الأخبار
أخبار إقليمية
مبارك الفاضل يكتب: البشير يتهمنا بادعاء ضيق العيش رغم توفير الانقاذ البيتزا والهوت دوق
مبارك الفاضل يكتب: البشير يتهمنا بادعاء ضيق العيش رغم توفير الانقاذ البيتزا والهوت دوق
مبارك الفاضل يكتب: البشير يتهمنا بادعاء ضيق العيش رغم توفير الانقاذ البيتزا والهوت دوق


انتشار الفقر وضيق العيش وفساد الحكم حقائق يكابدها الشعب يومياً
09-21-2013 07:21 PM
بسم الله الرحمن الرحيم

خرج علينا رئيس الانقاذ عمر البشير في خطابه لشباب حزبه بمبررات مخادعة وكاذبة لعزم حكومته زيادة اسعار الوقود والخبز في البلاد وهذا سلوك طبيعي درج عليه منذ توليه للسلطة عبر انقلابه العسكري لصالح الجبهة القومية الاسلامية .
ولكن ما دعانا للتعليق من خلال هذا المقال هو ما جاء علي لسانه من امتنان علي اهل السودان بان نظامه عرفهم الهوت دوج hot dogs وهو عبار عن قطعة سجق كبيرة الحجم تعتبر أكلة شعبية ألمانية ( الفرانكفورتر) تباع في عربات متحركة في الاسواق في المدن الالمانية. وفي نفس اليوم خرج علينا وزير ماليته في لقاء صحفي يمتن فيه علي اهل السودان بان الانقاذ عرفتهم
البيتزا وهي أكلة شعبية إيطالية. ( والبيوت قبل الانقاذ كانت شينة) وقد سبقت تصريحات البشير ووزيره العبقري تصريحات مماثلة لأركان نظامه علي ذات الوزن مثلاً (بان السودانيين عرفوا موية الصحة بعد الانقاذ) او( الماقادر يعيش في الخرطوم يطلع منها ويكفينا شره__والجالوص ممنوع.)

الغريب ان معظم قادة الانقاذ ينحدرون من اسر فقيرة، والفقر ليس عيباً فمعظم اهل السودان فقًراء. وحتي اسرة المهدي كانت اسرة فقيرة من المجاهدين امتهنت الزراعة وكدت واجتهدت حتي بلغت ما وصلت اليه في عهد الامام عبدالرحمن المهدي. وكثير من رجال الاعمال والمال في السودان كانوا فقراء عصاميين ،اجتهدوا وناضلوا فاغناهم الله رجال امثال الشيخ مصطفي الأمين ،وابوالعلا، والبرير وآخرين كثر. عملوا في الزراعة والتجارة والصناعة وكبروا مع اعمالهم. ولكن العيب وكل العيب ان تتنكر لبيئتك من الفقراء كما فعل قادة الانقاذ الذين صعدوا من قاع المجتمع وعندما وصلوا الي اعلي سحبوا السلم الذي صعدوا به. فكانت اول قراراتهم الغاء مجانية التعليم والعلاج حتي لا يتعلم ابناء الفقراء ولا يتعافوا، مع العلم بانهم يعلمون جيداً بانه لولا مجانية التعليم لما تعلموا ولما وصلوا الي مواقعهم التي مكنتهم من الاستيلاء علي السلطة عبر الانقلاب العسكري.

ولكن يبدوا جلياً الان من تصريحاتهم وقراراتهم انهم يعانون من عقد نفسية تجعلهم يكرهون بيئتهم الفقيرة التي نشاؤا وترعرعوا فيها ولذا يتمسحون بما يعتقدونه مظاهر الغني فيتحدثون عن الهوت دوق والبيتزا ومياه الصحة ويحرمون مباني الجالوص التي نشأنا فيها حتي لا تذكرهم بماضيهم بعد ان سكنوا القصور بمال الشعب، بل احدهم حرم أطفال السودان وأسرهم من التنزه في حديقة الحيوان ، فقام ببيعها حتي لا تذكره بماضيه. لتصبح الخرطوم بدون حديقة حيوان رغم ان السودان زاخر بالحيوانات المتنوعة.

ولكن بئس ما امتنوا به من أطعمة علي الشعب السوداني، الهوت دوق ألالمانية او البيتزا الايطالية فلا اجد فيهم اي فخر لأهل السودان. نحن السودانيون نفخر باكلاتنا الشعبية ومطعمنا، وأينما ذهبنا او اقمنا تصحبنا الكسرة والملاح والعصيدة والقراصة وشيت الجمر لمن استطاع اليه سبيلاً في عهد الانقاذ النحس.

لقد كنا قبل الانقاذ فقيرنا وغنينا نشرب من موية الماسورة والبئر ونحن في احسن حال الي ان جاءت الانقاذ وتدهور كل شئ وتبدل لون الماء في المواسير الي السواد بسبب تدهور خدمات مياه المدن والأرياف نتيجة لسياسة التمكين التي ابعدت الكفاءات وجاءت بالكيزان في كل المواقع. اضف الي ذلك الفساد والنهم والنهب للمال العام الذي أدى للتلاعب والغش في مواد تنقية المياه وإهمال صيانة محطات ودوانكي المياه في الريف حيث خصصت الانقاذ في الميزانية العامة نصف في المئة لخدمات المياه فقط. لهذا السبب عرف المقتدرون مياه الصحة وفلاتر المياه التي راجت في عهد الانقاذ. اما غير المقتدرين فاضطروا لترويب ماء المواسير والآبار التي اختلطت مياها بالصرف الصحي حتي يستطيعوا شربها.

لا ادري كيف يستطيع قادة الانقاذ الكيزان ان يفسروا امتلاكهم للقصور والمزارع الفخيمة والعربات الفارهة والعقارات في دبي وماليزيا وفي باركلين أرقي وأغلي احياء لندن وهم كانوا فقراء وابناء فقراء لا ميراث لهم ولا دخل غير مرتب الدولة
كيف يبرر ضابط مساحة بسيط وبايع تياب نسائية امتلاك شركات عبر القارات وامتلاك مئات ملايين الدولارات وهم لا ارث لهم ولا استثمار لهم غير عضوية الجبهة الاسلامية ونظام الانقاذ. ولكن صحيح الاختشوا ماتو

في الختام نقول للبشير وزملاءه من أدعياء التدين أنكم لن تستطيعوا خداع الشعب السوداني او تخفون عنه الحقيقة الماثلة أمامه في انتشار الفقر وضيق العيش وفساد الحكم لانها حقائق يكابدها يومياً ولم يعد هناك أمامكم غير الرحيل.

20/سبتمبر 2013


تعليقات 63 | إهداء 0 | زيارات 14637

صفحة 1 من 212>
التعليقات
#775482 [الداقوي]
0.00/5 (0 صوت)

09-24-2013 09:40 PM
هوي اعملوا حسابكم والله انا سمعت مبارك الفاضل دا بي اضاني دي ايام كان مترشح لرئاسة الجمهورية يقول ما معناه أن السودان دا ملك حر لآل المهدي. والله يلحق لامن يلم فيكم ويبقي رئيس بعد ما نقلبها إلا يضوقكم المر وسواد الليل. دا زول ما بيعرف إلا نفسه وآل المهدي ونسابته وباقي السودانيين لم وأدي البحر . تموتوا انتو في الانتفاضة ويجو هم يبقو رؤساء بدون أي تضحيات. عمركم سمعتو بي زول مات في احتجاجات والله انتفاضة من آل المهدي والله الميرغني؟نقلبها برانا ونحرسها منهم ونبقي رؤساء برانا.


#772875 [عبةدالله الفشاشوية]
0.00/5 (0 صوت)

09-23-2013 01:48 AM
التحية الحبيب المناضل سيد مبارك في ابطاله للباطل و تشخيص حالة قادة الانقاذ السايكولوجية و ما خفي اعظم و عندنا امثله علي عثمان كثر


#772852 [إبن السودان البار ***]
5.00/5 (4 صوت)

09-23-2013 12:17 AM
هل ستحاسبك حكومة الثورة علي فسادك عندما عينك عمك وزيراً لوزارة التجارة وأغتنيت منها ؟؟؟ أم عفا الله عما سلف ؟؟؟ الشعب لا يريد الطوائف الدينية وكهنتها وعوائلها التي تريد المحافظة علي مكتسباتها ؟؟؟ والسودان لن يكون حكمه حكراً علي هذه العوائل وطوائفها التي بلانا بها الإستعمار ؟؟؟
الوجيه مبارك الفاضل !!! عندما كان وزيراً للتجارة في االحكومة الخاصة بعمه الصادق باع قطن السودان الذي كان يقدر سعره ب100 مليون دولار باعه ب60 مليون دولار لتاجر هندي يحمل الجنسية البريطانية اسمه باتيا وعندما احتج محافظ بنك السودان لرئيس الدولة آنذاك سيدكم الصادق
المهدي زعل من المحافظ المرحوم طيب الذكر/الشيخ بليل اذ كيف حتة محافظ يسائل الوزير ود العز ؟؟؟ وصفت احد الصحف البريطانية هذه الصفقة بصفقة القرن ؟؟؟ ومن ضمن ما أستلمه مبارك من رشوة الطائرة التي أحترقت بنيروبي – كينيا وقتلت ستة طيارين سودانيين في عز شبابهم ومن ضمنهم الطيار المرحوم نزار أحمد يونس رحمهم الله جميعاً ؟؟؟ ومنذ ذلك الحين اصبح مبارك الفاضل وجيهاً وتمرد علي عمه الذي علمه السحر وكون لمة خاص به سماها حزب ؟؟؟ وفي السودان الحبيب نسمي اي لمة فتة حزب ؟؟ وقبل ان يكون وزيراً كان يعمل موظف من دون أعباء في مصنع خليل عثمان بمرتب متواضع وبعد ما إستلم وزارة التجارة وهاك يا بيع في الرخص التجارية وكذلك صفقة القطن وبذلك كون نفسة وأشتري عقارات في لندن والآن يعيش كوجيه ورئيس حزب مطلق وأبدي في سبات ونبات وملعون ابوك بلد ؟؟؟ والذي يريد ان يتحقق من هذه المعلومات وما خفي أعظم فليسأل كبار موظفي بنك السودان والأقطان ووزارة التجارة في ذلك الزمان ؟؟؟ وفي السودان من المستحيل ان تكون هنالك أسرار وخاصةً في جرائم الفساد والجنس ؟؟؟ ففي بيوت العزاء والمناسبات تفشي كل الأسرار وخاصة من النساء ؟؟؟ لأن زوجة الموظف الصغير بالجمارك او الشرطة او الوزير الجديد عندما تظهر في المناسبات بالتوب الحرير الجديد والأيدي تكون معنكشة بالأسورة الذهبية من الرسغ الي الكوع وهي من قبل كانت حايمة بشبشب سفنجة تثير الغيرة ويتبرع الجميع بالبحبتة ومعرفة السر ؟؟؟ والثورة في الطريق ؟؟؟


#772785 [عمك تنقو]
5.00/5 (1 صوت)

09-22-2013 09:33 PM
(انه لمن سخريات القدر ان يحكمنا من كانوا بالامس ياكلون لحم الاسود وموز القرود ) هذه مقولة عظيمهم الترابى بعد المفاصلة فى اشارة الى اللعين على عثمان محمد طه الذى كان والده يعمل حارسا فى حديقة الحيوان ويقوم بسرقة باقى لحم الاسود وموز القرود ويذهب بها الى بيته .. لعنة الله عليهم جميعا


#772778 [نص صديري]
5.00/5 (4 صوت)

09-22-2013 09:23 PM
مبارك الفاضل انت اكبر حرامي وكت كنت وزير للتجارة في عهد صادقكم الدايش نسيت سوق الرخص قدام وزارتك ؟!
ورفع الدعم عن السكر؟!!
ياحليلك وحليل قعداتك ...قعداتك برخص مصانع الجلود وتصاريح السكر
انت قايل نسينا تاريخك الوسخ؟ كدي خلي جيلنا يموت وغشوا الصغار الما حضروا زمنكم كالعادة


#772746 [الحقيقة مرة]
5.00/5 (2 صوت)

09-22-2013 08:32 PM
الكوز بطبيعتو بطيني شهواني مخو الحقيقي بين السرة والركبة في الدنيا غير شهوة البطن والفرج تاني ما بعرف ولا عايز اعرف شي ذاتو


#772646 [عطيطو الاسوانى]
5.00/5 (3 صوت)

09-22-2013 06:12 PM
ايها السودانين الشرفاء نظموا انفسكم لمرحلة انتقالية فيما يبدو لى انتهى عهد الانقاذ بالاخطاء المركبة ولن تنفع سياسية الترقيع . ان الاوان لبداية جديدة تحقق للمواطن ابسط حقوقة فى العيش الكريم . دعوا الخلاف سو الصفوف وتوحيد الكلمة والله اكبر والعزة للسودان . الله اكبر ولا نامت اعين الحرامية . والى الامام وثورة حتى النصر باذن الله .


#772622 [عماد كمال]
3.00/5 (2 صوت)

09-22-2013 05:31 PM
كل كلمة حا اذكرها تحتها الكثير من الكلام و لكني سوف اكتفي بذكرها فقط , دون تبرير او تفسير و هذه الكلمات هي انجزات حكم الاحزااااااااااااااااااااااااب عام 2514 :
1/ الاتصالات
2/ البترول
3/ سد مروي
4/ مصانع السكر
5/ مصانع الاسمنت
6/ مصانع الزيوت
7/ المواني العديدة
8/ الطرق العديدة
9/ تخطيط السكن العشوائي
و الله ده و انا ما سياسي لو كنت سياسي و عايش الزمن داك كان عرفت شنو .
مجانية التعليم للعدد القليل لا تعني سوي تمييز طبقي , و مجانية العلاج تعني تقديم خدمات يدفعها العامل البسيط للاغنياء التجار , و بعدين من الذي قال ان التعليم و العلاج غير مجاني , لكن طبعا اولادهم الواحد اذا اصفر ساكت كان الاخصائي يجي جري البيت و لو ما جا بكرة يمشي الشارع هسي الاخصائي يصارع الحكومة و الوزير لو ما عجبهم عندوا عيادته الخاصة, و نحن ناس قريحتي راحت ديل من زمان ناخد حبة ( الجون ) و نقول معاها الشفاء من رب العالمين و ده بعد تئن يوم كامل زول جايب خبرك مافي , و طبعا الجماعة وجدوا ليهم حجه و طلع الابطال المدافعين عن حقوقكم الضائعة و نحن كان عندنا حقوق من زمان ضايعة .


ردود على عماد كمال
United States [ابو ساري] 09-22-2013 09:09 PM
الظاهر الناس في وادي و انت في وادي . شكلك من اهل نعيم الانقاذ و امورك مصلحة و ما حاسي بالشعب الغلبان. اي انجاز تتحدث عنو وكل ما ذكرت هي مجرد مقالب شربتوها الشعب السوداني ديون على كاله و جدواها الاقتصادية زيرو كبير. دائما تعتقدون في الشعب السوداني الغباء حتى يخرج امثالك و يقول مثل هذا الكلام


#772529 [ود فارس]
5.00/5 (4 صوت)

09-22-2013 03:18 PM
كلام صاح و منطقي ياود المهدي لكن انت برضو وود عمك حرامية كبار


#772528 [ودالعمدة]
4.50/5 (3 صوت)

09-22-2013 03:18 PM
بشبش من صراصر وحوش بانقا وزريبة ابقار والده بكافوري .......
وزير المالية من منطقة تدعي قراقير لا يوجد بها سكن غير الرواكيب ........
والي الخرتوم من القضارف وكل سكنها قطاطي قش .......
يتفزلكون علي الشعب اللذي افقروه بالهوت دوق والبيتزا وماء الصحةوبيوت الطين !!!!
سبحانه من يحي العظام وهي رميم,,,والشبع بعد الجوع لقليل الاصل "مضرة"


#772524 [المهند]
5.00/5 (2 صوت)

09-22-2013 03:16 PM
يامبارك الفاضل ماذا قدمت للسودان عندما كان القلم بيدك على سبيل المثال عندما كنت وزيرا للداخلية ولكن في هذه المرحلة لامانع ان نتحد انا واخوي وابن عمي على الغريب (الانقاذ+ المؤتمر الوطني )
تحياتي


ردود على المهند
United States [امجد النور] 09-23-2013 05:50 AM
كان يمكن ان يمسك رقابكم كما تمسكها الانقاذ حاليا" على الاقل اعطى الرجل هذا


#772518 [ود امدر]
0.00/5 (0 صوت)

09-22-2013 03:12 PM
و حديقه حيوانات لي هسي بقت بدل ما تكون الحيوانات في الاقفاص و تجو تتفرجو فيها بقت راكبه البكاسي و الكروزرات و حايمه في الشوارع و الاسواق.....


ردود على ود امدر
United States [امجد النور] 09-23-2013 05:25 AM
روق شوية يازول الحيونات هم من سرقو قوت الشعب الذى يكافح من اجل الحياة الكريمة. ودى امدرمان ودة فعلا بتدى المهاجر وبتخلى اهلا. ياضيفنا لو زرتنا لوجدتنا نحن الضيوف وانت رب المنزلى.


#772504 [ابراهيم سماوى]
5.00/5 (2 صوت)

09-22-2013 03:03 PM
بس ما تنسى إنك قلت فى مصنع للسلاح الكيماوى جنوب الخرطوموكان سببا لضرب مصنع ادوية
ولم تحافظوا انت وابن عمك على الديمقراطية التى بذلنا فيها دمنا
كما اننا نعرف تاريخ واصل الانقاذيين ايضا نعرف تاريخكم الاسود فى الحكم
وقصص اليورانيوم ... وووو أسكت يا مبارك انت اخر من يتحدث


#772491 [تينا]
0.00/5 (0 صوت)

09-22-2013 02:55 PM
مرحبا بك فى راكوبتنا الظليلة عمنا الفاضل ((( صادق الصادق ))) وأقول لك الحمد لله أنك لم تسمع بالهوت دوق بل الحمد لله أنك لم تراه واذا كنت رأيته كنت ستصاب بالطمام ولن تستطيع أن تستسيغ طعمه الغريب صراحة عمنا الكريم استغفر الله أن أعيب الأكل لكنه مقزز بمعنى الكلمة وأحمد ربك أنه جنبك طمام البطن بسببه . تحياتى


#772479 [NjerkissNajrta]
4.50/5 (2 صوت)

09-22-2013 02:38 PM
يا اللى كنت وزير و كمان سافرت حول العالم الأنقاذ فاشلة لكن أنت أكثر فشلا كما نعرفك حتى أن استشهادك بالهوت دوك و البيتزا غير موفق لأن الهوت دوك و البيتزا ليست الا أطعمة معروغة بأنها زخيصة وضارة بالصحة و هذه ليست الا معلومات عامة و متاحة يا عبقرينو


#772470 [المهاجر]
4.00/5 (1 صوت)

09-22-2013 02:27 PM
صباحكم فل يا ناس الراكوبة .. شكرا يا سيد مبارك انت كمان صباح الخير يا داب صحيت ولا دا تلميع عشان الثورة قربت و عايز تعمل اعادة انتاج وحضور .. بس في المستقبل نحنا ما عايزين كيزان ما عايزين ناس المهدي ما عايزين ناس الميرغني يعني ارتاح عايزين وجوه جديدة ... يا بعشوم نعم مبارك الفاضل ضرب عوض الجاز بالمركوب في وشو امام الوزراء و بشه في القصر الجمهوري بس انت ما ذكرت السبب .. لانو مبارك لمن سئل عوض الجاز عن قروش البترول قال ليهو ( نحنا اشترينا بيها الزيك )... اقتباس من النص ( لتصبح الخرطوم بدون حديقة حيوان رغم ان السودان زاخر بالحيوانات المتنوعة ) عليك الله هو حيوانات اكتر من ناس بشه ديل ...
اهداء الي السيد مبارك الفاضل :
صحوت ضميرك جات لي بعد ما حبي و كياني اديتو غيرك .. بعد ايه تطراني


#772448 [مجدي عزالدين]
5.00/5 (2 صوت)

09-22-2013 01:57 PM
المدعو مبارك الفاضل اكبر سياسي فاشل في السودان اخر من يتكلم عن الفساد هذا الدجال ما لم يعلمة معظم الاخوه المعقبين علي هذا الهراء اعلاه ان الحرامي مبارك الفاضل سارق مال الشعب ما يمتلكه من اموال خارج البلاد في شكل شركات تجارية يمول السودان لمده عشره اعوام


#772430 [سيد إبراهيم محجوب]
5.00/5 (2 صوت)

09-22-2013 01:43 PM
إنت يا مبارك الغير فاضل .....!! كنت مساعداً لنفس البشير في يوم ما ..... وتسببت في إطالة حكم الكيزان لأنك قمت بهدم التجمع الوطني في القاهرة ورجعت مساعداً للبشكير بعدما تم شراؤك أيها التاجر الرخيص .... فاخرص وأصمت وأسكت وأخرس ..... فقد حكم عليك الشعب السوداني بالإعدام حياً وميتاً فلا مكان لك وسط الشرفاء ..... فأنت والصادق والميرغني وغيركم من الرخاص قد تسببتم في إطالة عمر النظام بل كنتم تحمونه كل آل للسقوط ...... فتباً لك ولأمثالك أيها المنافق ..


ردود على سيد إبراهيم محجوب
United States [امجد النور] 09-23-2013 06:04 AM
مرحبا بكل معارض للنظام حتى وان كان احد سدنته باب التوبة مفتوح وسيكون باب المحاكم مفتوحا" ايضا" على جميع المعارضين الاتحاد عسى ان نجد طريقة فعالة لاسقاط النظام ويجب ان نعامل الانقاذ بالمثل كما استخدموا كل الوسائل لحكمهم يجب اسقاطهم باى وسيلة يعنى لازم نقوى ضراعنا


#772413 [سحساحة وعدم راحة]
0.00/5 (0 صوت)

09-22-2013 01:30 PM
ياناس بالله بشة واعوانة ديل نازلين من وين ياخ بيتزتك دي شنو ماعجين وسلطة فقط نحن قبلكم والله بعلم الخروف للقعدة فبالله عليكم استحوا كذبكم اصبح زي علامة المسيح الدجال الامي والمتعلم يقرأها في وجوهكم


#772399 [Hassan]
5.00/5 (3 صوت)

09-22-2013 01:12 PM
يا أخوانا المساح هو بتاع مشروع سندس كان ساكن فى بيت إيجار فى الحلةالجديدة مساحة 200م وهو الأن يسكن فى قصر وحوض سباحة فى إركويت . من أين له هذا ، كل هذا مال الشعب أين المفر لقد دنى العذاب ، ما ذهب به مبارك كل حقيقة، هؤلاء قوم لا دين لهم.


#772386 [ابوالهول]
5.00/5 (3 صوت)

09-22-2013 01:01 PM
اعدكم في القناة الحرة القادمة بتوفير وانزال اعلانات عن الهوت دوج ..والبيتزا هت ..وكلو شي
ابدأوا التبرعات للقناة الحرة للمعارضة يرحمكم الله ...
***********
القناة الفضائية الحرة واجب الساعة...القناة الفضائية الحرة واجب الساعة...
القناة الفضائية الحرة واجب الساعة...القناة الفضائية الحرة واجب
القناة الفضائية الحرة واجب الساعة...القناة الفضائية الحرة
القناة الفضائية الحرة واجب الساعة...القناة
القناة الفضائية الحرة واجب الساعة...
القناة الفضائية الحرة واجب
القناة الفضائية الحرة
القناة الفضائية
القناة
القناة الفضائية
القناة الفضائية الحرة
القناة الفضائية الحرة واجب
القناة الفضائية الحرة واجب الساعة...
القناة الفضائية الحرة واجب الساعة...القناة .
القناة الفضائية الحرة واجب الساعة...القناة الفضائية
القناة الفضائية الحرة واجب الساعة...القناة الفضائية الحرة .
القناة الفضائية الحرة واجب الساعة...القناة الفضائية الحرة واجب
القناة الفضائية الحرة واجب الساعة...القناة الفضائية الحرة واجب الساعة...


#772368 [ود ام سنجك]
0.00/5 (0 صوت)

09-22-2013 12:45 PM
في ذمتكم يا ناس قبل الانقاذ فى ام بلسكات


#772367 [samisuh]
5.00/5 (3 صوت)

09-22-2013 12:45 PM
تنظفوا فى نفسكم أشان تجوا راجعين وتعدوها ده حقى وده حقك ونحن نضيع كما ضعنا فى السابق


#772345 [brins]
5.00/5 (1 صوت)

09-22-2013 12:27 PM
كما يقول المثل الي اختشوا ماتوا
النصر قريب للشعب السوداني وسوف تحاسبون انا فلتم من الدنيا في الاخره لكم عذاب عسير .
تحـــــياتي


#772334 [ود الدلنج]
5.00/5 (1 صوت)

09-22-2013 12:13 PM
ده كله كوم وقرار والي الخرطوم الخاص بعدم منح تراخيص للعمال إلا بالشهادة الجامعية كوم تاني !!! ولا شنو؟


#772313 [abu khaled]
5.00/5 (2 صوت)

09-22-2013 11:53 AM
المرة دي نحن اكشط امسح وبعد كدة ما عاوزين كل الوجوه الفاشلة القديمة وانتم ايه الاحزاب الذين قدتم السودان للكيزان بطبق من ذهب ولتذهبوا انتم جميعا للجحيم وعاوزين ثورة شباب بأفكار ودماء فماذا قدتم للسودان غير الجهل والتخلف والنهب وما ان لهذا الشعب ان يتعلم


#772307 [DR SAMI ALI]
3.00/5 (2 صوت)

09-22-2013 11:50 AM
هذا الرجل مبارك احبه في الله وانا لاتبع لاي حزب غير حزب السودان ماقبل 89 ولكن هولا لن يرحلوا الا ان يلتف امثالك باالامارات والسعودية ومصر لقلع شياطين الاخوان تجار الدين كما حدث بمصر...وللسودان رب يحيميه


#772266 [Essam.2013]
5.00/5 (4 صوت)

09-22-2013 11:13 AM
شكرا عمو بشــة....... ففي عهدك اكتشفنا الهوت دوغ وعرفنا نكهة وطعم البيتزا

اكتشفنا ان الباعة المتجولين هم خارجين عن القانون...... وعرفنا ان كل المتسولين ما هم الا أجانب

اكتشفنا ان من يخرج ليطالب سلميا بحقوقه تضربه شرطتك حتي الموت
واكتشفنا ايضا معني الغلاء والجوع والتشرد
شكرااا جزيلااا


#772241 [ود عدلان]
5.00/5 (2 صوت)

09-22-2013 10:54 AM
في الحقيقة بالاضافة للهوت دوق و البيتزا تعرف الشعب السوداني علي وجبة جديدة في عهد الانقاذ . ألا و هي لحس الكوع.
ماذا ينتظر هذا الشعب اكثر من ذلك
و ماذا لديه ليخسره طالما وصل الامر لحد الكرامة


ردود على ود عدلان
[ابوراس كفر] 09-22-2013 06:38 PM
واضيف ليك كمان وجبة ود حوش بانقا المفضلة الفول بالكمونية مع كاس كاسين كده من السفن اب او الشامبيون المخلوط بزبادى ماركة "كابو" و سجارة بنقو من شرفة القصر الجمهورى او بيتو الفى كافورى محل ما ابوه كان بحلب البقر , تخليهو ينسى الالام ويسرح وينسى ماضيهو التعيس :
انو ضرب امو عشان قنقر
انو سرق الفسفور لمن حرق جعباتو وخلاهو يكون عاقر بدنيا وفكريا للابد
انو قتل بنية فى الابيض وهو سكران ومسطول
وانو قتل ونهب فى الجنوب
وانو لسه بيقتل ويستبيح دم اهلنا فى دارفور
اما انا الاون انو تور حوش ود بانقا المخصى ده ان يذبح ؟
ويعملوا من كرشو هوت دوغ لناس نافع وعلى محمود والترابى وعلى عثمان الخ السفلة

European Union [مفصول تعسفي] 09-22-2013 02:18 PM
ود عدلان، دحين اخونا ود البطانة دا زعلان ماله ؟ قريت ردك ثلاث مرات وجبت فهامة الفاتح جبرا وبرضوا مافهمت هايج ماله ... يكون البطانة مافيها هوت دوغ.. ولا بيتزا ... غريب يا اخي

United States [ود البطانة] 09-22-2013 11:48 AM
لحس الكوع ليس المراد منة الشعب السوداني ولكن المراد منه احزابكم المتهالكة الهرمة التي نحرها السوس , والتي جوعت الشعب السوداني حين كان ابناء زعمائها يعيشون في ترف ورفاهية على حساب ابناء الفقراء والمساكين


#772198 [حسن الطاهر]
5.00/5 (1 صوت)

09-22-2013 10:25 AM
عفيت منك يا ود المهدي ياها دي رجالة جدك زاتها الطردت الانجليز مش زي ود عمك التعبان دا .


#772189 [صابر]
5.00/5 (1 صوت)

09-22-2013 10:20 AM
كدي انت يا ضل الدليب قول لينا طعم الهوت دوغ والبيتزا دي كيف ومكوناتهم من شنو؟
طيب أقول ليك إنت وديك العدة ووزير ماليتكم العصامي دا:
الهوت دوغ والبتزا أساسا عندما يأكلهما المقتدرون يأكلونها فقط للتغيير ولكن نسبة لكمية الدهون الحيوانية والدهون المشبعة التي تحتوي عليها هذه الوجبات السريعة فإن هؤلاء القادرين يبتعدون عن أكل الدهون لمدة طويلة حتى يحرقوا ما دخل في بطونهم من سموم. الهوت دوغ لو يعرف سيادة ديك العدة تركيبته لن يأكله والبيتزا كذلك بما فيهم من جبن موزريلا وصلصة وأملاح لا تلاءم صحة الذين في عمر ديك العدة والكيزان الذين انتفخت بطونهم و"تكعوجت" أرجلهم التي لم تعد قادرة على حمل هذه الكروش المليئة بالسموم وأكل السحت.
هذا الشعب العظيم لا يستحق أمثالكم فأنتم نبت شيطاني تنكرتم لتاريخنا ولحضارتنا ولواقعنا باسم دينكم الذي لا يشبه ديننا الحنيف. نحن نفتخر بمأكولاتنا وببيوت جالوصنا التي أوتنا وأوت ضيوفنا وأهلنا ومعارفنا. فتقاسمنا فيها النبقة وعشنا جميعا بدون تطاول أو تباغض حتى جاء عصركم المشئوم فحولتم بلادنا إلى ساحة حرب وفصلتم جزء عزيز من أرضنا وشعبنا بسبب عنصريتكم وأيدلوجيتكم التي ألبستموها لباس الدين الحنيف والدين بعيد عن ادعاءاتكم وهرطقتكم ولم تكتفوا بإشعال النيران في بلادنا وتشريد شعبنا فصرتم تشتمونا كل يوم، تسخرون من بيوت جالوصنا ومن عدم معرفتنا للهوت دوغ والبتزا.
بالمناسبة يا ديك العدة إنت بتعرف السجوق. السجوق السوداني بتركيبته العجيية وحشتوته التي أصبح ضعاف النفوس في عهد اللإنقاذ يضعون فيها أي شيء هذا هو هوت دوغ سوداني وكان راقي ونظيف قبل مجيكم يا كيزان الجهل النشط.
قاتلكم الله أينما ثقفتم ويومكم أسود وحينها ستخبروننا عن قصوركم قبل الإنقاذ وستعودون إلى جحوركم ولن تجدوا بيوتكم العشوائية التي أدخلتموها في المخططات السكنية وأصبحت ملكا لغيركم.


#772180 [**** (( أبو عمـــــــر )) ****]
5.00/5 (1 صوت)

09-22-2013 10:10 AM
لك التحية الاخ مبارك الفاضل ولكن الموضوع الذي تناولته وليس لشخصك لانك في يوماً ما كنت من زمرة الذين يتعالوا علينا بالهوت دوق والبيتزا .
المثل بقول فاقد الشي لا يعطيه فكيف يعطونا وهم تذوقوا طعم البيتزا والهوت دوق وكيف يعطوننا وهم نفضوا غبار الزمن الاغبر من حياتهم وتبديل حياتهم من الجالوص الي القصور ومن ركوب الدابة الي الهمر واللكزس والمارسيديس .
إن الله يمهل ولا يهمل . اذا كنتم انتم تضربون بقوة من اجل الحفاظ علي الهوت دوق والبيتزا فإن الله ضربته أقوي علي الظالمين والمجرمين .
حسبي الله ونعم الوكيل فيكم حسبي الله ونعم الوكيل فيكم حسبي الله ونعم الوكيل فيكم ....


ابو عمر ....


#772147 [أحمد]
4.00/5 (4 صوت)

09-22-2013 09:42 AM
اقتباس أول: (وكدت واجتهدت حتي بلغت ما وصلت اليه في عهد الامام عبدالرحمن المهدي).
اقتباس ثاني: (ولكن بئس ما امتنوا به من أطعمة علي الشعب السوداني، الهوت دوق ألالمانية او البيتزا الايطالية فلا اجد فيهم اي فخر لأهل السودان).
صحيح قال الاختشوا ماتو
الزول ده أيام كان وزير كانت السيارة تشيلوا من قدام الباب الداخلي للبيت وتنزولوا قدام باب المكتب يعني ما كان بيشوف الشمس نهائيا.


ردود على أحمد
United States [ما صح] 09-22-2013 03:33 PM
يا ايها المدعو أحمد وهذا الاسم برئ منك !!!
اسأل عوض الجاز وزيركم بتاع الطاقة ،قول ليه مبارك الفاضل لما كان في السلطة دقاك ليه في مكتبك ،وهذه قصة مشوورة لمن عوض الجاز قاعد يكووورك ،.
باختصار مبارك اشتكى للبشير عن عدم اطلاعه على نسبة تقسيم النفط يعني عوض الجاز مابفهمو الحاصل شنو !! فوجه التيس الاصلع بشبش عوض الجاز بان يقوم بتنوير مبارك عن النفط .
فقال له --%،دي للشركات المنتجة او المنفذة ،--%ندي ،.....،ال5% دي بنشتري بيها الزيكم ديل .
فما كان من مبارك الا وغضب واغلق باب مكتب الجاز (الله يحرقه بي جاز )بأحكام ،وقام بضربه مثل الكلب ،وبقى يصيح مثل النسوة .
عشان كدا قلبو حار واتمنى انه يلم فيك انت برضو عشان يلحقك جازك .

United States [بعشوم] 09-22-2013 01:21 PM
يعني عايزو يمشي كداري يا احمد ؟!
الزول كتب مقال موضوعي جدا وواقعي في رئيسك المجنون ده .. خليك موضوعي وناقش

United States [sasa] 09-22-2013 11:22 AM
ياالمدعو احمد انا اعوذ بالله لست بحزب امة ولست بمتسربل بالدين بل سودانى ليبرالى الى يوم الدين !!! لكن هذا المبارك الفاضل ان كان له سوء فعل اضر بالسودان فهو اهون واقل مما فعله هؤلاء الكلاب المسعورة الضالة المنافقة الكاذبة الكذوبة؟؟ مع علمى بان مبارك الفاضل لم يرتكب ما يجعله شخص مجرمومطلوب للعدالة دوليا.....أأمل الاتكون من الحاشية او التبع اوالدهماء او مايسمون بالامنجية زورا وبهتان وماهم الا ببصاصييين غثاء سيل


#772146 [خالد عثمان]
3.00/5 (2 صوت)

09-22-2013 09:42 AM
اظن بتاع الثياب النسائية الداخلية وكان تاجر شنطة بين السودان والسعودية اخونا الكوز صاحب الوان خوجلي........منو......

نحيك ياسيد مبارك


#772126 [جركان فاضى]
3.00/5 (2 صوت)

09-22-2013 09:20 AM
احصائية وزارة التربية والتعليم تقول ان نسبة الفاقد التربوى بلغ85%...فهذه النسبة من الطلاب لاتمتحن الشهادة السودانية...والسبب؟عجز اولياء الامور عن توفير وجبة الفطور لاطفالهم وطلابهم فى المدارس...تخيل ان اولياء الامور لايستطيعون توفير ابسط انواع الطعام مثل البيتزا والهوت دوق لافطار ابنائهم فى المدارس


#772114 [عوض محمد]
5.00/5 (1 صوت)

09-22-2013 09:14 AM
العيب من لا يتعظ من الشعوب الاخرى ... التى تحررت من حكوماتهم ... فيجب على حكومة بشير وزمرته سوف يأتيهم يوما اسود مثل ما انقلب الشعب على مايو وقلعتهم من اساسهم ... اذا كان اليوم لك فغدا سوف يكون لشعبك الذى قهرته وظلمته ..
واننى فى بلاد المهجر نفتخر باكلاتنا الشعبيه ومطعمنا، وأينما ذهبنا او اقمنا تصحبنا الكسرة والملاح والعصيدة والقراصة ولا عيب كان كنا فقراء او اغنياء ان نتذكر ماضينا وذى مابيقول المثل الما عندوا قديم ما عندوا جديد ...


#772094 [barracuda]
5.00/5 (1 صوت)

09-22-2013 09:00 AM
هوت دوغ وبيتزا ، يا للهول ، أإلى هذا القدر من الانحطاط وصلنا ، يأخي رجع للناس المديده والويكة والكسرة واطلع انت اكل هوت دوغ وهو مرفعين . بكرة حياكلكم كيت كات.


#772085 [علمكو]
5.00/5 (2 صوت)

09-22-2013 08:53 AM
حراميه بإمتياز..لا حول و لا قوة إلا بالله..يوما ما ستشرق الشمس و لو كره الكيزان


#772082 [jac]
0.00/5 (0 صوت)

09-22-2013 08:48 AM
بس البشير كان يذكر الجميل كامل وانو الانقاذ اكلت الناس الهوت دوق في الصيف والكولددوق في الصيف يعني كلب حار في الشتاء وكلب باردفي الصيف عشان يضمن سلامة المواطنين من النزلات في فصل الجليد.


#772049 [عوض الجاز]
5.00/5 (1 صوت)

09-22-2013 08:04 AM
مبارك الفاضل يهاجم عندما يقترب البشير للصادق و طبعآ فيها رش و اللازي منه شنو الجد ماهي الإنقاذ من قامت و شارك فيها و دخل القصر و سكتوه بالدولار كلكم حرامية البشير و الوزير وانت وللأسف معظم ساسة البلد حرامية مئة المئة انت ونافع كلكم عملة واحدة


ردود على عوض الجاز
United States [ما صح] 09-22-2013 03:37 PM
صحيح اخي بعشوم واحييك على الحقيقة دي قصة مشهورة ،ضربوا زي الكلب
انشاء الله كمان يلم في عوض الجاز التقليد.

[بعشوم] 09-22-2013 01:24 PM
شوف يا عوض الجاز ، مبارك الفاضل ده الشخص الوحيد الي ضرب عوض الجاز الانت فرحان بيهو ده بالمركوب في وشو في اجتماع الوزراء وقدام الرئيس كمان .. رايك شنو يا عوض الجاز ؟ظ


#772041 [شوقى خليل حتيله]
5.00/5 (1 صوت)

09-22-2013 07:50 AM
البلدوزر جاكم

التحيه للسيد مبارك الفاضل الذى أوفى وكفى هو التنكر ومحاولة طمس التاريخ الذى لايمكن طمسه

والذى يختزن فى الزاكره الجمعيه لشعبنا وهو أن هؤلاء الكيزان الأوغاد أتوا من بيئات فقيره

والفقر ليس عيبا ولكن العيب محاولة الغفز والتنكر لأحباب المصطفى الذى قال فيه أغلب أهل

الجنه الفقراء ولكن الحمد لله فقرائنا أعزاء أنفس وشرفاء لم تمتد اياديهم للمال العام

ولم يسفكوا دما مارسوا المهن التى يقوم علي أكتافها أقتصاد نادوس زراعة رعى صناعه

ولم يكونوا أبناء عاقيين لهذا التراب الذى ورثوه بدماء الأجداد وتضحيات الأباء

لم يسيئوا لشعبه قط بل كان الشعب محل فخرهم واعتزازهم وعمودهم الفقرى فى مجابهة الايام

المدلهمه لهم التحيه والوعد الصادق ان بلادهم سوف تعود حره ديمقراطيه رغم أنف هؤلاء

القتله المجرميين...


#772039 [صاقعة و هجايم ليل]
5.00/5 (3 صوت)

09-22-2013 07:48 AM
"من كان منكم يأكل ثلاث وجبات، فلماذا لايقتصر علي وجبتين، ومن كان يأكل وجبتين فعليه الاكتفاء بواحدة، لأن الأكل الكثير ضار بالصحة"

"انتو فاكرين بثينة زوجة نجار، أبدا فهي زوجة رئيس جمهورية، ولها أن تلبس ما تشاء، وتظهر كما تشاء، فهي سيدة السودان الأولي! "

ما أشبه الليلة بالبارحة


#772018 [بكرى]
5.00/5 (1 صوت)

09-22-2013 06:59 AM
هل الهوتدوق صناعة انقاذية


ردود على بكرى
[agab] 09-22-2013 01:06 PM
kan sena3a 3askarea lken bgy sena3a wedadeya?????????????????????


#772002 [الخمجان]
5.00/5 (2 صوت)

09-22-2013 06:27 AM
مبارك الفاضل لمس حقيقة مؤلمة وهى ان هؤلاء ابناء فقراء وقد ذكر هذا الكلام سابقا وهو صحيح مائة بالمائة ولا يقصد مبارك ان يسئ الى حالة الفقر بل المقصود ان هؤلاء حاقدون على تاريخ اباءهم الفقير وساخطون على قدر الله ولذلك كان الفقر عقدة لازمتهم طيلة حياتهم جعلتهم يلتهمون اموال الشعب وياكلون السحت ولا يبالون ولا يشبعون خوفا من ان يرجعهم المولى عز وجل الى حالتهم الاولى يريدون تامين انفسهم من قضاء الله ولكن نسو قوله تعالى ( سنستدرجهم من حيث لا يعلمون ) صدق الله العظيم


#771981 [د.حميد قنيب]
4.50/5 (4 صوت)

09-22-2013 05:01 AM
ممكن اصدق اى انسان الا انت يامبارك


ردود على د.حميد قنيب
[agab] 09-22-2013 01:07 PM
like


#771970 [هدهد]
5.00/5 (1 صوت)

09-22-2013 02:00 AM
ياود المهدي مافي زول بقدح في شجاعتك بس لى متين الانتظار؟
الشارع داير قائد مصادم يثق فيه ومنتظر ظهوركم قدامه .


#771954 [يوسف]
5.00/5 (9 صوت)

09-22-2013 12:56 AM
كان هناك منذ العام 1985م نسبة 90% من الشعب السوداني يعرف الهوت دوغ والباسطرمة والبيرقر والشيش كباب الذي تنتجه شركة لولي للمنتجات الغذائية ومسألة كون البشير لا يستطرد ذلك ولا يتذكر بالمرة توفر مثل هذه الأطعمة التيك أوي ، يبدو حينها كان معدم ويعيش حد الفقر مثل الكثيرين الذين استغربوا وتسألوا عن ماهية مصطلح الهوت دوغ الذي يتحدث هو عنه الأن ؟ فالناس في أطراف الحاج يوسف ووسط امبدة وعلي تخوم الحلة الجديدة منذ ليلة خطابه الذي قال فيه أنه رب نعمة أهل السودان وأنه منعم الهوت دوغ ! أنكسر المواطنين علي المطاعم ليطلعوا علي قوائم الأطعمة حتى لا يتفاجئوا باسم سندوتش مرة أخري فيعتقدوا أنه نوع من الاكتشاف الطبي أو الفتوحات العلمية العظيمة التي تستدعي ليتحدث عنها رجلاً في قامة السيد الرئيس


#771950 [ناصح]
5.00/5 (8 صوت)

09-22-2013 12:41 AM
صدقكم الريس وهو كذوب نعم اهل السودان ما عرفوا الهوت دوق الا في عهد الكيزان بجب ان لا ننكر ذلك كم يجب ان لا ننكر ان شعب السودان ما ذاق الذل والهوان الا غي عهد الكيزان وما عرف الفقر وسيئ الاسقام وانتشار السرطان الا فب عهد الكيزان وما عرف الظواهر التي تشمئز لها العقول والابدان من اغنصاب الاطفال وبيع المخدرات الا في عهد هؤلاء الرجرجة والدهماء و ما عرف شعب السودان دور رعاية الاطفال مجهولي الابوين و كبار السن الا فب عهد رعاة المشروهع الحضاري ويكفي ان الشعب اصبح اربع طبقات اناس شرفاء تم التضييق عليهم فهاجروا ليتركوا الوطن لهؤلا السفلة والطبقة الثانية هم سارقوا قوت الشعب ومن خاض معهم من المنتفعين و الثاثة هم المتسولون الشحاتون الذين غلبتهم الحيلة لبلجاوا للتسول و الرابعة طبقة الشرفاء الذين يعانون من ظلم الكيزان فصاروا يدعون عليهم ليل نهار ان يسيم الله الكيزان اياما مثل ايام القذافي وما شاكله من الطواغيت


#771912 [ضل الدليب]
5.00/5 (5 صوت)

09-21-2013 11:17 PM
اصلا انتو ياناس الاحزاب الطايفية والجهوية سبب كل مشاكل السودان اسع جاين تتكلمو وبعد ما لبنت ما بنديها الطير اعرفو انو انتو ماعندكم دور ولامكان في المرحلة القادمة ، وبعدين شنو حكاية انو بلغت اسرة المهدي في عهد عبدالرحمن الكان عميل للانجليز وظل ياخد مصروفو الشهري من الحاكم العام ولا ننسى انه وصف ثورة اللواء الابيض وثورة 24 بثورة العبيد وابناء الاماء وعندما وطلب منه اسيادو الانجلير ان يقنع العملاء الاخرين اعداء الوطن والدين امثال الميرغني واعيان الشكرية و......ووقعو على وثيقة سلمت للانجليز اجمعو فيها ان هولاء ابناء العبيد والاماء ولايحق لهم الثورة وان ما فعلوه جرم يستحق التوبة والاستغفار .جاي بعد كلو تقول جدك العميل عمل الثروة بي جهدو كلكم حرامية واولاد كلب


ردود على ضل الدليب
[عماد الغبشاوي] 09-22-2013 03:09 PM
يارجل اتقي الله ولاتسئ الناس في شخصهم يمكنك انتقاد سياستهم ولكن كبيرة اولاد كلب

[agab] 09-22-2013 01:18 PM
3afeeeeeet mnk da kalaaaam saaaaaaaah selsm alhotdog da enta ma lmeet fyho wal shno ya syadatak wahomto alnas balgahl sedy sedy sedy (0al albeet). mabeet alharasa.

United States [امجد النور] 09-22-2013 09:09 AM
الاختلاف فى الراى لا يفسد للود قضية بس كدى حسع انتا مع معارضة عفن وقذارة الكيذان. دى الخطوة المهمة حاليا وممكن نحل اختلافاتنا بعد اجتثاث هذا السرطان اما اذا كنت جدادة الكترونية فالتشكيك فى المعارضة مابحلك فحكومة الكيذان تعرت تماما" وهى تهوى وتقع فى شرور اعمالها

United States [سالم احمد] 09-22-2013 01:38 AM
التاريخ ما بقروهو في الوان والإنتباهه ولا في ضُل الضُحى ، بل في مكتبات الجامعات الوطنية ،
.. تاريخ الوطن ونضالات الوطنيين لا يأتوا به من كتابات سلاطين و عسكر الامبراطورية .
التاريخ الحقيقي لهذا الوطن كتبه بتجرد كتّاب وطنيون امثال ابوسليم وغيره ..


#771894 [ودالباشا]
5.00/5 (4 صوت)

09-21-2013 10:34 PM
ماقصرت قعدتهم فى مكانهم وذكرتهم اصولهم بس يا ود الفاضل الكتابه دى خليها للصحفيين الشرفاء امثال ود عووضه وجبرا وبكرى الصائغ وشبونه وهم كثر انت بس وبما انك راجل خبرته السياسه ودهاليزها مكانك الصحيح اذا فعلا موجوع للوطن والمواطن ان تقود الشارع وتنظم وتنسق حتى يشتعل الشارع بالذات هذه الايام حيث الهيب والغليان ولن ينفجر الا بالقيادة التى تدرك ازرار الاشتعال وهذه ما ينقص الشارع


#771890 [المتجهجه بسبب الانفصال]
4.97/5 (8 صوت)

09-21-2013 10:25 PM
لكأن سيدى علي بن أبي طالب قصد هؤلاء المتاعيس عندما فسر الموضوع نفسياً وقال:
((اطلبوا الخير من بطون شبعت ثم جاعت فان الخير فيها باق ولا تطلبوا الخير من بطون جاعت ثم شبعت فان الشح فيها باق،،)) إن هذا التوصيف ينطبق على مسئولي الانقاذ تطابق شن وطبقة،،،
ولكن دعونا نتعمق في هذه الحالة الرائبة قليلاً بعد الحمدلله والصلاه والسلام على اشرف المرسلين سيدنا محمد واله الطيبين وأصحابه الكرام ،،

ما عبر عنه سيدنا علي هنا بان اطلبوا الخير من بطون شبعت ثم جاعت فان الخير فيها باق عنى به حسب إسقاطه على الحالة الانقاذية يلي :
انه عندما يكون الانسان في حاله اكتفاء وشبع تظهر من صفاته الخيره ما تفيض عليه وعلى سلوكه وتصرفاته وتكون جزء متجزء من طبعه المجبول عليه بالتنشئة ذات العين الملانة .. وهذا الشبع يقصد به حالة الاكتفاء والزهد مما لدي الاخرين وليس بالضروره ان يكون المقصد هنا انه غني بالمال ولكن المقصود هو الاكتفاء والقناعه ..والتعفف ..فتكون نفسه عزيزه ولديه حالة من الشعور انه لا يدني نفسه الى التكالب على ما لدي الاخرين وعطاءه يكون بمقدار ما في نفسه من قدر ..لانه انسان معطاء ... وبالدراجي السوداني (( عينو ملانة)) ولكن الانسان الذي عاش في حالة من الجوع.. ويقصد بالجوع هنا حالة التطلع لما لدى الاخرين .. وليس كل جائع هنا يقصد به الفقير .. ولكن ما لدى البعض من حالة جوع ورغبه في الاخذ مما لدي الاخرين حتى لو كان لديهم ما لديهم من الاشياء سواء المادية او المعنويه .. فانه يستكثر اعطاء القليل .. لانه لم يعتد على العطاء ..
هذا هو التفسير النفسي لسلوك الانقاذيين وهذا هو التحليل الوحيد الذي يرتقي لحالتهم الشائنة المشينة،، بالتالي لا تستغرب يا عمنا الحاج ود عجبنا اللي الضيوف ديوانو فاتح قبل زمن حظر التجول من إمتنان الانقاذيين على الشعب السوداني بظهور الهوت دوغ والبيتزا متناسين زيادة الاصابة بالدرن في عهدهم حيث حل السودان بعد أفغانستان وقد كان خاليا منه قبل عهد الهوت دوغ والبتزا إلأ بشكل محدود ومسيطر عليه كما في كل الدول الراقية،،
إن إمتنان البشير ووزير المالية بدخول الهوت دوغ والبيتزا وهي أكلتان تتوفر مكوناتهما في الاطعمة السودانية فيه اشارة ومدلول نفسي لمرحلة الطفولة والحرمان القاسي التي تعشعش في العقل الباطني أخراجها في لحظة تشكل العنف اللفظي تجاه الغير وإسقاط حالة سابقة عليهم ،،، وقد قال النبي العظيم (( خياركم في الجاهلية خياركم في الاسلام)) وفعلاً الذين كانوا خيرين في الجاهلية كانوا خيارا في الاسلام،،، وقيدما قيل كل يعمل بأصله لذلك لا تنتابكم الهواجس من أقوال الانقاذيين فهم يعبرون عن حالات قديمة فلابد لحليمة أن تعود لعاداتها القديمة ،،،،


ردود على المتجهجه بسبب الانفصال
United States [Fato] 09-22-2013 09:16 AM
أخى / المتجهجة بسبب الأنفصال كلام سيدنا/ على بن أبى طالب له مثل سودانى شبيه وهو(الما فى بيت أبوك بخلعك).وهذا ينطبق فعلا عليهم.


#771848 [كارورى]
4.00/5 (3 صوت)

09-21-2013 09:16 PM
jsgl dh hf

تسلم لوطنك وشعبك يا ابو يوسف


#771846 [متسكع]
5.00/5 (1 صوت)

09-21-2013 09:14 PM
البلدوزر جاكم

الباع حديقة الحيوانات هو على عثمان طه تربي فيها
لكون ابوه الرجل الشريف العفيف كان يعمل بهاحارس

ارجو من السادة المتابعين الموضوع ان يعرفونا عن


1/ تاجر الثياب
2/وضابط المساحة

من هم بالاسم وبكل شفافية


#771843 [حسان]
0.00/5 (0 صوت)

09-21-2013 09:13 PM
انهم ابن المهدي يعيشون صراعا تتحدث عنه عقولهم الباطنة فيقصد الريس اهل وزاراته الغبش و يقصد النائب الاول اهل الانقاذ لان من سواهم اقصي الاخر و هذا الصراع سيتحول بقدرة القادر ال حروب تنشر غسيلهم القذر


#771841 [صادق الصادق]
4.25/5 (3 صوت)

09-21-2013 09:12 PM
انا استاذ جامعي احمل درجه الدكتوراه قبل عقد من الزمان وساكن في الخرطوم ولا اعرف حتي ماهو الهوت دوق..ولم اراه منذ ان ولدت ..ولم اسمع بهذا الشي الا من خلال هذا المقال !!!اقسم بالله العظيم انا صادق فيما اقول!!!


ردود على صادق الصادق
United States [بعشوم] 09-22-2013 01:26 PM
صادق يا الصادق ..

United States [**** (( أبو عمـــــــر )) ****] 09-22-2013 10:20 AM
لك التحية دكتور الصادق
وليس من العيب ان تعرف الهوت دوق ولو عرفته لما اكلته لانه شي لا نفتخر به ولا يشبه بيئتنا
الهوت دوق عبارة عن لحم مفروم يحشي داخل المصران مثله مثل السجوك بل السجوك افضل منه بملايين المرات لان الهوت دوق يحشي بالاجزاء التي نرميها نحن السودانيين مثل الجلافيط والشحم يعني الحاجة الغير مرغوبة في الدجاج او اللحم ..
للعلم ان الهوت دوق هو وجبة الفقراء والمساكين في الدول الاخري ..

United States [امجد النور] 09-22-2013 09:47 AM
يا استاذ نحن فى السودان من احسن الشعوب التى تجيد التعامل مع اللحوم الحمراء اماالهوت دوق لم يجد تذوقا" سودانيا" لذا لم ينتشر بصورة واسعة وقد وجد مكانه فى السوددان اخيرا" نسبة لعوامل اقتصادية اهمها ارتفاع اسعار اللحوم مما يجعل الكثرين يبحثون عن اشياء مشابهة وهو يصنع من نسبة من اللحم اضافة لمواد اخرى ويعد من الماكولات ذات التأثير السلبي على الصحة

United States [جركان فاضى] 09-22-2013 09:32 AM
يادكتور متعك الله بالصحة والعافية والظاهر عليك بتنوم هانئ البال...فاذا اردت ان تتثقف غذائيا صاحب الكيزان...عندها سوف تتعرف مش على الهوت دوق والبيتزا بل على المطعم الايطالى والمطعم الفرنسى والمطعم الصينى والمطعم العربى والشرقى والمطعم الهندى وبقية مطاعم الدنيا...وكلها متوفرة فى الخرطوم...فاذا عرفت هذه المطاعم فسوف تنفتح عيونك بس بتعمى بصيرتك

United States [محمد نور] 09-22-2013 08:19 AM
احسن ليك يااستاذ ماتعرفو من الاساس اضرب قراصه وعصيده وملاح روب وتقليه زائدا كول او أمبق بق اللى هى ملاح الباميه المفروكه, ملاح روب تقيل مضافا اليه نكهه النال او ام شعيفه والله افضل 100 مره بالنسبه من هذه الهوت ودقHOT DOG?

[هدهد] 09-22-2013 06:13 AM
يا استاذ أنا مغترب لأكثر من عشرين عاما ولم اسمع به وفى الاجازات بالسودان اكلت فى افخر مطاعمها بالسوق العربى وامدرمان ولم اسمع به .... هى باين عليها وجبة كلاب يبيعونها فى الرياض وكافورى والرئيس المعتوه دا مفتكرها حاجة عظيمة ومفخرة للشعب السودانى عرفها فى عهده الاسود .

[كاك] 09-22-2013 02:38 AM
اين تحصلت على الدكتوراه قبل عقد من الزمان اكيد في دول الغرب كيف لم تسمع بالهت دوق ام اذا تحصلت علي الدكتوراه في عهد الانقاذ كيف لم تسمع والانقاذ جلب الهت دق للسودان بلاش كضب وصوم ثلاثة ايام علي الحلف

[ahmed] 09-22-2013 02:33 AM
يا الصادق الصادق إليك هذه النكتة السودانية التي إنتشرت في السبعينات من القرن الماضي .يدعي إن سوداني ذهب الي أمريكا وجاع جداً ولم يجد امامه سوي محلات الهوت دوغ وترجمها حرفياً كلب سخن وبما إن الجوع كافر فلقد قرر أن يأكل الكلب رغم قرفه وطلب واحد هوت دوغ وعندما فتح السندوتش قال ده حظ شنو ؟ من الكلب كله ما يقع لي الا ده ؟ يا أخي نحن في الحلة بنقول لقطعة العظم المغلفة باللحم . كلب. معقول ما سمعت دي كمان .


#771836 [sami]
5.00/5 (4 صوت)

09-21-2013 08:58 PM
هاهاهاها مقال روعة
بتاع حديقة الحيوان وعارفنو
وبتاع المساحة عارفنو
ولكن بتاع التياب ده منو ؟هاهاهاهاهاها
الاختشو ماتو


ردود على sami
United States [ابونضارة] 09-22-2013 01:46 AM
طيب عرفنا صلاح تياب .. يا اوكامبو سراق الإنقاذ ده منو ؟؟ ما كلهم حرامية .
بتاع المساحه ياهو الليمبي ولاّ واحد تاني ؟؟ الليمبي ده ما قالوا مهندس (بصريات) تخصّص عمى ليلي ؟؟

European Union [إبن السودان البار ***] 09-22-2013 12:42 AM
لماذا التستر ؟؟؟ نورنا ونور شباب الثورة حتي يعرف لصوص السودان منو ؟؟؟ وإذا أردت أن تعرف الباع قطن السودان وإستلم رشوة مهولة وبقي وجيه وكون حزب ( لمة) خاص به بعد ما لقي فرصة في حكومة الأسد النتر وأكل الهوت دوق منو ؟؟؟ ياهو الفي الصورة قدامك ( مبارك الفاضل الموظف سابقاً بدون أعباء في مصنع نسيج خليل عثمان بمرتب متواضع ؟؟؟

United States [moy ako] 09-22-2013 12:33 AM
لا افتكر التياب قاصد بيها جمال!

[أوكامبو] 09-21-2013 10:59 PM
بتاع التياب دا صلاح كرار الشهير بصلاح دولار و الذى بعد ان لفظه نظام الإنقاذ قام بتأسيس شركة تعمل فى مجال الحفريات قوامها عدد من الحفارات التى يصل ثمن الواحدة منها الى بضعة مئات من الملايين مستفيدا من الأموال التى نهبها بمعية سراق الإنقاذ.


#771824 [مغترب]
4.50/5 (4 صوت)

09-21-2013 08:42 PM
سلمت يداك يا ابن المهدي هؤلاء لعنة الله عليهم


#771802 [محمد كلمون]
5.00/5 (3 صوت)

09-21-2013 08:06 PM
انا ااقترح ان نقوم بعمل نسمية ضد الغلاء بداية تغيير حقيقى


#771801 [بعشوم]
3.00/5 (2 صوت)

09-21-2013 08:06 PM
يديك العافية يا طوربيد


#771799 [قصي]
5.00/5 (6 صوت)

09-21-2013 08:05 PM
ربما هذا ما يفسر إصراره للذهاب الي نيويورك-ليتذوق الهوت دوق الأمريكي



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


صفحة 1 من 212>
مساحة اعلانية
تقييم
5.97/10 (10 صوت)




الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة