني ولست منه وليس بوارد علي الحوض ومن لم يدخل عليهم ولم يعنهم على ظلمهم ولم يصدقهم بكذبهم فهو مني وأنا منه وهو وارد علي الحوض).


***اللهم صلي وسلم وبارك عي سيدنا محمد وعلي اله وصحبه وسلم***


#693413 [كاك]
0.00/5 (0 صوت)

06-11-2013 12:28 AM
كان من المفوض من المحاور ان يحمل معه شريط فيدو عن رقيص البشير في حفلة زواج وسط النات وهويكشف ويسأله عن رأيه في رقيص البشير


#693391 [من الآخر]
0.00/5 (0 صوت)

06-10-2013 11:34 PM
نعم اتفق مع بعض ارائك الدينيه (يعني حسب علمي والله اعلم) لكن ان تنتقي هذه الامور دون سواها وبهذه الطريقه يضع مليون علامه استفهام
لو صحيح لا تخشي لومه لائم في الله تحدث عن (الظلم , الفساد , الامام الجائر , ...)

لم ولن تفعل و اتحداك وبالامس القريبه قالها مولانا سيف الدوله (سراديق العزاء في طول البلاد وعرضها لقتلي ابوكرشولا وقاده الدوله مبتهجين بتكريم (والي) المريخ ) اين كنت يا (شيرين)؟


هوووووووووووووووووووووووووووووووووووووووووووس ليس إلي


#693359 [abusafarouq]
0.00/5 (0 صوت)

06-10-2013 10:23 PM
قال دفع الله حسب الرسول...( ما لله لله وما لقيصر لقيصر.. نحن كل شىء عندنا لله ).
بتلك المقولة والاسلوب والمنطق أكلو البلد هذه هى الجهل والمصيبة نسبو كل شيىء لله أباحو المحرم وحرمو المباح وأكلو مال الشعب تزوجو بها الحريم مثنى وثلاث ورباع وركبو بها الفارهات وبنو بها القصور القيصرية الفخمة وحجو بها بيت الله المحرم كل ذلك منسوب لله بإسم الدين والشريعة لكنهم كذبو عندما يقولو لله هى للقيصر وحاشيته الطبالين هذا هو الصحيح . والمسكين محمد أحمد يبحث عن لقمة العيش الحلال بين فكوك الحواشى المنتفعين الحرامية لك الله الذى لايهمل ولايهمل ياوطن ...


#693306 [حلفاوي]
5.00/5 (1 صوت)

06-10-2013 08:51 PM
ايها المدعي بالشيخ ما فائدة ان تكثر من النسل من اجل الجهاد وحفظ لارض والدين لانكم مستهدفين
اذا امريكا والغرب حيدمروا البلد من البحر والجو وبعد ما كل نسلك ومجاهدينك في خبر كان انت لسع من زمن البندقية والمجاهدين يا عنتر زمانك


#693304 [sudani]
0.00/5 (0 صوت)

06-10-2013 08:50 PM
الشيخ دا عندو واحد قريبه بعثى فضلوه صالح عام وقام إتوسط ليهو عند عمر البشير ورجعه للعمل بقرار جمهورى عشان أهله ضغطوا عليه عشان يفوز فى المجلس الوطنى يعنى دا زول منافق وكذاب


#693299 [على الفضل]
0.00/5 (0 صوت)

06-10-2013 08:42 PM
شباب دا الرابط لصفحة حسبو نسوان على الفيس بوك,, اعملو شير

facebook.com/pages/%D8%AD%D8%B3%D8%A8%D9%88-%D9%86%D8%B3%D9%88%D8%A7%D9%86/421155367983036


#693282 [حواتي]
0.00/5 (0 صوت)

06-10-2013 08:27 PM
قريت الحوار كلو مافيهو ولا حرف عن الفقر والغلاء والمعيشة الضنكة مع ان الصحفي اورد ذكرها عدة مرات وكل مرة شيخ حسبو يروح الموضوع..بالله ناس امدرمان الرابعة انتخبوك عشان تشوف مصالحهم وتكونو صوتهم ولي عشان تفتي في النسوان؟؟ لو كانو دايرين داعية كان بقوك امام مسجد ماعضو برلمان!!
وبعدين اذا كان الشباب عازف عن الزواج عشان الغلاء والعطالة التعدد يجي من وين في زول قادر يفتح بيت واحد عشان يعملهم اربعة بيوت كمان؟؟ الا التعدد بس حصري علي الجيوب المليانة؟؟ الاولي كان تقول نعمل مشروع للشباب الغير متزوج حتي يكمل نصف دينة ونسهل عليهو مصروفات الزواج والسكن عشان لا يحتاج لي واقي ولاينقل مرض ولا يزيد اطفال المايقوما...
سؤال عرضي:لو كان نتيجة تعدد الزوجات الاناث اكتر من الذكور ساعتها تعمل شنو يامولانا؟؟
ياجااااااااااااااهل


#693248 [سوداني مبارك]
5.00/5 (1 صوت)

06-10-2013 07:19 PM
سيناريو بسيط يا شيخنا لو في واحد عندو ايدز لفي علي بنتك او بنت من اسرتك فهل تفضل ان تصاب بالايدز لانه لم يستعمل الواقي و تفضل اصابتها بالمرض عقابا لها علي فعلتها ,علما ان اخترت الاجابة بنعم فانك تركت فردين مسلمين مذنبين(يمكن ان يتوبا الي الله) يموتان وبالتالي قللت تعداد الامة الاسلامية التي تخاف عليها وتدعو الي تكاثرها لمواجهة المخاطر
اليس من باب اولي ان تدعو الي طرق اكثر نجاعة من طريقتك العقيمة وتحلل اموالك التي هي من مال المسلمين والشعب .


#693218 [حليم - براغ]
5.00/5 (2 صوت)

06-10-2013 06:26 PM
مفروض يسموك بدل حسب الرسول نسوان!! يسموك حسب الرسول الخنيث !!!كلامك قبيح متل وشك الشين ده!! الظاهر إغتصبوك نسوان بعود كبير قبل كده !!وله تكون إشتغلت معرص قبل ما تبقي نائب برلماني و إغتصبك خنيث معرص متلك !! بعدين إنت رئيستك سامية بتحبها وله مابتحبها عفنة وله ما عفنة !! عشان كده بتكره النسوان !! بيقولوا السواي ما حداث.. برلمان من ناس المحجوب ومبارك زروق ومحمد نوالدين والشيخ علي عبد الحمن والشريف الهندي !! وغيرهم من العظماء !! إلي الكلب حسب الرسول وسامية محمد أحمد ..فعلا أصبحنا شعب لا قيمة له في هذه الدنيا...


#693205 [samisuh]
4.50/5 (2 صوت)

06-10-2013 06:09 PM
الذى يقول الحق فى هذا الزمان يصير غريبا"


#693192 [انور مطر]
5.00/5 (1 صوت)

06-10-2013 05:54 PM
ومن لم يحكم بما انزل الله فاولئك هم الكافرون ) لو قارنا ممارسات برلمان الذي ينتمي علية حاج دفع الله ما الاية اين موقعه من الاية هل هو كافر ام مسلم برلمان يجيز القتل والاغتصاب والزنا جرائم ابادة جماعية هذا هو العدالة الاجتماعيه لحاج دفع الله اقول في تقديري الشيخ فساد وفي وقت راهن برلمان سوداني افسد برلمان علي عالم الاتخجل يا الشيخ


#693078 [حمدان جمعه]
0.00/5 (0 صوت)

06-10-2013 03:16 PM
نحن بنات مصر بنحبهن وبنحب غناهن لكن مابنحب قروشهم عشان معونه امريكيه


#693064 [hazim]
3.50/5 (4 صوت)

06-10-2013 02:59 PM
تساءلت كثيرا لماذا الشيخ حسبو مستهدف و تصريحاته دائما مثيرة للنقد و السخرية,فوجدت الرجل له من الاسباب ما يحسد عليه, اولا هو رجل فحل و كامل الفحولة(بدليل انه متزوج اكثر من واحدة) فى هذا الزمن الذي اقل ما يقال عنه هو زمن الرجولة المنكوبة..ثانيا هو رجل غيور لدينه و عرضه و وطنه فى زمن يقرط فيه الرجال حتى في اغلى ما يملكون...لك التحية شيخنا حسب الرسول انت على الحق طالما كثر اعداءك فى هذا الزمن,و ما اكثر الناس و لو حرصت بمؤمنين


ردود على hazim
United States [موسي صالح] 06-10-2013 05:21 PM
من تعليقاتك التي اتابعها ثبت لي مدي تعقلك وقياسك للامور بشكل معرفي دقيق والرد باسلوب متحضر وبعيد عن الاساءه اشكرك اخي حازم


#693063 [حسان الكسلان.]
5.00/5 (1 صوت)

06-10-2013 02:59 PM
وليه نعمل علي التجهيز للحروب?
وليه مانعمل ونجهز للسلام وهو من منهج الإسلام?
بتعليم الأجيال القادمه معني الوطنيه وإحترام القانون
والعداله الإجتماعيه .
إننا نفتقد أبسط مقومات الحياه الكريمه
أزيلوا الظلم واعتمدوا علي الله. فغير المعقول أن نري الظلم وتتكلمون
عن العداله.


#693054 [ابن السودان]
0.00/5 (0 صوت)

06-10-2013 02:49 PM
الشيخ يتحدث بما جاء فى الكتاب الكريم و السنة عن الحدود واحدهما الزنا .يقول الله تعالى :
قال الله تعالى: (ولا تقربوا الزنى إنه كان فاحشة وساء سبيلا) الإسراء/32،
((ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي النَّاسِ لِيُذِيقَهُمْ بَعْضَ الَّذِي عَمِلُوا لَعَلَّهُمْ يَرْجِعُونَ))
عن ابن عمر رضي الله عنهما مرفوعا: " ثلاثة قد حرم الله عليهم الجنة: مدمن الخمر والعاق والديوث الذي يقر في أهله الخبث " رواه الإمام أحمد .
جزاك الله شيخنا ووفقك لما فيه الخير والصلاح للكل.
ونرجو من الاخوة الترفع وعدم الاساءة للشيخ .
" مَا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ" (ق، الآية: 18)

عن رسول الله -صلى الله عليه وسلم- أنه قال:

((إِنَّ العبد ليتكلّم بالكلمة -مِنْ رضوان الله- لا يُلْقِي لها بالاً، يرفعه الله بها في الجنة, وإن العبد ليتكلم بالكلمة -من سَخَط الله- لا يُلْقِي لها بالاً، يهوي بها في جهنم))


ردود على ابن السودان
United States [ابن السودان] 06-11-2013 01:21 AM
يا أهل الراكوبة ، هذا الإسم الذي أستخدمه في مداخلاتي ، وقد تفاجأت بمن يكتب بنفس الاسم ...؟؟؟ لذا أعلن من اليوم ، أنا ابن السودان توقفي عن كتابة أي تعليق بالراكوبة ، حتي ينجلي الأمر أو ... نودع الراكوبة للأبد !!!


#693051 [اوكامبو]
4.00/5 (3 صوت)

06-10-2013 02:46 PM
نائب يليق ببرلمان البشير..و لست فى حاجة للزيادة.


ردود على اوكامبو
European Union [على الفضل] 06-10-2013 08:40 PM
شباب دا الرابط لصفحة حسبو نسوان على الفيس بوك,, اعملو شير

https://www.facebook.com/pages/%D8%AD%D8%B3%D8%A8%D9%88-%D9%86%D8%B3%D9%88%D8%A7%D9%86/421155367983036


#693034 [البذئ]
4.00/5 (3 صوت)

06-10-2013 02:30 PM
عشان تجيبوا شباب يحموا ليكم أرضكم دى، وإلا أرضكم حتضيع ودينكم بيضيع،?????كان الجماعة الحيتولدوا مشو الجبهة الثورية نقبل وووووووووووووووين يا شاطر؟؟؟

نزغرد ذى الجماعة الفى الصورة الفوق دى؟؟؟


ردود على البذئ
European Union [على الفضل] 06-10-2013 08:40 PM
شباب دا الرابط لصفحة حسبو نسوان على الفيس بوك,, اعملو شير

https://www.facebook.com/pages/%D8%AD%D8%B3%D8%A8%D9%88-%D9%86%D8%B3%D9%88%D8%A7%D9%86/421155367983036


#693018 [ابنوسی]
4.00/5 (2 صوت)

06-10-2013 02:08 PM
شیء مؤسف بالجد


#692996 [hudhud]
4.00/5 (2 صوت)

06-10-2013 01:51 PM
والله يا ارجوز فعلا دونية ما بعدها دونية . بالله محمد مرسي دا شنو عشان هذا المهووس يتمنى يكون شعرة من لحيته؟؟!! انا لله ،،،


#692992 [ههههههههههه]
4.00/5 (2 صوت)

06-10-2013 01:46 PM
بالله عليكم الله شوفوا السؤال والرد عليهو كيفن ّ ّ ّ!!!!! .



(( { هل الأفضل الأموال التي تأتينا من مسلمين أم من مسيحيين.. "شيرين عبد الوهاب" مسلمة وكثير من المنظمات مسيحية.. أيهما أفضل؟!


- أموال "مصر" بنحبها، وبنحب رئيس مصر جداً، لكن مغنيي مصر حاجة تانية.. ليتني كنت شعرة في لحية "محمد مرسي". ))


#692972 [Mohamed]
4.50/5 (2 صوت)

06-10-2013 01:31 PM
(أنا قلت البلد مستهدفة، وحفظاً للأرض والعرض والدين وأرواح الناس لا بد أن يكون هناك مجاهدون ومقاتلون.. )

البلد ناقص عدالة و ليس مستهدفة .... العدالة هنا معناها أن نتساوى في الحقوق الأساسية، بمعنى أن أضمن الحق الأساسي لنفسي وللجميع، وهذه الحقوق الأساسية تتعلق ببعض المعايير، هي في الإسلام مقاصد الشريعة الإسلامية التي نزلت الشريعة لتحقيقها في دنيا الناس، من حفظ للدين والنفس والعقل والنسل والعرض والمال.

فكل ما أضر وأخل بهذه الأساسيات والحقوق، (من حفظ للدين والنفس والعقل والنسل والعرض والمال)
لابد من إعطاء الأولوية لإزالته.أليس النظام السوداني هو من أخل بهذه الأساسيات والحقوق .....

الأولوية في إزالة الظلم و الفساد لابد أن تكون لتغيير أنفسنا قبل تغيير العالم من حولنا. فالتغيير كذلك تحكمه قوانين وسنن ذكرها الله سبحانه وتعالى في كتابه الكريم في مواضع كثيرة، كمثل قوله تعالى: {إن الله لا يغير ما بقوم حتى يغيروا ما بأنفسهم} (الرعد: 11). هذا قانون لا يتخلف، مثل قوانين الفيزياء والطبيعة والجاذبية وحركة الشمس والقمر. وبالتالي لن يحدث تغيير حقيقي في أي مجتمع إلا بعد أن يتغير ما بداخل هذا المجتمع ويتطهر من الفساد و الظلم والأمراض. ولا ينبغي أن تلفتنا القضايا الجانبية المفتعلة وغير المفتعلة عن أولوية التخلص من كل الجراثيم و الظلم والنقاط السوداء في المجتمع وإعطاء ذلك أولوية.
البناء صعب، ولذلك لا ينبغي لنا أن نبني وعندنا من عوامل الهدم ما عندنا، والهدم سهل ولا يحتاج إلى الوقت والجهد الذي يحتاجه البناء. إذن لابد في واقع عالمنا السوداني اليوم من استكمال الشوط في تطهير المجتمع من الفساد والظُلم أى من الحزب الحاكم بكل أشكاله وصوره قبل الحديث عن البناء والتغيير.


#692963 [ركابي]
4.94/5 (5 صوت)

06-10-2013 01:22 PM
بالطبع ما في شك.. هسّه أدخل الوزارات، حتلقاها كلها مليانة بنات في غاية الأدب والجمال والحشمة، وأعمارهن تتجاوز الثلاثين وتقارب الأربعين.. ديل بيتزوجوهم أولادنا؟! ديل نحن البنتزوجهم... والناس العندهم زوجات هم البيعرسوهن، والإسلام ده عندو حل لأي مشكلة.. مشكلة البنات الفائضات الما لاقيات الزواج ديل نتزوجهم نحن المتزوجين ديل.. أصلو ما في صحابي عندو زوجة واحدة..............
الكلام ده مافيهو اي عوجة وتمام التمام ياشيخ دفع الله بس المشكلة الظروف الاقتصادية مابتسمح ذاتو بالزواج من اساسو فمابالك بالتطبيق باتنين او تلاتة او اربعة يامولانا جماعاتك الحاكمين البلد افقرونا لابسط مقومات الحياة


الكلام ده ما صحيح.. الواقي الذكري ده خليهو يكون في الإجزخانة.. الداير يتم الرضاعة ممكن يستخدموا.. والمريض الذي لا يريد أن يعادي زوجته يمكن أن يستخدمه، ولكن لا يوزع بين الطلاب في الجامعات...............
فعلاً مفروض الواقي يكون الاخلاق والفضيلة والدين ...سهلوا حياة الناس زي ماكان عايشين اهلنا زمان وماحتلقوا في السودان اي فاحشة وحاربوا الفساد الاقتصادي الافقر الشعب السوداني ومنها ظروف الناس حتتحسن وما حيكون في عذر للجنس خارج المؤسسة الزوجية


#692934 [النخيل]
5.00/5 (2 صوت)

06-10-2013 01:00 PM
ربنا ينصر دينك ونحن من خلفك ودعوة للجميع لمناصرة الشيخ الراجل ده ماجاب شئ من عنده وما ذكره مقنع تماما قال دي ما قضايا مهمة دي اساس المجتمع...الله يعينك


#692892 [أسامة]
4.75/5 (3 صوت)

06-10-2013 12:26 PM
لا تعليق لأنني ما عدت أقراء لهؤلاء الفاسدين تجار الدين


#692881 [freedomfighter]
4.50/5 (3 صوت)

06-10-2013 12:17 PM
يا عمك انت شبعان و تريان نان كيفن ما تتزوج. عمك انت و الله قاعد تفكر بش....... ىا خى خلينا عليك الله شى واقى ذكرى و شى صلب شيرين و قادينا دين دين . ضارب لى قروش المؤتمر الوطنى دى و عامل لى فحل و الله يشوتوك الا تبقى عليك حكاية شريط اللمبة.


#692845 [محمد]
4.75/5 (5 صوت)

06-10-2013 11:45 AM
دا عايز يلفت انتباه الناس والاعلام بس هو البرمان فيهوا زول مستقيم ما كلهم ململمين لخدمة اجندة الكيزان ما اكتر قال شيرين ما تزور السودان هو انحنا فى السودان عندنا كم شيرين امنع اخوات شيرين فى السودان من زيارة نيجيريا وبعد داك اتكلم .


#692844 [ابو ابراهيم]
4.88/5 (7 صوت)

06-10-2013 11:44 AM
يا جماعة الرجل حدد حجمه الحقيقي بأنه يطمح في أن يكون شعره في دقن محمد مرسي علماَ بأن محمد مرسي الان عند الشعب المصري لايسوى شعرة في إبط شيرين. يا ناس الميديا أعفونا من هذه الكوميديا المملة ودعوا شعرة دقن محمد مرسي في حاله


ردود على ابو ابراهيم
European Union [على الفضل] 06-10-2013 08:42 PM
شباب دا الرابط لصفحة حسبو نسوان على الفيس بوك,, اعملو شير

facebook.com/pages/%D8%AD%D8%B3%D8%A8%D9%88-%D9%86%D8%B3%D9%88%D8%A7%D9%86/421155367983036


#692801 [حاتم أب تفة]
4.50/5 (3 صوت)

06-10-2013 11:12 AM
ولم لا يرتّد السودان ألف سنة ضوئية للخلف، وثمة أناس يأتون بمثل هذا نائباً عنهم..!!


#692798 [المقهورة]
5.00/5 (3 صوت)

06-10-2013 11:11 AM
لقد لفت نظري هذا السؤال وإجابته وقد جدت فيه ما يتطابق مع حالة مريضنا
عل الإجابة بالإضافة إلى نصيحتي تشفيه من علته.
(س) سمعت أن هناك أعشاب مفيدة لتخفيف الشهوة الجنسية كالكافور والزيزفون واليانسون..
ولست أدري مدى صحة وفاعلية تلك الأعشاب؟
(ج) مرحبا أخي.. لتخفف من شهوتك عليك التقليل من أكل اللحوم والابتعاد عن الطعام الحريفي
كالفلفل بأنواعه والأعشاب المثيرة للشهوة كالقرنفل والزعفران وغيرها من المثيرات والابتعاد عن أكل
حلاوه الطحينيه واللوز والفول السوداني و مايصنع منه، وأخذ الأعشاب المهدئه كالينسون وفاكهة التوت.
اتمنى أن أكون قد أفدتك حيث أنني على اطلاع في الطب البديل. (انتهى)
أما أنا فأضيف إلى ما سبق العدس.. أكثر من أكله فهو يقلل من قوة الحواس وطغيان النفس.
ألم تسمع بأن المسجونين يطعمونهم العدس للحد من طغيانهم في السجون (طغيان الشهوة
والانفعالات وأي شيئ فيه عنف بدني). أما إذا لم تنفعك النصائح السابقة فأقول لواحدة
من زوجاتك أن تقوم بتركيب سوستة في خشمك تفتح فقط عند الضرورة!


#692771 [سيد احمد الشايقي]
4.75/5 (4 صوت)

06-10-2013 10:45 AM
الزول ده كلما اشوف صورتو اشم رائحة المراحيض فكيف بالله لو الواحد وقف جمبو


ردود على سيد احمد الشايقي
European Union [Tazaki] 06-10-2013 06:05 PM
ليس الرد على سيد احمد الشايقي فوالله انت لا تستحق ذلك ويبدو انك ما سوداني لان السودانيين عندهم أخلاق ، ولا يمكن أن يصلوا لهذه المرحلة من عدم التهذيب ، شخصيا ليس لي علاقة بهذا الرجل ، لكنني أشكوك لله سبحانه وتعالى على هذا اللسان ، استغفر الله العظيم
وللساده إدارة الراكوبة أقول لا تنشروا مثل هذا التعليق ، اجعلوا من الراكوبة منارة نهتدي بها ونلتف حولها ، وأرجو من الأخوة التعليق في حدود أخلاقنا التى ما زلنا نتمسك و نفتخر بها ، والله من وراء القصد


#692727 [دارفوري]
4.50/5 (3 صوت)

06-10-2013 10:14 AM
الزول ده اكبر زول فاضي شغله كدي شوفوهو احتمال بيجدع عشان عجبتو افراح عصام ولا ريماز ميرغني


#692683 [مسلم وافتخر]
3.88/5 (4 صوت)

06-10-2013 09:44 AM
سدد الله خطاك ياشيخ والى الاماموالدين مافيه قشور ولباب والرسول بقول من راى منكم منكرا فاليغيره...


ردود على مسلم وافتخر
[ابوايمن الحلاوى] 06-10-2013 11:19 AM
انت حوار للتيس دا ولاشنو؟؟؟ بس كلام الرسول (ص) مابقى الا فى دا ؟؟ والله وهم واحسن ماتفتخر...


#692662 [zol]
3.50/5 (4 صوت)

06-10-2013 09:28 AM
بسم الله الرحمن الرحيم

عفيت منك يا دفع الله حسب الرسول ...لا تلتفت الي نبيح الكلاب واصل سيرك وموفق بأذن الله


#692651 [حوار الشيخ دفع الله]
5.00/5 (3 صوت)

06-10-2013 09:22 AM
مدد مدد يا سيدنا ويا شيخنا، يا عضو البرلمان الدايما منتصب ، فى الصحيان وفى الإحتلام ،الألله جابك لى سعادة النسوان فى كل مكان. بلاك النسوان بيتعسوا و يقطعوا قبال ميعادن. والما جابن الجنا بى بركاتك البدنية و الروحية يلدن التيمان. أبشرن يا أخوات نسيبة وأنهلن من بركات شيخنا.


#692643 [جركان فاضى]
5.00/5 (7 صوت)

06-10-2013 09:18 AM
500 مليون عربى غير قادرين على هزيمة 5 مليون اسرائيلى.قال كترة قال وفى معركة اليرموك كان جيش الرومان اضعاف اضعاف جيش المسلمين.وكترة الانجاب بدون تعليم تجعل الشعب زى القش وقشة كبريت واحدة تحرقه.اما شيخنا الخيالى فضارب قروش المؤتمر الوطنى ويتزوج مثنى وثلاث ورباع وما عارف 90% من الشعب بايت القوة


#692642 [ابوسروال]
4.94/5 (7 صوت)

06-10-2013 09:17 AM
دا واحد مخبول ومخرف ونصب نفسه اله !
اين انت من سارقي قوت الشعب_
تطاولو في البنيان وركبوا اخر الصيحات وياكلون احسن الاطعمة _والطلاب المساكين ياكلون البوش_


#692640 [shah]
5.00/5 (11 صوت)

06-10-2013 09:14 AM
الفحل الهائج ده ... وشو ذاتو محتاج يلبسو واقى ذكرى.


ردود على shah
United States [shah] 06-10-2013 11:42 AM
بس الخير بقى فى أحاديثه الجنسية الغير مهذبة دى؟

United States [ابن النوبة] 06-10-2013 11:07 AM
إتق الله - قل خيراً أو أصمت - أنت مسئول عما تقول - الشيخ يريد الخير - تكلم خيراً أو أقفل فمك الوسخ ده ..... يا منافق ....


#692634 [أراجوز]
4.86/5 (8 صوت)

06-10-2013 09:10 AM
- أموال "مصر" بنحبها، وبنحب رئيس مصر جداً، لكن مغنيي مصر حاجة تانية.. ليتني كنت شعرة في لحية "محمد مرسي".
----------
شفتو الدونية دي كيف ؟


ردود على أراجوز
United States [abusafarouq] 06-10-2013 09:57 PM
سبقتنى فى الحتة دى بعد روست المقطع وجدت تعليقك وتركته شكرا لك يا أخى دى الانبطاح بذاتو تجاه السيد المصرى على حكامنا ومسؤلى حكومتنا المرعوبين من قوة مصر تهديده الدائم على حاكمنا المستبد الخايف من المصرين ويقتل أهلو مهما طول أو قصر سوف يحصل أشتباك مع المصرين فى حدودنا الشمالية أستعدو وتزوجو النساء كى تدافعو عن الشمال قبل الغرب والجنوب والشرق .


#692589 [ابوايمن الحلاوى]
4.99/5 (14 صوت)

06-10-2013 08:33 AM
بصراحه انا ماكملت الموضوع لانه هايف وsexy ومثير للغرائز ومحرك للشهوات ودافع لعمل جنسى ويصل بك الى عالم الحريم ويعلمك ماهو الواقى الذكرى!!الزول دا كدى شوفوا رايه امكن عاوز ليو واحده وتوجد عقبات عشان كدا اعرفوا ليه هو تخصص فى النساء؟؟ حاجه واحده ابعدوه عن اى مجتمع فيو حريم ؛شغلوه قائد مجاهدين واعملوه لواء يعنى مجتمع ضكر بس ..والبنت العاوزه تلعب ممكن تجيد المراوغه وتخترق دفاعات الواق الذكرى.. والله مصيبه ودخلت علينا والتيس دا بكترة ترديده لهذه الكلمه بدات ترسخ عند الناس وبفتشوا عليها !! هو من يشيع الفاحشه .. بلا يخمك وداهيه تلفك لو اشغلتنا بسفاسف الامور....


ردود على ابوايمن الحلاوى
European Union [على الفضل] 06-10-2013 08:42 PM
شباب دا الرابط لصفحة حسبو نسوان على الفيس بوك,, اعملو شير

facebook.com/pages/%D8%AD%D8%B3%D8%A8%D9%88-%D9%86%D8%B3%D9%88%D8%A7%D9%86/421155367983036

United States [MAHMOUDJADEED] 06-10-2013 10:00 AM
ما كملت الموضوع وتقول هايف ؟!! ..المؤخر السودان شنو غير الحكم الاستباقي والانطباعي غير المؤسس . اتقوا الله في دينكم وفي وطنكم والله كلام الزول ده ما فيهو أي هيافة .

United States [الجعلي] 06-10-2013 09:59 AM
بلا يخمك وداهيه تلفك لو اشغلتنا بسفاسف الامور...

تحدث بأدب أو فلتصمت . الشيخ قد يكبر والدك عمراً . لاتدخلوا علينا شيماً لاتشبه السودانيين .



خدمات المحتوى


مساحة اعلانية





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة