في


الأخبار
أخبار السودان
دفع الله حسب الرسول : بعض الصحفيين لا يفهمون شيئاً... تقول له محمد يسمعها علي.. يكتبها زينب يقرأها فاطمة وما عندهم فهم...غناء الزمن دا الولد بشبه البنت والبنت سجمانه أنا بعرفو وانت بتعرفو ....!!
دفع الله حسب الرسول : بعض الصحفيين لا يفهمون شيئاً... تقول له محمد يسمعها علي.. يكتبها زينب يقرأها فاطمة وما عندهم فهم...غناء الزمن دا الولد بشبه البنت والبنت سجمانه أنا بعرفو وانت بتعرفو ....!!
دفع الله حسب الرسول : بعض الصحفيين لا يفهمون شيئاً... تقول له محمد يسمعها علي.. يكتبها زينب يقرأها فاطمة وما عندهم فهم...غناء الزمن دا الولد بشبه البنت والبنت سجمانه أنا بعرفو وانت بتعرفو ....!!


أنا أستاذ جامعي وبابكر حامد ود الجبل إبن خالتي
06-12-2013 07:11 AM
حوار: عيسى جديد:

مابين كل جلسة برلمانية وأخرى، يخرج بتصريح مثير، يحدث جدلاً إعلامياً بمجرد نشر خبره على متن الصحف... هو الشيخ البرلماني دفع الله حسب الرسول النائب عن الدائرة الرابعة بأم درمان، والشاهد أنه بتصريحاته البرلمانية ومطالبه قد أحدث أثراً وحراكاً إعلامياً تخطى الإعلام المقروء الى الإعلام المسموع والمشاهد، بل انتشر الجدل حول ما يقوله الى الإعلام الإلكتروني في مواقع التواصل الاجتماعي على الانترنت (الفيس بوك /تويتر/اليوتيوب) آخر لحظة وضعت كل هذه الأسئلة أمام الشيخ دفع الله حسب الرسول، الذي قدم مرافعة ساخنة واضعاً النقاط حول الحروف، مدافعاً عما قاله ومفنداً لما قيل حوله ومقدماً إفادات جديدة حول العديد من المواضيع، فاتحاً النار على الإعلام.. مشيراً الى ضرورة توخي الدقة في نقل تصريحاته فماذا قال وبماذا دفع من مبررات؟ ...!! نتابع في مضابط هذا الحوار

أولاً.... دعنا نتعرف عليك من هو الشيخ دفع الله حسب الرسول؟

- قال ضاحكاً.. انتو لسه ما عرفتوني... طيب أنا دفع الله حسب الرسول البشير من قرية السليمانية غرب محلية أم درمان.. درست في مدرسة السليمانية، ثم حي العرب الوسطى، ثم الأهلية الثانوية، ثم سنة واحدة في جامعة أم درمان الإسلامية، وكنت في الاتحاد وتمت محاكمتنا بالأمر الجمهوري الإعدام أو السجن عشر سنوات، وذلك في أول أسبوع لعهد نميري

لماذا تمت محاكمتكم بهذا القرار الجمهوري؟

- تمت محاكمتنا لأنه النميري حل الجامعة الإسلامية ونحن احتجينا، وكتبنا منشورات، وقدمنا بعد ذلك للمحاكمة العسكرية، وكنا في حزب الأخوان المسلمين، وحكم علينا بسنتين وقضيناها أربعة وعشرين شهراً، وخرجت ووجدت نفسي في السنة الرابعة، وكنت امتحن من داخل السجن وامتحنت وتخرجت سنة 1972م من كلية التربية

وماذا بعد التخرج أين عملت وكيف وصلت الى المجلس الوطني كنائب برلماني؟

- بعدها دخلت أكثر من عشرين معاينة عشان اشتغل لم أجد اية فرصة خالص، ولكن عملت معاينة واحدة في السفارة النتيجرية وتم قبولي، وسافرت الى نيجيريا في سنة 1973م، وقضيت بها عشر سنوات، درست فيها الدراسات الإسلامية باللغة الانجليزية كانت خصبة جدا، ورجعت في 1983م والتحقت بجامعة افريقيا العالمية كأستاذ جامعي.. أما المجلس الوطني فدخلته وهو أول مجلس بعد المجلس الانتقالي، الذي كان بالتعيين ودخلت أول مجلس بالانتخابات عن طريق دائرة أم درمان الدائرة الرابعة..

من كان ينافسك في تلك الدائرة؟

- مافي ناس كان بقولوا عليهم في الدائرة الرابعة وآخر منافسة الفرق بيني وبين أول المنافسيبن 28 الف صوت، يعني الفرق كان كبيراً وكنت أمثل المؤتمر الوطني..

أنت ممثل لتلك الدائرة ولكن الحديث عنك بانك تثير قضايا لا علاقة لها بالمواطنين في دائرتك أو حتى الهم العام للمواطنين ما ردك؟

- أولاً خليني أعرفك بدائرتي الرابعة أم درمان هذه التي تبدأ من الجامعة الإسلامية الى حدود ولاية النيل الأبيض جنوباً.. وشرقاً النيل الأبيض.. وغرباً حدود كردفان.. وكلها فيها 80 قرية

هل زرتها كلها وتفقدتها وعملت على تحقيق مطالبهم؟

- منفعلاً .... يا أخي زرتها كلها وعملت فيها الكثير وكلهم يعرفوني وحفرت أكثر من 70 بئراً، وأوصلنا الكهرباء لأكثر من 15 قرية، وكيف حفرت هذه الآبار وقدمت هذه الخدمات، الوزارة تطلب المساهمة الشعبية، وهذه القرى فقيرة، وساهمت بجلب المساهمة من ابن خالتي بابكر حامد ود الجبل، وابن اخيه محمد حامد، ومن أخونا صديق حيدوب من ديوان الزكاة.

مقاطعاً... لكن لماذا لا تأخذ من الحكومة وأنت تمثلها؟

- أنا ماشي ليك ما تستعجل.. أنا آخذ المساهمة وادفعها للحكومة التي تقوم بالحفر، ولدينا الآن 100 مسجد بالمنطقة، والآبار والكهرباء، وقدمت هذه الانجازات للأخ غلام الدين عثمان حينما كان وزيراً للمالية في ولاية الخرطوم، وكتب لي خطاباً بأن نائباً يهتم بشؤون مواطنيه، وهذه شهادة اعتز بها، وتؤكد أنني أعرف اهتمامات من رشحوني وأعمل لهم..

هذا ما قدمته على مستوى الدائرة ومن رشحوك ..إذن لماذا لا نسمع صوتك في القضايا الكبرى في البلاد.. الفساد الظلم المعيشة ما يهم الناس.. انت فقط تتحدث عن قضايا يقولوا البعض انها انصرافية خاصة فيما يتعلق بالنساء؟

- هذا كلام فارغ، وهذا كلام صحفيين وكتاب أعمدة يجلسون خلف المكيفات

واقول بصراحة إن بعض كتاب الأعمدة.. أقول بعضهم إذا رأيته أو قرأت له أو سمعته تتذكر نعمة الله عليك..

كيف ذلك فسر لنا؟

- لا يفهمون شيئاً... تقول له محمد يسمعها علي.. يكتبها زينب يقرأها فاطمة وما عندهم فهم..

ما هو دليلك على عدم فهم الصحفيين وكيف تتهمهم بذلك؟

- دليلي واضح من خلال حديثي في كثير من القضايا.. مثل الربا والجهاد والمظهر العام، وأنا لا أريد الحديث عن نفسي ولكنني ذهبت للجهاد أكثر من 11 مرة، واتحدى هؤلاء الصحفيين البتكلموا عني ديل والبنقدو كلامي عن الجهاد واحد فيهم لاقانا هناك مافي وهم يقولون إننا لا نتحدث إلا في هذه المواضيع، هذا كلام فارغ منهم.

مقاطعاً... أنت تشن الهجوم على الصحفيين لكن الشاهد أن الجميع من غير الصحفيين في الشارع العام أو في مواقع التواصل الاجتماعي المعروفة ينتقدون تصريحاتك المثيرة للجدل في أكثر من موضع، ابتداء من صورة شيرين الى قضية العفونة للنساء، ومن ثم الواقي الذكري وممارسة البنات لكرة القدم انتهاء بدعوة الزواج للجهاد ؟

- بانفعال.. طيب طيب... واحدة واحدة... نبدأ بقضية شيرين واحتلت هجليج، والشباب هناك يستشهدون ويضحون بأراوحهم، والفنانون يأتون بشيرين عشان تغني ليلة الجمعة التي احتلت فيها هجليج في دار الرياضة بالخرطوم.

هذا كلام محبط للقوات المسلحة، محبط للمجاهدين الذين يموتون هناك، وهنا بالخرطوم ناس بغنوا وبرقصوا مع فنانة عارية كاسية زي مافي صورها التي تملأ الشوارع، واستعنت بها أنا في البرلمان لرفض زيارتها، وقلت ليهم إذا كان ديننا ناقصاً نتمو رجالة، ولذلك كل المجلس تجاوب، ورئيس المجلس تجاوب، والوالي أوقف الحفل وهذه محمدة، والذي يعارضني في ذلك، فليراجع إيمانياته ودينه.

هذه واحدة ماذا عن التصريحات الأخرى.. ممارسة النساء لكرة القدم مثلاً؟

- جاي ليك عليهن كلهن، التانية مسألة لعب النسوان للكورة.. أنا ماعندي مانع المرأة تتريض في مدرستها، أو في بيتها، أو في صالتها المقفولة.. وأنا بشتري لبناتي كور، ولكن إن تكتب الفيفا لوزارة الرياضة باذا ما عملتو فريق للنساء لكرة القدم يلعب بره السودان ما بنديكم قروش، ويستجيب الوزير ويعمل فريقاً من النساء، ويلفن البنات في المدارس والجامعات عشان يعملوا فريق نساء يطلعو برة.. كان لازم نتحرك لمجمع الفقه الإسلامي وعمل فتوى، وهي عندى الآن وهي(إن الرياضة حق للجميع، ولكن لا يجوز للمرأة أن تلعب كرة مع الرجال، ولا يجوز لها أن تخرج لتلعبها في أروربا أو أمريكا أوغبره.. ولو في السماء الأحمر، ودا كلام كمان لا يعارض فيه إنسان إلا مختل العقل، وهذا لايرضاه اي شخص على بناته أو أخواته

وماذا عن دعوتك للزواج مثنى وثلاث حتى يمكن رفد المجتمع بالذكور للجهاد والقتال.. وهل كل حياتنا سنظل مجاهدين وفي حالة حرب؟

- وليه لا.. مش نحن أمة مستهدفة، وأنا سبق إن قلت داخل المجلس إنه جون قرنق قال لجماعتو ماداير بطن فاضية للبنات، وداير بعد عشر سنين يقولوا في كريمة دااك عربي يعني يتكاثروا لدرجة أن يغطوا على العرب حتى في كريمة، ويصبح كل السودان جنوبيين... وأنا قلت إن القوات المسلحة لابد أن تدعم القوات المسلحة بالرجال اعدت السلاح ونحن بنصنع فى السودان من الطلقة لحد الطيارة، وين مصانع الرجال، ومصانع الناس هي الزواج، ولابد للرجل في داخل المجلس أن نأخد بيعة الآن نحن نواب المجلس كل واحد فينا يتزوج اكثر من زوجه، واي زوجة بالمجلس تحث راجلها انو يتزوج عشان نجيب مجاهدين لأن الحرب دي ما حرب الليلة أو باكر.. يعني بعض الصحفيين السطحيين قالوا ننتظروا 18 سنة عشان يحاربوا لينا ..المسألة ماكدا...الحرب دى ليها خمسين عاماً حتى الآن ولم تتوقف، لازم يكون عندنا استراتيجية نشتغل بيها لقدام، وربنا سبحان وتعالى ما خلق الرجل لامراة واحدة، والرجل لو تزوج المرأة وهم في عمر واحد عشرين عشرين سنة بعد ثلاثين سنة هذه المرأة تنجب ما كتب الله لها من الاولاد، لكن بعد لك يكون الأمر صعباً

لكن أنت تدعو للزواج مثنى وثلاث ورباع، رغم أن الأوضاع الاقتصادية صعبة حتى الزواج بواحدة يحتاج الى تفكير واستعداد؟

- نعم الأوضاع المعيشية صعبة، ولكن هذا لا يمنع الزواج، وأقول لك إننى قلت لكثير من الشباب والناس، إنه عندنا في الوزارات وكل الوزارات بنات اغلبية فيها، وبنات على قدر من الجمال، وعلى قدر من الأدب والتقوى، والقروش عندهن وبعضهن لديهن العربات، ودايرات ازواج امشوا تزوجوا يا شباب.. والرسول قال تنكح المرأة لمالها .. مافي واحد يقول لي الحياة الاقتصادية صعبة وكدا، إن البنات كما قلت شغالات في الوزارات وعندهن القروش وكلهن بنات حلال... وبنات حلال دي ارجو أنك تكتبا...

ماذا عن حديثك عن (الختان ) وعفونة النساء والفتوى التي صدرت من مجمع الفقه الاسلامي؟

- أولاً يجب أن تنفي عني ما ذكر حول عفونة النساء، هذا الكلام لم أقله ونسب اليّ بالخطأ ولا أعرف مصدره بالنسبة لختان النساء، أنا مشيت لمجمع الفقه الإسلامي لأن الناس بتقول لا تختن المرأة والبنات ودي شغل بتاع أمم متحدة في مجمع الفقه، طلعوا لينا فتوى باحاديث اربعة رواها الرسول صلى الله عليه وسلم الحديث الأول «الختان من سننن الفطرة !) الحديث الثانى (إذا التقى الختانان فقد وجب الغسل ) الحديث الثالث(..الختان سنة للرجال مكرمة للنساء ) الحديث الرابع توجيه للخاتنة) شني ولا تنهكي )وهذه كلها أحاديث واردة عن الرسول صلى الله عليه وسلم والأئمة الأربعة مابين الوجوب وبين المكرة .... طيب يجي زول يقول لا البطهر بنتو بكون اخطأ

مقاطعاً.. هل أنت مع الختان أم ضده؟

- أنا مع ما قاله الرسول صلى الله عليه وسلم في حديثه، ما مع الامم المتحدة ... شوفوا الناس الواقفين مع الامم المتحدة والكلام الفارغ البسوا فيه دا في التلفزيون وفي الإذاعة دعوها سليمة سليمة.. هي ما سليمة ولا حاجة هي(غير سليمة)، وهذا الكلام لو كان المنطق بتاع «ولدت سليمة دعوها سليمة» حتى الولد ولد سليماً فدعوه أيضاً سليماً، لكن هذه شغلانية بتاعة أمم متحدة وأنا بمشي بحضر هذه الندوات وبعرض فيها أفلام تحدد فيها تفاصيل عورة المرأة دون خجل أو حياء.

مقاطعاً لكن هذا هو العلم والمعرفة ولا حياء في العلم ليتعلم الناس؟

- هذا يخدش الحياء، وياريت لو كان علم هم يريدون أن ينشروا الفاحشة ويجعلوا من هذه الأمور عادية في المجتمع ولدى الناس.. والكلام البقولوا كله هو عن الختان الفرعوني والختان الفرعوني، يكفينا اسموه من شناعتو .. والختان الفرعوني في الشريعة عقوبة من يفعله هي الدية، وهم ما عارفين حاجة أنا رجل شريعة، لأن من يفعله يكون عطل جزءاً من الإنسان من العمل.. ونحن نعرف وهم لا يعرفون، ويختلف عن ختان السنة، ونحن الذين طلعنا الفتوى من مجمع الفقه الإسلامي وارادت وزيرة الشؤون الاجتماعية يومها أن تعمل قانون الطفل ودخلته مجلس الوزارء.. ومن ضمن بنود هذا القانون أن أي بنت تختن أمها تأخذ سبع سنين سجن، وأبوها يأخذ سبع سنين سجن.. (الرئيس عمر البشير جزاه الله خيراً كان في مجلس الوزراء، وكنت قاعد ورفع الفتوى بتاعة مجمع الفقه الإسلامي.. وقال إن مجمع الفقه الإسلامي بالنسبة له هو مرجعية الدولة، وبالنسبة له أن هذا الكلام كلام دين ياتو ختان البدو فيهو الزول سبع سنوات، تستثنوا ختان السنة من العقوبات.. ختان السنة برا واذا لم يستثنى لن أمضي هذا القانون )..وجزاه الله خيراً وقال لعبد الباسط سبدرات الذي كان وزيراً للعدل حينها بتنفيذ القرار)

كل ما تتحدث عنه متعلق بالنساء لماذا تكره النساء هل أنت عدو للمرأة؟

- منفعلاً.....أنا أكره النساء.. هذا غير صحيح، واتحدى اي رجال يتزوج ثلاث نسوان ويعدل بينهم، وحديثي عن النساء دائماً بالخير ولمصلحتهن.. واذكر قبل كم سنة وفي المجلس هنا قابلت بعض النساء، وقالت لي إحداهن إني عدو للمرأة، فقلت له كيف أكون عدواً للمرأة وأنا متزوج ثلاث ..

وأنا لما قلت الرجل يتزوج أكثر من امرأة، أكتر الناس القاموا عليّ هم الناس الخائفين من نسوانهم ياخي أن بعرف صحفيين....

مقاطعاً.. لماذا دائماً تشن الهجوم على الصحفيين؟

- لأنهم بكتبوا كلام فارغ، ولا ينقلون ما أقوله وكلامي القلتو في المجلس انه الرجل يتزوج أربعة، وتحدثوا عنه في التلفزيون، وعملوا ندوة وضربوا لي في البرنامج عن رأيي في التعدد وقلت ليهم إن التعدد ما حقي أنا، التعدد دا حق الله، وانكحوا ما طاب لكم من النساء مثنى وثلاث ورباع.. وكذلك حديث الرسول إني مكاثر بكم الأمم... والقاعدين ديل كلهم خائفين من زوجاتهم، والمخوافاه مرتو أنا عافي ليه... لكن الصحابة كلهم عندهم أكثر من امرأة

إذن أخيراً هل ما تقوله تحت قبة البرلمان من تصريحات تم تنفيذها ونجحت؟

- كلها نجحت.. حديثي عن شيرين تم إيقاف حفلتها ونجحت في ذلك، ولعب المرأة لكرة القدم المجلس اتخذ قراراً للنساء يلعبن الكرة وفقاً لفتوى مجمع الفقه الإسلامي.. ومسألة الزواج المجلس كله كبر وأيد القرار، وحتى المتزوجين مثنى وثلاث الناس ديل مسلمين..

لكن لم تحدثنا عن مناقشتكم لأمور مثل الفساد، ومخصصات النواب، وعدم الوصول لقرارات لمصلحة المواطن؟

- بالنسبة للفساد دي قضية عايزة إثبات، والعارف ليهو زول مفسد يثبت ذلك، ويقول هديك المحاكم فاتحه، لأنه مما تقول هذا مفسد دي قضية، وانا شخصياً لا أعرف زولاً مفسداً وانا شخصيا غير مفسد،، أما الخصصات ما عندنا اي مخصصات وهي حقت رئيس المجلس ونوابه، ورؤساء اللجان وديل كلهم ما تأمين 20 نفراً.. أما عن فهى ثلاث الف وستمائمة بالله عليك نائب برلماني جاء من دارفور، وجاء من الشمالية، يسكن بالايجار يأكل منها ويستضيف أهله ويدرس أبناءه، والداير يعرف يجى يدخل المجلس الوطني ...وأنا شخصياً ما عندي مشكلة انا ود البلد دي وعندي بيت وأرض

مقاطعاً.. هل تملك عقارات وأراضي وعمل؟

- ضاحكاً...أنا لا املك غير «بيتي وأرض» لأن الواطة دى بتاعت اجدادي واقول ليك الواطة بتاعت المجلس دي حقت جدي كمان.. أما العمل فإن عملي بجامعة افريقيا يساعدني كثيراً ولعلمك أنا عملت لفترة بالمجلس الوطني بدون مرتب، لأنني كنت أعمل بالجامعة وخيرونا بين المرتبين، واخترت مرتب الجامعة، حتى ينصلح الوضع بالمجلس، ومنحنا مرتبات..

إذن كلمة أخيرة شيخ دفع الله حسب الرسول والبلاد تشهد حالة سياسية غير مستقرة وكذلك اقتصادياً واجتماعياً ويتناوشها الأعداء وانتم نواب الشعب؟

- أنا بقول لكل الناس وللحكومة وهي نصيحة للمسئولين وللقوات المسلحة إننا نهدي الانتصار للمتمردين بارتكابنا للذنوب التي نفعلها من السماح ببنات بلعبن الكورة، ووزارة الصحة تبيح توزيع الواقي لابنائنا بالجامعات، وتشجع على المعاصي، وكذلك الغناء في وسائل الإعلام بكل الإذاعات، فهي أغاني فارغة في الاندية مثل نادي الضباط، ونادي الشرطة والأمن وغيرهم لا يفتح للحفلات الفارغة، لأنها تتسبب في المعاصي وتتسبب في الهزائم.

مقاطعاً.. لكن ليس أفعال الناس لوحدها هناك الحكومة وأيضاً ليس كل الأغنيات يا شيخنا فهناك أغانى وطنية، وهناك أغاني تراثية وعاطفية هي ثقافة شعب؟

-أيضاً الحكومة.. أنا قلت ذلك وهي كلها ذنوب تهزم الناس وتجلب الهزيمة، لأن الشيطان استدلهم.. أما عن الغناء فهو زي الكلام، فيهو الحرام وفيهو الحلال.. ولكن غناء الزمن دا الولد بشبه البنت والبنت سجمانه أنا بعرفو وانت بتعرفو ....!!

آخر لحظة


تعليقات 36 | إهداء 0 | زيارات 9651

التعليقات
#695971 [adil a omer]
0.00/5 (0 صوت)

06-13-2013 02:11 PM
ان شاء الله بتدرس شنو !! فقه اللواط ولا ختان الاناث


#695959 [عبيد الله]
4.00/5 (1 صوت)

06-13-2013 02:00 PM
ود الجبل ود خالتي ده شنو ده . والله اسلوب تعبان


#695378 [الجدادة ام شطر]
0.00/5 (0 صوت)

06-13-2013 01:38 AM
الجدادة عندها كم شطر؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

دة اول سؤال جاوب عليه الشيخ حسب الله .. الدليل من قناة سودانيس اونلاين على اليوتيوب

فما ذا كانت الاجابة

http://www.youtube.com/watch?v=0c9HHMO14IU


#695338 [عاصم]
0.00/5 (0 صوت)

06-12-2013 11:42 PM
الزول ده دخلو البرلمان عشان يضحكهم شويه يتهبل شويه الراجل دهع مخه عفن جدا ويمكن يكون في نشأته في حاجة تجاه المرأة معقداه محتاج لطبيب نفسي والله لو ما عالجوه بكره بتلقوه في الشوارع ماشي ويكلم نفسه يقول حاجات غباء و عفانة مخ تجاه المرأة


#695327 [radona]
0.00/5 (0 صوت)

06-12-2013 11:26 PM
ضدقت ياشيخ فعلا فنانين اليومين دي اصواتهم قبيحة
ديل متفننين وليسوا فنانين
بس بنت واحده طاعت من الجوقه دي كلها اسمها منار صديق صوتها حلو
ياجماعة والله مولانا ده راجل تفتيحة لي انتو ما قادرين تفهموه
ده راجل عصري ودهري
لكن ختما الجبناء الذين يخافون زوجاتهم كا بحبوه لانهم ما بيقدروا يدبلو


#695324 [عصمتووف]
0.00/5 (0 صوت)

06-12-2013 11:15 PM
.


#695306 [khairbarakat]
0.00/5 (0 صوت)

06-12-2013 10:49 PM
قال ماشاف فساد ... ما أنت أعمى بصر وبصيرة وبعدين تشوف كيف من دقنك دي؟ ... بس لأول مرة أعرف سبب تدني مستويات خريجيننا خاصة في كل المجالات المتعلقة بالدين هل عرفتو ليه؟ لأنو هذا المعتوه أستاذ جامعي...


#695286 [المهاجر]
0.00/5 (0 صوت)

06-12-2013 10:19 PM
الحقو الجدادة جعفر النميرى


#695262 [رئيس اللجنة]
5.00/5 (1 صوت)

06-12-2013 09:27 PM
العضو البرلماني الذكري


#695257 [nasr]
0.00/5 (0 صوت)

06-12-2013 09:19 PM
هذا الأبله المتخلف أعطته الصحافة أكثر كثيرا مما يستحق ......وبالفعل نحن نعيش فى زمن المهازل ..حسب قولهذكر بأنه أستاذ جامعى ياللفضيحة ويالهوان الحامعات فى هذا العهدوالأدهى أنه نائب برلمانى ويمثل 80 قرية ويفتخر بأنه قريب ود الجبل...ياترى ماذا أرتكبنا من اثام حتى يسلط الله علينا مثل هذا النوع من عباده(؟؟؟؟؟؟؟وأتمنى من الذى يلقب نفسه زورا وبهتانا (جعفر نميرى )ألا ينبرى بالردفهو أكثر تخلفا من شيخه هذا الاهطل


ردود على nasr
United States [فاروق بشير] 06-12-2013 10:53 PM
والمشكلة المحاور ضعيف


#695245 [انصاري]
0.00/5 (0 صوت)

06-12-2013 08:57 PM
أي جهاد!!!القصة كانت ثلاثة أشياء (ثروه- سلطة -ترتيبات امنية) يعني ظلم!!.. الدليل رجع الشهيد د.جون قرنق نائب اول لامير المؤمنيين، وتم التقسيم حسب الاتفاق وأخيراً نال الجنوب الاستقلال.. وينو الجهاد هنا... قال مشيت 11 مرة إن شاء الله تمشي 111 مرة يعني شنو... ما حاج نور مشى ومات!!!؟؟ قال مشيت .... هاك الجهاد.. دة


#695177 [nagatabuzaid]
0.00/5 (0 صوت)

06-12-2013 06:44 PM
اعوذ بالله من الشيطان الرجيم بسم الله الرحمن الرحيم وسلام قولا من رب رحيم

كل هذه الهضربة اريد ان اعلق على امرين اولهم يا شباب المخلوق ده ما كان عنده اى ذكر

زمن نميرى ما يغشكم واسالوا عنه طيب قلنا كان فى نيجيريا ( سميناها رضينا )

معارضته او مقاومته لحضور المغنية شيرين ولا اسمها منو ما بعرف _ اصلا ماعندى شغلة بالغناء

والمغنيات _ علل ذلك بانه الناس كانت بتحرر هجليج وكيف تجى مغنية تغنى يعنى ما لسبب دينى ما

يحرم الغناء كما يقول ناس بوكو حرام مع انه كما ذكر احد المعلقين بما معناه انه كان معاهم

واظنهم الان فى ضيافته لزوم رد الجميل السبب فى منع شيرين عرفناه وموقف كريم جدا واصيل جدا

وسؤالى ليه ما منعت رئيسك من الذهاب او نصحته لالغاء حفل تكريم جمال الوالى يبتهج وجيشنا

وابنائنا المغسول هقولهم وطيارينا نسور الجو يواجهون نيران الحركات المسلحة فى ابو كرشولا

اما كان افضل ان يتابع ويراقب ولوبالمنظار عن بعد المعركة ( ما قلنا ليه انزل بروحك )

انت زول نائب برلمانى مافى زيك ليه تغلط الغلطة الكبيرة وتترك رئيسك فى ميدان جمال الوالى

بهجة وانشراحاو فلذات اكبادنا يموتون جراحا واحتراقا وليه انت ما نزلت المعركة ولو تقبف من

بعيد وتوجههم بدقنك المحننة ( حشاش بدقينتوا ) ولا ااانسيت هناك مافى نسوان رجال وبس وزى ما

قلت حداشر مرة سافرت الجهاد كنت با بوكرشولا تتمهم دستة يمكن بنات الحور يغيرن رايهن


#695169 [ابعنجه]
5.00/5 (1 صوت)

06-12-2013 06:35 PM
انتيكه


#695137 [محجوب عبد المنعم حسن معني]
5.00/5 (2 صوت)

06-12-2013 05:48 PM
قايتو كان ده كلامك عداك العيب والحمدلله انني لم اعلق على اي تصريح نسب لك، لانو بامانة الصحافة بقت ما امينة في بعض ما تكتب


#695111 [المندهش]
0.00/5 (0 صوت)

06-12-2013 05:13 PM
يا جماعة المسمي نفسو جعفر نميري دا تقول هو ذاتو شوفو ما برد الا على الحريم لاحظو ليهو بعدين زولك دا استاذ في شنو بس في الحريم يا زول هو دخلو البرلمان عشان كدا ؟ هذا الرجل لا يدري ما معني ان يكون نائبا في البرلمان اوب سوري نسيت قايل في برلمان


#695085 [انصاري]
0.00/5 (0 صوت)

06-12-2013 04:18 PM
أستاذ جامعي حته واحدة كده وله مقسمة!!!؟؟؟؟؟؟ وبدرس قينكولجي فى الطب!! عشان كدة جامعاتنا جات الطيش في التقييم العالمي


#695020 [shah]
0.00/5 (0 صوت)

06-12-2013 02:38 PM
أستاذ جامعة؟
طيب خد:يالماشى لى باريس ... جيب لى معاكا عريس ... شرطا يكون لبيس ... ومن هيئة التدريس.


#695014 [ود امدرمان]
0.00/5 (0 صوت)

06-12-2013 02:33 PM
الزول ده جبتوهو من وين!!!!!!!!!!!!!!!!!!!!!!!!!!!!!!!!!!!!!!!!!!!!!!!!!


ردود على ود امدرمان
[cour] 06-12-2013 08:21 PM
من بوكو حارام


#694867 [سالم]
0.00/5 (0 صوت)

06-12-2013 12:53 PM
واقول بصراحة إن بعض كتاب الأعمدة.. أقول بعضهم إذا رأيته أو قرأت له أو سمعته تتذكر نعمة الله عليك..

كيف ذلك فسر لنا؟

- لا يفهمون شيئاً... تقول له محمد يسمعها علي.. يكتبها زينب يقرأها فاطمة وما عندهم فهم..
صحافيي الغفلة دي الحقيقة الوحيدة القلتهاز


#694861 [Mohd]
4.00/5 (1 صوت)

06-12-2013 12:46 PM
(أنا أستاذ جامعي )

سجم الجامعة البتدرس فيها والطلبة القاعدين ليك

شكلك في المراهقة الثانية

يا دكتور الهناء


#694859 [Mohd]
5.00/5 (1 صوت)

06-12-2013 12:46 PM
(أنا أستاذ جامعي )

سجم الجامعة البتدرس فيها والطلبة القاعدين ليك

شكلك في المراهقة الثانية

يا دكتور الهناء


#694839 [ود الحاجة]
4.50/5 (2 صوت)

06-12-2013 12:26 PM
اقتباس:النسبة للفساد دي قضية عايزة إثبات، والعارف ليهو زول مفسد يثبت ذلك، ويقول هديك المحاكم فاتحه، لأنه مما تقول هذا مفسد دي قضية، وانا شخصياً لا أعرف زولاً مفسداً وانا شخصيا غير مفسد،، أما الخصصات ما عندنا اي مخصصات وهي حقت رئيس المجلس ونوابه، ورؤساء اللجان وديل كلهم ما تأمين 20 نفراً.. أما عن فهى ثلاث الف وستمائمة بالله عليك نائب برلماني جاء من دارفور، وجاء من الشمالية، يسكن بالايجار يأكل منها ويستضيف أهله ويدرس أبناءه، والداير يعرف يجى يدخل المجلس الوطني ...وأنا شخصياً ما عندي مشكلة انا ود البلد دي وعندي بيت وأرض

تعليق:اتق الله يا رجل ,حتى الاجانب من العجم شموا رائحة الفساد!!!

1. هل يوجد قضاء نزيه
2.الا يرى النائب دفع الله تطبيق شريعة بني اسرائيل فانها لا تعمى الابصار و لكن تعمى القلوب التي في الصدور
3.أين ذهبت ايرادات النفط؟
4. هل سبق ان قام البرلمان او اي عضو برلماني بالحصول على تفاصيل ايرادات و منصرفات بيت المال ؟
5. قولك " وانا شخصياً لا أعرف زولاً مفسداً وانا شخصيا غير مفسد " اشبه بقول العلمانيين الذين يدعون الى الاختلاط و التبرج و يقولون بانهم لم يروا أحدا يسئ للاخلاق في هذا الصدد


#694835 [عباس]
0.00/5 (0 صوت)

06-12-2013 12:23 PM
بوركت .


#694824 [انين الصمت]
4.75/5 (4 صوت)

06-12-2013 12:14 PM
11 مره مالو ماجاك صاروخ ريحنا منك يارب ارحمن والله الراجل دا من اشوفو برتفع ضغطي وخايفه يجيني سكري ولا جلطه عليكم الله شوفو مستوي الحوار وعاينو التفاهه سليمه سليمه اننا خلاص ما حنكون سليمين


ردود على انين الصمت
United States [omer] 06-12-2013 09:12 PM
يااااااااجعفر نميرى البترد عليها دى حرمة الجن يداوة كعب الاندراوة ركز شوية

[nagatabuzaid] 06-12-2013 05:58 PM
رد على جعفر نميرى تال شيخك ده الشيطان لما يشوفوا يقوم جارى

[جعفر النميري] 06-12-2013 01:17 PM
بجيك ضغط لأنك بترى الرجل كامل والكمال لله فهو ملتحي واستاذ جامعي ومتزوج من ثلاث ويقول الحقيقة وأنتم أشباه الرجال أخوان الشياطين تلاقيك كارد ذقنك كالمرأة ، وطبعاً أديك معلومة مهمة جداً ، كل شخص فيه مس من الشيطان لا يحب أن يرى شخص فيه نزعة القرآن !!روح شوف ليك حفلة ترقص فيها مع شياطينك ..


#694796 [عطيطو الاسوانى]
0.00/5 (0 صوت)

06-12-2013 11:54 AM
جزاك الله خيرا الشيخ دفع الله حسب الرسول .


#694794 [عبده الحاج حسن]
5.00/5 (4 صوت)

06-12-2013 11:51 AM
وأنا من زمان بفتش للجهة البتغذيك بالأفكار دي ،أتاريك إنت جايبا من بكو حرام،


#694782 [احمد]
5.00/5 (2 صوت)

06-12-2013 11:37 AM
مهرج ليس الا يلعب دور قزر لالهاء الناس عن القضايا الحقيقيه


ردود على احمد
[جعفر النميري] 06-12-2013 01:18 PM
أولاً صحح كلمة(قزر) ثم ضمها لنفسك لأن هذا الرجل عفيف ونظيف وشريف واشرف منك ..


#694708 [Almo3lim]
5.00/5 (3 صوت)

06-12-2013 10:28 AM
((واقول بصراحة إن بعض كتاب الأعمدة.. أقول بعضهم إذا رأيته أو قرأت له أو سمعته تتذكر نعمة الله عليك..))
---------------------------------

و دا نفس موقفنا منك يا ( حسبو الشتت قصبو )..

حقيقة نحن في نعمة كبرى و نقول خير الدعاء :

الحمد لله الذي عافنا مما ابتلى به غيرنا ..


#694671 [ابوايمن الحلاوى]
5.00/5 (3 صوت)

06-12-2013 10:02 AM
* لامنافس لك فى الدائره لانك اكثر تعليم * انا من قربه فى دائرتك مواسير مويه فى بيوتنا مافى؛ تقول لى كهرباء؛والمدرسه مسافة4 كيلو. * 11 مره مشيت الجهاد ورجعت والمعاك انقرضوا شهداء والحمد لله انك امام المسجد. * ياحاج من جهز غازيا فقد غزا وهجليج ليها جيش ابو رياله وبعدين نحن مابنحارب فى دوله !!دى مجموعة ه افراد معارضه للنظام واشتد عودها. * البلد كل شهر بتخرج فنانات غير محجبات واخر خلطه وممكن تسال واحد اسمه بابكر صديق ومحمد سليمان والسيد بشبش برقص فى حفلاتن لمن منطلونوا اقع. * والرسول(ص) قال خذوا نصف دينكم من هذه الحميراء!!وحكومتنا مليانه حريم ويراسن رجال ورئيسنا عندو اتنين!!!!! وربنا يخلف ليو بالذريه عشان نزيد الجيش حسب كلامك. * ياحاج دفعول وين السور الساتر عشات تتكلم فى صاله مغلغه؟؟ انت قايل روحك فى دوله خليجيه!!! * كدى قول بسم الله ؛يمين الله مافى حد مستهدفنا؛ ودا اصبح شعار ناس الطين الوطنى.. 8 تصنع شنو ياعمك؟؟ طلقت ابو رياله اما جات راجعه او كتمت .. وكمان الطائرات بتقوم براها وتقع براها ليها الله .. ماحصل فكو ليهم طياره جات راجعه. * عشان نزيد العدد معناها انت عاوز تحارب لسنة 2050 لكن بتحارب منو وفى شنو؟؟ وانتوا للوقت داك قاعدين؟؟؟ اعوذ بالله من ارذل العمر. * وبعدين الموظفات جميلات مافى شك لانه باين؛ بس الادب والتقوى دى ماتحكم عليها. مع احترامى لبنت بلدى. * لما تمشى تحضر ندوات امم متحده شيل معاك شنطة امواس؛ والختان شغال تش والحفلات صباحى ولا حد دخل السجن. * ياحاج ماتدخل فى الغريق وتهبش نادى الضباط والقوات المسلحه؛ بكره افتشوا ليك ماالقوك؛ وخليك مع الواقى الذكرى وبنات الجامعات والموظفات وشيرين واخواتها.... واكتفى:::::


#694630 [سعاد صالح التني]
4.00/5 (2 صوت)

06-12-2013 09:38 AM
والله الصحافه ذاتا تافهه عاملين قوما وفاعدا للمتخلف دا بشكل غريب
كان من الأولي مقابله شخص له قيمه ولديه حلول لخروج الوطن من المستنقع العفن الخطونا فيهو أمثال هذا الارهابي .
العيب مامنك يابتاع انت
العيب من حمارنا ومتخلفنا الكبير الرقاص المافي ليهو في التفاهه والعواره مثيل
ابتلاء من الله نسأله بحق قدرته التي قدر بها علي كل شىء ان يزيله عن الوطن وعن ابناء وبنات هذا الوطن.
اتفوووووووووووووووووووووعليك ياحسب الرسول وعلي أمثالك يامنبع التخلف والجهل.


ردود على سعاد صالح التني
European Union [محجوب عبد المنعم حسن معني] 06-12-2013 10:05 PM
اخونا جعفر النميري ديل ناس مافي منهم فائدة ، ناس بس بتعرف تلخبط الكيمان، نصيحتي ليك خليهم في جهلهم
مع مؤدتي

United States [MAHMOUDJADEED] 06-12-2013 06:40 PM
عيب يا سعاد الله يهدي الجميع ويصلحك ويصلح البلاد والعباد .

United States [nagatabuzaid] 06-12-2013 06:17 PM
رد على جعفر نميرى


سعاد التنى لا اعرفها شخصيا لكن اسرتها لا يمكن ان تصف عاملا عندها بالعفونة ثم ان كنت انت

فعلا ود ناس ومن بيت فى مستوى بيت التنى والله لما نطقت بهذه الالفاظ ثم كيف لانسانة تحمل اسم

اكبر الاسر تعليما وفهما وعملوا فى كل المناصب فى الجيش عندما كان جيشا وفى الدبلوماسية

عندما كانت الدبلوماسية فهما وعلما قبل عهد دبلوماسية السماسرة والتجار وخطف الزوجات من

ازواجهن وفى الخدمة المدنية من عهد الانجليز الى ان جاء عهد الانتكاس وفى كل المجالات وانتم

اصلا بتعكسوا الايات من الجاهلون؟ بت ال التنى ام تابع الشيطان الرجيم وشيطانه بالله عليكم فى

راجل ابن ناس يتلفظ بمثل ما ذكره تابع الشيطان الرجيم

United States [جعفر النميري] 06-12-2013 01:25 PM
هذه أساليب لا تنفع بل تضر بمستوى المتلقي الذي لا يجد إلا ردود أفعال عفنه مثل عفنتك يا بت التني ومثلك من جعل البلد متخلفة لأنكم تريدون ما لا تفعلون ..فقط بالتنظير والتفاهة، الواجب التجلي والتصدي بالحُجّة والإقناع لا بالتفوو أو التفاهة ومثلك نقول له كما قال تعالى (وإذا خاطبهم الجاهلون قالوا سلاما)، سلامُ على السودان ، سلامُ على الدنيا بأجمعها طالما هذا هو حياء المرأة بل تعدّت مرحلة عدم الحياء إلى قلة الحياء ...

[المطوع] 06-12-2013 10:43 AM
حسبو دا معروف بحبه للسبعات . وكمان بيقول ود الجبل قريبه وهو ذاتو ود الحجر دا شنو برضو سبعاوي وعشماوي كان . دا سودان العزة والكرامة ومخرجات المشروع الحضاري شخص نوع دا داير اقول انو ود الجبل امي لا يعرف توقيع اسمه وانا انسان متعلم ودكتور . والله لولا الكيزان وحكومتهم البلطجية لما قامت لك قئمة ولكنت صفر في الشمال والجنوب .


#694616 [الدغري]
0.00/5 (0 صوت)

06-12-2013 09:28 AM
ياشيخ ماتدفن رأسك في الرمال الفساد منتشر وسطكم وخليك صادق ربنا يسألك يوم القيامة لم تسمع بفساد وزير الدفاع وابنه ونافع وابنه وولد بكري حسن صلاح والمتعافن والبشير وإخوانه وزوجته والزول السرق بيته ووجد بيته كانه بنك السودان ياخ الشعب السوداني ده عمل ليكم شنو حتي تنكرون السرقة انت شريف قلنا ليه تنكر السرقات ياخ اتقي الله بينك وبين القبر خطوة لاتتستر علي الفساد حتي لاتكون مشارك وكل هذه الشهادات والعلم لا تساوي شئ لأنك كذاب كذاب كذاب وعارف وسامع وعندك الأدلة لكن مال السحت والعمي الحزبي عمي بصيرتك مثلك مثل أي شخص مؤتمر وطني


#694614 [ahmmed]
5.00/5 (2 صوت)

06-12-2013 09:28 AM
والله ياجماعة،الزول ده نحن قايمين عليهو ساي،في مايتعلق باجتهادوا الفقهي اياها دي الشريعة الفي الكتب،اسو ليكم شنو محمود محمد طه قال ليكم نشوف ليكم درب من كتاب الله اخلي الحكاية تمش،كتلتو،دفع الله جابها ليكم يمين مخففة سويتوه مسخره،ان شاءالله بركة الله اجوكم ناس طالبان،الشريعة الصح صح،والله الرادي كان تفتحوا للنشرة،عذبتونا.


#694598 [الضكر]
5.00/5 (2 صوت)

06-12-2013 09:15 AM
جهاد جهاد شنو المشيتلو تمشوا المرخيات والا فتاشا وتقولو مشينا الجهاد

الذيك اكان مشى الجهاد كان كرشو نخروها ليهو

ههههههههه

دفع الله نسوان


#694594 [سامر]
5.00/5 (1 صوت)

06-12-2013 09:12 AM
ما قلتليكم الراجل ده ظريف و صاحب نكتة بس انتو ما فاهمينو.....تخيلو طلع بحب الكضب وقال انا ما قلت ...!!!


ردود على سامر
United States [shah] 06-12-2013 10:47 AM
ده بتاع نكت جنسية بس وبايخة كمان.


#694592 [alkaser]
5.00/5 (2 صوت)

06-12-2013 09:10 AM
يالها من مهازل استاز جامعة راعي الغنم نع احترامي لة افهم منك


#694517 [المتغـرب الأبــدي]
5.00/5 (2 صوت)

06-12-2013 08:07 AM
حوار: عيسى جديد
-----------------------------
والله يا عيسى جديد ما عندك موضوع ..
الراجل المعتوه دا قابض الجو عشان لاقي أمثالك يعملوا معاه لقاءات ..
مالك ومالو يا خي ؟؟



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية
تقييم
1.00/10 (1 صوت)




الرئيسة |المقالات |الأخبار |الصور |الفيديو |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة