الأخبار
منوعات
بائع العماري (قذافي) : دخلي في اليوم (2) مليون جنيه!
 بائع العماري (قذافي) : دخلي في اليوم (2) مليون جنيه!


09-05-2013 04:22 AM

الخرطوم: أمنيات محمد :

(التمباك) او (الصعوط) سلطان الكيف الذي يجمع كل الناس بمختلف طبقاتهم تحت لوائه ، يجبرهم ان يأتوا مهرولين لطلبه ، اثرياء وفقراء تجدهم يقفون جنبا الى جنب امام محلات بيعه .. هذا ما وجدناه امام محل (قذافي الكائن بسوق ليبيا ، حيث تحدثنا معه حول اصل (التمباك) وزراعته ، وطريقة صنعه ، ذلك في المساحة التالية :



*حدثنا عن اصناف التمباك ؟

(الحقة ) وهي اجود انواع التمباك وأغلاها ثمنا ، الرطل منه بـ(11) جنيها ، ويأتي في المرتبة الثانية من حيث الجودة (السيوبر) والرطل منه (6 جنيهات) اما الاقل جودة اسمه (شاذ) والرطل منه بـ(5 جنيهات) .

*اماكن زراعته وكيفية حصاده ؟

يزرع في منطقة الشقرة بشمال دارفور بصورة اكبر ، وزراعته موسمية مع فصل الخريف وتنجح زراعته في التربة الطينية وعندما تنمو بصورة كاملة يتم قطع اوراقه وتجفيفها في اماكن ظليلة ، وبعد ذلك يتم طحنها وتعبأ في جوالات ، ثم يتم تخميرها بـ 20 رطل عطرون لكل برميل (تمباك) واضافة الماء . وبعد ذلك يصبح جاهزاً للبيع .

*يقال ان (التمباك) يزرع ليخفى بينه البنقو؟

التمباك لا ينمو مع البنقو مطلقا.

*دخلك اليومي من تجارة التمباك؟

دخلي اليومي (2) الف جنيه بالجديد ، الاستهلاك اليومي 120 رطلا .

*كيف تبيع شيئاً يضر بصحة الانسان عمدا ؟

انها مسألة اكل عيش وكل من يتناوله يعرف انه ضار بالصحة .. وانا اعلق على محلي لافتة مكتوب عليها (التمباك ضار بالصحة ويسبب السرطان) فالزبون يقرأها قبل ان يشتري مني.

*رائحته كريهة كيف تتأقلم معها ؟

تعودت عليها وادمنتها اليوم الذي لا احضر فيه للمحل اصاب بالصداع. *نوعية الزبائن الذين يترددون على المحل ؟

شباب وشيوخ بل ونساء يأتين ليشترين التمباك.

الراي العام






تعليقات 19 | إهداء 0 | زيارات 5508

التعليقات
#760366 [بت حبوبتها]
3.00/5 (1 صوت)

09-06-2013 12:01 AM
والله يا قذافي باين عليك تاجر شاطر لكن يا ريت تغير بضاعتك المسرطنة القاتلة !

بعدين ممكن تضحك علينا لكن ما بتقدر تضحك على ربنا .. شنو يعني تعلق لافتة بأن التمباك قاتل وانت بتبيع فيهو !

أنا زوجي مدخن لكن عمري ما جبت ليه سجاير مع تموين البيت "حاجات الشهر" عشان ما أحس إني ساهمت في أذيته, الله يهديه ويهدي جميع المدخنين ومستعملي التمباك, آمين.


#760295 [كركاب]
5.00/5 (1 صوت)

09-05-2013 07:26 PM
شغل يا قذافى
التمباك مضر بالصحة ويسبب السرطان
لك كل الحق اخليت مسؤليتك الاجتماعية


#760265 [تينا]
0.00/5 (0 صوت)

09-05-2013 06:15 PM
الأخ الفاضل ((( محجوب معنى ))) ربنا يجعل كل أيامك ضحك وسرور . بالله بذكرك بواحدة اسمها أم أحمد مشاكسة زييى كدا ولا شنو ههههه امكن من الدفعات القبل ما ابدأ معاكم التعليق لذا ما عرفتها . أما اختنا الفاضلة نجاة ابو زيد أنا برضو بسأل منها لى مدة وعملتا ليها نداءين نسأل الله أن تكون بخير وتظهر قريب وتنورنا وكذلك أختنا الفاضلة نوارة نتمنى رجوعها وأخونا واحد برضو ما عرفتو لكن نتمنى كلهم يرجعوا وينوروا الراكوبة . تحياتى


ردود على تينا
European Union [محجوب عبد المنعم حسن معني] 09-05-2013 08:22 PM
الف تحية مرة ثانية لك اختي الكريمة تينا، هي مشاكسة لكن لا تخلو من احترام ويعجبني تعليقك عشان ما فيهو اسفاف وتحقير للأخرين، بل بالعكس فيهو نقد بناء واحترام للجميع لا يخلو من قفشات، كذلك كانت هذه سمة الاخت ام احمد، اخونا واحد ايضا شخص رائع جمعتنا نقاشات عن امدرمان الحبيبة.
مع مؤدتي


#760258 [Me too]
0.00/5 (0 صوت)

09-05-2013 05:45 PM
تمباك= خمول وقعاد في الضللة واحلام يقظة ولعن وسب في الزمن والحظ والبلد متاخرة لان العقول والرؤس متخمرة بفعل هذا التمباك ماله حرام وتعاطيه حرام ورائحته ينفر منها الشيطان والله شيء مقزز ومقرف في المواصلات في السوق في المطعم في كل مكان وجانا كمان تعاطي البنات !!!!1 اللهم لا نسالك رد القضاء ولكن نسالك اللطف فيه. ودمتم سالمين


#760202 [ابو الطب]
0.00/5 (0 صوت)

09-05-2013 03:56 PM
ااحمد لله اهلنا انصار مايكرهو شى اكتر من التمباك والبسفو التمباك


#760081 [برعي]
0.00/5 (0 صوت)

09-05-2013 01:20 PM
والله موضوع يقريف ! ما تجيب سفه يا اخ ؟؟ ها هاها


#760007 [radona]
5.00/5 (1 صوت)

09-05-2013 11:41 AM
التمباك والبنقو هي اساس المال الذي تعتمد عليه الحركات المسلحة في دارفور وهذا شئ يعلمه القاصي والداني
الحكومة كدأبها تفكيرها في الضرائب والعوائد والجبايات من التمباك
ولايهمها صحة الموطن في شئ
هسع بالله كان زرعوا بدل البنقو والتمباك زهور ما كان صدرناها وجابت دولار لجماعة الحكومة
السودان اكبر مصدر للبنقو والتمباك
لذلك كل يوم سنشهد حركة تحرير سودان
الحكومة تاخد جنيه ضرائب بتاعين الحركات يستفيدوا 1000 ج ويجيبوا بيهو سلاح لحماية تجارتهم ومناطقها
لو غلبتكم كلموا امريكا تجي تبيد مزارع البنقو والتمباك بالطائرات
واؤكد لكم امريكا في دي حتتعاون معاكم بل وتحترمكم
جربوا


ردود على radona
United States [KAJNKI] 09-05-2013 02:45 PM
يا الاسمك Radona اذا ابيد الصاعوط واحرقت مزارعه ،، انا متأكد حبوبتك حتموت من شدة الخرم


#759936 [تينا]
5.00/5 (3 صوت)

09-05-2013 10:50 AM
أجى يا بنات أمى ؟؟ عاد ما بسألكن واقفات بدون خجلة ؟؟ ياهو فعلا اخر الزمن نحن فى الرجال عندنا فيهو رأى كمان جيتن انتن استحن عاد .


ردود على تينا
European Union [محجوب عبد المنعم حسن معني] 09-05-2013 04:32 PM
الاخت تينا
تحياتي
اضحك الله سنك ، ما عارف والله دايماً بتذكريني، بالاخت ام احمد من السعودية، ما عارف وين اختفت ليها فترة ما ظاهرة، وكمان التحية لبنت امدرمان نجاة ابوزيد ايضاً هي ما ظاهرة وان شاء الله المانع خير والاخت نوارة ايضاً من قطر واخونا واحد من السعودية، التحية للجميع من دون فرز


#759856 [MAHMOUDJADEED]
5.00/5 (1 صوت)

09-05-2013 09:41 AM
2000 ج في اليوم 60000 ج في الشهر حوالي 30000 ريال سعودي في الشهر . دخل محترم جداً لكن مال التمباك ده بيمشي وين ؟!!


#759834 [كيس الموز التحت السرير]
0.00/5 (0 صوت)

09-05-2013 09:25 AM
جميل جدا بسفو بس . احسن من البنقو ؟ البلد عاوزه كده بنات تفتيحه .


ردود على كيس الموز التحت السرير
United States [كيس الموز الفي التلاجه] 09-05-2013 10:07 AM
هههههههه ياخي بكونن مرسلات من حبوبتن العجوز .


#759810 [نسأل الله لنا وله الهدايه]
0.00/5 (0 صوت)

09-05-2013 09:08 AM
اللهم أغْننا بحلالك عن حرامك وبفضلك عن من سواك .


#759642 [ابومونتي.]
4.50/5 (2 صوت)

09-05-2013 07:02 AM
من أغرب القصص التي سمعتها
أحد المغتربين,تزوج إحدي الحسان وإكتشف
إنها بتسف التمباك,غضب غضبا شديدا,وخيرها
وقال لها: يا,,,أنا يا,,,التمباك فقالت له التمباك.
فطلقها.


ردود على ابومونتي.
United States [كركاب] 09-05-2013 07:21 PM
هههههههه
حلوة
بت ما تفتيحة كان تخت السفة فى الشفةالعلية


#759628 [المتجهجه بسبب الانفصال]
4.82/5 (6 صوت)

09-05-2013 06:43 AM
بالامس أجرت قناة الشروق لقاء مع المعتمد أبو كساوي وقد بدأ لا حيلة له في مواجهة الحاصل من مخلفات وتداعيات السيول والامطار وتراكم القمامة مما ولد الذباب والناموس وقد طافت كاميرا الشروق عدة اماكن في مايو وكرري وجبل أولياء واشتكى المواطنون سوء الخدمات ورمى المعتمد بعض العبء غير الاداري على سلوك المواطنين في التعامل مع القمامة ،،، وطالما أن قذافي أكد أن السعوط لا يحط (يرك فوقو الضبان) الذباب عليه فاني اقترح على المعتمدين في هذه الايام غير المباركة بالذباب والناموس أن يجروا دراسة لاستخلاص بفباف من السعوط يرش بالطائرات في اجواء المدن والقرى لطرد الذباب والناموس إلى الدول المجاورة أضف الى ذلك أن رش مستخلص التمباك في الجو سيزيد نسبة الكيف دون شراء للتمباك الأصل على غرار موضة الاحزاب الاصل وغير الاصل،،

وقال قذافي ان دخله في اليوم 2 مليون جنيه أي الفين أو ما يعادل أكثر من 250 دولار وهو دخل في ظل دخل الفرد في السودان كبير جدا ولعل ربيع عبدالعاطي حينما حسب دخل الفرد بأنه حوالي 1800 دولار حسبه على هذا الاساس بدون هوادة،،، ومن الملاحظ في السودان هذا البلد الذي بدأ في الآونة الاخيرة غريب الاطوار ويزداد فيه النزاع والشجار أن الضرورات التي لا تبيح المحظورات تحظى بنسبة مبيعات عالية ،،،


#759610 [عمر عيسى]
0.00/5 (0 صوت)

09-05-2013 06:12 AM
حرام والله


#759607 [الكنزي]
5.00/5 (1 صوت)

09-05-2013 06:00 AM
و النساوين ديل برضو بسفنننننننننننن!!!


#759600 [الكاهلي]
0.00/5 (0 صوت)

09-05-2013 05:48 AM
دا مقال ليكي يا مجنونه يا بت ام حمد(ضم الحا)


ردود على الكاهلي
[عصمتووف] 09-05-2013 07:07 AM
سمج وسخيف وباهت وثقيل الدم يا كهل طرشق واضرب راسك الفارغ بالحائط


#759583 [سايكو]
0.00/5 (0 صوت)

09-05-2013 05:10 AM
كان الحكايه فيها 2 مليون في اليوم حقوا الواحد من بكره يشوف ليه طريقه مع ناس التمباك ديل ، انشأء الله كان 2 مليون في الشهر بس برضو احسن من العطاله ، و طز في نظره المجتمع ، و كان علي الشهأدات دي بنقطعها و نرميها ما دام ما وفرت لينا شغل بمرتب معقول يحفظ كرامتنا .


#759579 [المكوجي]
0.00/5 (0 صوت)

09-05-2013 05:02 AM
ونساء يأتين ليشترين التمباك

وديل مُرسّلات ولّ بِسِفّن؟؟


ردود على المكوجي
United States [غلبان] 09-05-2013 02:18 PM
هههههههههههههههه يا مكوجى نصهن بسفن


#759576 [الصارم]
5.00/5 (2 صوت)

09-05-2013 04:57 AM
وغيركم مضيعين البلد بالتمباك والكسل والوساخة ودى الحاجات اللى بتستفيد منها البلد منكم +الخراب وحمل السلاح



خدمات المحتوى


مساحة اعلانية





الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة