الأخبار
أخبار إقليمية
بالفاء ... فساد قصيدة لمحجوب شريف
بالفاء ... فساد قصيدة لمحجوب شريف


09-27-2013 09:52 AM


المهندس (س)غرير

يادابو خريج والفراريج

قد تحاول أن تطير

أما المقاول (صاد) خبير

بالفاء فساد قادر تماماً

يلتهم كل المواد

أسمنت فات فيهو الفوات

والسيخ مِعتت

وبوهيه ممكن تبقى جير

فلا لعل ولا عسى

لاعسر هضم ولا ضمير

ناول وبس ناول كتير

إن الحصى لمن عصى

هذا الكلام سمعوه

من خشم المدير

كل الظروف بتهون

تماماً ما عداك

ياأيها الظرف الكبير

كتف العماره وقد هوى

مسئول إذن موسى الغفير !!

دُق الطبول

هلل وكبر وانبسط دُق الطبول

عين الرضا ابتسمت وقد بصمت

علي ختم القبول

تقرير يطول

ما السيل براهو رمى البيوت

1-عدم التزام البنا بالطين الصحيح !

2-حك الغنم للحيطه

كم حث الزباله على السقوط

3-أما الكلاب الواحد يرفع رجلو

جنب الساس يبول

غير الحيارى والسكارى

ثم قُطاع الجُمار

4-هذي المباني تعاني

من حمى الذبول

ولكافة الأسباب

مصيرها الى زوال

5-في آخر الأمر ..... السيول

ويواصل التقرير يقول:-

نِعم الكباري والمصاري والسدود

لاداعي لي لطم الخدود

من أين عشعش هؤلاء

إلى قراهم يرجِعون

وبلا وعود

عدد الحصى والرمل

في الشايفنو هم

هم قله في الدم والنقود

وانتهى التقرير

كمان نحن بنقول

من أين عسعس هؤلاء

سُب في الولاء قبل الكفاءه

مع الفساد الفج

ومشنقة الحلول




تعليقات 7 | إهداء 0 | زيارات 7749

التعليقات
#780261 [سرور]
0.00/5 (0 صوت)

09-27-2013 07:17 PM
حنبنيهو
البنحلم بيهو يوماتى
وطن شامخ وطن عاتى
وطن خيّر ديمقراطى
وطن مالك زمام أمرو
ومتوهج لهب جمرو
وطن غالى
نجومو تلالى فى العالى
إراده سياده حريّه
مكان الفرد تتقدم..
قيادتنا الجماعيّه
مكان السجنِ مستشفى
مكان المنفى كليّه
مكان الأسري ورديّه
مكان الحسره أغنيّه
مكان الطلقه عصفوره
تحلق حول نافوره
تمازج شُفّع الروضه
حنبنيهو
البنحلم بيهو يوماتى
وطن للسلم أجنحتو
ضدّ الحرب أسلحتو
عدد مافوق ما تحتو
مدد للأرضو محتله
سند للإيدو ملويّه
حنبنيهو..
البنحلم بيهو يوماتى
وطن حدّادى مدّادى
ما بنبنيهو فرّادى
ولا بالضجه فى الرادى
ولا الخطب الحماسيّه
وطن بالفيهو نتساوى
نحلم نقرا نتداوى
مساكن كهربا ومويه
تحتنا الظلمه تتهاوى
نختّ الفجرِ طاقيّه
وتطلع شمس مقهوره
بخط الشعب ممهوره
تخلي الدنيا مبهوره
إراده وحده شعبيّه


#779634 [انصاري]
0.00/5 (0 صوت)

09-27-2013 11:26 AM
التحية لك أستاذنا.. (شاعر الشعب) محجوب شريف.. وأنت تنثر أشعارك هدى للصامدين..كالعهد بك رغم الظروف الصحية والمرض اللعين.. لكنك دائما رصين.. حزنك نبيل.. فرحك كبير..صبرك جميل..تحارب بالكلمة (المهندة) البتارة.. بلا هوادة ضد الظلم والإستبداد بأحرف تستوطن شغاف القلب..و بلغتك الشعبية اليومية..ذات الذائغة الفنية البديعة دون تكلف أو تذويق..تستنطق الوجدان والضمير الحي..في الوقت الصعب والعصيب.. عبر رحلتك الطويلة الحافلة بالعطاء والبشارة والمحبة..لك الخلود في وجداننا أسماً.. وشعراً.. و حلماً وتمني...ولك العافية التشد الحيل.


#779608 [أبو تمام]
5.00/5 (1 صوت)

09-27-2013 11:01 AM
كنت قد تنبأت بأن رفع الأسعار سيؤدي للانتفاضة المباركة في قصيدتي التي نشرت لأول مرة بالراكوبة " ارفع الدعم .. ارفع ارفع .. انت حاكمنا المدلع ..
ارفع ارفع .. يمكن البتسوي ينفع ..
أو يحرك فينا ذرة من المشاعر أو يخلي الشعب يطلع .. "
وقد تداولتها مواقع التواصل على نطاق واسع
وهأنذا أقتطف لكم من قصيدة أخرى نشرتها أيضا بالراكوبة في وقت سابق .. شجعوا الثورة واشعلوها حيثما كنتم فهذه هي الفرصة الأخيرة والنظام يلفظ أنفاسه "

يا ..... للأسف
حال البلد مسكين وقف
من ربع قرن ...
أصبحنا في وطن القرف ..
" قرفٌ قرف ْ .."
من ربع قرن .. كوشتو ما خليتو شي
دوران و لف ..
بلّيع و سَفْ
(وطني يسير بلا هدف )
يا وطني أُف .. يا وطني أُف
يا وطني قول
" للحاقد المخبولِ .... تُفْ
للفاقد المسئولِ .. تُفْ
وعلى المعاكم والوراكم
ألفِ تُفْ
وعلى اللي جابكم ..
في حضوركم وفي غيابكم
ألفِ تُفْ
وعلى اللي جاب الجاب ولادكم
ألفِ تُفْ "
وعشان نعيش نختف .. ختِفْ
يوماتي نحنا حياتنا كلها كَعْ وكُفْ
شريان شمال ينزف نزِف
ووريد جنوب ينزف نزِف
من ربع قرن ..
يا وطني دمك ما وقف
من ربع قرن
زادت على البلد المحن
والحال وقف
من ربع قرن .. ما شفنا صاح ..
ما سمعنا من غير النواح
دقونا دق العيش .. كمان سلبوا المراح
كوركنا لامن ديكنا صاح
وصبرنا صبر أيوب على نار البلا
قالولنا لا ..
دا " الإبتلا "
خنقونا لامن صوتنا راح
جلدونا لامن قلنا آآآآآآح
شوفو الشعوب عملت شنو !
ياخوانّا بس راجين منو ؟
ياخوانّا مالكُم ما نُصاح ؟
دا بلد شنو ؟
ياخوانّا حيّ على الكفاح
ياخوانّا هيّا على السلاح
ياخوانّا سيبو الانبطاح
كتفا سلاح !!
أرضا عبارات الخضوع والانبطاح
أرضا زمان الارتياح
كتفا سلاح .. كتفاً كتِف ..
عصفا سلاح
خلوه شرب الشاي
ورقدة ضل وونسة وانشراح ..
ردوا الشرف ..
كتفا سلاح ..كتفا كتِفْ
واحد .. ألِف
زحفا نعيد وطن السلام المختطف
زحفا نحطم ... كل أصنام الخزف
زحفا على قصر الترف
زحفا إلى فلل الحدايق والنمارق والنجف
زحفا إلى كل الدهاليز والغرف
زحفا إلى خِزَن الهدايا والتحف
زحفا إلى وكر اللصوص ...
شيخ التيوس المحترف
زحفا على بؤر التفاهة في الصحف
زحفا نطهّر "من طرف" ..
زحفا نطهّر "من طرف" ..
زحفا ولا قلبا يحنْ أبدا
ولا عينا ترف ..
باسم الوطن
باسم الشرفْ
خلونا بس ننفك من هذا العفن
كتفا سلاح ..كتفا كتِفْ ..
خلو العساكر وترتجف
تعرق تجف
إن شا الله بعدها نتفقْ أو نختلف ..
بس ما مهم ..
بكرة بتشوفو ونكتشف..
من ربع قرن يا للأسف
كنا بندوعل في عجل
مصنوع من الزيف والخزف !!!!؟؟؟؟؟؟
ختو النقاط فوق الحرف
ختو النقاط فوق الحرف ...


#779537 [ابوزول]
5.00/5 (1 صوت)

09-27-2013 10:02 AM
حاشية
المقصود بالأسمنت والجير. ....اللص الكبير علي كرتي الذي يتحدث الان في الامم المتحدة باسم السودان .....أليس هذا زمن المهازل


#779536 [محمد]
0.00/5 (0 صوت)

09-27-2013 10:00 AM
أوعك تخاف
قصيدة جديدة
للأستاذ محجوب شريف


يا من تموت بالجوع وقدامك ضفاف
والأرضِ باطنها ظلَّ مطمورة سواك
عطشان وقد نزلت عليك
أحزان مطيره
مُزَن سماك
الدنيا أوسع من تضيق
قوم أصحى فِك الريق هتاف
إن الذين أحبوا روحهم ضيَّعوك
وبيَّعوك أعز ما ملكت يداك
أوعَك تخاف
الخوف محطه محطه ما سكَّة وصولك للطريق
إن الأيادي الحُرَّه ما بْتشعِل حريق
تبْ ما بْتقيف تستنَّى قدامها بْتشوف
يَحْتِل غريق تلو الغريق
ما تنسى إنك كنت صاحب راي وبيت
أهلا حباب لو دقَّ باب
عندك مخدَّه وعنقريب هبَّابي،
لمَّه وقهقهات
تصحى وتنوم وتقوم معطَّر بالنشاط
تنعس وقع في لحظه من إيدك كتاب
وقلم كما برق السحاب
يتهادى ما بين السطور
كان سرجو كرسي الخيزران
عند المغيرب رادي
بغ بِنْ المزاج
يدخل من النفَّاج عليك عثمان حسين
يا عُشرة الأيام تمام
أهو دا الكلام
يا سلوى جك المويه
أعملوا لينا شاي
الأسره ممتده وحِداك جيران لطاف بي جاي وجاي
جار المسيحي سكن إمام
إلفه ومودَّه وقرقراب
والناس قُراب
ناس من نيالا وآخرين
من وين ووين
هسَّع جهنم في الحقيقه معسكرات
من أين جاءكَ هؤلاء
ما جونا من قيف السراب
أو جونا من خلف الحدود
بل جونا من جوّانا هم حُترب
هنالك باقي في حلق الكلام
تلك البذور الراكده في قاع الجُراب
ما اتنفَّست فلق الصباح
نفس الأزقة الفيها
سكَّتنا الكلاب..
ولكم وكم غلب الغُنا السمح النباح
كم نحن أحياناً شربنا المويه
من كاس الجراح
من بين أصابعنا المخدَّره بالسُكات
من بين مسامات العيوب..
يا الله مين جلَد البنات
جلداً موثق في القلوب
وسكتنا ساي
جُوّانا منْ فصل الجنوب
هم عَسَّموك وقسَّموك خلُّوك مشتت في الدروب
حدَّادي مدَّادي الوطن قد كان
حليل الأغنيات
يا أيها الأسف الشديد
أكتب نشيد من تاني أجمل أمنيات
لا للشهيد تلو الشهيد
إلا إذا خطأً وصدفه تِحِتْ هدير التنميه
موت الله ساي حتماً أكيد
أو جانا من خلف الحدود
وطن الجدود وطن الجدود
نفديك بالأرواح نذود
من بعد ذلك يا جميل
أحلم بما لك من حقوق
كشك الجرايد في الصباح،
كيس الفواكه والملابس والكراريس والحليب
نكهة خبيز والدنيا عيد إنسان عزيز
وطن سعيد والشعبِ حر
وطن التعدد والتنوع والتقدم والسلام
حيث الفضا الواسع حمام
والموجه خلف الموجه والسكه الحديد
حرية التعبير عبير
تفتح شهيتك للكلام
النهر ما بِستأذن الصخره المرور
جهراً بِمُرْ نحو المصب
أمواجو تلهث من بعيد
أكتب نشيد راسخ جديد
الشمسِ تشهد وبرضو أستار الظلام



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية
تقييم
0.00/10 (0 صوت)




الرئيسة |المقالات |الأخبار |الصور |الفيديو |الصوتيات |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة