الأخبار
منوعات سودانية
الجمال مسحور.. عيون تترصد وعيون يقتلها جمالها
الجمال مسحور.. عيون تترصد وعيون يقتلها جمالها
الجمال مسحور.. عيون تترصد وعيون يقتلها جمالها


06-17-2013 06:21 AM
الخرطوم: تهاني عثمان : «قلت ليكن ده ما مرض دكاترة ما سمعتن كلامي، هسي لو كنتن من الاول قلتن خير هسي كان بقيتي في خيرين تلاته، وامك خبارا كمان ما بتعرف مرض الدكاترة من مرض الشيوخ».. لفت حديثها هذا انتباهي، وظللت انتظر انتهاء المكالمة، لاسألها عن قصدها من هذا الحديث، فقالت لي حاجة بتول: «بت اختي دي من يوم ما عرسوها ما شافت ليها عافية، بس تقول ليك السخانة في جلدي وما تترش الا بالمويه الباردة وفي الآخر جلدا دا بس رشح ليك كلو حبوب، والحنة الرسموها ليها بس اتقلعت ليك من جلدا بس تقول القطيفة»، وتواصل حاجة بتول في سرد التفاصيل وتضيف: «لكن هي يا بتي عاد برااااها سوتا في روحها، يوم صبحية العرس لمت صحباتها وجابن الفنانة وترقص النهار كلو والناس فيهم الزول الما بذكر الله والما بقول ما شاء الله والعين الحارة بتصيب».
و«العين الحارة» مقصود بها النظرة التي تصيب ما تقع عليه بالضرر، وفي حديث العين تستحضرني قصة ذلك الرجل في ضواحي ود مدني الذي دخل على بناته التوأم يوم ختانهن، وهي حكاية حكتها ليك حاجة زينب وقالت: «البنات كانن راقدات في عنقريب الجرتك ومغطيات بي توب القرمصيص.. عاين ليهن ابوهن وقال: مالن عاملات متل بنات الكوتشينة، وما هي الا ايام والبت الكبرى اصيبت بشلل في احدي قدميها بينما الاخرى سقطت اثناء لعبها وكسرت ساقها «كسر مركب» لم تتم معالجته الا ببتر ساقها».
وتحكي الخالة ست البنات الهادي قائلة: «إن احد الرجال في قريتهم معروف عينو حارة، مرة جاء بي حدا بيتنا.. بتي قامت تجري منو عشان مشهور بي عينو الحارة، وأول ما جانا قال: البنية دي مالا جاريه متل الورتابة، البت وقعت لمن سنها اتكسرت»، وتقول نادية حسنين: «بقولوا الزول العينو حارة ملاحظتو قوية وبنتبه لي أي حاجة ومرات بوصف الشيء البشوفو، وان كان غير قاصد فهو يضرك، وحتى في ناس ما بكونوا عارفين روحم». وقالت نادية: «جارتي في الحلة سحرت ود اختا، ولمن الود مرض وما لقوا ليهو علاج اختا جاتها في البيت وقالت ليها ولدك دا بكون سحرتوا ليك انا واتوضت ورشت ود اختا بي مويه وضوها». ويقول الحاج عبد الرحيم ان العين اكثر ما تصيب النساء والاطفال، وفي لخمة وانشغال الناس نسو امر التحصين وضرورة ان يحصنوا انفسهم واولادهم»، ويقول فيصل عمر: «اشتهر فريق في قريتنا بأن كل اهله «عينم حارة» وقالوا العين الحارة ورثة، وانو الامو وابوهو اولاد عمومة عينم ما بتقع واطة يعني بتأذاك بتأذاك، وفي ناس بقولا الزول العيونو مدورة عينه حارة، وان شكل العيون ليها دورها».
وتكون العين اكثر خطراً من السهم المسموم خاصة عند من لا يذكرون الله، لذا تعودنا ان نسمع من حبوباتنا عند رؤيتهم لكل ما يسر ويعجب قول: «صلاتي علي النبي، صلاتي علي النبي» وتكررها احداهن اكثر من مرة، وليس المقصود منها الجزم بأن الواحدة عينها حارة ولكن تحسباً للآخر من أن يصيبه ضرر مما اعجب عين الرأي، والمشيئة تحجب ضرر العين حتى أن الكثيرين يستصحبون سلامهم بقول ما شاء الله

الصحافة


تعليقات 7 | إهداء 0 | زيارات 5655

التعليقات
#699986 [ابراهيم]
0.00/5 (0 صوت)

06-18-2013 09:57 AM
كلامك صاح يا USAMA كل الديانات السماوية فيها العين . علمهم ووريهم وثقفهم . هم اصلاً قايلين العين عند المسلمين بس . وقايلين مافي ناس غير المسلمين بيامنوا بيها .


#699670 [وليد ذو الفقار]
0.00/5 (0 صوت)

06-18-2013 02:02 AM
دي صوره لطفله وانا بستغرب واحد معلق فوق تعليق اهبل دي طفله


#699069 [الغضنفر]
5.00/5 (2 صوت)

06-17-2013 10:53 AM
غايتو العيون الفوق دي لو أدتني طلقة كاربة في دنقوستي دي و ركبتني التونسية أنا عافية ليهن دنيا و آخرة.


#699028 [ابوايمن الحلاوى]
0.00/5 (0 صوت)

06-17-2013 10:24 AM
كل قيم ومعانى الغزل تاصلت واوجدت فى العيون !! لا توجد قصيده او مقطع للشعر يخلو من التطرق للعيون وحتى المعلقات لم تخلوا من تناول العيون بمعانيها المختلفه والعجب العجاب الاغانى السودانيه تركت كل شىء وانحازت للعيون وفتشوا عليها !!!بس العين البتصيب دى مامعروفه الا فى المجتمع المسلم !!! وكدى شوفوا بنات جون فى بقاع الارض جمال العيون وهبوه ليهن وكل حاجه عندهن تمام لكن ماسمعنا انه فى واحده ودوها لشيخ او عملوا ليها بخرات والجمال عندهن مامسحور بل يتم عرضه للغاشى والماشى ولا تعقيب تانى.....


ردود على ابوايمن الحلاوى
[الكيك الكمل بلادو فريك و قبل على الحسكنيت] 06-17-2013 05:57 PM
أولاد جون و بنات جون عيونهم أخطر من عيونا نحن المسلمين لأننا بنقول ما شاء الله و تبارك الله و هم عندهم العين و لكنهم لا يفسرونها كما نفسرها نحن المسلمين و لذلك عندهم أمراض أكثر مننا و بالذات الأمراض النفسية و الكثير منها بسبب العين و لكن لأنهم لا يعرفون اصابة العين و لا يعترفون بها و لذلك لم تسمع انه فى واحده ودوها لشيخ او عملوا ليها بخرات.


#698976 [ابوساره]
5.00/5 (1 صوت)

06-17-2013 09:38 AM
هسع الجمال وينو؟ مسويه عيونه ديل البلا الكديسة !!!!!!!!!


#698944 [مريود]
0.00/5 (0 صوت)

06-17-2013 09:11 AM
كلام صاااااااااااااااااااااااااااااااااااح .
العين حق ولو كان شيئ سابقا القدر لكانت العين.


#698836 [حريف ما لاقي]
5.00/5 (1 صوت)

06-17-2013 07:51 AM
العين لو افترضنا انها موجودة لكن السودانيين كترو المحلبية ... لفينا بلاد كثيرة لم نجد للعين قصص وحكايات وروايات ومناظر وافلام كما في السودان ... انه الفراغ والجهل ... اصحوا يا عالم الناس ماشة المريخ بعد شوية حتلقوا نفسكم براكم في الواطة وزل بيخدمكم مافي والله الا ترجعوا لحياة اجدادنا القدماء ... ابرة ما قادرين تقدوها وتتفاصحوا عين وعمل وجن وشيوخ وبرضو تقولوا لي المؤتمر الوطني حكم 24 سنة ... اكاد اجزم بطريقتكم دي حيحكمكم 240 سنة وفي مقولة اخري 2400 سنة


ردود على حريف ما لاقي
United States [MAHMOUDJADEED] 06-17-2013 07:32 PM
أنت لاقي لكن ما حريف . العين حق .. العين تدخل الجمل القدر وتدخل الرجل القبر .

United States [ابوالرسالة] 06-17-2013 12:40 PM
انت عملت شنو؟ قديت ابرة يقد جيبك

[USAMA] 06-17-2013 12:34 PM
بالعكس يا حريف ، العين و الحسد موجود في كل ثقافات الدنيا ، حتى في امريكا و الغرب عموما و هو ما يطلق عليه عندهم لفظ evil eye ، و إن كان بصورة اقل من ما هو سائد عندنا ، و قد قرأت قصة مرة لأب من يوغسلافيا فقأ عينيه بيده حتى لا يتسبب بالاذى لمولوده الصغير بعد أن رآه للمرة الاولى ، و ذلك لما عرف عنه من شدة العين.



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية
تقييم
9.00/10 (2 صوت)






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة